موضوعنا النهارده حيكون حول الرجل اللي قدامك في الصورة ده .. ده يبقي إسمه (أرنستو فالفيردي Ernesto Valverde) وده في حالة إنك أول مرة تسمع الإسم ده فهو يبقي المدير الفني الجديد لنادي برشلونة .. لو انت من مشجعي نادي برشلونة التقال أوي فانا أتحدي إنك تكون عارف مين هو (فالفيردي) أصلاً و شكلك كده من الناس اللي مش حاسة أو شاكه إنه حيبقي مدير فني ناجح لبرشلونة .. إحنا ناويين نتكلم عنه بإستفاضه بس عشان في الأول أطمنك فخليني أوريك شوية حاجات من اللي مكتوبة في الCV بتاع الرجل ده:
- كلاعب كرة قدم هو لعب سنتين لنادي إسبانيول و بعد كده إنتقل لبرشلونة و هو في برشلونة كان بيلعب تحت إيد المدير الفني الإسطوري (يوهان كرويف Johan Cruyff) وختم الCareer بتاعته كلاعب كره قدم في نادي أتيلتيك بلباو.
- سنة 1994 يعني قبل حتي ما (فالفيردي) يستلم أول وظيفة له كمدير فني لفريق الناشئين لنادي أتليتيك بلباو تلاقي إن (كرويف) قال عنه إنه من أذكي اللاعبين اللي إشتغل معاهم وكان دايماً عايز يتعلم و لو بقي مدرب حيبقي من أفضل مدربي العالم.
- الرجل ده قبل كده درب نادي أوليمبياكوس اليوناني كسب معاهم 3 بطولات دوري و بطولتين كاس.
- في الفترة اللي كان بيدرب فيها نادي أتليتيكو بلباو الإسباني كسب معاهم بطولة كاس الملك و دي كانت أول مرة النادي الباسكي يكسب بطولة من 31 سنة.
- من سنتين ريال مدريد كان بيدوروا علي مدير فني وكانوا حاطين (فالفيردي) علي رأس أولوياتهم بس لما رفض إدارة ريال مدريد عينت الإسباني (رافا بينيتيز Rafa Benitez) ومن بعدها عينك ما تشوف إلا النور.
حياة (فالفيردي) أغرب من ما تتخيل .. الرجل ده سنة 1986 كانت أول مرة يعيش في مدينة برشلونة و إقليم كاتالونيا كله لما نادي إسبانيول إشتراه كلاعب .. في وقت فراغه كان بيدرس التصوير الفوتوغرافي في معهد التصوير الفوتوغرافي الكاتالوني .. سنة 2012 عمل معرض فني للصور الفوتوغرافية بتاعته والمعرض ده إتعمل في العاصمة اليونانية أثينا أيام ما كان شغال مدير فني لنادي اوليمبياكوس .. أخو (فالفيردي) شغال رسام كاريكاتير .. زوجته (مونيكا Monica) شغاله عالمة أحياء Biologist .. (فالفيردي) نفسه شخص متعلم جداً .. لما كان عنده 20 سنة كان بيدرس في جامعة نهر سيستاو Sestao River University و درس علم الأحياء لمدة سنة كاملة .. هو عاشق للتصوير الفتوغرافي لدرجة إنه كان عايز لما يعتزل كرة القدم يتفرغ خالص إنه يعمل Career لنفسه كمصور بس تشاء الأقدار إنه يبقي المدير الفني لبرشلونة.
بدأت تفهم إنك بتتعامل مع شخص مش عادي .. طب أزيدك من الشعر بيت .. لما (بيب جوارديولا Pep Guardiola) قرر إنه يسيب تدريب برشلونة ساب لإدارة النادي إسمين يختاروا منهم اللي يمسك من بعده .. الإسمين دول كانوا (فالفيردي) و (تيتو فيلانوفا Tito Vilanova) الله يرحمه اللي كان المساعد بتاع (جوارديولا) .. إدارة برشلونة قالت لنفسها عشان مشروع (جوارديولا) يكمل خلينا نختار (فيلانوفا) بس ربنا شاء و (فيلانوفا) يصاب بمرض السرطان وحالته الصحية إتدهورت جامد بعد سنة من تعيينه .. إدارة برشلونة حاولت تتكلم مع (فالفيردي) تاني .. إدارة برشلونة قعدت مع (فيلانوفا) عشان يحاولوا يقنعوه إنه يقدم إستقالته عشان صحته بس هو أصر إنه يكمل شغله وهم إحترموا قراره وقالوا أسفين جداً ل(فالفيردي) اللي كان وقتها متقدمله عرض من نادي أتليتيكو بلباو وهو قبل العرض .. بعدها بكام شهر إتدهورت الحالة الصحية ل(فيلانوفا) لدرجة إن الدكاتره قالوله انت لازم تقدم إستقالتك و لما إدارة برشلونة جرت علي (فالفيردي) قالهم هو المرة دي سوري مش حينفع انا إديت كلمتي لإدارة نادي أتليتكو بلباو ومش حينفع أبقي عيل قدامهم.
إدارة برشلونة بعد كده عينت الأرجنتيني (تاتا مارتينو Tata Martino) اللي طبعاً زي ما كتير مننا عارفين اللي حصله و مشوه بعد سنة .. تاني إدارة برشلونة راحت تتكلم مع (فالفيردي) عشان يمسك الفريق و تاني قالهم سوري مش حينفع أسيب أتليتيكو بلباو دلوقتي انا ماضي عقد معاهم ومش حينفع أرجع في كلمتي .. في الوقت ده حصل إن ريال مدريد قدموله عرض زي ما قلتلك في البداية وبرده قالهم سوري مش حينفع .. إدارة برشلونة قررت إنها تعين (لويس إنريكي Luis Enrique) بس قالوا ل(فالفيردي) انت مسيرك تمسك الفريق .. السنة دي شاءت الظروف إن ده يحصل .. عقده مع أتليتيكو بلباو خلص وقدر إنه يوصل بيهم لبطولة Europa League للسنة الرابعة علي التوالي و (فالفيردي) حيسيب أتليتكو بلباو و هو ضميره مستريح و راضي عن نفسه و إدارة النادي موقفتش في طريقه و ودعوه كجنتلمان إحترم كلمته معاهم ومشي بشكل محترم.
ده يخليك تقول لنفسك ده بني أدم محترم و متعلم و مؤدب .. واضح إنه مدرب كويس بدليل إنه حقق معجزة مع نادي أتليتيكو بلباو إنه لأربع سنين متتالية بيوصل بيهم إنهم يلعبوا في أوروبا مع العلم إن إمكانيات نادي أتليتيكو بلباو محدوده أوي .. بس لما مسك فرقة كبيرة زي أوليمبياكوس اليوناني خد بيهم 3 بطولات دوري و بطولتين كاس .. السؤال بقي اللي لازم انت كمشجع لبرشلونة تسأله لنفسك: هل (فالفيردي) حيستحمل؟ ده مدير فني مفيش لاعب لعب تحت إيده محبوش .. هو كريم و صريح و ذكي و حتي دمه خفيف ولسانه حلو ومش بيحب قلة الأدب فهل شخصية زي دي حتستحمل الشغل في بيئة مضغوطة زي نادي برشلونة؟ متنساش إن البيئة المضغوطة دي (لويس إنريكي) مستحملهاش بعد سنتين و مشي و حتي (جوارديولا) أنجح مدرب في تاريخ النادي مشي بعد 4 سنين .. لا و لما مشي أخد سنة كاملة أجازة عشان يريح أعصابه من الضغط العصبي و النفسي اللي أي مدير فني لبرشلونة بيتعرضله .. فتاني لازم أسأل: هل (فالفيردي) حيستحمل؟
نقطة قوة (فالفيردي) هي إنه من أكثر المدربين اللي بيعرف يتكلم مع اللاعبين .. عندك لاعب زي (أندير هيريرا Ander Herrera) اللي دلوقتي بيلعب لنادي باريس سانجيرمان بس لعب تحت إيد (فالفيردي) في نادي أتليتيكو بلباو و بيقول عنه إنه من أكثر المدربين اللي بيعرف يتعامل مع اللاعبين في أوضة اللبس .. بيقول عنه إنه صريح و واضح و شفاف جداً معاك ومن النادر أوي إنك تلعب تحت إيد مدير فني بيخلي اللاعبين الأساسيين و الإحتياطيين مستعدين ياكلوا النجيلة عشانه .. بس في برشلونة النقطه دي ممكن تتقلب عيب مش ميزة .. بمعني:
لو بصيت علي أوضة اللبس بتاعة فرقة أتليتكو بلباو حتلاقيها 25 شاب كلهم في سن بعض و كلهم إتربوا في نفس المنطقة ومفيش حد فيهم شايف نفسه .. بس هل لما يروح برشلونة حيعرف يتعامل مع كمية الغرور و العنظزة اللي في أوضة اللبس .. لاعب أسطوري بس بيتقمص بسهولة زي (ميسي Messi) حيتعامل معاه إزاي؟ .. بس لو انت مكان لاعبي برشلونة خلي بالك إن (فالفيردي) مبيخافش خالص إنه يوقفك ولا بيخاف من الضغط الجماهيري وخليني أديلك مثالين علي كده:
المثال الأول .. أيام ما كان مدير فني لنادي أتليتكو بلباو حصلت خناقة بين إتنين لاعبين هما (فران ياتس Fran Yates) و (إيسر ديل هورنو Asier Del Horno) قام (فالفيردي) واقفهم هم الإتنين وطلعهم بره التشكيلة خالص.
المثال الثاني .. و دي حاجة معرفش ليه الناس مش بتتكلم عنها كتير و هي إن (فالفيردي) كان مدير فني لنادي أوليبمياكوس اليوناني في فترة حرجة أوي من تاريخ اليونان .. اليونان كانت عايشه وقتها في أزمة إقتصادية و الشارع كان بيغلي وكل يوم مظاهرات و إضرابات ده غير إن الجماهير كانت مستنية النادي يكسب بطولة الدوري .. عشان بس تستوعب حجم الضغط اللي هو كان عايش فيه .. حاول تتخيل إن (فالفيردي) كان مثلاً المدير الفني لنادي الأهلي في فترة ثورة 25 يناير و وسط المظاهرات و الدم و القتل و الدوري شغال عادي جداً كسب بالأهلي بطولة الدوري .. عايز تفهمني إن شخص قدر إنه يفضل هادي في ظروف زي دي حيخاف إنه يقعد (ميسي) ولا (نايمار Neymar) علي الدكة .. لو إحتاج إنه في الإستراحة بين الشطوين يزعق في (ميسي) عشان مستواه مش حلو فهو مش حيخاف يزعله وممكن كمان يبدله بين الشوطين عادي جداً .. انت ممكن تكون مستغرب بس إحتمال كبير تشوف ده بنفسك الموسم الجاي.
فيه ميزتين في شخصية (فالفيردي) حتشوفهم برده بنفسك الموسم الجاي إن شاء الله و هما إن دماغه ناشفة أوي وفي نفس الوقت مرن جداً وممكن يغير من تكيتكه الكروي في لحظة .. انا عارف إنك مستغرب بس خليني أشرحلك انا قصدي إيه:
أول ماتش له كمدرب مع نادي أتليتيكو بلباو كان ضد فريق برشلونة واللي كان بيدربه وقتها الهولندي (فرانك ريكارد Frank Rijkaard) و برشلونة كسب الماتش .. المشكلة إن (فالفيردي) بصفته إتعلم كرة قدم في برشلونة فهو بيلعب بنفس طريقة اللعب الهجومية المفتوحة .. فبعد الهزيمة دي ناس كتير قالوله إن يمكن مع إمكانيات لاعبي أتليتيكو بلباو مينفعش إنك تلعب بالطريقة دي بس هو أصر إنه مش حيعمل حاجة هو مش مقتنع بيها .. نفس الكلام ده حصل أيام ما كان ماسك فرقة إسبانيول .. (كرويف) كان بيقول إنه بيستني ماتشات إسبانيول عشان يتفرج علي لعبهم .. بس ده مش بيخليه يتقال عليه إنه فيلسوف زي ما بيتقال علي (جوارديولا) .. في نفس الوقت هو مرن جداً في تكتيكاته .. لما كان في أتليتيكو بلباو كان معاه إتنين مهاجمين طوال بيعرفوا يجيبوا أجوان بالراس كويس اللي هما (راؤول جارسيا Raul Garcia) و (أريتز أدوريز Artiz Aduriz) بس بدل ما يقعد واحد فيهم علي الدكة بقي بيلعب بإسلوب لعب شبه لعب الأندية الإنجليزية زمان اللي هو بيخلي الوينجات ترفع في كرات عرضية كتير .. حتشوف ده كتير في برشلونة الموسم الجاي .. فكرة إسلوب اللعب الواحد اللي مبيتغيرش ده إنساها خلاص.
المصدر:
مقالة بعنوان Ernesto Valverde Ready to be The Resurrection at Barcelona نشرت في جريدة The Guardian البريطانية وده لينك المقالة الأصلية:
https://www.theguardian.com/football/blog/2017/may/30/ernesto-valverde-barcelona-nou-camp-stone-roses?CMP=Share_AndroidApp_Add_to_Facebook
