تحديث إتعمل يوم 17 سبتمبر 2021 .. السلطان (قابوس بن سعيد) توفي إلي رحمة الله تعالي يوم 10 يناير 2020.
كلامنا النهاردة حيكون عن سلطنة عمان و مينفعش نتكلم عن سلطنة عمان من غير ما نتكلم عن السلطان (قابوس) .. ده بالضبط زي ما مينفعش نجيب سيرة الفول من غير ما نجيب سيرة الفلافل .. اه إسمها فلافل مش طعمية بس مش دي القضية دلوقتي .. إنت في حياتك مش حتشوف حد زي السلطان (قابوس) .. الرجل ده فعلاً ملامحه مش بتكبر في السن .. بصله علي أي صورة علي Google حتلاقي ملامح وشه متغيرتش سواء الصورة متاخدة سنة 1995 أو 2015 .. القانون هناك بيقول إن صورة السلطان لازم تتعلق في كل مكان .. لو ليك حد عايش هناك إسأله حتلاقيه بيقولك إن مفيش محل و لا مكتب إلا لازم يكون معلق صورة السلطان (قابوس) .. إنت بتتكلم عن بلد فيها السلطان هو الدولة و الدولة هي السلطان.
لما إتعرف إن السلطان (قابوس) أصيب بمرض السرطان و كل 6 شهور بياخد جلسة علاج كيماوي بقي كل 6 شهور لازم يطلع في التليفيزون لمجرد إنه يوري للناس وشه عشان يعرفوا إنه لسه عايش .. هنا إنت تبدأ تحس بإن فيه حاجة غلط .. في كل الصور اللي حتلاقيها علي Google حتشوف السلطان (قابوس) لابس نفس العمة البيضاء اللي علي فكرة كان بيلبسها أبوه الله يرحمه (سعيد بن تيمور) اللي (قابوس) عمل عليه إنقلاب سنه 1970 و نفاه للهند و عاش في مدينة دلهي لحد ما مات .. جري الشريط 47 سنة و بص علي حال سلطنة عمان دلوقتي حتلاقيها في نفس الوضع المزري اللي (قابوس) عمل الإنقلاب علي أبوه عشان ينقذ البلد منه .. يعني الإبن شاف الأب بيبوظ في البلد و مش عارف يحكمها قام عامل عليه إنقلاب و نفاه و مسك هو عشان ينقذ الوضع و بعد 47 سنة إكتشف إنه وصل البلد لوضع يمكن أسوأ من اللي أبوه وصلها له .. مع إننا عشان نكون صرحاء مع نفسنا السلطان (قابوس) كان شغال زي الفل في بداية حكمه.
هو لما حكم وعد بإن حكمه حيبقي عامل زي عصر النهضة في أوروبا .. هو أنهي العبودية و انا عارف إنك ممكن تكون مش مستوعب إن في سلطنة عمان لحد سنة 1970 كان عندهم عبيد .. حاول متقفش قدام النقطة دي كتير .. أبو السلطان (قابوس) كان رجل رجعي شوية تحس إنه كان لسه عايش أيام قريش .. يعني لحد ما أطيح به كانت عمان كلها مفيهاش إلا 3 مدارس بس و السلطان (قابوس) خلاهم 900 مدرسة .. برده لحد ما أطاح بوالده سلطنة عمان كلها علي بعضها مكنش فيها إلا 15 كيلومتر من الطرق المتسلفتة بس و هو زود 30,000 كيلومتر .. إذن أرقام الرجل في بداية حكمه بتتكلم عنه.
في المقالة دي حنحاول نجاوب علي سؤال واحد: هو إيه اللي حصل لسلطنة عمان بالضبط؟
عمان تعداد سكانها 4 مليون نسمة و صحيح ده 4 أضعاف مثلاً عدد سكان قطر بس برده يعتبر نسبياً رقم قليل .. لما السلطان (قابوس) حس بالخطر علي كرسيه بعد ما ثورات الربيع العربي بداية من سنة 2011 بقت بتوقع حكام العرب أسرع ما البلح بيقع من النخل لما يستوي .. فهو عشان يهدي شوية من الغليان في الشارع وعد بإن الإنفاق الحكومي حيزيد بنسبة 70% علي مدي ال3 سنين بداية من 2011 لحد 2014 .. المواطن العماني بدأ يهدأ و يسكت و ميعترضش و يبطل يطالب بإن يبقي له رأي لحد ما حصل الإنهيار الرهيب في أسعار بيع برميل النفط سنة 2014 و هنا السلطان (قابوس) مبقاش قادر يدي المواطن نفس مستوي الرفاهية اللي هو عوده يعيش فيه.
الوضع الإقتصادي لسلطنة عمان سيء بس مش زي الزفت .. سنة 2015 العجز في الموازنة العامة كان 15% من الدخل القومي اللي بيسموه Gross Domestic Product أو GDP إختصاراً .. و الرقم ده نط ل21% سنة 2016 .. بس بدل ما الحكومة أو خلينا نقول بدل ما السلطان (لإن خلينا نكون صرحاء هناك السلطان هو الحكومة) يقرر إنه يمسك إيده شوية علي المصاريف لإنه شايف سعر برميل البترول بيقع و بقاله 3 سنين بيصرف ببذخ من غير حساب و عجز الموازنة عمال يعلي كإنه حساس الحرارة بتاع عربية ماشيه في عز الحر و بتسرب زيت موتور إذا به بيصرف أكتر و علي حاجات بلده مش محتاجاها .. علي فكرة الموضوع حيحلو عن كده.
سنة 2016 قرر السلطان (قابوس) إنه يضاعف نسبة الجزء المخصص له من الميزانية العامة .. يعني الرجل ده لو بيخش للبلد مبلغ معين فهو بصفته سلطان بياخد نسبة كمصروف خاص له يصرفه زي ما هو عايز .. فهو قرر رغم المشاكل اللي الإقتصاد بتاع بلده بيعاني منها إنه يضاعفها .. ليه؟ .. محدش عارف .. مش كده و بس .. هو وعد بإنه يزود مرتبات الموظفين و راح إشتري عدد من مقاتلات Typhoon البريطانية الصنع رغم إنه فعلياً زي ما حتشوف كمان شوية مش محتاجهم.
مع المصاريف الزيادة اللي ملهاش مبرر و الدخل القومي اللي عمال يقل بسبب إنخفاض سعر بيع برميل النفط و عجز الموازنة اللي عمال يزيد فبقي فيه إحساس إن عمان مش حتقدر تسدد الفلوس اللي عليها .. في شهر مايو اللي فات وكالة تقييم الديون S&P خفضت تصنيفها لقيمة الديون العمانية بإنها Junk Status يعني بإختصار اللي ناوي يسلف العمانيين فلوس يعمل حسابه إنهم مش حيقدروا يسددوا الفلوس اللي إستلفوها .. بمعني أخر .. الإقتصاد العماني وصل لمرحلة صعبة لدرجة إن لو حصل و العمانيين حبوا يستلفوا فلوس من حد مش حينفع يستلفوا إلا من صندوق النقد الدولي IMF لإنه الجهة الوحيدة اللي ممكن تسلفهم عشان حيجبرهم يعملوا إصلاحات إقتصادية صعبة زي ما حصل مع مصر لما إستلفنا منهم 12 مليار دولار و أديك شايف الوضع الإقتصادي بقي عامل إزاي عندنا.
الإعلام العماني لما بيجي يهدي الناس بيقولوهم متقلقوش قريب أوي سعر بيع برميل النفط حيعلي من 50 دولار للبرميل ل80 دولار للبرميل و ده الرقم اللي لازم سعر بيع برميل النفط يوصله عشان بس سلطنة عمان تقدر تسدد الديون اللي عليها مش إنها ترجع زي الأول .. لو حبيت تفهم هو الإعلام العماني جاب كلام ده منين فأقدر أقولك إن التفسير الوحيد إنهم إما بيضربوا الودع أو بيشموا علي ظهر إيدهم .. أما بقي لو انت مواطن عماني و مش مقتنع بالكلام ده فالأمن العماني شغلته إنه يقبض عليك و يتكلموا معاك بطريقتهم عشان يقنعوك بطريقتهم برده إنك تصدق اللي بيقوله الإعلام .. و هناك الأمن مبيرفقش معاه انت إبن مين لإنهم من كام شهر قبضوا علي قاضي عادي جداً.
سنة 1995 السلطان (قابوس) خرج للناس بحاجة سماها رؤية 2020 إنه وعدهم ان إن شاء الله لما تيجي سنة 2020 الإقتصاد العماني مش حيبقي معتمد كلياً علي عائدات النفط .. بإختصار هو سنة 1995 وعد العمانيين بإن بلدهم حتبقي عامله زي دبي دلوقتي .. عارف إنك بتهرش في شعرك بتقول لنفسك هو مش ده نفس البق الحمضان اللي (محمد بن سلمان) بيقوله للسعوديين اليومين دول فأيوه هو هو نفس الكلام .. بس السنة اللي فاتت طلع قال لشعبه سوري يا جماعة انا قلتلكوا إنها رؤية 2020 بس إحنا إتأخرنا شوية و حنخليها رؤية 2040 .. لو كانت رؤية 2020 دي إتعملت صح و العمانيين مشوا عليها زي الكتاب ما بيقول فكان المفروض إن دلوقتي في 2017 عائدات النفط تكون 40% بس من إجمالي الدخل القومي في حين إن عائدات النفط كانت سنة 1995 تمثل 66% من إجمالي الدخل القومي العماني .. حزر فزر عائدات النفط دلوقتي سنة 2017 تمثل كام من إجمالي الدخل القومي العماني؟ .. أكتر من 80% حضرتك.
من حقك تسأل نفسك طب هو ليه العمانيين سابوا نفسهم للدنيا كده؟ .. يعني محدش شاف إن المركب بتغرق و حاول ينصح السلطان بحاجة؟ .. الحقيقة إنك لازم تسأل نفسك إزاي تنصح واحد معين نفسه سلطان و رئيس وزراء و وزير خارجية و وزير دفاع و وزير مالية و محافظ البنك المركزي بإنه غلطان؟ .. بجد والله .. إزاي تعترض و بصفتك إيه؟ .. حتي مجلس الشوري بتاعه يعتبر مجلس صوري بيقول للسلطان حاضر و نعم و أمين كمان.
اللي زود من الأزمة اللي بتعيشها سلطنة عمان دلوقتي هو الخلاف بينها و بين دول مجلس التعاون الخليجي خصوصاً المملكة العربية السعودية و الإمارات العربية المتحدة و الخلاف ده متمثل في هاتريك من 3 نقط:
• السعودية و الإمارات مش عاجبهم خالص قوة العلاقة بين سلطنة عمان و بين إيران.
• السعودية و الإمارات برده مش عاجبهم إن سلطنة عمان طنشتهم خالص في إنها تشارك في العملية العسكرية في اليمن و بدل ما انت مش ناوي تحارب في اليمن دافع دم قلبك عشان تشتري مقاتلات Typhoon ليه يا بني ادم؟
• الأهم من كده إن سلطنة عمان بتتعامل مع السعودية و الإمارات بخصوص أزمة قطر زي شخصية (عاطف) في فيلم الناظر لإن العمانيين قريبين من قطر و مش عاجبهم اللي بيحصل مع قطر و مش ناويين يغيروا من تعاملهم مع قطر.
فيه علامات للمصيبة الجاية اللي ممكن تحصل لسلطنة عمان لو محدش لحق الدنيا .. مطار مسقط الدولي كان المفروض يفتتح السنة دي و إتأجل إفتتاحه لسنة كاملة زيادة .. القطاع الخاص العماني مبقاش قادر يستوعب الالاف الخريجين الجدد اللي بيتخرجوا من الجامعات العمانية كل سنة .. الناس بدأت تتكلم تاني .. صحيح الحكومة قدرت تخرس الأصوات اللي إعترضت علي إرتفاع أسعار الوقود في فبراير اللي فات .. الناس خايفة من حاجتين: إما إن الضعف اللي وصلتله عمان حيغري دول الخليج إنها تفرض سيطرتها عليها أو إن يحصل للسلطان (قابوس) نفس اللي حصل لوالده.
المصدر:
مقالة بعنوان The Sultanate of Oman is taking a kicking نشرت في مجلة The Economist و ده لينك المقالة الأصلية:
https://www.economist.com/middle-east-and-africa/2017/07/08/the-sultanate-of-oman-is-taking-a-kicking?fbclid=IwAR3i11kTUa3pccBjQvpcOrWGMCVLErNTA5I742qFNuJnc5kcgSKrI9yJYQ0
