حنكمل كلامنا عن الموضوع اللي بدأناه اللي هو (زين الدين زيدان) أو الشيخ (زيدان) زي ما ناس بتحب تتريق عليه .. الحقيقة إن سبب التريقة علي (زيدان) هو زي ما كلنا عارفين حظه إن في الماتشات الكبيرة الفرق اللي بتلاعبه سبحان الله الحظ بيقف قدامها و بيتصابلها لاعبين مهمين أو إن التحكيم يقف وراه زي ما حصل في ماتش النص نهائي لبطولة Champions League قدام نادي بايرن ميونيخ الألماني .. إنت من حقك تتريق أو تضحك علي الكوميكسات اللي بتطلع علي (زيدان) زي ما إنت عايز بس اللي حنتكلم عنه النهاردة هو موضوع جد شوية و هو عن حاجة عملها (زيدان) خلت الدنيا ماشية معاه زي السكينة في الحلاوة و الحاجة دي كتير من المدربين بيحاولوا يعملوها بس بتفرقع في وشهم .. الحاجة دي هي سياسة تدوير اللاعبين أو Rotation اللي هي إنك متلعبش ماتشين ورا بعض بنفس التشكيل .. الحقيقة إن (زيدان) وصل لمرحلة إنه بقي أستاذ و رئيس قسم في الRotation وعشان تشوف ده بنفسك خليني أرجعك ليوم 15 إبريل 2017.
يوم السبت 15 إبريل 2017 كان المفروض إن ريال مدريد يلاعب نادي سبورتينج خيخون علي أرضهم اللي بيسموه إستاد المولينون El Molinon اللي يعتبر أقدم إستاد بيتلعب عليه ماتشات في الدوري الإسباني السنة دي .. حط نفسك للحظة كده مكان (زيدان) .. الماتشات نازله ترف فوق دماغك .. إنت قبل ماتش سبورتينج خيخون ب3 أيام لعبت ماتش الذهاب في دور ال8 من بطولة Champions League قدام بايرن ميونيخ و كسبته بنتيجة 2-1 و عندك ماتش العودة يوم الثلاثاء .. يوم السبت اللي وراه عندك ماتش الكلاسيكو ضد برشلونة علي أرضك .. معندكش حل غير إنك تلعب ماتش سبورتينج خيخون باللاعبين الإحتياطي و تريح تشكيلتك الأساسية لماتش بايرن ميونيخ .. ده كلام الناس العاقلين اللي دارسين بره و جوه.
فعلاً من ضمن تشكيلة ريال مدريد اللي لعبت ماتش الذهاب ضد بايرن ميونيخ ملعبش منهم غير قلبين الدفاع بس في ماتش سبورتينج خيخون .. من أصل 11 لاعب مفضلش غير (سيرجيو راموس Sergio Ramos) و (ناتشو Nacho) والسبب في إنهم هم اللي لعبوا إن قلبين الدفاع التانيين مصابين سواء (رافاييل فاران Raphael Varane) عشان عنده إصابة في العضلة الخلفية أو (بيبي Pepe) اللي عنده إصابة في ضلوعه .. باقي ال9 لاعبين كلهم ولا واحد فيهم شارك في ماتش سبورتينج خيخون .. ودي مكنتش أول مرة (زيدان) يعمل فيها كده .. (زيدان) يعتبر أول مدير فني لنادي يكون بينافس علي لقب الدوري الإسباني La Liga ويفضل يغير من تشكيلة فرقته كل ماتش بالشكل ده.
كلنا عارفين إيه اللي حصل .. ريال مدريد كسب ماتش سبورتينج خيخون 3-2 و خسر الكلاسيكو بنفس النتيجة بجون في الثواني الأخيرة جابه (ليونيل ميسي Lionel Messi) وده خلي ريال مدريد يتساوي في عدد النقاط مع برشلونة و له ماتش مؤجل بس برشلونة بقي هو المتصدر بفارق الأهداف .. يوم الأربعاء (زيدان) كان عنده ماتش مصيري ضد فريق ديبوتريفو لاكورونيا وكان لازم ريال مدريد يكسب الماتش ده .. تفتكر (زيدان) يعمل إيه؟
تاني قام عامل Rotation .. قعد (كريستيانو رونالدو Cristiano Ronaldo) علي الدكة عشان كان مرهق من ماتش الكلاسيكو .. قعد (رونالدو) علي الدكة في ماتش هو مينفعش ميكسبوش قدام فريق ديبورتيفو لاكورونيا اللي أحب أفكرك إنه كسب برشلونة بنتيجة 2-1 .. الغريب إن ريال مدريد كسب الماتش ده 6-2 .. أداء الريال كان مفيهوش غلطة لدرجة إن المدير الفني لنادي ديبورتيفو لاكورونيا و إسمه (بيبي ميل Pepe Mel) خرج بعد الماتش قال إنه كان معجب جداً بأداء ريال مدريد في الماتش رغم إن تشكيلة الريال كانت كلها من اللاعبين الإحتياطي اللي هو سماهم Real Madrid B ونقلت عنه جريدة El Pais الإسبانية إنه قال: “انا حبيت أوي إني أتفرج علي أداء ريال مدريد B عن إني أشوف أداء ريال مدريد A .. إنك تكسب ريال مدريد B أصعب بكتير من إنك تكسب ريال مدريد A”.
إنت ممكن تكون من الناس المقتنعة بإن (زيدان) فعلاً محظوظ بس اللي حنحاول نوصله ليك من المقالة دي إن الحظ عامل مهم في النجاح اللي حققه (زيدان) مع ريال مدريد الموسم ده بس فيه عوامل تانية أهمها سياسة Rotation أو تدوير اللاعبين .. (زيدان) من أول ما النص الثاني من الموسم بدأ وهو شاف إن عنده مشكلة كبيرة .. هو دلوقتي في مرحلة خروج المغلوب من Champions League و كمان في الدوري كل نقطة بيخسرها ممكن تكلفه اللقب في الأخر .. عشان كده هو قرر يغير من اللاعبين بتوعه كل ماتش .. سياسة التدوير دي لو متعملتش صح ممكن تبوظ الدنيا .. الأساس بتاع (زيدان) إنك لو بتلاعب فرقة ضعيفة في الدوري علي أرضها فهو لازم يريح لاعيبته الأساسيين وده كان الأساس اللي بني عليه سياسة Rotation .. خد عندك ماتش غرناطة في الدوري علي أرضهم كمثال .. هو ريح 9 من التشكيلة الأساسية والإتنين الأساسيين الوحيديين اللي لعبوا الماتش ده كانوا (سيرجيو راموس) و (كاسميرو Casemiro) وريال مدريد كسب الماتش ده 4-0.
نجاح سياسة التدوير دي له مقياس واحد يتقاس عليه .. هو إنت لو لعبت بتشكيلة من الإحتياطيين أداءك حيبقي وحش مقارنة بتشكيلتك الأساسية ولا لا؟ .. لو كانت الإجابة لا يبقي إنت شغال زي الفل و الRotation بتاعك مضبوط وده اللي قدر (زيدان) يحققه .. سياسة التدوير بتاعته كانت ماشية الله ينور لدرجة إن جريدة Marca الإسبانية عملت إستطلاع رأي علي الWebsite بتاعها سألت الناس هم بيحبوا يتفرجوا علي ريال مدريد B أكثر و لا ريال مدريد A؟ وده يوصلنا للسؤال اللي بعد كده: هو إزاي (زيدان) لعبها صح كده؟ و الأهم هو إيه الفرق بين ريال مدريد A و ريال مدريد B؟
ريال مدريد B ده تقدر تقول إنه مصدر فخر و مصدر إحراج ل(زيدان) و لإدارة نادي ريال مدريد كلها .. ده فريق مكون من 11 لاعب إحتياطيين اللي هم (كيكو كاسيلا Kiko Casilla) في حراسة المرمي .. (فابيو كوينتراو Fabio Coentrao) و (ناتشو) و (فاران) و (دانيلو Danilo) في خط الدفاع .. (ماتيو كوفاتيتش Mateo Kovacic) و (جيمس رودريجيز James Rodriguez) و (إيسكو Isco) في خط الوسط .. و الهجوم مكون من (ماركو أسونسيو Marco Asensio) و (لوكاس فاسكيز Lucas Vazquez) و (ألفارو موراتا Alvaro Morata) .. التشكيلة دي كلها مكونه من لاعبين دوليين وكلهم مثلوا منتخبات بلادهم و لو حسبت ثمن و تكلفة ال11 لاعب دول علي بعض حتلاقي نفسك بتتكلم عن فريق واقف علي ريال مدريد ب255.5 مليون يورو .. عشان بس أحطك في الصورة .. الماتش القبل الأخير لريال مدريد في الدوري الإسباني كان قدام فريق سيلتا فيجو و اللي بفكرك إنها فرقة وصلت نص نهائي بطولة Europa League و خسرت من فريق مانشستر يونايتد .. تشكيلة سيلتا فيجو اللي لاعبت ريال مدريد وخسرت 4-1 إتكلفت علي بعضها 75.5 مليون يورو يعني فريق سيلتا فيجو بلاعيبته الأساسيين و الإحتياطي أقل من ال80 مليون يورو اللي ريال مدريد دفعهم عشان يشتري (جيمس رودريجيز) اللي هو أساساً لاعب خط وسط إحتياطي ضمن تشكيلة كاملة من الإحتياطيين.
بس في نفس الوقت الفريق الإحتياطي ده أو زي ما الإعلام الإسباني بيسميه ريال مدريد B مكون من أسامي لاعبين نجوم بس عايزين يثبتوا نفسهم .. بص علي (ألفارو موراتا) .. ده مهاجم لعب عدد ماتشات أقل بكتير من (كريم بنزيمه) المهاجم الأساسي ورغم كده سجل 6 أهداف أكثر منه .. بص علي صانع الألعاب (جيمس رودريجيز) اللي تقدر تقول مبروك لمانشستر يونايتد إنهم خلصوا صفقة إنتقاله ليهم .. علي الناحية التانية عشان نكون منصفين ففيه رأي بيقول إن طبيعي يكون أداء ريال مدريد B أحسن بكتير من ريال مدريد A .. طبيعي إنهم لما يلاعبوا فريق ديبورتيفو لاكورونيا يكسبوه 6-2 أصل قوة فريق ديبورتيفو لاكورونيا متجيش حاجة جنب قوة فريق بايرن ميونيخ أو أتليتيكو مدريد أو برشلونة.
قد يقول قائل طب ما ريال مدريد مش هو النادي الوحيد اللي بيحب يشتري في لاعبين و يخزنهم علي الدكة .. ليه بيعملوا كده متفهمش .. بس اللي عمله (زيدان) مختلف شوية .. اللي حصل إنه وزع حمل الماتشات علي اللاعبين بتوعه كلهم .. عشان برده أحطك في الصورة .. فيه 20 لاعب في ريال مدريد لعبوا أكثر من 1000 دقيقة في ماتشات الدوري الإسباني الموسم ده .. وقبل ما تهرش في شعرك عشان تحاول تستوعب ده معناه إيه خليني أفهمك:
فريق تشيلسي اللي كسب الدوري الإنجليزي Premier League الموسم ده المدير الفني الإيطالي بتاعهم (أنتويو كونتي Antonio Conte) مش من نوعية المدربين اللي بيحب سياسة ال Rotation ومش بيحب يغير من تشكيلته .. يمكن السبب في كده إن الموسم ده تشيلسي مكنش بيلعب في أي بطولة أوروبية بس هو قدر يحقق لقب الPremier League بفريق شبه ثابت .. 13 لاعب بس قدروا يكسروا حاجز ال1000 دقيقة لعب طول الموسم .. ومش بس تشيلسي .. فريق زي بايرن ميونيخ اللي هو كمان كسب الدوري الألماني Bundesliga وعلي عكس تشيلسي شاركوا في بطولة Champions League تلاقي إن المدير الفني بتاعهم (كارلو أنشيلوتي Carlo Ancelotti) معاه 16 لاعب بس هم اللي كسروا حاجز ال1000 دقيقة لعب .. وبالمرة نجيبلك سيرة يوفينتوس و موناكو اللي كسبوا لقبي الدوري الإيطالي و الفرنسي الموسم ده .. تلاقي إن 14 لاعب بس من فريق موناكو كسروا حاجز ال1000 دقيقة في مقابل 17 لاعب في يوفينتوس.
سياسة Rotation اللي مشي عليها (زيدان) الموسم ده مع ريال مدريد مش بس خلت إن مفيش لاعب في تشكيلة الفريق ميلعبش إنما كمان الفريق كله تقريباً سجل أهداف .. فيه 19 لاعب في تشكيلة ريال مدريد جابوا أهداف في الدوري الإسباني الموسم ده وده رقم كبير جداً خصوصاً لو عرفت إن فريق برشلونة اللي سجل له أهداف في الدوري الإسباني 15 لاعب بس مع العلم إن برشلونة معتمد بشكل شبه أساسي علي الثلاثي الهجومي (ليونيل ميسي Lionel Messi) و (نايمار Neymar) و (لويس سواريز Luis Suarez).
طب هل معني كده إن مفيش ولا مدير فني جرب سياسة Rotation دي في كل أندية أوروبا الكبيرة إلا (زيدان)؟ يعني هو الوحيد أبو العريف يعني اللي بيفهم أوي كده؟
الحقيقة لا لإن (لويس إنريكي Luis Enrique) هو كمان الموسم ده حاول يجرب سياسة Rotation دي مع برشلونة بس فرقعت في وشه .. قبل ما الموسم ده ما يبدأ هو طلع قال تصريح صحفي لجريدة Diario AS الإسبانية قال فيها إنه شايف إن التشكيلة اللي تحت إيده دلوقتي هي أحسن تشكيلة في تاريخ نادي برشلونة .. جري الشريط كده الموسم كله تلاقي إن من أصل 6 صفقات عملتهم إدارة برشلونة الموسم ده مفيش إلا المدافع (صامويل أوميتي Samuel Umitit) اللي تقدر تسميه صفقة ناجحة .. الحق يقال إن ده الموسم الثاني ل(لويس إنريكي) مع برشلونة و خلال الموسم الأول له السنة اللي فاتت هو كان بيغير من تشكيلته زي ما البنات بتغير من شكل مكياجها قبل ما تكون خارجة مشوار .. الرجل ده في أول 29 ماتش له مع برشلونة الموسم اللي فات غير تشكيلته 29 مرة يعني مفيش ولا مرة لعب ماتشين ورا بعض بنفس التشكيلة وده سببله مشاكل كتير من ضمنها محاولة تمرد من (ميسي) شخصياً بس لما (لويس إنريكي) عقل كده وبدأ يفهم راسه من رجله و ثبت تشكيلته في النص الثاني من الموسم و ربنا كرمه وحقق الثلاثية.
ودي النقطة اللي محتاجة تكون مفهومة كويس .. مفيش حد حقق النجاح اللي حققه (زيدان) الموسم ده وهو بيعمل Rotation كتير أوي كده .. (لويس إنريكي) حقق الثلاثية لما بدأ يثبت تشكيلته .. في موسم 1968-1969 تلاقي إن فريق بايرن ميونيخ الألماني حقق لقب الBundesliga لما لعبوا ب13 لاعب بس طول الموسم يعني ال11 لاعب الأساسيين تقريباً متغيروش خالص .. (زيدان) حقق الدوري الإسباني رقم 33 في تاريخ ريال مدريد بفريق مفيش حد فيه ملعبش وده في حد ذاته إنجاز لإن ريال مدريد نفسه مش متعود علي كده .. بمعني:
أخر مرة ريال مدريد حقق لقب الدوري الإسباني كان من 5 سنين لما (جوزيه مورينيو Jose Mourinho) كان هو المدير الفني تلاقيه حقق اللقب ب8 لاعبين بس لعبوا أكثر من 30 ماتش في الموسم يعني تقريباً (مورينيو) مكنش بيغير حد من تشكيلته الأساسية .. المرة اللي قبلها اللي ريال مدريد يحقق لقب الدوري الإسباني كان في موسم 2007-2008 والمدير الفني بتاعهم وقتها كان الألماني (بيرند شوستر Bernd Schuster) تلاقيه كسب الدوري ب9 لاعبين بس شاركوا في أكثر من 30 مباراة في الموسم .. أخر مرة ريال مدريد حقق ثنائية الدوري و الChampions League وده نفس الإنجاز اللي (زيدان) بيحاول يحققه الموسم ده والكلام ده كان سنة 1958 تلاقي إن 10 لاعبين بس شاركوا في أكثر من 20 مباراة في الموسم و أحب أفكرك إن وقتها الدوري الإسباني كان مكون من 16 فريق بس.
(زيدان) الموسم ده عمل حاجه متعملتش قبل كده .. سواء كنت مقتنع إنه مدرب بيفهم أوي أو إنه مدرب محظوظ أوي .. الرجل ده خد Risk عالية إنه يطبق سياسة Rotation بالشكل ده و بأداء مش بيتأثر خالص .. خد عندك مثال بسيط وهو (كريستيانو رونالدو) .. ناس كتير متعرفش إن في أخر 6 ماتشات لريال مدريد في الدوري الإسباني بره أرضهم فيه منهم 5 ماتشات (رونالدو) أساساً مسافرش مع الفريق عشان (زيدان) يريحه .. هل تفتكر إن أداء ريال مدريد إتأثر؟ .. انت تعرف إن في ال5 ماتشات دول ريال مدريد جاب 21 جون؟ .. زمان كانت الناس شايفه إن الحاجه الوحيدة اللي حتمنع (رونالدو) إنه يلعب كل ماتشات ريال مدريد في الموسم كله هو الإصابات .. بس (زيدان) بقي بيقعده علي الدكة عشان يريحه و مهم أوي إنك تحيي (زيدان) إنه أقنع (رونالدو) إنه يوافق من غير مشاكل … و الأهم إنك تكون مقدر إن القرار ده خلي (رونالدو) يتألق في الماتشات الحاسمة .. الرجل ده في ماتشي الذهاب و العودة ضد بايرن ميونيخ في دور ال8 من بطولة Champion League جاب 8 جوان و دي حاجة (ميسي) شخصياً معملهاش.
(زيدان) الموسم ده قدر يثبت إنك ممكن تحقق لقب الدوري و إنك تحقق لقب Champions League مرتين ورا بعض عن طريق بإنك تلعب بتشكيلتين مختلفين خالص مش لإنك مضطر إنما لإنك عايز تريح لاعيبتك .. قول عليه شيخ .. قول عليه محظوظ .. بس أنا شخصياً حرفع قبعتي و أسقف ل(زيدان) لإنه أثبتلنا كلنا إنه مدير فني بيفهم.
المصدر:
مقالة إسمها Plan B: How Zinedine Zidane Has Found Another Way of Winning with Real Madrid نشرت في Website إسمه Bleacher Report وده لينك المقالة الأصلية:
http://bleacherreport.com/articles/2710058-plan-b-how-zinedine-zidane-has-found-another-way-of-winning-with-real-madrid
