مش عارف ليه الصينيين مبيعرفوش يسموا الحاجة اللي بيعملوها أسامي سيكسي كده تلزق في رأس اللي بيسمعها .. يعني مثلاً السفينة اللي قدامك في الصورة دي تبقي حاملة الطائرات الأولي اللي تصنعها الصين بالكامل .. رغم إن سفينة زي دي تعتبر درة تاج التصنيع الحربي لأي بلد ولازم تتسمي إسم مناسب لمكانتها إلا إن لحد دلوقتي الصين مسمتهاش .. لو دخلت علي النت حتلاقي إن ليها أسامي زي Type 001A أو Type 002 .. بس الحقيقة إسم حاملة الطائرات دي مش هو مشكلتها الوحيدة .. زيها زي أي حاجة بتتصنع فهي لازم تتجرب و تختبر كويس أوي .. في عرف البحر تجربة سفينة حربية جديدة بتتسمي Sea Trial و الكلمة دي معناها إن السفينة اللي انت صنعتها تاخدها كام لفة كده في البحر علي كذا يوم بحيث إن في كل مرة بتلف بيها بتركز تجربتك علي حاجة معينة .. زي كده لما تشتري عربية جديدة و تاخدها لفة عشان تجربها .. مرة تجرب سحب الموتور بإنك تجري بيها .. مرة تجرب الفرامل بإنك تفرمل مرة واحدة .. مفيش مانع تجرب الABS .. نفس الكلام في السفن .. انت بتجرب كل حاجة فيها من أول الرفاصات لحد كل الحساسات أو Sensors اللي فيها لحد الأسلحة.
عاجبني في تفكير الصينيين إنهم مبيحبوش يحطوا التاتش بتاعتهم عشان ميخربوش الدنيا .. الناس دي في الثمانينات راحت إشترت من أوكرانيا حاملة طائرات خردة مركونة في الترسانة البحرية و محدش بيشغلها .. الصينيين خدوها للترسانة البحرية في داليان Dalian و قعدوا يشتغلوا عليها 10 سنين لحد ما خلوها عروسة تاني و سموها لياو- نينج Liaoning .. لما الصينيين حبوا يعملوا حاملة الطائرات بتاعتهم خلوها نسخة طبق الأصل من Liaoning .. تقريباً الإتنين ليهم نفس الأبعاد .. الإتنين فيهم Ski Ramp و ده يبقي المطلعايه اللي قدام خالص عشان الطيار المقاتل و هو بيطلع بطيارته يستخدمه بإنه يزق طيارته زيادة بحيث إنك بدل يعني ما تزود طول السفينة عشان توفر مدرج إقلاع طوله كافي .. الإتنين بيقدروا يشيلوا 26 طيارة مقاتلة J-15 و تقريباً برده نفس العدد من الطيارات الهليكوبتر و علي فكرة العدد ده يعتبر تقريباً نص عدد الطيارات اللي أي حاملة طائرات أميريكية شغالة بالطاقة النووية بتقدر تشيله.
المعلومة اللي إحنا متؤكدين منها إن حالياً حاملة الطائرات الثالثة اللي تبقي عند الصين و الثانية اللي تبقي بالكامل من تصنيعها حالياً في مرحلة التصميم و حتتسمي Type 003 .. يادي النيلة علي الأسامي اللي مش بتتحفظ دي .. و فيه كلام علي إن حاملة الطائرات الثالثة دي تصميمها حيبقي مختلف شوية عن سواء Liaoning أو Type 002 .. فيه كلام بيتقال علي إن الصين بتخطط تصنع ما بين 4 ل 6 حاملات طائرات بحيث إن يبقي عندها قوات بحرية تقدر تقف الند بالند قصاد القوات البحرية الأميريكية.
المصدر:
مقالة بعنوان China’s First Homemade Aircraft Carrier is Having Some Problems .. نشرت في مجلة Popular Mechanics و ده لينك المقالة الأصلية:
https://www.popularmechanics.com/military/navy-ships/a28648689/china-homemade-aircraft-carrier/
