لينك التسجيل الصوتي علي ساوند كلاود:
https://on.soundcloud.com/4qEjN
اللي منكوا شاف فيلم Pearl Harbor فهو عدي عليه اسم الأدميرال (إيسوروكو ياماماتو Isoroku Yamamoto) قائد القوات البحرية اليابانية وده الرجل اللي خطط وقاد بنفسه الهجوم علي ميناء بيرل هاربور واللي يعتبر الشرارة اللي دخلت أميركا للحرب العالمية الثانية .. الغارة دي حصلت يوم 7 ديسمبر 1941 ومن بعدها ومفيش أمريكاني إلا وكان بيسب ويلعن في الرجل ده .. الأمريكان كانوا شايفينه شيطان لابس بدلة عسكرية .. شايفينه مجرم حرب شن غارة إرهابية علي ناس نايمة في حالها ملهاش ذنب ومعملتش حاجة بس هي دي مشكلة الأمريكان إنهم دايماً شايفين نفسهم ملايكة وأبرياء .. علي رأي أمي الحمير مبتشمش بعضها .. اللي ححكيه النهاردة هو الحقيقة مش تفاصيل غارة بيرل هاربور قد ما اللي ححكيه هو إزاي الأمريكان قتلوا الأدميرال (ياماموتو) .. ده حقيقي .. من قبل ما الأمريكان ينفذوا عملية إغتيال (أسامه بن لادن) الله يرحمه بإعتباره عدو فهم من زمان أوي في إبريل 1943 نفذوا عملية شبه عملية إغتيال (بن لادن) بس لإغتيال يمكن أهم شخص في المؤسسة العسكرية اليابانية .. مش كده وبس .. دول سموا العملية: العملية إنتقام Operation Vengeance.
إغتيال (بن لادن) أو إغتيال (ياماموتو) أو أي غارة جوية بتتنفذ بطيارة بدون طيار Drone بتسمع عنها بتتعمل في العراق أو أفغانستان أو اليمن أو أي حتة فيها وجود عسكري أميريكي بتمشي بنفس الترتيب .. التكنولوجيا هي اللي بتفرق بس طريقة العمايل ثابتة .. زي بالضبط محشي الكوسة .. زمان كنا بنقور الكوسة بإيد المعلقة لحد ما طلعلتنا المقورة .. بس فضلت حلة المحشي بتتعمل بنفس الطريقة .. الموضوع بيبدأ إن المخابرات بتلقط رسالة .. سواء بقي رسالة موبايل .. مكالمة تليفون .. إشارة راديو .. المهم إن وسط العدو فيه حد منهم بيبلغ حد تاني معلومة عن هدف إنت عايز تخلص منه .. بمجرد ما بتلقط الرسالة دي وتفسرها بتبدأ تعرف إن اللي إنت عايز تخلص منه حيبقي موجود في اليوم الفلاني في المكان الفلاني فبتبدأ تتصرف.
الكلام ده كان في مارس 1943 وفي الوقت ده الوضع بالنسبة لليابان كان زي الزفت .. كانت لسه مجموعة جزر جوادالاكانال Guadalcanal وقعت في إيد الأمريكان بعد مقاومة أسطورية من اليابان .. الإنتقاد اللي كان بيتوجه للجنرالات اليابانيين إن كل واحد فيهم قاعد تحت المروحة في مكتبه وبيبعت عساكره يموتوا .. (ياماموتو) حب يبعت رسالة لعساكره إن القادة بتوعكوا معاكوا علي الجبهة .. هو إختار يزور قواته اللي موجودة في جزيرة بوجينيفيل Bougainville في المحيط الهاديء عشان يرفع شوية من الروح المعنوية لعساكره .. بس المشكلة إن مينفعش قائد القوات البحرية يروح كده في زيارة مفاجئة .. معقولة سيادة اللواء يجي من غير تشريفة .. مش لازم يبقي فيه حراسة؟ .. لازم إستقبال رسمي .. لازم عساكر تحيي العلم .. ليلة كبيره أوي سعادتك .. ودي كانت أول غلطة إن إتبعتت رسالة بالراديو من قيادة القوات البحرية في طوكيو لقائد القوات اليابانية في الجزيرة إن الأدميرال شخصياً جاي فافرشوله الأرض ورد.
يوم 13 إبريل 1943 إتبعتت رسالة للقوات اليابانية في الجزيرة متقال فيها إن الأدميرال جاي إمتي ومعاه حراسة قد إيه .. اليابانيين من ناحيتهم بيقولوا إنها كانت رسالة متشفرة بشفرة معقدة إسمها JN-25 .. علي الناحية الثانية اليابانيين مكانوش يعرفوا إن المخابرات الأميريكية كانت فكت الشفرة دي من زمان وده كان سبب في الخساير اللي كانت نازلة ترف فوق دماغ اليابانيين في الحرب وهو إن الأمريكان كانوا عارفين هم اليابانيين حيعملوا إيه قبل ما اليابانيين يعملوه .. قال يعني عشان اليابانيين يأمنوا نفسهم زيادة هم عدلوا شوية علي الشفرة بتاعتهم وسموها JN-25D بس برده الرسالة بتاعة وصول (ياماموتو) كانت إترجمت في أقل من يوم.
المعلومة وصلت لقائد القوات الأميريكية في المحيط الهاديء الأدميرال (تشيستر نيميتز Chester Nimitz) واللي بمجرد ما عرفها طلع ورقة وقلم ومن نفسه ومن غير ما يرجع لحد إدي أوامره بتنفيذ عملية عسكرية لإغتيال (ياماموتو) .. أدميرال (نيميتز) بصفته قائد القوات الأميريكية كلها فالأمر راح من عنده لقائد الأسطول الأميريكي في المحيط الهاديء الأدميرال (وليام هالسي William Halsey) .. لما الأمر راح للناس اللي حتنفذه بصوا ل(وليام هالسي) وقولوا هو إنت دارس الكلام ده قبل ما تقوله؟
دلوقتي الطيارات اللي تحت إيد القوات البحرية الأميريكية واللي بتطير من علي حاملات الطائرات اللي في الخدمة يا إما طيارات F4F Wildcat أو طيارات F4U Corsair والإتنين مدي طيارانهم ميكفيش إنهم يطيروا 120 كيلومتر لحد جزيرة بوجينيفيل Bougainville اللي حيبقي فيها (ياماموتو) من جزيرة جوادالاكانال Guadalcanal اللي هي أقرب قاعدة بحرية أميريكية ويرجعوا تاني وطبعاً وقتها مكنش فيه فكرة إن الطيارات تتزود بالبنزين في الجو .. مفيش حل غير إنهم يستلفوا طيارات P-38G Lightning من تصنيع شركة لوكهيد مارتن Lockheed Martin واللي في الخدمة تحت إيد سلاح الجو الأميريكي .. ودي كانت مشكلة .. الطيارات اللي بتطير من علي حاملات الطائرات بتبقي طيارات خفيفة لإن مدرج الإقلاع والهبوط قصير بس عشان تجيب طيارة إتصممت إنها تطير من علي مطار طويل وتقول للطيار إتصرف وإطلع من علي حاملة طائرات فدي بتحتاج طيارين درجة أولي .. قالك بسيطة .. حنكلم القوات الجوية يسلفونا الطيارات بالطيارين اللي جامدين زحليقة دول وأسطوات في الطيران .. خد التقيلة اللي وراها.
عشان الطيارات متتلقطش بالرادار فلازم إنها تفضل طايرة بمحاذاة سواحل الجزر من أول جوادالاكانال لحد بوجينيفيل بحيث متبعدش عن الساحل بأكثر من 15 كيلومتر وتفضل طايرة علي إرتفاع ميعديش 15 متر من سطح البحر لمسافة بتوصل 120 كيلومتر .. طب أزيدك من الشعر بيت .. طيارات P-38G Lightning لا فيها رادار AWACS ولا أي رادار يخلي الطيار يبقي عارف هو رايح في أنهي داهية ولا حتي يعرف هي مين تبقي الطيارة اللي فيها (ياماموتو) ولا أي حاجة خالص .. هي علبة صاج مركبين عليها محركين وبتطير وخلاص .. وفي نفس الوقت الطيارين الأمريكان مينفعش يبقوا طايرين فوق الجزيرة علي أمل إن ربنا يفرجها عليهم ويلاقوا طيارة الأدميرال .. هم لازم يروحوا في نفس المكان والتوقيت اللي طيارة الأدميرال تكون فيه في الجو ومستعدة تهبط .. الحسبة اللي إتعملت معقدة بشكل إنت لا تتخيله .. السمعة المتاخدة عن (ياماموتو) إنه رجل ملتزم في مواعيده بس الله أعلم إيه اللي ممكن يحصل يومها ممكن يأخره .. الأمريكان مش عارفين هو الطيار بتاعه حياخد أنهي مسار فهم إضطروا يشموا علي ظهر إيدهم ويخمنوا .. حسبوا سرعة الرياح وحسبوا متوسطة السرعة اللي ممكن الطيارة اللي حيركبها الأدميرال حتبقي كام .. هم كانوا حاسبينها علي إنه حيركب قاذفة G4M Petty ودي تبقي القاذفة الأساسية في سلاح الجو الياباني وقتها .. بعد حسبة طويلة عريضة أغلبها تخمينات وأولها هبد وأخرها دعوة بإن ربنا يسترها قالوا إن (ياماموتو) حيكون فوق جزيرة بوجينيفيل الساعة 9:35 صباح يوم 18 إبريل 1943 .. ودي كانت من أكتر الهبدات اللي عملتها القوات الجوية الأميريكية في تاريخها وهم بيقولوا لنفسهم يا صابت يا خابت.
كمية الحاجات اللي كان ممكن تبوظ إنت لا تتخيلها بس رغم كل ده وبصدفة مبتحصلش إلا نادراً الطيارين الأمريكان وصلوا فوق الجزيرة الساعة 9:34 .. الأغرب إن الطيارين اليابانيين وصلوا الساعة 9:35 بالثانية .. الحاجة اللي الأمريكان فرضوها وهم عارفين إنها مستحيل تحصل حصلت والرجل وصل في معاده .. الوضع كان كالأتي .. فيه قاذفتين G4M Petty طايرين علي إرتفاع 1350 متر واحدة فيهم شايلة (ياماموتو) والثانية فيها رئيس أركانه الأدميرال (ماتومي أوجاكي Matome Ugaki) .. بيحمي الطايرتين سرب من 6 طيارات A6M Zero طايرين علي إرتفاع 450 متر فوق القاذفتين .. ده كان الهدف .. الأمريكان بقي بعتوا سرب من 18 طيارة P-38G Lightning منهم أربع طيارات حيهجموا علي الطيارة اللي فيها (ياماموتو) والباقي حيحموا الأربعة المهاجمين .. وهم رايحين فيه طيارتين من ال18 إتعطلوا وإضطروا يرجعوا .. ده كان معناه بدل ما كان عندك 14 طيارة حماية بقوا 12 بس.
عشان يحافظوا علي عنصر المفاجأة ال16 طيارة الأمريكاني طاروا علي إرتفاع 5400 متر وبمجرد ما شافوا الموكب بتاع (ياماموتو) هجموا .. الأربع طيارات اللي حتتولي الهجوم قسموا نفسهم مجموعتين كل مجموعة من طيارتين .. المجموعة الأولي حيهجموا الأول وبعدها بشوية المجموعة الثانية .. الطيارتين بتوع المجموعة الأولي واحدة منهم كان بيطير بيها كابتن طيار إسمه (توماس لانفيير جونيور Thomas Lanphier Jr) والثانية بيطير بيها ملازم أول طيار (ريكس باربر Rex Barber) .. وهم نازلين إكتشفوا حقيقة إنهم مش عارفين (ياماموتو) موجود في أنهي طيارة من الطيارتين G4M Petty فإضطروا إنهم يقسموا نفسهم كل واحد راح علي طيارة .. بس فجأة كام طيارة من الست طيارات A6M Zero إشتبكوا معاهم عشان يحموا القائد بتاعهم وده خلاهم يغيروا التكتيك من إن كل واحد يروح علي طيارة وبقي إن (توماس لانفيير جونيور) يشتبك هو مع طيارات A6M Zero في حين إن (ريكس باربر) يخلص هو علي الطيارتين.
واحدة من أكبر عيوب G4M Petty إنها خفيفة وتنك البنزين بتاعها مش محمي كويس فلو طيار مقاتل شاطر ممكن يضربها كذا طلقة في مكان تانك البنزين والطيارة كلها حتولع في الجو .. (ريكس باربر) تقدر تقول لعب حادي بادي كرنب زبادي وإختار واحدة من الطيارتين G4M Petty يبدأ بيها علي أمل إنها فعلاً هي اللي تكون شايله (ياماموتو) .. ضربها كذا طلقة دمرلها المحرك الشمال بتاعها وخلاها تقع في غابة فوق الجزيرة .. بعد كده هو راح للطيارة الثانية في الوقت اللي المجموعه الثانية من طيارت P-38G Lightning بدأت تهاجم وال3 طيارات إستلموا الطيارة G4M Petty لحد ما وقعوها في مياه البحر.
الحقيقة إن الأمريكان حظهم في العملية دي كان ولا حظ صاحبك في البلايستيشن اللي جاب فيك 4 جوان من هجمتين وإنت جايب جونين في نفسك .. مبدأياً كده الطيارة اللي وقعت في الغابة هي دي اللي كان فيها (ياماموتو) ومات في تحطمها مع باقي اللي كان في الطيارة وفيه فرقة بحث وإنقاذ لقت جثته ورجعوها اليابان وحرقوها زي ما التقاليد اليابانية بتقول ودفنوا رفاته في طوكيو وإتعمله ضريح مخصوص زرعوا فيه شجرتين بابايا لإنه كان بيعشق الفاكهة دي وفضل العساكر اليابانيين يعتنوا بالضريح بتاعه لحد ما الحرب خلصت .. الطيارة التانية اللي وقعت في البحر هي اللي كان فيها رئيس أركانه (ماتومي أوجاكي) ونجي والعساكر اليابانيين أنقذوه.
(ماتومي أوجاكي) فضل يخدم في القوات البحرية اليابانية لحد يوم 15 أغسطس 1945 في اليوم ده الإمبراطور (هيروهيتو Hirohito) أعلن إستسلام اليابان .. الأخ (ماتومي أوجاكي) بعدها بكام ساعة خد طيارة A6M Zero وطار بيها ورمي نفسه فوق سفينة أميريكية عشان ينتحر بطريقة الكاميكازي Kamikaze .. علي الناحية الثانية الأمريكان كانوا طايرين من الفرحة بس فضلت الخناقة علي مين اللي قتل (ياماموتو) وقيادة القوات البحرية قالت إنها حتقسم الشرف ده علي الإتنين طيارين (توماس لانفيير جونيور) و(ريكس باربر) مع إن ناس كتير بتقول إن (ريكس باربر) يستحق إنه ينول الشرف ده لوحده.
حتلاقي ناس كتير في أمريكا بتقول إحنا لما قتلنا (ياماموتو) دي كانت بداية هزيمة اليابان .. النقطة دي هم بيقولوها عشان ميتقالش عليهم إنهم لإغتالوه لإن كلمة إغتيال في عرف السياسة تعتبر كلمة أبيحة .. حاجة كده زي كلمة أحيه .. إحنا الإسكندرانية عادي عندنا بس القاهروية تحسهم بيتخضوا منها متفهمش ليه .. صحيح إن تخطيط وتنفيذ غارة بيرل هاربور بيخليها واحدة من أهم الغارات الجوية في التاريخ بس (ياماموتو) عك الدنيا بما فيه الكفاية بعدها ب6 شهور في هزيمة اليابان في معركة ميدواي Midway .. حيجي حد يقول يا فؤش بس الأمريكان كسبوا المعركة دي عشان المخابرات الأميريكية فكت شفرة الإتصالات اليابانية .. أمين .. بس برده أخطاء (ياماموتو) كانت صعبة أوي الصراحة وممكن أبقي أتكلم بشوية تفصيل عن معركة ميدواي دي لإنها فعلاً من أهم معارك الحرب العالمية الثانية وهي اللي دمرت كل حاملات الطائرات اللي كانت في إيد اليابان .. خساير اليابان في المعركة دي كانت كارثية وناس كتير بتقول إن (ياماموتو) جاله إكتئاب بعد اللي حصل وبقي مقتنع إن خلاص اليابان خسرت الحرب .. يمكن لو كان (ياماموتو) عاش كان حيدير المعارك اللي حصلت بعد كده في أواخر الحرب بشكل أفضل شوية بس برده مصير اليابان كان إتحسم قبل إغتياله.
إغتيال (ياماموتو) بيحطك قدام سؤال جديد .. هل إغتيال قائد في جيش معادي جريمة حرب ولا عمل مشروع؟ .. حط المقارنة دي قدامك .. دلوقتي الأمريكان جاتلهم معلومة إن قيادي معين في داعش مستخبي في بيت في سوريا .. بتطلع طيارة بدون طيار Drone تضرب صاروخ علي البيت تجيبه الأرض .. هنا إنت بعت طيارة عليها علم أميركا فوق دولة قانوناً مش في حالة حرب مع أميركا وضربت بيها واحد مش لابس زي عسكري عليه علم سوريا ومات في الغارة دي مدنيين ملهمش أي ذنب غير إنهم كانوا في الوقت الغلط في المكان الغلط .. علي الناحية الثانية (ياماموتو) كان لابس زي عسكري لبلد في حالة حرب ضد أميركا واللي قتله عساكر لابسين زي عسكري برده .. قانوناً الأمريكان معملوش حاجة غلط .. زي ما بالضبط لما الإسرائيليين إغتالوا المشير (عبدالمنعم رياض) الله يرحمه علي الجبهة .. بالقانون إنت متقدرش تقول عليهم عملوا حاجة غلط .. اللي أنا عايزك تعرفه إن الأمريكان نفسهم وهم بياخدوا قرار الإغتيال مكنش في دماغهم أصلاً السؤال بتاع هو إحنا اللي حنعمله ده يعتبر جريمة حرب؟ .. القرار طلع من قائد القوات الأميريكية في المحيط الهاديء وإتنفذ كأنه أي قرار عسكري عادي .. لا حصل إن القرار ده إحتاج موافقة الرئيس ولا إن وزارة العدل قالت هو القرار ده قانوني أو لا.
تظل عملية إغتيال الأدميرال (ياماموتو) في رأيي أنا الشخصي علي الأقل تعلمك درس مهم جداً وهو داري علي شمعتك تقيد .. أنا متفهم جداً فكرة التشريفة وإن التقاليد العسكرية دي حاجة مقدسة مينفعش نتجاهلها وإن سيادة اللواء لازم العساكر تديله إحترامه .. كل ده حلو لو إنت بلد في حالة سلم .. في الحروب في رأيي لازم كل التقاليد دي تترمي في الزبالة.
المصدر:
- مقالة بعنوان The shocking story of how the U.S. assassinated the admiral who planned Pearl Harbor .. نشرت في مجلة The National Interest وده لينك المقالة الأصلية:
https://nationalinterest.org/blog/buzz/shocking-story-how-us-assassinated-admiral-who-planned-pearl-harbor-40252
