فيه خناقه انت يمكن متعرفش عنها حاجه بين الصين و اليابان في افريقيا و عشان تفهم الخناقه دي خليك معايا في الكام جمله الجايين .. الصين عشان تشتري اصوات دول افريقيا في اي تصويت يحصل في الامم المتحده فهي بقت بتروح للدول الافريقيه تسلفها فلوس عشان الدول دي تعمل مشاريع بنيه تحتيه هي محتاجاها .. المشكله ان الصين مش بتقول للدول دي خدوا فلوس و اعملوا المشاريع اللي انتوا نفسكوا تعملوها و لو مش عارفين وانا حساعدكوا في اي مشاكل هندسيه لو احتجتوا .. لا مش ده اللي بيحصل .. ليكن مثلا المشروع اللي عايز يتعمل هو مطار .. اللي بيحصل ان الصين بتودي شركات المقاولات و الاستشارات الهندسيه بتاعتها بالعمال الصينيين بالمواد الخام بالاوناش اللي بتروح من الصين لحد البلد الافريقيه و المشروع يتعمل و يخلص .. لا الدوله الافريقيه استفادت .. ولا هي شغلت ناس .. ولا اي حاجه خالص .. المطار بيشتغل و المفروض ان المطار بيجيب فلوس من الرحلات اللي بتروح و تيجي و جزء من الفلوس اللي بتيجي بتروح في سد الدين اللي الدوله الافريقيه خدته من الصين .. عاده الصين بتعمل مشروع ضخم فشخ و مكلف فشخ في بلد مش محتاجه المصاريف دي كلها .. تلاقيهم عملوا مطار يستوعب مليون مسافر في السنه في بلد اساسا مفيش حد بيروحها .. فجاه بيجي معاد السداد تلاقي البلد الافريقيه مش عارفه تسدد اللي عليها .. الصين بتقولها ولا يهمك يا حبيبه قلبي اعتبري ديونك كلها اتدفعت في مقابل انك تسيبلي المطار او الميناء او الطريق اللي انا عملته ليكي بحق انتفاع 99 سنه مثلا و البلد الافريقيه غصب عنها بتحط جزمه في بقها و توافق .. ده في الاقتصاد بيسموه Debt-Trap او فخ الدين بس في عرف الشارع بيتسمي قله ادب و وساخه و سرقه .. سريلانكا مثال صارخ علي ده .. دي بلد الصين بنت فيها ميناءين بحريين و الصين خدتهم وضع يد لما البلد معرفتش تسدد الديون اللي عليها.
اظن السؤال دلوقتي هو .. طب ايه اللي جاب سيره اليابان و ايه اللي ممكن اليابان تعمله؟ .. اللي ممكن اليابان تعمله انها تدي مساعدات مش ديون بس المشكله ان اليابان داخله الخناقه دي متاخر اوي ومش بس مشكله التاخير هي اللي قارفه اليابانيين في عيشتهم .. اليابان بلد ديموقراطيه بمعني ان مينفعش رئيس الوزراء (تشينزو ابي Shinzo Abe) يروح لشركه زي Sony او Toshiba يقولهم روحوا اعملوا مشاريع في افريقيا بالامر المباشر .. الصين وضعها مختلف .. اي اشاره من طويل العمر يطول عمره يزهزه عصره ينصره علي مين يعاديه رئيس الصين (جي جينبنج Xi Jingping) بتعتبر امر مينفعش شركه صيني ايا كانت هي مين متنفذوش .. بس يمكن اللي اليابان بتعرضه علي الدول الافريقيه ان لو جيت ساعدتك تعملي مشروع فانا حخليكي تجيبي ولاد البلد هم اللي يشتغلوا في المشروع مش بجيب العمال بتوعي من اليابان .. المواد الخام بتيجي من جوه البلد مش زي ما الصين بتعمل .. فيه خناقه تكسير عظام بين اليابان و الصين و نصيحه حطوا عنيكوا علي الخناقه دي وانا لو مكان الحكومه المصريه انا ممكن استغلها و اكل الشهد بس للاسف مين في حكومتنا بيقرا.
المصدر:
مقاله بعنوان Japan cannot stop China from owning Africa – Its too late .. نشرت في مجله Forbes وده لينك المقاله الاصليه:
https://www.forbes.com/sites/panosmourdoukoutas/2019/09/05/japan-cannot-stop-china-from-owning-africa-its-too-late/#471853472c09
