إحتواء فيروس كورونا .. ما بين خشبة فرعون و الحنية.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/9l3aeaod7v3z

المقالة دي حتبقي طويلة حبتين فخليني من الأول كده أخش في الموضوع علي طول .. النهاردة حنتكلم عن إزاي دول العالم إتعاملت مع فيروس كورونا؟ واللي الحقيقة لو جيت تبصلها حتلاقي نفسك قدام مدرستين تقدر تعبر عنهم بمثلين شعبيين إحنا في مصر عارفينهم كويس ..المثل الأولاني هو اللي ميجيش بعصاية (موسي) يجي بخشبة فرعون .. المثل الثاني هو كله بالحنية بيفك .. .. المدرسة الأولانية اللي هي اللي ميجيش بعصاية (موسي) يجي بخشبة فرعون جربتها الأول الصين و جابت معاها نتايج حلوة أوي لدرجة إن فيه دول تانية من اللي بيتقال عليها ديموقراطية زي إيطاليا و أميركا بتفكر تقلدها .. المدرسة الثانية اللي هي كله بالحنية بيفك فيه دول جربتها و جابت معاها نتيجة زي سنغافورة و كوريا الجنوبية و هونج كونج و تايوان بس لسبب ما محدش بيجيب سيرة عنهم .. مدرستين عكس بعض في كل حاجة وجابوا نتيجة وده اللي إحنا النهاردة عايزين نتكلم عنه بإستفاضة شوية.

زي ماقلتلك هي حتبقي مقالة طويلة حبتين فخليني أخش في الموضوع و نبدأ معلش يعني بالمدرسة الأولانية .. اللي ميجيش بعصاية (موسي) يجي بخشبة فرعون بإني أحاول أسأل شوية أسئلة ونجاوب عليها سوا بحيث في الأخر خالص حتكون جمعت فكرة كويسة عن إيه اللي حصل وإزاي الصين قدرت تحتوي الفيروس؟

• إيه بالضبط اللي عملته الصين عشان تحتوي فيروس كورونا؟
• هل ده جاب نتيجة؟
• ولو هو جاب نتيجو إيه مشكلته اللي خلت مش كل الناس عايزه تعمل زيه؟

خلينا نبدأ بالإجابة عن السؤال الأولاني .. هو بالصلاة ع النبي الصين عملت إيه عشان تحتوي الفيروس؟

فيروس كورونا الجديد أو Covid-19 زي ما بقي يتسمي دلوقتي و حكينا قصة إزاي فرقع في وش الصين بسبب تأخرهم المستفز في إنهم يقولوا الحقيقة وحتي الدكاتره اللي حاولت تحذر العالم إتقبض عليهم و صوتهم إتخرس .. الصين ضيعت حوالي 3 أسابيع في بداية ظهور الفيروس وهي بتحاول إنها تكتم علي الخبر ماجور لحد ما الوضع خرج بره سيطرتهم وهنا طلع الرئيس الصيني (جي جينبينج Xi Jinping) عشان يعلن خطة الصين لمواجهة الفيروس اللي هو سماها حرب الشعب أو People’s War واللي الحقيقة بتقدر تتلخص في جملة واحدة .. عارف انت لما تبقي تعبان شوية وعندك دور برد فمامتك تقولك خليك في أوضتك عشان متعديش باقي اللي في البيت .. ده بيسموه الحجر الصحي Quarantine .. أهو تخيل بقي إن الصين حطت مدن كاملة في الحجر الصحي.

بص هو الموضوع صعب في تخيله و إستيعابه لإن انت عمرك ما شفت بعنيك حاجة زي دي بس انا ححاول أبسطهالك .. يوم 23 يناير 2020 بدأت خطة إحتواء الصين للفيروس بإنهم جابوا مدينة ووهان Wuhan اللي هي المفروض يعني مركز إنتشار الفيروس واللي عايش فيها 11 مليون بني أدم و قرروا إنهم مش بس يحطوها تحت الحجر الصحي إنما كمان يفرضوا فيها حظر التجوال .. طب ده معناه إيه؟ .. تخيل إنك مثلاً عايش في أكتوبر .. تخيل إني قفلت كوبري أكتوبر و قفلت طريق الواحات .. فعلياً أكتوبر مبقاش فيه حد لا يعرف يخشها ولا يعرف يخرج منها .. مش بس كده .. انا قلت للناس محدش ينزل شغله .. محدش ينزل عياله مدارس .. الحالة الوحيدة اللي مسموح فيها إنك تنزل من البيت هي إنك يا عشان تشتري أكل و شرب يا عشان تشتري أدوية .. ولو نزلت الشارع فانت حتنزل علي رجلك .. لو ركبت عربيتك و سقتها حيتقبض عليك .. المصانع كلها حتقفل لحد علي الأقل 20 مارس 2020 .. شوية و الإجراءات دي مش بس شملت مدينة ووهان إنما شملت أكتر من مدينة عايش فيهم حوالي 60 مليون بني أدم وفي تقديرات تانية إتقال إن عدد السكان اللي إتطبق عليهم الحجر الصحي ده وصلوا 760 مليون بني أدم.

الحجر الصحي الإجباري للمدن ده إتطبق بشكل انت لو فكرت فيه فعلياً مش أي بلد تعرف تعمله .. أحياناً بيتحط عساكر علي أبواب العماير عشان يسألوا اللي طالع و اللي نازل رايح فين؟ و جاي إمتي؟ .. أحياناً العساكر بيتقالهم محدش من سكان العمارة مسموح له إنه ينزل أصلاً .. في ووهان العساكر بقوا بيعدوا علي شقة شقة يقيسوا درجات حرارة الناس ولو لقوا حد درجة حرارته عالية شوية بيتسحب علي الحجر الصحي في المستشفي .. لو انت من اللي الست والدتك داعيه عليهم و إتصبت بالفيروس فانت بيتحقق معاك عشان يعرفوا انت كلمت مين؟ و قابلت مين في الكام يوم اللي فاتوا؟ و كل الناس دي العساكر بتروحلهم لحد بيوتهم تاخدهم علي الحجر الصحي في المستشفيات .. السوشيال ميديا إتراقبت .. لو انت بتستخدم Google Maps و فاتح اللوكيشن بتاعك فانت بتتراقب.

يحكي أن مواطن صيني عنده مطعم في ولاية إسمها سيشوان Sichuan سافر يشتري بضاعة من ولاية هوباي Hubei اللي مدينة ووهان فيها .. الأخ بعد ما رجع بيته لقي إن البوليس طب عليه و أجبروه إنه يفضل في بيته و ميخرجش .. لما لقي نفسه محتاج ينزل يشتري حاجات للبيت لقي موبايله بيرن و البوليس بيكلمه بيحذره إنه لو مرجعش بيته  حالاً حيجوله عشان يحطوه في الحجر الصحي في أقرب مستشفي .. الحكومة الصينية قالت لشركات البرمجة إنهم يعملوا Apps علي Smartphones بحيث كل مواطن يتسجل برقم تليفونه زي Whats App كده بحيث App ده يقيم صحتك .. هل انت إتحطيت تحت الحجر الصحي ولا لا؟ .. حد من اللي تعرفهم إتصاب بالفيروس ولا لا؟ .. عندك مرض مزمن ولا لا؟ .. بناء علي كل المعلومات دي يقيموا المواطنين وبناء علي التقييم ده بيتسمحلك تنزل من بيتك أصلاً او لا.

عشان الضغط علي المستشفيات كان رهيب فهم وزعوا معدات الإختبار علي الفيروس علي المعامل .. لو انت مثلاً عندك دور برد عادي فانت بتتحط في مناطق حجز مش حجر صحي بالمعني الحرفي لكلمة حجر صحي و مناطق الحجز دي بتكون يا في مولات يا في جيم .. فوق ده كله فيه مستشفيات إضافية إتبنت بسرعة محصلتش قبل كده في تاريخ البني أدمين عشان تتعامل مع المصابين ومع اللي بيتحطوا في الحجر الصحي.

طب دلوقتي هل كل ده جاب نتيجة؟

لو انت من الناس اللي بتصدق كلام وزارة الصحة الصينية فالإجابة هي اه .. الطريقة دي جابت نتيجة و نتيجة حلوة كمان .. وزارة الصحة الصينية طلعت يوم 12 مارس 2020 قالت إن خلاص السواد عدي وإنهم لأول مرة من ساعة ما بقت الحكومة الصينية تعلن أرقام المصابين وصلوا إن 8 حالات بس إتصابت بالفيروس في نفس اليوم وده أقل رقم يتسجل لعدد الإصابات في يوم واحد في الصين من ساعة بداية الأزمة .. ده في الوقت اللي الفيروس طايح في العالم و محدش عارف يفرمله .. وأكبر دليل علي ده إن مش بس منظمة الصحة العالمية WHO قالت إن اللي الصين بتعمله ده زي الفل إنما كمان دول تانية بتحاول تقلد الصين.

إيطاليا حطت نفسها تحت الحجر الصحي بعد ما الفيروس أصاب 12,000 بني أدم قتل منهم 800 وفيه كلام إن عدد القتلي وصل 2000 .. تخيل بلد كاملة لا حد يخشها ولا حد يخرج منها  بإستثناء طبعاً (كريستيانو رونالدو Cristiano Ronaldo) اللي تحسه ماسك ذلة علي الطليان .. ومش بس كده .. رئيس الوزراء (جوزيبي كونتي Giuseppe Conte) أمر بأن كل المطاعم و الكافيهات و البارات و السينمات وحتي الجيم حتقفل لحد علي الأقل أخر مارس 2020 واللي مش حيسمع الكلام حيتحبس 3 شهور و حيدفع غرامة 230 دولار .. الفلبين اللي رئيسها المجنون ابن المجنونة (رودريجو ديتوريتي Rodrigo Duterte) أعلن إن العاصمة مانيلا اللي عايش فيها حوالي 13 مليون بني أدم لا حد فيهم حيطلع براها ولا حد حيخشلهم لحد علي الأقل نص شهر إبريل .. بلاش كل دول .. (أندرو كومو Andrew Cuomo) وده يبقي حاكم ولاية نيويورك أعلن إن ولايته خلاص إتحطت تحت الحجر الصحي .. مفيش حد حيخش نيويورك ولا حد حيخرج منها.

ولو هي طريقة الصين جابت نتيجة .. ليه متعممتش؟

والله الإجابة بقي علي حسب انت قاعد فين في مدرجات الإنتماءات السياسية .. لو انت من الناس اللي بتصنف نفسك علي إنك ناشط سياسي و شايف إن حرية المواطن خط أحمر وإن مينفعش الحكومة تنتهك حريتك تحت أي ظرف وتحت أي مبرر فانت غالباً واقف في صف ناس زي منظمة حقوق الإنسان Humans Rights Watch أو HRW  اللي هو انت شايف إن اللي بتعمله الصين ده عيب و حرام .. لو انت من الناس دي فانت مش مقتنع بفكرة إن مش مشكلة يموت بني ادم قصاد إن يعيش الالاف .. لو انت من الناس دي فانت شايف مثلاً إن موت طفل في الصين عنده شلل دماغي عشان أبوه و أخوه إتحطوا تحت الحجر الصحي و مبقاش فيه حد في البيت ينزل يشتريله أدويته مش حاجة مقبولة .. انت لو من الناس دي فانت ضد فكرة إن يموت بني أدم واحد عشان ألف يعيشوا .. ولو انت من الناس دي برده فانت شايف إن التأثير النفسي علي إن ملايين البني أدمين يتحطوا في حجر صحي في ظروف أشبه بإنك تبقي محبوس حبس إنفرادي دي حاجة مش صح .. فيه ناس لو إتحطت في مكان لوحدها مفيهوش بني أدمين أعصابها بتتعب .. بلاش كل ده .. لو انا مواطن غني فانا أقدر أستحمل اني أقعد شهر في البيت مشتغلش .. بس لو انا مواطن غلبان عايش علي اليومية بتاعة شغلي فانت كده بتموتني من الجوع .. فيه كذا تقرير إتكتب عشان يقيموا السياسة دي بتبهدل الإقتصاد إزاي؟ ولقوا إن مثلاً من ضمن 1000 شركة صغيرة فحوالي 30% معاهم سيولة تكفي إنهم يدفعوا المرتبات لموظفيهم لمدة شهر واحد بس.

المشكلة الأكبر إن الصين قدرت تطبق سياسة اللي ميجيش بعصاية (موسي) يجي بخشبة فرعون عشان الناس هناك بتخاف من فرعون .. الصينيين بيسمعوا كلام حكومتهم .. اللي يقوله زعيم الأمة (جي جينبينج) بيمشي علي أطخن طخين بس ده مش معناه إن المواطن الإيطالي أو الأميريكي اللي متعود يعيش في بلد حر بيكفله التعبير عن رأيه وإنه يعمل اللي عايز يعمله إنه حيسمع كلام الحكومة .. إذا كانت الحكومة الصينية تقدر تراقب اللوكيشن بتاعك و تعرف منه انت رحت فين؟ و جيت منين؟ فده مش معناه إن حكومات تانية في العالم عندها نفس الإمكانيات ولو عندها نفس الإمكانيات فدستورياً و قانونياً متكونش تقدر تنفذ ده .. عشان كده انا بستغرب من الحكومات اللي قررت تمشي ورا المدرسة الصينية بس مش أوي .. هم خدوا بس فكرة الحجر الصحي علي المدن و سابوا فكرة التحكم الأوفر في كل صغيرة و كبيرة في تصرفات المواطنين علي أساس إن الإجراءات دي مش دستورية في بلد زي إيطاليا مثلاً .. انا شايف إنك يا تاخد المدرسة الصينية زي ما هي كده بكل تفاصيلها يا متطبقهاش خالص و روح للمدرسة الثانية اللي حنشوفها كمان شوية.

هنا يجي الكلام عن السياسة التانية .. كله بالحنية بيفك .. انا حابب أخص بالذكر 3 دول اللي هم تايوان و سنغافورة و هونج كونج .. الناس اللي ليها في الجغرافيا شوية عارفين إن الدول الثلاثة يا جيران يا ليهم حدود مشتركة مع الصين .. الناس دي عارفه كمان إن ملايين الصينيين بيسافروا خصوصاً لهونج كونج و لسنغافورة يا عشان بيزنس يا عشان الأجازات .. فعلياً المفروض يعني المنطق بيقول إن بمجرد ما فيروس كورونا ضرب الصين تبقي مسألة وقت عشان الدول الثلاثة تبدأ تعيش الكارثة .. فضلنا مستنيين و مفيش حاجة حصلت .. لحد يوم 13 مارس سنغافورة اللي عايش فيها 5.7 مليون بني أدم إتصاب فيها 187 حالة و ولا حالة منهم إتوفت .. تايوان اللي عايش فيها 23.6 مليون بني أدم ظهر فيها 50 حالة مات منهم حالة يتيمة .. هونج كونج اللي عايش فيها 7.5 مليون بني ادم ظهر فيها 131 حالة توفي منهم 4 حالات بس .. هنا انا عايزك تحاول تفكر في الإجابة عن سؤال إزاي؟ .. إزاي 3 دول جيران للصين و الصينيين رايحين جايين عليهم بشكل يومي ميظهرش فيهم إلا الحالات القليلة دي؟ و مسمعناش إن ولا بلد فيهم عملت لا حظر تجوال ولا حجر صحي لمدن كاملة ولا أي حاجة خالص.

السر كله في تفتيح المخ وإنك تمشي بمبدأ لا تؤجل عمل اليوم الي الغد .. إذا كانت الصين بدأت سياسة الحجر الصحي الإجباري علي مدينة ووهان يوم 23 يناير 2020 فاللي حصل إن تايوان قبلها بيومين اللي هو يوم 21 يناير و كلا من هونج و سنغافورة يومي 23 يناير مشوا في سكة تانية خالص:

خطوة رقم واحد: Travel Restrictions اللي هو لا تخاف ولكن إحذر:

السنعافوريين قالوا لنفسهم أول حاجة بما إن الفيروس ده جاي من الصين فخلينا مؤقتاً نمنع أي حد جاي من الصين إنه يخش البلد .. يمكن عشان سنغافورة جزيرة فالي حد ما فكرة إنها تحمي نفسها سهلة شوية بس بمجرد ما الصين أعلنت إن مدينة ووهان بقت هي مصدر الفيروس فسنغافورة الأول قالت إن أي مواطن صيني جاي من ووهان حيتكشف عليه في المطار و لو لقوا عنده أعراض إنفلونزا حتي حيتعزل لوحده لحد ما يعرفوا ماله .. شوية و سنغافورة بقت من أوائل الدول اللي منعت أي رحلة جوية جايه من ووهان إنها تخش البلد .. كل ما الصين تعلن إن حالات كورونا ظهرت في مدينة معينة فالمدينة دي أي مواطن جاي منها برحلة طيران لسنغافورة بيتحط الأول تحت الحجر الصحي .. من اليوم الأول و سنغافورة إختارت المدن الجامعية بتاعة 3 جامعات عشان يبقوا مراكز إستقبال المسافرين .. مش بس كده .. لو انت مواطن صيني جاي من ووهان و لما إتفحصت لقوا إن عندك أعراض الفيروس فكل يوم انت بتقضيه في الحجر الصحي بيدوك بداله تعويض فلوس.

طريقة تعامل تايوان مع الفيروس مختلفتش كتير عن سنغافورة بس يمكن فيه فروقات خفيفة إن عملية الكشف علي المسافرين اللي جايين من مناطق إتقال إن فيها الفيروس بقت بتتعمل جوه الطيارة قبل ما أي راكب ينزل للمطار .. يوم 21 يناير 2020 لما إتلقطت أول حالة مصابة بالفيروس وكان مسافر جاي من ووهان فأربع شركات طيران في تايوان قرروا إنهم يوقفوا كل رحلات الطيران بين تايوان و ووهان .. بعدها ب3 أسابيع طلع قرار بوقف كل رحلات الطيران بين تايوان و الصين كلها بإستثناء الرحلات الجاية من كام مدينة مهمة زي بكين و شنغهاي و جيامين و تشينجدو.

هونج كونج يمكن لو حتبص لحالتها فهي فعلياً كانت أصعب من تايوان و سنغافورة .. إذا كانت تايوان و سنغافورة جزر فهونج كونج ليها حدود برية مع الصين .. إذا كانت سنغافورة و تايوان دول مستقلة فهونج كونج صحيح ليها حق الحكم الذاتي بس هي برده جزء من الدولة الصينية .. في المتوسط يومياً فيه 300,000 مواطن صيني بيعدوا الحدود لهونج كونج ده كان معناه إن إذا كانت تايوان و سنغافورة ليهم القدرة علي إنهم يمنعوا وصول الحالات اللي قد تكون مصابه بالفيروس من الصين ليهم فهونج كونج مينفعش تعمل ده .. اللي هونج كونج محتاجة ولازم تعمله هي إنها تفترض الأسوأ وإن الفيروس عندها فعلاً واللي لازم يتعمل هو منع إنتقال الفيروس بين الناس .. تعامل هونج كونج زيه زي تعامل سنغافورة و تايوان بدأ بدري أوي .. يوم 3 يناير 2020 لما كان لسه الفيروس بينتشر في ووهان كانت هونج كونج حطت لجان تفتيش علي كل الكارتات علي طول الحدود بينها وبين الصين .. أي مواطن بيعدي بيتكشف عليه ولو لقوا درجة حرارته عالية أو بيعاني من أي كحة أو بيعطس بيتعزل و في لحظتها وزارة الصحة في هونج كونج بتتبلغ .. بعدها بخمس أيام يعني يوم 8 يناير 2020 إتمنع دخول أي مواطن صيني جاي من ووهان وأي منطقة صينية إتقال إن ظهر فيها الفيروس و كمان إتقفلت 6 معابر أو كارتات من أصل 14 علي طول الحدود البرية بين هونج كونج و الصين .. شوية و خمس كارتات كمان إتقفلوا .. عدد المسافرين الصينيين اللي بيخشوا هونج كونج يومياً قل من 300,000 بقي 750 في شهر فبراير 2020.

خطوة رقم إتنين: Quarantines أو بمعني أخر إقطع عرق و سيح دمه:

لنفترض إن حالة إتلقطت في سنغافورة .. انت مواطن صيني فلت من إجراءات Travel Restrictions و ظهرت عليك الأعراض وانت في البلد .. ساعتها طاقم المستشفي اللي حضرتك بتتحجز فيها بيكون جزء مهم أوي من شغلهم إنهم يرسموا Time Line من أول ما طلعت من المطار .. قابلت مين؟ .. سلمت علي مين؟ .. كلت فين؟ .. لمست إيه؟ .. في حالة إن مريض قال انه مش فاكر فساعتها بيكون من حق طاقم المستشفي إنه يوصل لأي معلومات متسجلة عند شركات الإتصالات أو كاميرات المراقبة في الفنادق و المطاعم .. بإختصار هم خلوا الدكاتره بقي من صلاحياتهم إنهم يكونوا ضباط مباحث أي معلومة يطلبوها حتتوفر ليهم من غير ما حد يسألهم هو انتوا عايزين المعلومة دي لي؟

تايوان مشت في سكة مختلفة سيكا بإن صحيح الحكومة وفرت مراكز حجر صحي بس الأفضل كان إن كل واحد يتحجز في بيته و اللي مينفذش التعليمات و ميلتزمش بالحجر الصحي بيكون معرض إنه يتداس علي وشه بغرامه بتوصل 33,200 دولار.

هونج كونج في جزئية الحجر الصحي دي داست بنزين و مشيت علي الرابع .. بداية من يوم 5 فبراير 2020 أي مواطن جاي من الصين بقي مجبر إنه يتحط في الحجر الصحي 14 يوم .. الحالات اللي بتتلقط بيتعمل تحريات انت ممكن متبقاش مستوعب مدي دقتها و سرعتها عشان يعرفوا كل حالة قابل مين؟ و شاف مين؟ و سلم علي مين؟ وكان فين؟ .. الإخوة بتوع هونج كونج حسبوا هم المستشفيات بتاعتنا شاكب راكب كام سرير لقوهم حوالي 40,000 منهم 10,000 من اللي بيتقال عليهم Negative Pressure Bed يعني سرير مستشفي ينفع تستخدمه للحجر الصحي .. بما إن ده مكنش كفاية فهم راحوا لمشاريع الإسكان بتاعة الشباب اللي لسه محدش إستلمها و قلبوها بسرعة أوي لمراكز حجر صحي .. بالأرقام هونج كونج نجحت في إحتواء الفيروس بشكل مذهل .. لحد يوم 12 مارس إتصاب 131 حالة بس منهم 62 حالة إتصابت بالعدوي جوه البلد .. لحد اليوم ده فيه 24,700 بني أدم في الحجر الصحي.

خطوة رقم ثلاثة: Self-Isolation, Social Distancing, Heightened Hygiene أو بمعني أخر الوقاية خير من العلاج:

في سنغافورة قالوا مفيش حاجة إسمها نلغي الدراسة .. إنتوا فاهمين يعني إيه الدراسة تتلغي؟ .. يعني الأمهات اللي بيسيبوا عيالهم في المدارس عشان يروحوا الشغل مش حيعرفوا يشتغلوا .. يعني ناس قوت يومها معتمد علي المدارس مش حتلاقي شغل .. بس ده مش معناه إن إحنا منعملش كل اللي نقدر عليه عشان نحمي أطفالنا .. يومياً بيتعمل كشف علي الطلبة .. كل طالب بيتقاسله درجة حرارته في كل مدارس البلد ودي لوحدها تاسك انت عمرك ما حتتخيل مدي صعوبتها .. بقي فيه حملة توعية حكومية بأهمية النظافة .. الحملة كلها علي بعضها شاكب راكب ركزت علي 5 حاجات:

• لما تيجي تعطس أو تكح يبقي معاك منديل.
• لما تاكل في مطعم يبقي معاك معلقة و شوكة بلاستيك من اللي بيبقوا في كياس.
• وانت بتاكل أو بتشرب يبقي معاك طبق أو صينية عشان ميقعش منك حاجة وتكون ملوث بالفيروس.
• الحمامات العمومية يا ريت تسيبها نظيفة.
• إغسل إيدك كتير .. اه و بالنسبة للكمامات تلبسها لو انت عيان غير كده متلبسهاش.

تايوان علي الناحية الثانية قالت للناس يستحسن يعني أي إيفينتات تتلغي .. يستحسن إن الصلوات تتلغي بس مش إجباري .. حتي المدارس قفلوها إسبوعين بس و بعد كده رجعوها تاني عادي خالص بداية من يوم 25 فبراير .. وزارة الصحة في تايوان عندها إحتياطي محترم من الكمامات الجراحية فبدأت تتشكل لجان شعبية عشان الكمامات دي تتوزع علي المواطنين بسعر ثابت مدعم من الحكومة عشان مفيش تاجر يفكر يسترزق .. الحقيقة إن خطة تعامل تايوان مع إحتواء الفيروس نجحت بشكل مذهل لإن لحد يوم 14 مارس كانت 58% من إجمالي الحالات المسجلة للمصابين بالفيروس إتصابت عن طريق العدوي بين أهل البلد وده دليل نجاح الخطة لإن في دول تانية كتير النسبة دي كانت أعلي بكتير أوي .. زي سنغافورة فتايوان بدأت تطبق حملة توعية كبيرة قايمة  علي 3 نقط:

• إلبس الكمامة طول ما انت بتكح و بتعطس.
• كل ما تلاقي فرصه إغسل إيدك بالصابونة.
• حاول تتفادي التجمعات وده بيشمل المستشفيات كمان.

هونج كونج عشان زي ما قلتلك حالة خاصة شوية بحكم إن ليها حدود مشتركة مع الصين فإضطرت في خطوة الوقاية خير من العلاج إنها تمشي في إجراءات أقوي شوية من بتاعة تايوان و سنغافورة .. بداية من 28 يناير 2020 و موظفي الحكومة بقوا مطالبين إنهم يشتغلوا من البيت .. كل الإيفينتات و الحفلات يا إتلغت يا إتأجلت .. يوم 27 يناير طلع قرار بقفل الحضانات و المدارس لحد يوم 16 فبراير و القرار إتمد لحد يوم 20 ابريل بحيث الحصص الدراسية بقت كلها علي الإنترنت .. خلي بالك إن زي ما السنغافوريين قالوا خطوة تأجيل الدراسة دي مش سهلة و ليها إعتبارات كتير بس في حالة هونج كونج المجتمع نفسه ممكن يساعد شوية في إن صدمة وقف الدراسة تبقي أسهل .. أغلب الأسر اللي فيها الأب و الأم بيشتغلوا يا بيكون مستوي المعيشة بتاعهم عالي شوية فبيقدروا يبقي عندهم مربية أو ناني تقعد بالعيال أو إن عشان المجتمع في هونج كونج مترابط شوية فالجد أو الجدة من طرف الأب أو الأم بيقيموا في البيت عشان يقعدوا بالعيال طول ما الأب و الأم في الشغل.

زي ما انت شايف مدرستين عكس بعض .. مدرسة بتقولك اللي ميجيش بعصاية (موسي) يجي بخشبة فرعون ودي اللي بتطبقها الصين .. مدرسة قايمة علي إجراءات في منتهي القسوة محتاجة اللي تنفذها تبقي حكومة متحكمة في كل صغيرة و كبيرة في البلد و كمان يكون أهل البلد مش حقول بيثقوا بس علي الأقل بيسمعوا كلام حكومتهم .. مدرسة تانية خالص ماشية بمبدأ كله بالحنية بيفك ودي اللي طبقتها سنغافورة و تايوان و هونج كونج .. مدرسة قايمة علي التوعية و الهدوء وإن مفيش حاجة بالغصب .. مدرسة بتعتمد أولاً و أخيراً علي الثقة المتبادلة بين المواطن و حكومته .. المدرستين جابوا نتيجة و نتيجة مبهرة كمان بس السؤال دلوقتي الثمن كان إيه؟ .. مين المدرسة اللي حتطلع من الأزمة أقوي؟ ومين المدرسة اللي فعلياً إتداس علي إقتصادها؟ .. الأهم من كل ده إنك بلاش تتخيل إنك حتقدر تمشي علي كلام مدرسة فيهم بس تبقي من جواك قايل انا حمشي علي سطر و أسيب سطر .. ساعتها انت بتضر نفسك مش بتلحق الموقف.

بالنسبة لينا في مصر تعاملنا مع الفيروس نط بسرعة أوي من مجرد خبر بنسمعه في الأخبار وفي بوستات علي سوشيال ميديا لوضع إحنا عايشينه يومياً في حياتنا .. الدراسة إتأجلت .. الدوري إتاجل .. كل ما نروح سوبرماركت يا نلاقي الأرفف فاضية يا نلاقي ناس معبيه كراتين مناديل و مكرونة و رايحه تحاسب ع الكاشير زي ما تكون الحرب العالمية الثالثة قامت .. انا عارف كويس إن إحنا كمصريين مش قادرين نفهم و نستوعب أوي هو إحنا فين من كل ده؟ .. مش كل المستشفيات في مصر فيها أجهزة الكشف عن الفيروس و ده معناه إن فعلياً إحنا منقدرش نعرف هو بالضبط عدد المصابين وصل لحد فين؟ خصوصاً إن زي ما شرحتلك في المقالة فيه دول تانية زي تايوان و سنغافورة كانت مستعدة من اليوم الأول عشان كده نصيحتي ليك إنك تسيب الحكومة في حالها حالياً .. إذا كانت أميركا بجلالة قدرها يطلع المسئول عن إدارة مكافحة الأوبئة و الأمراض المعدية (أنثوني فاوتشي Anthony Fauci) يقول في شهادته قدام الكونجرس إن البلد مش مهيئة ومش مجهزة للتعامل مع فيروس كورونا وإن كتير من المستشفيات الأميريكية مفيهاش أجهزة الكشف عن الفيروس يبقي انت فعلياً متقدرش تقول لوزارة الصحة بتاعتنا انتي بتهببي إيه في عيشتك .. فعلياً انت متقدرش غير انك تعتمد علي نفسك لإن إحنا حقاً و صدقاً We are on our own يا روحي وعشان كده انا طالب منكوا 4 حاجات بس:

• كل ما تلاقي فرصة إغسل إيدك علي الأقل لمدة 20 ثانية .. بص وانت بتغسل إيدك سمع سورة الفاتحة في سرك ولما تخلصها إقفل الحنفية أديك خدت ثواب وانت واقف.
• لما تيجي تعطس أو تكح أرجوك أرجوك أرجوك إعمل ده في منديل ولو إتزنقت ومفيش قدامك منديل كح أو إعطس في كوعك بس بلاش تعطس أو تكح في إيدك.
• انا عارف إن منكوا كتير عايز يلبس كمامات بس ياريت تلبسها لو انت عندك أعراض برد غير كده بلاش كلنا نروح نشتري كمامات لإن فجأة حنلاقيها نقصت جامد في السوق و ساعتها الدكاترة في المستشفيات مش حيلاقوها.
• حاول علي قد ما تقدر تقعد في البيت خصوصاً لو انت عيان وحتي لو انت مش عيان ودي نقطة محتاجه تتشرح شوية لإنها بتتسمي Social Distancing.

كلمة Social Distancing دي بمنتهي البساطة إنك حاول تبقي إنطوائي علي قد ما تقدر .. حاول متروحش أي إيفينتات فيها ناس كتير .. لو ينفع حاول تشتغل من البيت .. لو حتركب مواصلات أو حتروح تشتري حاجة من سوبر ماركت كبير زي كارفور حاول تروح في وقت بعيد عن وقت الذروة لو ينفع .. ولو مش حتقدر تعمل ده حاول دايماً تحافظ علي مسافة 3 متر بينك وبين أي حد .. زي ما قلتلك حاول تبقي إنطوائي علي قد ما تقدر .. السبب في إن الحكاية دي مهمة هي إنها بتساعد علي حاجة إسمها Flatten the Curve .. يعني إيه البتاعة دي؟

فيه رسم بياني عندك و الرسم البياني ده حتلاقي فيه خط أفقي مكتوب عليه Health Care System Capacity وده بيعبر عن أقصي قدرة إستيعاب للمستشفيات في البلد وإحنا مش عايزين نضغط أوي علي المستشفيات فنكتشف إن عدد الحالات اللي عمال يدخلها أكبر من قدرتها علي الإستيعاب .. اللي إحنا عايزين نعمله إننا نقلل من إنتقال الفيروس بينا عشان منلاقيش نفسنا كلنا بايتين في المستشفي .. خليك فاكر إن عدد سراير المستشفيات في مصر كلها أقل بكتير من عدد سرايرنا اللي بنام عليها في بيوتنا .. علي فكرة حكاية Flatten the Curve دي مهمة بشكل انت لا تتخيله لإن مثلاً في إيطاليا عشان مستشفياتهم مش متصممة وعمرها ما كان في حسابها إنها تتعامل مع عدد المصابين الرهيب ده فالدكاتره الطليان بقوا مضطرين يضحوا بمرضي علي حساب مرضي تانيين مش لسبب غير إن معندهمش سراير ومعندهمش أماكن تكفي.

أخيراً خلوا بالكوا من بعض ومن نفسكوا .. لو ليك قرايب كبار في السن زي جدك و جدتك أو ليك حد من قرايبك و صحابك عنده مرض مزمن بيؤثر علي مناعته خلوا بالكوا منهم .. كلموهم كل يوم و إتطمنوا عليهم لإن دول أكتر ناس معرضة إنها تتصاب .. طمنوهم بس مترعبوهمش .. إلتزموا علي قد ما تقدروا بالتعليمات و حاولوا تهدوا .. انا عارف ان الوضع ده يعصب أي حد .. عارف إن إحساس القلق لوحده صعب بس خليكوا فاكرين إن جيل أواخر الثمانينات و التسعينات ده جيل شاف موتات أكتر من كده بكتير .. إحنا عدي علينا الزلزال و حربين خليج و ثورة و 4 رؤساء جمهورية و أزمة مالية عالمية و لسه عايشين و زي الفل .. دايماً إفتكروا إن أكتر من كده و بيزيح ربنا.

المصادر:

مقالة بعنوان China’s draconian lockdown is getting credit for slowing Coronavirus. Would it work anywhere else? نشرت في مجلة TIME وده لينك المقالة الأصلية:
https://time.com/5796425/china-coronavirus-lockdown/
مقالة بعنوان They’ve contained the Coronavirus. Here’s how. نشرت في جريدة The New York Times وده لينك المقالة الأصلية:
https://www.nytimes.com/2020/03/13/opinion/coronavirus-best-response.html?auth=login-facebook
مقالة بعنوان China’s battle with a deadly Coronavirus, in photos نشرت في جريدة The New York Times وده لينك المقالة الأصلية:
https://www.nytimes.com/2020/01/25/world/asia/china-coronavirus-photos.html
حلقة من برنامج Last Week Tonight with John Oliver وده لينك الحلقة علي YouTube:
https://www.youtube.com/watch?v=_066dEkycr4