خلينا نبدأ المقالة دي بسؤال واضح و بسيط: تفتكر ليه إدارة نادي ليفربول الإنجليزي قررت تشتري (محمد صلاح)؟
الإجابة بمنتهي البساطة إن النادي بقاله 27 سنة بيحاول يكسب لقب الدوري الإنجليزي الممتاز اللي بيسموه بريمير لييج Premier League و هم شايفين فعلاً إن (صلاح) ممكن ينهي سنين الإنتظار دي .. هم شايفين ده أوي لدرجة إنهم مترددوش يخلوا (صلاح) هو أغلي صفقة في تاريخ النادي مع العلم إن قبل ما يشتروا (صلاح) أغلي صفقة عملوها كانت سنة 2011 لما إشتروا المهاجم الإنجليزي (أندي كارول Andy Carroll) مقابل 35 مليون جنيه إسترليني .. صحيح إن الصفقة دي فشلت و اللاعب مقدرش يثبت نفسه في ليفربول بس اللي عايزك تتأكد منه إن المدير الفني لنادي ليفربول (يورجين كلوب Jurgen Klopp) إشتري (صلاح) عشان حاجة واحدة بس هي إنه يكسب الPremier League .. و ده اللي إحنا حنركز عليه كلامنا في المقالة دي هو إننا نفهمك مبررات نادي ليفربول إنه يدفع 39 مليون جنيه إسترليني عشان يشتروا (صلاح) و ليه هم شايفين إنه هو الجزء اللي ناقص في حل لغز ليه ليفربول مش عارف يكسب لقب الPremier League؟
ليفربول إشتروا (صلاح) من نادي روما الإيطالي اللي هو أساساً إشتراه من نادي تشيلسي الإنجليزي الصيف اللي فات .. رسمياً (صلاح) قعد في نادي تشيلسي سنتين و نص خلال السنتين و نص دول ملعبش غير 6 ماتشات بس .. ده خلي إدارة تشيلسي تعيره في الأول لنادي فيرونتينا الإيطالي و بعد كده أعاروه لنادي روما و اللي إشتراه رسمياً من تشيلسي .. فترة (صلاح) في الدوري الإيطالي مختلفة خالص عن الفترة اللي قضاها في إنجلترا .. زي ما قلتلك في تشيلسي مكنش بيلعب بس في إيطاليا كان معدله التهديفي هو جون في كل ماتش تقريباً و ده معدل مذهل لسببين: السبب الأول إنك بتتكلم عن الدوري الإيطالي يعني ملوك الدفاع و الثاني إنك بتتكلم عن جناح مش لاعب مهاجم صريح .. ده يخليك تسأل سؤال منطقي: طب لو (صلاح) كويس أوي كده كلاعب كرة قدم ليه هو فشل في تشيلسي؟
نادي تشيلسي إشتري (صلاح) من نادي بازل السويسري في يناير 2014 مقابل 16 مليون جنيه إسترليني .. و هم إشتروه أساساً لإن (صلاح) علّم عليهم لما فريق بازل لاعب تشيلسي في بطولة Champions League و (صلاح) جاب فيهم جونين رايح جاي في ماتش الذهاب و ماتش العودة و الموسم اللي قبله (صلاح) علّم علي نادي توتنهام بس في بطولة Europa League .. لما تشيلسي إشتري (صلاح) هم إشتروا لاعب سريع و مباشر ومهاري و رغم كل ده مكنش بيلعب .. ليه؟ .. لإن تشيلسي وقتها كان عندهم (إيدن هازارد Eden Hazard) و (وليان Willian) .. وقتها المدير الفني لتشيلسي كان (جوزيه مورينيو Jose Mourinho) و اللي كان بيلعب ب(وليان) كصانع ألعاب و ب(هازارد) كجناح .. فطبيعي إن (مورينيو) كان بيفضّل إن اللي يلعب علي الجناح التاني يكون لاعب دفاعي شوية عشان يضبط نص الملعب و عشان كده هو كان بيقعد (صلاح) علي الدكة و يلعب ب(راميريز Ramires) .. ده بيخلي السؤال اللي كان المفروض تسأله لنفسك مش هو ليه (صلاح) فشل في تشيلسي؟ السؤال اللي المفروض تسأله هو ليه تشيلسي إشتروا (صلاح) أصلاً طالما هم مش محتاجينه؟
(صلاح) فضل مستحمل يقعد علي الدكة باقي الموسم علي أمل إن الموسم اللي وراه ربنا يفرجها .. في الموسم الثاني له مع تشيلسي إشتروا (سيسك فابريجاس Cesc Fabregas) يعني لاعب صانع ألعاب تاني فده خلي (مورينيو) يخلي (أوسكار Oscar) الله يمسيه بالخير يلعب في مركزه الأساسي كجناح و بدل ما (صلاح) بقي بديل (راميريز) لقي نفسه بديل ل(راميريز) اللي هو بديل ل(أوسكار) .. (صلاح) مفشلش في الPremier League في تجربته مع تشيلسي لإنه أساساً محدش إداله الفرصة إنه يثبت نفسه.
لما (صلاح) لقي نفسه بيلعب كتير لما راح إيطاليا رجع تاني (صلاح) بتاع بازل .. الفكرة إن مش (صلاح) جاب 35 جون في 71 ماتش لعبهم في الدوري الإيطالي سواء مع فيرونتينا أو روما .. الفكرة إنه عمل 20 تمريرة حاسمة Assist .. الفكرة إن وجوده في الملعب لوحده بيولع خط الهجوم و ده اللي (يورجين كلوب) عايزه و شايف إن (صلاح) حينقله لليفربول و ده اللي حيجيب للنادي لقب الPremier League .. بمعني:
ليفربول عندهم مهاجم إسمه (دانييل ستوريدج Daniel Sturridge) .. زيه زي (صلاح) هو بدأ الCareer بتاعته في تشيلسي و معرفش يثبت نفسه و ليفربول إشتراه .. لو إتكلمنا بحق ربنا ف(ستوريدج) كلاعب كرة قدم مهاراته أعلي من (صلاح) بس ده مكنش كفاية إنه يلعب كأساسي تحت (كلوب) لإن اللي يهم (كلوب) حاجة تانية جنب الأهداف و الAssists و الحاجة دي إن المهاجمين بتوعه يضغطوا علي مدافعي الخصم و يقطعوا الكرة في نص ملعب الخصم .. الأرقام بتاعة (صلاح) بتقول إنه علي الأقل بيقطع الكرة مرة في كل ماتش و بيعمل 0.5 إعتراضة في الماتش في نص ملعب الخصم .. إنت ممكن تقول لنفسك بس إنه يقطع الكرة مرة واحدة في الماتش الواحد مش حاجة كبيرة أوي يعني و إنت قد يكون عندك حق بس اللي مهم تفهمه إنك كمهاجم تقطع الكرة من مدافع في منطقة جزاءه فده بيخلق خطورة كبيرة .. (صلاح) معندوش مشكلة إنه يكون هو أول مدافع في الفريق .. لو قارنت مثلاً أرقام (صلاح) بأرقام (سايدو مانيه Saido Mane) تلاقي إن معدله يقطع الكرة 0.9 مرة في كل ماتش و بيعترض الكرة من المدافعين في نص ملعبهم 0.3 مرة يعني أرقامه أسوأ بكتير من أرقام (صلاح) .. إذا كنت إنت متخيل إن (مانيه) كان متألق في ليفربول الموسم اللي فات فتخيل (صلاح) حيعمل إيه و لو الإتنين لعبوا مع بعض فمين الدفاع اللي يقدر يقف قدامهم؟
ليفربول مشتروش (صلاح) عشان يبقي بديل (مانيه) برده خلي بالك .. هما ممكن يلعبوا علي الأطراف و (فيليبي كوتينيو Philippe Coutinho) يلعب في النص ده في حالة إن (كلوب) حيلعب بطريقة 4-3-3 .. أما لو حب يلعب بطريقة 4-4-2 فممكن يلعب برأسي حربة هما (صلاح) و (ديفوك أوريجي Divock Origi) .. ليه؟ .. الموسم اللي فات (صلاح) شكل ثنائي هجومي مع (إيدن دزيكو Eden Dzeko) في روما و (صلاح) خلق ل(دزيكو ) 22 فرصة سجل منهم 7 أهداف و دي ثاني أقوي شراكة هجومية في كل دوريات أوروبا الكبيرة بعد الثنائي (عثمان ديمبيلي Ousmane Dembele) و (بيير إيميريك اوبيميانج Pierre-Emrick Aubameyang) اللي بيلعبوا في نادي بروسيا دورتموند الألماني.
عودة (صلاح) لPremier League حتخلي ناس كتير تسأل يعني هو حيعرف يؤدي كويس لما يلعب في ماتش الذهاب ضد فريق ستوك سيتي مثلاً علي ملعبهم لما الدنيا تكون بتشتي؟ .. بس لو إنت بتسأل نفسك السؤال ده أحب أفكرك باللي عمله (صلاح) في كأس أمم افريقيا اللي فاتت في ماتش غانا و إزاي قدر يقود المنتخب إنه يكسب 1-0 علي ملعب زي الزفت .. لو (صلاح) عرف يلعب في ملعب معفن زي ده فخليك واثق إنه حيتألق في إنجلترا.
في أخر المقالة أنا حابب بس أخدك في جولة سريعة في تاريخ ليفربول إنه يدفع فلوس كتير في صفقات فاشلة علي أمل إنهم يكسبوا الPremier League .. مش عشان حاجة غير إني أفهمك إنهم شايفين (صلاح) فعلياً هو أول صفقة كويسة يعملوها من سنة 1992:
أخر مرة نادي ليفربول يحقق فيها لقب الدوري الإنجليزي كانت سنة 1990 لما كسبوا ماتشهم ضد فريق كوينز بارك راينجرز QPR بنتيجة 2-1 و الماتش ده إتلعب علي أرضهم في إستاد أنفيلد Anfield … سنة 1992 إتعمل الPremier League بالصورة اللي إنت تعرفها دلوقتي .. خلال ال25 سنة دول حاولت إدارة ليفربول إنها تصرف اللي قدامها واللي وراها عشان تكسب الPremier League و مفيش فايدة برده .. الناس دول دافعين لحد دلوقتي 909.981 مليون جنيه إسترليني .. زود عليهم ال39 مليون جنيه إسترليني اللي دفعوهم في (صلاح) تلاقي إن النادي دافع لحد دلوقتي 950 مليون جنيه إسترليني و متوقع إن مع باقي الصفقات اللي حيعملوها الموسم ده فالرقم يتجاوز المليار جنيه إسترليني.
بداية الصرف خالص كانت سنة 1992 مع بداية إنشاء النسخة الحالية من Premier League .. في السنة دي هم دفعوا مليون جنيه إسترليني مرة واحدة لنادي واتفورد عشان يشتروا حارس المرمي (ديفيد جيمس David James) و الموسم خلص و هم دافعين 4.7 مليون جنيه إسترليني من غير أي نتيجة .. سبب الفشل إن الإدارة كانت جايبه أسطورة النادي (جرايم ساونس Graeme Souness) عشان يبقي مدير فني بس الرجل صحيح إنه أسطورة من أساطير النادي بس كان مدير فني علي قده أوي .. فضل حال ليفربول في النازل كده لحد سنة 1994 لما جابوا المدير الفني (روي إيفانز Roy Evans).
سنة 1995 أغلي صفقة عملها النادي كانت شراء المهاجم (ستان كاليمور Stan Collymore) مقابل 8.5 مليون جنيه إسترليني .. الرجل ده قعد في النادي سنتين معملش حاجة أكتر من إنه جاب هدف الفوز في ماتش نيوكاسل اللي خلص بنتيجة 4-3 .. سنة 1997 النادي إشتري (بول إينس Paul Ince) مقابل 4.2 مليون جنيه إسترليني علي أمل إن الصفقة دي تزرع الرغبة في الفوز في الفريق بس الصفقة دي بقت ملهاش أي ستين لازمة سنة 1998 لما إدارة النادي عينت المدير الفني الفرنسي (جيرار أوليير Gerard Houllier) اللي أساساً كان شايف إن (بول إينس) ملوش مكان في تشكيلته .. (جيرار أوليير) كان معجب أوي باللاعبين الإنجليز و أكبر صفقتين عملهم كانوا شراء المهاجم (إيميل هيسكي Emile Heskey) من نادي ليسيتر سيتي مقابل 11 مليون جنيه إسترليني و صفقة إنتقال (نيك بارمبي Nick Barmby) من نادي إيفرتون مقابل 6 مليون جنيه إسترليني .. بس ولا صفقة من دول جابت نتيجة.
إختيارات (جيرار أوليير) في صفقاته بدأت تجيب نتيجة بعدين لما دفع 2.5 مليون جنيه إسترليني عشان يشتري المدافع (سامي هيبيا Sami Hyypia) و جاب كمان (جاري مكاليستر Gary McAllister) ببلاش .. صفقتي إنتقال (ماركوس بابل Markus Babbel) و (ياري ليتمانين Jari Litmanen) خلت ليفربول يكسب بطولة كأس إنجلترا سنة 2001 و كانوا مركز ثاني في الPremier League سنة 2002 .. أخر صفقتين عملهم (جيرار أوليير) كانوا كوارث الحقيقة بإنه دفع 10 مليون جنيه إسترليني عشان يشتري (الحاج ضيوف) و 4.7 مليون جنيه إسترليني عشان يشتري (ساليف دياو Salif Diao) و بعدها إدارة ليفربول مشته خالص.
سنة 2005 لما إدارة ليفربول جابت المدير الفني الإسباني (رافا بينيتيز Rafa Benitez) فأول صفقتين عملهم كان إنه إشتري المايسترو (تشابي ألونسو Xabi Alonso) و الجناح (لويس جارسيا Luis Garcia) مقابل 16.7 مليون جنيه إسترليني و الإتنين دول كانوا أهم لاعبين عنده في الفريق اللي في السنة دي حقق لقب الChampions League .. سنة 2007 النادي دفع 20.2 مليون جنيه إسترليني عشان يشتروا المهاجم (فيرناندو توريس Fernando Torres) بس تقدر تقول إن الفلوس مبقتش بتطلع إلا بطلوع الضرس من بعد ما الثنائي الأميريكي (توم هيكس Tom Hicks) و (جورج جيليت George Gillett) إشتروا النادي .. لما (بينيتيز) إضطر إنه يبيع (توريس) لتشيلسي إشتري مكانه (روبي كين Robbie Keane) مقابل 19 مليون جنيه إسترليني و لما (ألونسو) راح ريال مدريد حاول يعوضه ب(ألبيرتو أكويلاني Alberto Aquilani) مقابل 17.7 مليون جنيه إسترليني و اللي كان بيتصاب أكتر ما بيلعب و برده مجابوش نتيجة و مكانوش بدايل تعوض غياب اللي مشوا.
بعد كده (توم هيكس) و (جورج جيليت) باعوا النادي لمؤسسة فينواي الرياضية Fenway Sports Group أو FSG إختصاراً و الكلام ده كان سنة 2011 و مش بس الإدارة اللي إتغيرت إنما كمان المدير الفني لإنهم جابوا أسطورة النادي (كيني داجليش Kenny Dalglish) .. الناس دي لما جت مكنش عندها أي مشكلة إنهم يصرفوا علي الصفقات بس المشكلة إنهم كانوا بيصرفوا غلط .. أول صفقة ليهم كانت الصفقة الفاشلة بتاعة شراء (أندي كارول) و سبحان الله هم إشتروه ب35 مليون جنيه إسترليني و إشتروا معاه (لويس سواريز Luis Suarez) من نادي أياكس أمستردام الهولندي ب22.8 مليون جنيه إسترليني بس شوف الفرق بين الإتنين كان عامل إزاي.
صفقات FSG الفاشلة كملت حتي بعد ما شالوا (كيني داجليش) و عينوا بداله (بريندون رودجرز Brendon Rodgers) لإن الإتجاه الجديد كان إنهم يصرفوا فلوس علي لاعبين لسه صغيرين في السن و لسه مستواهم مش حلو أوي و برده سبحان الله كلهم كانوا صفقات فاشلة يمكن بإستثناء صفقتي (دانييل ستوريدج) من تشيلسي في يناير 2013 مقابل 20 مليون جنيه إسترليني و صفقة (فيليبي كوتينيو) من نادي إنترميلان الإيطالي .. سنة 2014 اللي هو أول سنة النادي يوصل فيها لبطولة Champions League صرفوا 116.85 مليون جنيه إسترليني علي صفقات فاشلة طحن و بدل ما يحافظوا علي إنهم يتأهلوا لChampions League أنهوا الموسم في المركز السادس.
المصادر:
- مقالة بعنوان Liverpool Have Spent £910m But Have yet to Win The Premier League .. Can Mohamed Salah’s £39m Arrival Finally End Their Long-Running Drought? نشرت في جريدة The Daily Mail البريطانية و ده لينك المقالة الأصلية:
http://www.dailymail.co.uk/sport/football/article-4626564/Can-Mo-Salah-end-Liverpool-FC-s-Premier-League-drought.html - مقالة بعنوان Mohamed Salah May Have Flopped at Chelsea But He Can Fly at Liverpool نشرت في جريدة The Guardian البريطانية و ده لينك المقالة الأصلية:
https://www.theguardian.com/football/2017/jun/23/mohamed-salah-chelsea-liverpool-signing-roma?CMP=Share_AndroidApp_Add_to_Facebook
