الرسالة اللي أنا حابب أوصلها لأي بلد أو أي رئيس أو أي حاكم بيعتبر الأمريكان في ظهره وشايف إن (ترامب) حيحميه إن إنسي .. اللي (ترامب) عايزك تفهمه إن لو حصل وإنت إتخانقت مثلاً مع الروس أو الصينيين أو الإيرانيين فإنت فعلياً حتشيل أوبح.
لما رئيس الوزراء الإسرائيلي (بنيامين نتياهو) طلع قرار برفض الفيزا بتاعة عضوتي الكونجرس الأميريكي (إلهان عمر) و (رشيدة طالب) فده خلي الرئيس الأميريكي (دونالد ترامب) فرحان منه أوي بس القرار ده عمل شرخ جوه السياسة الداخلية الأميريكية.
الأربع بنات دول هم (رشيدة طالب) أول ست من أصل فلسطيني تخش الكونجرس .. (إلهان عمر) أول ست محجبة تخش الكونجرس .. (أليكساندريا أوكازيو كورتيز Alexandria Ocasio Cortez) بنت منطقتي عشان إسمها إسكندرية و دي تبقي من أصغر أعضاء الكونجرس سناً .. و أخيراً (إيانا بريزلي Ayanna Preseley) بنوتة سمرا برده في الكونجرس.
هنا إنت محتاج تفهم إن كل ده فنكوش .. شعبية (ترامب) وسط الأهلاوية أو الجمهوريين عالية و حتفضل عالية .. لإن محدش بيتكلم وسط الجمهوريين علي الفضايح دي كلها .. هم كلهم في إعلامهم و في جرايدهم عمالين يقنعوا الناس بإن (ترامب) فلة شمعة منورة.
الإتفاق النووي الإيراني مكنش بين أميركا و إيران بس لإن فيه 6 كيانات تانية اللي هم بريطانيا و ألمانيا و فرنسا و الإتحاد الأوروبي و روسيا و الصين و كلهم مش ناويين ينسحبوا من الإتفاق ولا يغيروا أي كلمة فيه .. المنطق بتاعهم لو انت مضايق من بنود الIran Deal هات حاجة تانية تحل محلها بس مينفعش تقول انا مش عاجاباني الIran Deal وانت معندكش بديل.
بس في نفس الوقت ده بيوريك قد إيه (ترامب) رجل فكره محدود لإنه كرجل أعمال و تاجر مبيحبش يتفاوض مع كذا طرف في وقت واحد لإن ساعتها التنازلات حتزيد .. إنما هو بيحب التفاوض يبقي بينه و بين طرف واحد بس عشان يعرف يمص دمه ودي النقطة اللي (روبيرت لايتثيزر) إتعمد يعملها وهو بيكتب صيغة القرار عشان يروح ل(ترامب) يقوله شفت يا ريس عملتلك حاجة علي مقاسك أهي عشان متتعبش.
في مايو 2022 السويد وفنلندا سوا قدموا طلب رسمي للإنضمام للحلف .. أيوه عارف إنك خدت بالك لإن الطلب اتقدم يدوبك بعد 3 شهور بس من بداية الغزو الروسي لأوكرانيا .. خلال أقل من سنة كانت فنلندا ورقها إتقبل والدنيا كانت سالكة بس تقريباً التراخيص عصلجت شوية مع السويد لإن إنضمامها وقفه معارضة المجر وتركيا.
بس يمكن نتايج قرار روسيا إنت ممكن متشوفهاش دلوقتي بس حتحس بيها قدام .. خلينا متفقين إن عشان روسيا تزود من عدد الرؤوس النووية اللي تحت إيدها فده مش حيفيدها في حاجة لإن لو عندك 1,500 رأس نووي مش حتفرق معاك لو بقوا 1,501 خصوصاً إن ده حيسحب وقت و فلوس و يا حسرة روسيا لا عندها الوقت ولا الفلوس لإن الحرب في أوكرانيا حنفية مصاريف مكسورة و مغرقة الدنيا.
علي فكرة الخوف مش بس علي أميركا إنما كمان علي الدول اللي الإحتياطي النقدي الأجنبي بتاعها بالدولار .. عندك بلد زي مصر مثلاً .. الجنيه بتاعنا قيمته مربوطة قد إيه مصر فيها دولارات فلما الإقتصاد الأميريكي يتضرب و قيمة الدولار تتهز فطبيعي إن الجنيه بتاعنا يروح في الشلاحات .. تقريباً علي مستوي العالم نص الإحتياطي النقدي الأجنبي بتاع دول العالم كلها بالدولار.
(كامالا) بني أدمة عايزة الناس كلها ترضي عنها و تحبها و ده بيخليها تخسر ناس كتير .. هي أول ست و أول حد مش أبيض يمسك منصب نائب الرئيس و ده لوحده فاتح عليها بكابورت عنصرية ما يعلم بيه إلا ربنا .. ردها علي ده إنها بتخلي دريكسونها بشكل مبالغ فيه أحياناً يحدف ناحية الشمال مع الليبراليين.
و ده بيحطك قصاد أهم حقيقة في الخناقة دي .. دي خناقة متوصفهاش غير الأية الكريمة اللهم أضرب الظالمين بالظالمين و أخرجنا منها سالمين .. دي خناقة بين إتنين قتالين قتلة كل واحد فيهم حيموت و يقعد علي الكرسي .. دي مش خناقة بين عقائد أو أيدولوجيات أو أفكار سياسية و عشان كده دي خناقة جديدة علي السودانيين نفسهم.
علي الناحية الثانية خليني أصنفرلك ذاكرتك وأفكرك بكيس الشيتوس الحجم العائلي (دونالد ترامب Donald Trump) اللي كان بيحكم أميركا قبل جدو (جو بايدن Joe Biden) وأسالك هو إنت فاكر إيه الحاجة اللي (ترامب) كان دايماً يشتكي منها كل ما يقابل المستشارة الألمانية وقتها (أنجيلا ميركيل Angela Merkel)؟ .. لو كنت ناسي أفكرك .. (ترامب) كان متضايق جداً إزاي بلد ربنا كارمها زي ألمانيا إقتصادها بسم الله ما شاء الله جامد زحليقة بس معندهاش عساكر ولا جيش قادر يقف علي رجله.
هي طيارة تحسسك بإنها شبه الكيا السيراتو .. طيارة بتشيل عساكر و صواريخ و مدافع رشاشة .. هي محندقة و صغيرة فبتقدر تناور و تخمس في الشوارع ولا الموتوسيكلات .. اللي منكوا شاف فيلم Black Hawk Down و اللي بيحكي القصة الحقيقة لمعركة مقديشيو اللي حصلت سنة 1993 حيشوفها و الطيارين الأمريكان حرفياً بيعملوا بيها ريفتات في الشوارع.
يمكن فيه وجهة نظر تانية لكل اللي أنا قلته ده و هي إن الناس من جواها مش عايزة حرية قد ما هي عايزة إستقرار .. في إسرائيل خلال الأربع سنين اللي فاتوا البلد إتعمل فيها 5 إنتخابات برلمانية عشان كل إنتخابات بتتعمل مفيش حزب بيعرف ياخد أغلبية تخليه يشكل حكومة و هو مستريح .. منطقي و مفهوم إن الناس تكون تعبت و زهقت و قالت لنفسها تشدد تشدد مش حتفرق بس نخلص .. الحكومة الإسرائيلية الجديدة دي حتكون أول حكومة تتشكل بأغلبية برلمانية في إسرائيل من سنة 2019.
الرئيس الأميريكي الجديد (جو بايدن) واحد من الحاجات اللي قال إنه حيشتغل عليها إنه يرجع أميركا تاني للإتفاق النووي مع إيران و ده عطي إسرائيل الفرصة إنها تدوس بنزين في تعاونها مع الخلايجة .. هم باعوا للخلايجة فكرة إن محدش خايف علي مصلحتكوا قدي .. زي ما بنقول المتغطي بأميركا عريان بس اللي متكلفت بإسرائيل متدفي.