كورونا فيروس من المواضيع اللي إتكلمنا عنها في مقالتين قبل كده .. المرة الأولانية حكينا إزاي الفيروس فرقع في وش الصين؟ .. الثانية حكينا فيها إزاي طريقة تعامل العالم مع الفيروس مشي بطريقتين اللي هم اللي ميجيش بعصاية (موسي) يجي بخشبة فرعون و الطريقة الثانية إنه كله بالحنية بيفك .. النهاردة أنا عايز أتكلم في حاجة مختلفة شوية و هي الأرقام .. أرقام الفيروس نفسها .. أهم معلومة تعرفها عن الفيروس ده إن 80% من اللي بيتصابوا بالفيروس بيبقوا مش عارفين إنهم إتصابوا و بيخفوا لوحدهم من غير أي تدخل طبي .. إنت متخيل؟ .. طب خد دي كمان .. واحد من كل 6 بني أدمين بس هو اللي الموضوع بيتطور معاه لدرجة إنه لازم يروح المستشفي لإنه مش عارف يتنفس.
زي ما قلت قبل كده في المرتين اللي إتكلمت فيهم عن الفيروس إن الموضوع جد بس مش لدرجة إنك تترعب .. حاول تتخيل إن التعامل مع الفيروس ده شبه إنك تعمل حلة رز .. أخطر مرحلة في عمايل الرز لما تغطيه و تسيب المياه تغلي لحد ما تنشف تقوم موطي النار علي الحله أوي .. لو إتاخرت الرز بيتحرق .. لو وطيت النار بدري الرز بيطلع مش مستوي .. في التعامل مع فيروس كورونا اللحظة الحرجة دي هي إن المريض يجيله إلتهاب رئوي .. عشان تفهم أكتر فإنت محتاج تبقي عارف إن المصابين بالفيروس ده بيتحطوا في أربع فئات:
- الفئة الأولي بيسموها Sub-Clinical و ده البني أدم الجبلة اللي هو جاله الفيروس بس مظهرش عليه أي أعراض بس مصيبة الفئة دي إنه ممكن يعدي غيره عادي جداً.
- الفئة الثانية ناس جالها الفيروس و ظهر عليها أعراض برد خفيفة اللي هو درجة حرارته تعلي شوية و كحة و صداع و إحتقان في الزور .. دي ناس ممكن تعدي غيرها و هم أساساً مش عارفين .. هو بيقول لنفسه ده مجرد دور برد مش فيروس كورونا لإن فعلياً الأعراض اللي عنده مش هي هي أوي الأعراض بتاعه الفيروس.
- الفئة الثالثة و دي أكبر فئة و دي ناس جالها الفيروس و ظهرت عليها أعراض أنفلونزا جامدة لدرجة إنه مبقاش عارف يروح شغله .. الناس دي هي اللي بتلاقيها ماليين المستشفيات.
- الفئة الرابعة و دي أخطر فئة و هي الناس اللي جالها الفيروس و وصل بيهم لمرحلة الإلتهاب الرئوي .. الناس اللي ممكن تبقي مرشحة تبقي ضمن الفئة الرابعة هم كبار السن و الناس اللي عندها أمراض مزمنة زي الضغط و السكر أو اللي عندها حساسية صدرية .. في ووهان مثلاً اللي هي المدينة اللي تعتبر مركز الفيروس 6% بس من المصابين هم اللي كانوا ضمن الفئة الرابعة .. الناس دي هي اللي بتتحط في العناية المركزة عشان يتحطوا علي أجهزة تنفس صناعي لحد ما رئتهم ترجع تشتغل تاني .. المرضي اللي بيتوافهم الله و ربنا يرحمهم جميعاً هم الناس اللي جالهم إلتهاب رئوي حاد.
عشان الأزمة دي تعدي علي خير إن شاء الله ففيه 3 حاجات أي واحدة فيهم تحصل:
- أول حاجة إن يطلع مصل مضاد .. الفكرة إنك بتحقن 60% من تعداد سكان البلد بالمصل اللي بيخلي عندهم مناعة ضد المرض و ده بيتسمي Hard Immunity .. المشكلة إن حتي لو الدنيا مشيت زي السكينة في الحلاوة مع شركات الأدوية فأول مصل ينفع الناس تاخده و هي متطمنة مش حينزل قبل ما بين 12-18 شهر .. لحد دلوقتي الناس ضمن الفئات الثلاثة الأولانية بيخفوا بإن الدكتور يفضل يجرب فيهم شوية مضادات حيوية من اللي بناخدها لما يبقي عندنا برد .. زي ما قلتلك هي المشكلة كلها في الناس اللي بتوصل للفئة الرابعة إن يجيلهم إلتهاب رئوي.
- ثاني حاجة هي اللي بتحصل في العالم كله دلوقتي إننا نحاول علي قد ما نقدر نقلل فرصة إن الناس تنزل الشارع عشان نقلل من أعداد المصابين و بالتالي الضغط علي وحدات العناية المركزة في المستشفيات يقل .. بمجرد ما أعداد المصابين تقل فالحكومات تقول للناس مارسوا حياتكوا بشكل طبيعي .. هوبا الفيروس يظهر تاني .. تقوم الحكومات قايله للناس أقعدوا في بيوتكوا .. ده إسمه Herd Immunity أو مناعة القطيع إن واحدة واحدة بتدي للمواطن العادي مناعة ضد الفيروس .. مشكلة الحل ده إنه أولا محتاج علي الأقل سنتين و خلال السنتين دول فيه ناس يا عيني جهازهم المناعي حيتبهدل من كتر ما بيجيلهم دور برد.
- ثالث حاجة هي إن الحكومات حول العالم تبدأ تتعامل مع الفيروس ده كأنه مرض مزمن بحيث إن كل اللي نقدر نعمله إننا نحافظ علي أعداد المصابين إنها متزيدش .. اللي حتعمله الحكومات إنها توفر أعداد كبيرة من أجهزة الفحص للمرضي و كمان تحاول علي قد ما تقدر تزود من وحدات العناية المركزة عشان المصابين اللي بتوصل حالتهم إن يجيلهم إلتهاب رئوي يتحجزوا فيها لحد ما يخفوا .. بإختصار إن الحكومات تتعامل مع كورونا علي إنه زي الضغط و السكر بالضبط .. مرض مزمن بيجي للناس كلها و زي ما أدوية الضغط و السكر مالية الصيدليات فكمان أجهزة الفحص عن الفيروس حتبقي موجودة في كل حتة.
المصادر:
- مقالة بعنوان Coronavirus: what happens to people’s lungs when they get Covid-19? نشرت في جريدة The Guardian و ده لينك المقالة الأصلية:
https://www.theguardian.com/world/2020/mar/20/coronavirus-what-happens-to-peoples-lungs-when-they-get-covid-19 - مقالة بعنوان Coronavirus: when will the outbreak end and life get back to normal? نشرت في موقع هيئة الإذاعة البريطانية BBC و ده لينك المقالة الأصلية:
ttps://www.bbc.com/news/health-51963486
