لينك التسجيل الصوتي علي ساوند كلاود:
https://on.soundcloud.com/ByLNCQfI2TfrhPX7FV
في رأيي الشخصي جزء ورا سعي البشر إنهم يقبلوا ما يسمي بفكرة نعيم الجهل هي إن كل واحد فينا من جواه مش عايز زي ما بنقول كده يفتح علي نفسه فاتوحه .. كونك جاهل بالشيء معناه بالتبعية إن محدش حيحاسبك علي إنك معملتش اللي كان المفروض يتعمل ولا حتلاقي حد يقولك قوم اشتغل علي سيناريوهات الوقاية من الأخطار المتوقعة .. إنك تعرف الحقيقة فأنت بتفتح علي نفسك الباب اللي حيجيلك منه الريح اللي إنت قررت إنك متسدوش وتستريح .. لو عرفت الحقيقة ساعتها عبايه الجهل مبقتش بتحميك وحتتحاسب علي اللي انت عملته لما عرفت الحقيقة .. المقدمة الفلسفية دي هدفها هو إني اشرحلك ليه احنا كبشر كتير مننا الحقيقة ما بينا وبين نفسنا قررنا نشتري دماغنا ونصدق ونقنع نفسنا إن فيروس كورونا Covid-19 اللي قعدنا في بيوتنا وخلانا نقلق علي أكل عيشنا وفيه مننا راح منهم حبايب وقرايب وصحاب بسببه ما هو إلا مرض طبيعي خلقه ربنا كابتلاء لينا كبشر وإن لا مفر غير قبول قضاء الله وقدره ولا يكلف الله نفساً إلا وسعها .. هو يعني حنعمل ايه .. ادي الله وادي حكمته.
حكومات كتير حول العالم قالت لنفسها ولشعوبها ادينا حاولنا وعملنا اللي علينا واللي نقدر عليه عشان نتفادي الأزمة .. من ضمن الأقوال المأثورة عن التخبط والفوضي اللي كلنا شفناها لما رئيس وزراء إيطاليا وقتها (جوزيبي كونتي) لما قال إنتهت حلول الأرض والأمر متروك للسماء .. اللي عمل حظر تجول زي الخلايجة والأمريكان والصينيين .. واللي صرف من جيب ميزانية الدولة بتاعته عشان يصرف لقاحات للمرضي زي ما حتي الحكومة المصرية عملت .. واللي خصص مبلغ وقدره في صندوق إعانة للناس اللي قعدت من شغلها زي ما جدو (جو بايدن) عمل ولحد دلوقتي كيس الشيتوس الحجم العائلي (دونالد ترامب) في الرايحه والجايه يقول إن الصندوق ده سبحان الله يعني هو السبب ورا التضخم الخزعبلي اللي حصل مش بس للإقتصاد الأمريكاني إنما الإقتصاد العالمي كله .. وكل ده اتبني علي كتاف فكرة إن الفيروس ده خلقة ربنا ودي الفكرة اللي لو حبيت تصيغها في شكل علمي شوية فهي نظرية الإنسكاب الطبيعي Natural Spillover Hypothesis وكلمة انسكاب دي معناها لما تيجي تصب شوية مياه في كوباية وايدك تفرط شوية وتلاقي المياة اتكبت بره الكوباية .. الفكرة إن زي المياه في التشبيه ده هي فيروس كورونا والكوباية تبقي العائل أو الحامل الطبيعي للفيروس اللي هي الحيوانات البرية اللي خلقها ربنا .. اللي حصل هو سلسلة طفرات جينية ورا بعضها للفيروس لحد ما الفيروس زي ما بقول كده اتكب بره الكوباية واتدلدق علي الطرابيزة اللي هو انتقل لعائل أو حامل جديد اللي هو البني ادمين .. النظرية دي هي اللي فسرت فيروس تاني شبه كورونا اسمه سارس SARS والعلماء خدوا النظرية دي طبقوها هي هي علي Covid-19 .. ومش بس SARS .. احنا كبشر في تاريخنا الحديث حصل لينا 5 أوبئة شبه بتاع كورونا ده .. الأنفلونزا الإسبانية سنة 1918 .. الأنفلونزا الأسيوية سنة 1957 .. أنفلونزا هونج كونج سنة 1968 .. الأنفلونزا الروسية سنة 1977 .. أنفلونزا الخنازير سنة 2009 .. أربعة من الخمسة والاستثناء كان الأنفلونزا الروسية كان السبب فيهم إن الفيروس انتقل من حيوان لبني أدم .. لحد ما جه إبريل 2025.
فجأة الناس صحيت علي إعلان اتحط علي الموقع الرسمي للبيت الأبيض بيقول صراحة كده إن فيروس كورونا يا جماعة الخير اتعمل في معمل في مدينة ووهان Wuhan الصينية وبالتحديد من معهد ووهان للفيروسات Wuhan Institute of Virology اللي اختصاراً بيسموه WIV .. اللي حصل إن اخواتك في الصين كانوا بيعملوا ابحاث بيسموها Gain-of-Function .. فكك من الترجمة الحرفية لنوع الأبحاث ده .. اللي الناس دي بتعمله إنها بتلعب في الشفرة الجينية للفيروسات بحيث يدوها صفات جديدة مكنتش موجودة فيها قبل كده .. الفكرة قريبة شوية من التجارب النووية اللي هو انت عملت القنبلة النووية ورميتها علي اليابان وكسبت الحرب بس هو ايه اللي يجري يعني لو طورنا فيها شوية .. زودنا قدرتها التدميرية .. جربنا نوجهها بالليزر .. نفس الفكرة في الفيروسات اللي هو انت بتحاول تطورها وتزود من قدرتها علي إنها تعدي البشر عشان يمكن لو لا قدر الله حصلت طفرة جينية طبيعية للفيروس يبقي معاك العلاج ليها من دلوقتي .. أبحاث Gain of Function من أكتر الأبحاث العلمية خطورة لإنك حرفياً بتلعب بالنار ومفيش في العالم كله غير 3 معامل بس بيعملوها .. اتنين في أمريكا ومعمل ووهان في الصين .. سنة 2017 الملحق المخابراتي في السفارة الأمريكية في العاصمة الصينية بكين عرف إن بيتعمل تجارب Gain of Function في معمل ووهان واتعملت لجنة دبلوماسية أمريكية لزيارة المعمل واللجنة دي كتبت تقريرين حذرت فيهم إن الإجراءات الأمنية في معمل ووهان مش أحسن حاجة في الدنيا ومحتاجة تزيد .. التقارير دي اتبعتت لمدير CIA اللي زي الشطور خدها زي ما هي كده ومن غير ما يقرأها حتي حطها في الدرج.
وسط الشغل بتاع الأبحاث دي حصلت غلطة ما محدش عارف بالضبط هي ايه خلت ان عدد من الباحثين الصينيين اللي شغالين في المشروع بدأوا يتعبوا وجالهم دور برد جامد شوية أعراضه هي هي أعراض Covid-19 وفي الغالب واحد فيهم عدي حد وهوبا الفيروس خرج عن السيطرة .. اللي خلي الناس تمسك في كلام البيت الأبيض إن الكلام ده طلع زي ما قلتلك في إبريل 2025 .. يوم 25 يناير 2025 طلع كلام مش رسمي من ناس قريبة من وكالة المخابرات المركزية الأمريكية CIA إن تقدر تقول كده مؤسسة المخابرات الأمريكية مبقتش مستبعده فكرة إن يكون Covid-19 فعلاً اتسرب من معمل وميكونش فيروس حصله تحور جيني طبيعي .. خليني أرجعك بالشريط تاني لورا أكتر .. يوم 28 فبراير 2023 مدير مكتب التحقيقات الفيدرالي (كريستوفر راي) كان أول مسئول أمني أمريكاني يطلع أصلاً يقول إن يا جماعة الخير أيوه فيه احتمال إن يكون Covid-19 فعلاً متسرب من معمل.
سامعك يا اللي بتحب نظريات المؤامرة وبتفرك في كرسيك وإنت بتقرأ الكلام ده بس أنا عايزك تستهدي بالله وتعرف حاجة وهي إن الكلام اللي طلع من البيت الأبيض ده له احتمال من اتنين .. يا اخواتك في الصين اللي معهد ووهان للفيروسات كانوا شغالين في بحث عادي من بتوع الجامعات دي .. يا إما البحث ده كان عسكري ضمن برنامج الحرب البيولوجية اللي بيكون تحت إشراف وزارة الدفاع .. بسبب الاحتمالين دول فانا عايزك تعرف معلومتين مهمين أوي:
- أول معلومة ودي خاصة بالاحتمال الأولاني إن Gain-of-Function Research اللي كان بيتعمل علي فيروس كورونا ونتج عنه إن الفيروس بدون قصد انتقل للبني أدمين فده فيه مشكلة بسيطة إنك لو صدقت كلام الصينيين فالدكتورة (شي زينجلي Shi Zhengli) مديرة معهد ووهان للفيروسات بتحلف بايمانات المسلمين والمسيحيين واليهود إن النسخة من الفيروس اللي هم بيشتغلوا عليها في الأبحاث مش هي النسخة الأصلية للفيروس انما دي نسخة زي ما تقول كده دايت منه ملعوب في جيناتها عشان متبقاش قاتلة أو تنتقل للبشر .. تاني .. ده لو انت حتصدق كلامها .. معلومة خدها مني وحطها علي جنب يمكن تنفعك بعدين .. الناس اللي بتقول إن Covid-19 ده فيروس طبيعي نتج عن تحور جيني بيقولوا إن أول حالة ظهور للفيروس بثوبه الجديد كانت في سوق بيع لحوم وخضار اسمه هوانان .. حزر فزر السوق ده فين؟ .. يدوبك بالعربية نص ساعة من معهد ووهان للفيروسات.
- ثاني معلومة ودي خاصة بالأحتمال الثاني إن الأخوة بتوع الحرب البيولوجية لما بيلاقوا نفسهم زهقانين مش لاقيين حاجة يعملوها فيقرروا يعملوا فيروس جديد فهم قبل ما يعملوا الفيروس لازم يعملوا الترياق أو Antidote بتاعه .. معني إن الناس دي عملت فيروس Covid-19 كفيروس حربي ولسبب ما لا يعلمه إلا الله فلت منهم وانتقل للبني أدمين فكان أول حاجة يعملوها إنهم ينزلوا الترياق اللي المفروض جاهز فوراً للناس بس ده محصلش .. فيا اما فعلاً الاحتمال ده صادق وساعتها كل الجنرالات اللي ماسكين برنامج الحرب البيولوجية في وزارة الدفاع عايزين يتعدموا في ميدان عام يا إما أصلاً النظرية دي فشنك والفيروس مكنش مشروع حربي ولا نيلة .. علي الناحية الثانية برده احقاقاً للحق فالخطوات اللي عملتها الحكومة الصينية أول ما ظهر فيروس كورونا من حظر للنشر واسكات لاصوات الناس اللي بتتكلم عن هو الفيروس ده ظهر ليه بتخليك تحس من جواك إن يمكن الحكومة الصينية بتداري علي الغلطة بتاعة جنرالات وزارة الدفاع.
خليني أختم معاك بإني اقولك إن في لعبة السياسة تبقي جدع وحتوصل فيها لو إنت من الناس اللي ما بتصدق تلاقي جنازة تشبع فيها لطم .. فترة رئاسة أبوحنان الأولانية كانت من 2017 لحد 2021 يعني في عز ما Covid-19 كان طايح فينا .. المهم زي ما قلتلك من شوية أول مسئول رسمي أمريكاني يطلع قدام الناس يقول إن فيه احتمال ولو ضعيف إن الفيروس يكون فعلاً متسرب من معمل كان مدير FBI والكلام ده في 2023 .. (ترامب) بصفته كان الرئيس وقت ما الفيروس ظهر جاله تقارير مبدأية من CIA بتقول إن في وقت ظهور أول حالة لفيروس كورونا في سوق هوانان كان فيه 3 دكاترة في معهد ووهان للفيروسات محجوزين في العناية المركزة بأعراض هي هي أعراض كورونا والحكومة الصينية مخبية تفاصيل حالة الدكاترة الثلاثة .. (ترامب) خد الكلام ده اللي زي ما قلتلك كان في تقارير مخابرات أولية مش مؤكدة وطلع شبه اتهم الصين رسمي بإنها هي اللي مسربة الفيروس .. ومش بس كده .. وزارة الخارجية بدأت تفتح تحقيق رسمي في الموضوع .. هوبا (ترامب) خسر الإنتخابات وجه جدو (بايدن) اللي أول حاجة عملها إن لغي التحقيق اللي بتعمله وزارة الخارجية عشان في 2023 يطلع تقرير من CIA يقول إن (ترامب) كان عنده حق .. طبعاً (ترامب) قضاها كعب داير وقتها علي القنوات عشان يعمل فيها المعلم (حسن شحاته) ويقول أنا صح أنا صح والموقف ده كان واحد من النقاط اللي (ترامب) بني عليها حملته الإنتخابية ضد (كامالا هاريس) في انتخابات 2024 اللي هو كسبها.
لحد دلوقتي محدش عارف الحقيقة فين .. لا الصين لقت الوطواط أو البانجولين أو ايا كان الحيوان اللي خلقه ربنا اللي نقل أول حالة Covid-19 للبشر .. ولا هم سامحين بلجنة تحقيق دولية تروح تشوف هو فعلاً الفيروس طلع من معمل ووهان للفيروسات ولا الموضوع كله هجص .. ولإن في غياب المعلومة المؤكدة الهبد بيتزايد بمعدل تصاعدي فالنقاش أو الخلاف اللي المفروض يبقي علمي مبني علي حقائق وبراهين وأدلة تحول لخناقة سياسية بين أبوحنان وانصاره اللي شايفين الصين دي أكبر عدو لأمريكا قصاد التيار الليبرالي جوه أمريكا اللي شايف بشكل غريب إن أي محاولة لاتهام الصين بإنها خبت الحقيقة وإن الفيروس فعلاً طلع من معمل فده بشكل ما يعتبر عنصرية تجاه الأسيويين .. الخناقة اللي كان المفروض تبقي بين دكاترة بقت خناقة بين شوية معاتيه كل اللي يهمهم هو تشوية صورة الطرف الثاني بغض النظر هو مين صح ومين غلط.
المصادر:
- مقالة بعنوان On the Controversies Surrounding the Lab-Leak Theory of COVID-19 نشرت في موقع المعمل الوطني للطب National Laboratory of Medicine وده لينك المقالة الأصلية:
On the Controversies Surrounding the Lab-Leak Theory of COVID-19 – PMC - مقالة بعنوان Covid origin: Why the Wuhan lab-leak theory is so disputed نشرت في موقع هيئة الإذاعة البريطانية BBC وده لينك المقالة الأصلية:
Covid origin: Why the Wuhan lab-leak theory is so disputed
