تابعونا

الأوكتاجون .. إيه ده كله إيه ده كله؟

فكرة إنك تقسم مقر قيادة القوات المسلحة بتاعتك لمباني مستقلة بحيث كل مبني يبقي تبع قيادة معينة دي فكرة كويسة خصوصاً في حالة إن المبني كله إتعرض لهجوم .. التفسير اللي انا شايفه إن كل فرع من أفرع القوات المسلحة حيبقي ليها مبنيين.

17 سبتمبر، 2019 11.2 ألف

وسط كل الكلام عن القصور الرئاسية و فيديوهات (محمد علي) و ردود الرئيس (عبدالفتاح السيسي) عليه اللي خلت Social Media هايجة هيجان طفل ضرب طبق مولتين كيك بالأيس كريم قبل ما ينام فالنهاردة انا عايز أتكلم بسرعة أوي عن مشروع من ضمن المشاريع اللي بتتعمل في العاصمة الإدارية الجديدة و اللي الحقيقة مش واخد حقه من الإهتمام و المشروع ده هو مجمع وزارة الدفاع الجديد أو الأوكتاجون Octagon زي ما المؤسسة العسكرية بتحب تسميه .. الحقيقة إني كنت الأول متخيل إن المبني ده إتسمي أوكتاجون عشان تصميمه الهندسي مخليه واخد شكل ثماني الأضلاع .. اللي هو النسخة المصري تقليد مقر وزارة الدفاع الأميريكية اللي الأمريكان سموه بينتاجون Pentagon عشان المبني تصميمه إنه واخد شكل خماسي الأضلاع .. بس اللي انا إكتشفته إن مش بس مقر وزارة الدفاع المصرية واخد شكل ثماني الأضلاع .. لا .. ده المبني عبارة عن 8 مباني كل مبني فيهم واخد شكل ثماني الأضلاع.

انت لو أخدت بالك من صورة موقع المبني حتلاقي إن فيه 8 مباني علي دائرة و جوه الدايرة دي فيه مبنيين كمان .. مش كده و بس .. ده فيه مكان لمبنيين كمان يتبنوا جوه .. يعني بتتكلم عن موقع إجمالي عدد المباني فيه ممكن يوصل 10 .. انا لسه مخلصتش .. من صور الموقع برده واضح إن فيه مباني إضافية حتتعمل بره دايرة ال8 مباني الكبار .. بعد كل ده انا لا يحضر في ذهني إلا جملة الفنان (نجيب الريحاني) الله يرحمه في فيلم لعبة الست لما بيقول بصوته المميز إيه ده كله إيه ده كله؟

مقر وزارة الدفاع الأميريكية اللي إتسمي بينتاجون Pentagon عشان زي ما انت شايف المبني علي شكل خماسي الأضلاع.
صورة للموقع العام لمشروع الأوكتاجون .. زي ما انت شايف هو عبارة عن دايرة خارجية من 8 مباني و دايرة خارجية إتبني فيها مبنيين ولسه فيه مكان لمبنيي كمان.
صورة مقربة للأساسات بتاعة المباني.

لإن فعلياً محدش من المؤسسة العسكرية حيطلع يحكيلنا قصة المبني إيه أو إتبني ليه بالشكل ده فالحقيقة إحنا مقدمناش غير إننا نحاول نهبد سوا علي أمل إن حد فينا يقول الهبدة الصح .. انا شخصياً شايف إن فيه هبداية منطقية جداً و هي إن أي قوات مسلحة في الدنيا بتتكون من أفرع رئيسية .. في حالة القوات المسلحة المصرية فإحنا عندنا 4 أفرع رئيسية للقوات المسلحة اللي هم القوات البرية و القوات البحرية و القوات الجوية و الدفاع الجوي .. لو انت كنت ناوي تعمل لكل واحدة من الأفرع الرئيسية دي مبني فده معناه إنك كنت محتاج 4 مباني .. انت ليه باني 8؟ .. فكرة إنك تقسم مقر قيادة القوات المسلحة بتاعك لمباني مستقلة بحيث كل مبني يبقي تبع قيادة معينة دي فكرة كويسة خصوصاً في حالة إن المبني كله إتعرض لهجوم .. التفسير اللي انا شايفه إن كل فرع من أفرع القوات المسلحة حيبقي ليها مبنيين .. واحد Duty و واحد Standby زي ما إحنا كمهندسين بنحب نستخدم طلمبتين في الموقع بحيث لو واحدة طلعت بره الخدمة التانية تشتغل.

فكرة إنك تقسم مقر وزارة الدفاع بتاعك لحتت عاملها الأمريكان في البينتاجون علي فكرة لإن المبني متقسم 3 حتت كل حتة كافية أوي إنها تقوم بدور المبني كله عشان زي ما قلتلك في حالة تعرض المبني لهجوم الدنيا متقفش .. بس برده .. وزارة الدفاع الأميريكية عباره عن مبني واحد بس إتقسم 3 أجزاء كل جزء فيهم كافي إنه يقوم و يشغل الوزارة كلها زي الفل.

زي ما انت شايف القاهرة في الحتة الخضرا اللي علي الشمال و هناك خالص علي اليمين مكان السهم الأحمر ده يبقي مقر وزارة الدفاع الجديد.
صورة متكبرة لواحد من المباني اللي بتكون مقر وزارة الدفاع الجديد.

يمكن أكتر حاجة بتيجي في دماغ أي مهندس لما بيشوف صور موقع زي موقع الأوكتاجون ده إنه يسأل نفسه هار أسود هو المشروع ده متكلف كام .. الحقيقة إن محدش عارف .. ولا حد حيعرف .. إنك تبني 10 مباني بالحجم ده بينهم إنفاق تحت الأرض تربط بينهم كلهم و ده غير الفرش و التشطبيات و الإضاءه بيخليني أحس إن بيتنا حيتخرب بسبب مشروع زي ده.

المصدر:
مقالة بعنوان Egypt’s New Ministry of Defense “Octagon” Complex Looks Like an Alien Base From Space  .. نشرت في مجلة The Drive و ده لينك المقالة الأصلية:
https://www.thedrive.com/the-war-zone/29762/egypts-new-octagon-ministry-of-defense-complex-looks-like-an-alien-base-from-space

مهندس ميكانيكا بحب الصحافه و الكتابه .. مؤمن بان من حق كل بني ادم انه يعرف الحقيقه ورا الخبر .. رسالتي انك تفهم حقيقه اللي بيحصل عشان لما تقرر رايك تكون فاهم انت بتقرر علي اي اساس

اترك تعليق

بريدك الالكتروني لن ينشر. يجب ملئ الخانات بعلامة *

من فضلك ادخل التعليق!

من فضلك ادخل الأسم!

من فضلك ادخل البريد الالكتروني!من فضلك ادخل بريد الكتروني صحيح!