كان يا مكان كان فيه حاجة إسمها الإتحاد السوفيتي .. علمه كان أحمر و في الركن الشمال فوق حتلاقي نجمة صفرا و تحتها مطرقة و منجل اللي كان الفلاحين بيحصدوا بيه القمح .. البتاع ده بقي دولة روسيا اللي كلنا عارفينها دلوقتي .. أه نسيت .. الأمريكان كانوا مرعوبين منه .. ده كده ملخص المعلومات اللي عند أغلبنا بخصوص الإتحاد السوفيتي واحد من أهم الإمبراطوريات في تاريخ البني أدمين .. الحقيقة انا مش بلوم حد من الجيل الصغير إنه ميعرفش حاجة عن الإتحاد السوفيتي لإن خلينا نكون صرحاء مع بعض انتوا أغلبكوا إتولد بعد سنة 1990 و لما وعيتوا علي الدنيا مكنش فيه حاجة إسمها إتحاد سوفيتي .. الجيل الجديد بيتعامل مع الإتحاد السوفيتي زي ما بيتعاملوا مع (أم كلثوم) الله يرحمها .. كان فيه واحده إسمها (أم كلثوم) وكانوا بيقولوا كان صوتها حلو .. غير كده مش محتاج أعرف حاجة.
النهارده حنحاول سوا نفسهم هو الإتحاد السوفيتي ده إتولد إزاي؟ .. يطلع إيه أصلا؟ .. و مين بقي (فلاديمير لينين Vladimir Lenin) و (كارل ماركس Karl Marx) اللي دايماً بنسمع سيرتهم من الناس اللي عامله نفسها مثقفة؟ .. فيه أسئلة كتير حتلاقيني بجاوب عليها طول ما انا بحكي القصة بس زي أي قصة في الدنيا بتتحكي لازم نبدأ من نقطة و النقطة اللي انا عايز أبدأ عنها هي سنة 1890.
في الوقت اللي مصر كانت تحت الإحتلال الإنجليزي وكان بيحكم مصر الأسرة العلوية اللي بدأت ب(محمد علي باشا) الكبير كانت روسيا برده بتحكمها أسرة ملكية هي أسرة (رومانوف Romanov) بس في السنة دي حصلت مجاعة ضربت روسيا و بسم الله ما شاء الله تعامل الحكومة مع المأساة دي كان زي تعاملك لما تخش إمتحان وانت مش مذاكر .. بتسيب الورقة فاضية .. الدولة مكنتش عارفه لا تخفف من تأثير المجاعة دي ولا عارفه تعيد إعمار البلد وبالتالي الناس بقت بتبص للقيصر .. هم كانوا بيسموه قيصر روسيا مش ملك روسيا .. و بتسأله هو حضرتك بتهبب إيه في عيشتك بس عشان نكون فاهمين؟ .. مهم برده تبقي مستوعب إن زي ما دايماً بقول المصايب مش بتيجي فرداني .. المصايب بتجمع نفسها في جروب واتس و بيرفوا فوق دماغ البني أدم مع بعض .. سنة 1894 بيوصل للحكم القيصر (نيكولاي الثاني Nicholas II) وده يبقي الملك (فاروق) الله يرحمه بتاع روسيا.
خدامك انا و العربية إن حكم بلد كبيرة زي روسيا مش حاجة سهلة بس في نفس الوقت انت فيك دماغ تعقل الأمور .. بلدك لسه طالعه من مجاعة .. فوق ده الثورة الصناعية بهدلت أووربا .. حاول تبص للثورة الصناعية زي ما إحنا بنبص دولقتي لتكنولوجيا الروبوتات Robotics .. دلوقتي انت لو عندك خط إنتاج شغال فيه 10 عمال فانا أقدر أبدلهم كلهم بRobot .. نفس الكلام في الثورة الصناعية .. المصانع بقت مش محتاجه تشغل ناس كتير زي زمان وده خلق أزمة كبيرة إن بقي عندك نسبة بطالة عمالة تزيد بشكل مفجع .. نقوم نسيب المشاكل دي كلها و لسبب لا يعلمه إلا الله (نيكولاي الثاني) يدخل بلده حرب ملهاش أي ستين لازمة مع اليابان سنة 1904 و روسيا خسرت الحرب دي بفضيحة سنة 1905 .. ميكس المصايب ده اللي هو مجاعة علي أزمة بطالة علي حرب خسرانة محدش عارف هي قامت ليه ومحدش كان عايز يحارب فيها خلي الأعصاب تفلت.
في يناير 1905 الناس نزلت الشارع .. (نيكولاي الثاني) تعامل مع الوضع زي ما أي حاكم ديكتاتور بيعمل لما بيلاقي شعبه هاج عليه .. إرميلي العيال دي في الحبس و اللي يقاوم إقتلوه .. مع أول ضحية يتقتل برصاص البوليس في المظاهرات الوضع خرج بره السيطرة .. مهم برده تبقي فاهم نقطة قبل ما نكمل .. أبو (نيكولاي الثاني) كان إسمه (أليكساندر الثاني) وده كان رجل حقاً و صدقاً يعني مفتري وده إترجم إنه كان لا يصلح إنه يبقي أب يربي عيال .. ده خلي (نيكولاي الثاني) كبر وهو عنده زي ما بنقول كده عقدة من أبوه أو Daddy Issues لإن صعب تبقي ولي العهد و تلاقي الناس بتقول في وشك إن أبوك القيصر بيقول عليك إنك رجل منسون .. معلش يعني انت كمان كام سنة حتبقي القائد العام للقوات المسلحة و تبقي سمعتك في القصر الملكي إن أبوك مش شايفك رجل أصلاً .. ده خلي حياة (نيكولاي الثاني) هي عبارة عن سعي مستمر إنه يثبت للناس إنه رجل أوي و إنه في الشدة شديد و في القوة أوي أوي .. يخش حرب مع اليابان و يخسرها .. مش عارف يدير بلده .. وفي الأخر لما شعبه يثور عليه يضرب عليه نار.
المظاهرات بقت كل يوم .. إضرابات في كل حتة .. البلد كانت رايحة في ستين داهية لحد ما في الأخر في أكتوبر 1905 (نيكولاي الثاني) قرر يجيب ورا .. الناس صحيت علي بيان أكتوبر October Manifesto وده عبارة عن شوية قرارات كان من ضمنها إقرار حقوق المواطنين و إن حيتكتب دستور هو أول دستور في تاريخ روسيا و كمان حيتعمل برلمان حيتسمي الدوما Duma .. كل ده جميل .. المشكلة إن لما حاكم يقرر يجيب ورا تحت الضغط الشعبي إن ناس كتير بتشوف إن كل التنازلات اللي هو قدمها مش كفاية .. إحنا شفنا ده بعنينا في ثورة يناير لما الرئيس (حسني مبارك) الله يرحمه طلع قال إنه حيستجيب لطلبات الثوار بس الثورة منتهتش .. ليه؟ .. عشان الثوار زيهم زي سمك القرش بمجرد ما يشموا ريحة الدم بيثوروا أكتر .. وهنا إحنا محتاجين نجيب سيرة بني أدم انت بتسمع عنه كتير الحقيقة .. (كارل ماركس).
صحيح الحكاية اللي بنحكيها دي أحداثها بتدور سنة 1905 بس (كارل ماركس) كان مات سنة 1883 يعني هو حيبقي معانا في القصة دي بروحه بس .. حاول تبقي فاهم إن (كارل ماركس) زيه زي كتاب و مفكرين كتير في تاريخ البني أدمين كانوا شايفين حاجة إحنا مش شايفينها .. (كارل ماركس) كان شايف إن حيجي اليوم اللي يحكم روسيا رجل مش مؤهل إنه يحكم و عنده عقد نفسية .. كان شايف إن لما الرجل ده يمسك الحكم فهو حيبقي مسئول عن إمبراطورية هو مش عارف يسيطر عليها .. كان شايف إن دي حتبقي فرصة إن الشعب هو اللي يحكم .. أفكار رومانسية بس الناس في روسيا لما جم يستخدموا الأفكار دي إتقسموا نصين .. نص بريء عامل زي شباب ثورة يناير بيحلموا باليوم اللي الناس البسيطة صوتها يتسمع وهي اللي تحكم .. و نص ثاني عايز يركب الموجة وعايز هو اللي يحكم وهنا حنجيب سيرة تاني شخص مهم جداً في قصتنا .. (فلاديمير لينين).
بيان اكتوبر محلش حاجة من مشاكل روسيا .. الحبر اللي إتكتب بيه البيان مخلاش (نيكولاي الثاني) فجأة جدير إنه يحكم روسيا .. بالعكس .. الدنيا فضلت تسوء و تسوء لحد ما جت الكارثة الكبري .. الحرب العالمية الأولي .. نرجع تاني لحتة إن المصايب مش بتيجي لوحدها .. مشكلة الحرب العالمية الأولي الكبيرة في رأيي الشخصي يعني بالنسبة للروس هي موقع العاصمة بيتروجراد اللي هي دلوقتي سانت بطرسبرج واللي هي يدوبك ساعة بالعربية من الحدود الألمانية الروسية و خليني أفهمك قصدي بإني أديط مثال علي كده نكسة يونيو 1967.
القاهرة بعيد عن قناة السويس و شبه جزيرة سيناء .. الناس اللي عايشة في البلد مكنتش دارية بحاجة عن المأساة و المصيبة اللي حصلت في النكسة و ده السبب إنهم نزلوا يرفضوا قرار التنحي بتاع (جمال عبدالناصر) الله يرحمه .. الوضع مكنش كده بالنسبة للروس في الحرب العالمية الأولي .. أهل العاصمة بقوا شايفين بعنيهم المعجنة اللي بتحصل .. العساكر المقتولة و المصابة بتيجي بالقطار لمحطة بيتروجراد من الجبهة و الناس بتتفرج .. لما يتقال في الصحافة اللي بتسمع كلام الحكومة إن روسيا بتكسب الحرب فالناس بتبقي عارفه إن ده كدب لإنهم شايفين بعنيهم الخساير .. وضع مستني إن الأعصاب تفلت .. و زي اللي حصل في يناير 1905 كلاكيت تاني مرة بس المرة دي في 23 فبراير 1917.
ده كان اليوم العالمي للمرأة .. في اليوم ده الستات اللي شغالين في المصانع نزلوا مظاهرة في شوارع بيتروجراد .. مظاهرة ناس كتير شافتها علي إنها مجرد مسيرة لشوية ستات هرموناتها نقحت عليها و نزلوا الشارع يفرغوا شوية طاقة .. دلوقتي عشان بس أحاول أقربلك الفكرة مش أكتر تخيل إن الفكر بتاع (كارل ماركس) ده عامل زي الإسلام السياسي كده .. فكرة عامة .. زي ما الإسلام السياسي بيقول إن لازم نحكم بما أنزل الله و رسوله فالفكر بتاع (كارل ماركس) أو الماركسية إن الشعب لازم هو اللي يحكم .. المشكلة مش في الفكرة العامة .. المشكلة دايماً في التفاصيل .. ده يفسرلك ليه الإسلام السياسي هو مظلة كبيرة تحتها ناس علي كل شكل و لون .. من أول التيار السلفي للإخوان المسلمين لحد الجماعات الجهادية .. برده الماركسية كانت مظلة كبيرة أوي تحت منها كيانات كتير من ضمنها الحركة البلشفية واللي في التشبيه بتاعنا هنا هي الإخوان المسلمين بتاعة روسيا.
مشكلة الحركة البلشفية إن الراس الكبيرة بتاعها كان هربان بره روسيا .. من سنة 1900 و (فلاديمير لينين) قاعد في سويسرا .. ده خلي تلاميذه و رجالته ليهم صوت بس مش أوي .. دايماً بيتبصلهم و يتقالهم لما الكبير بتاعكوا أو علي حسب تشبيهنا لما المرشد بتاعكوا يرجع بالسلامة إبقوا إتكلموا .. ده في الوقت اللي البلاشفه نفسهم مكنش عندهم رجا من المظاهرات بتاعة ستات روسيا .. بالنسبة ليهم المظاهرات دي حتخلص تاني يوم لو الحكومة عطت لكل ست رغيف عيش ترجع بيه لعيالها .. بس محدش كان متوقع نتيجة الغباء .. دايماً بقول التاريخ مش بيعيد نفسه ولا حاجة .. إحنا اللي بهايم .. (نيكولاي الثاني) متعلمش من درس 1905 و بدل ما يمتص غضب الناس أمر عساكره إنهم يضربوا نار .. و مع أول طلقة إتضربت علي المتظاهرين عينك ما تشوف إلا النور.
الثوار كانوا شباب و ستات و عمال و فلاحين و حتي ضباط و عساكر زهقوا من الهبد و الظلم و الإفترا .. ثورة شالت ما خلت .. ثورة من عنفها و عشان شارك فيها كل الناس تقريباً حتي العساكر في الجيش فطلعت إشاعة إن دي أكيد مؤامرة عاملها البلاشفة مع إنها مكنتش لا مؤامرة ولا نيلة .. دي كانت جمعة الغضب بتاعة روسيا .. يوم 27 فبراير 1917 الثوار دخلوا البرلمان و بدل ما البرلمان فيه ناس ولاءهم للقيصر إتشالوا كلهم و إتحط مكانهم مجلس من العمال إتسمي سوفييت Soviet و دي كلمة روسي معناها المجلس المنتخب .. أقف بقي هنا.
المجلس المنتخب ده أو السوفييت كانوا ناس عاقله و فاهمه .. دي ناس عارفه إنهم مجرد عمال في مصانع ميعرفوش حاجة عن إدارة بلد في حجم روسيا وعلي فكرة ده اللي قاله (كارل ماركس) .. الرجل ده فكره كان سابق عصره بسنين ضوئية .. هو كان عارف إن الناس العادية مش مؤهلة إنها تحكم عشان كده إنت محتاج الفلول أو الحرس القديم إنهم يكملوا في مناصبهم و يكملوا في إدارة شئون البلد بس طبعاً وهم متراقبين و بيتحاسبوا حساب الملكين لحد ما الشعب أو الثوار يتعلموا سر الصنعة و يبدأوا هم اللي يحكموا .. حاول تبصلها علي إن (كارل ماركس) رأيه في الثورات هو نفس الكوبليه بتاع أغنية (نانسي عجرم) .. مفيش حاجة تيجي كده إهدي حبيبي كده .. يوم 1 مارس 1917 مجلس الدوما بيشكل حكومة تصريف أعمال و مجلس السوفييت أعلن دعمه للحكومة دي طالما هي ماشية علي نفس الخط اللي رسمه (كارل ماركس) .. الحكومة دي كان ماسكها واحد من الأسرة الملكية إسمه (جيورجي ألفوف Georgy Lvov) اللي معروف عنه كان ليبرالي و رجل طيب مش بيحب الظلم و دراعه اليمين كان وزير العدل (أليكساندر كيرينسكي Aleksandr Kerensky) وده كان من العمال الغلابة الإشتراكيين .. حاول تتخيل إن بعد ثورة يناير عملنا حكومة تصريف أعمال من واحد من الفلول و واحد من شباب الثورة .. تاني يوم اللي هو 2 مارس قيصر روسيا (نيكولاي الثاني) بيتنحي عن منصبه و تنطلق الزغاريط في كل إنحاء روسيا.
من أول يوم ليها والحكومة المؤقتة بتاعة تصريف الأعمال ماسكة مطرقة و أجنة و بتكسر في كل حاجة بناها قياصرة روسيا و كانت مكلبشة مستقبل البلد .. فعلياً الحكومة دي كانت بتبني روسيا جديدة .. قوانين حرية إبداء الرأي و حرية التظاهر إتحطت .. (لينين) نفسه وصف روسيا في الوقت ده بإنها أكتر بلد فيها حريات في أوروبا كلها .. بس كان فيه خازوق .. و الخازوق ده إسمه الألمان.
الألمان شاطرين فشخ في علم النفس وكانوا فاهمين دماغ (لينين) كويس .. هم كانوا عارفين إن الرجل ده حيموت و يركب الموجة .. هو عايز يحكم .. هو مش وطني و عايز مصلحة روسيا عشان لما يشوف اللي بتعمله حكومة تصريف الأعمال يقول انا حقف وراهم و أدعمهم عشان الناس شايفه شغلها صح .. هم كانوا عارفين إنه عايز ياخد اللقطة .. دي نقطة .. نقطة تانية إن متنساش إن القصة بتاعتنا دلوقتي وصلت لسنة 1917 وفي الوقت ده كانت لسه الحرب العالمية الأولي مولعة و الحكومة الإنتقالية الروسية مش عايزه تعلن إنسحاب روسيا من الحرب عشان مش عايزين يزعلوا الإنجليز و الفرنساوين .. في نفس الوقت (لينين) معروف عنه إنه معارض جداً لإستمرار روسيا في الحرب .. إذن الحل سهل و بسيط .. خلوا (لينين) يرجع روسيا وهو حيتصرف .. هو حيلاقي طريقة يوصل بيها للحكم و بمجرد ما ده يحصل حيعلن إنسحاب روسيا من الحرب .. يوم 3 إبريل 1917 (لينين) بيوصل محطة قطار بيتروجراد و علي قطر ألمانيا هي اللي جابته عشان ياخده من سويسرا يرجعه بلده .. كده دور الألمان خلص .. الدور و الباقي علي (لينين).
(لينين) كان عامل زي الكوميك اللي بيقول هو رأيك يحترم و كل حاجة بس تحتفظ بيه لنفسك .. هو جه ومعاه خطة من 10 نقط إتعرفت بعد كده بإسم أطروحات إبريل April Theses .. المهم إن زتونة الكلام ده كله إن (لينين) مش عايز حكومة إنتقالية ولا حكومة تصريف أعمال و إن المجلس المنتخب اللي هو السوفييت اللي لو بصيتله شوية و دققت نظرك حتلاقيه كله عمال و ناس بسيطة هم اللي المفروض يحكموا روسيا .. من الأخر (لينين) رجع روسيا عشان يقولهم انا اللي عايز أحكم وعشان يوصل لهدفه ده لازم يبدأ بإنه يدي للناس شرير جديد يكرهوه .. الحكومة الإنتقالية.
(لينين) كان عنده القدرة إنه يلف الشوارع زي بياع الروبابيكيا عشان يقنع الروس بفكره .. هو كان باني رأيه علي نقطتين و النقطتين لو انت مواطن بسيط معندكش القدرة علي التخيل و مش فاهم أوي هي الحكومات بتشتغل إزاي حيعجبوك فشخ و حتقول علي (لينين) ده إن دماغه توزن بلد مع إنه حيوديك في ستين داهية:
- أول نقطة إن ليه نسمع كلام (كارل ماركس)؟ .. ليه يبقي عندنا ثورة من مرحلتين؟ .. ليه نسيب الفلول أو الحرس القديم هم اللي يمشولنا الدنيا مؤقتاً لحد ما إحنا نعرف نحكم نفسنا؟ .. طب ما نرميهم في السجون ولا نقتلهم و نخلص منهم و نحكم إحنا .. ليه أحكم بكره ما دام انا أقدر أحكم دلوقتي؟
- ثاني نقطة وهي مرتبطة بالنقطة الأولانية إن الفلول اللي بيحكموا دول مش حاسين بيكوا .. مش حاسين بظروفكوا .. مع الوقت بدأت المطالب الفئوية تزيد .. شوية وعمال المصانع قالوا إحنا عايزين نشتغل 8 ساعات في اليوم بس .. كل ما الحكومة تحاول تاخد قرار يتقالها إنتي حكومة مؤقتة كلمتك متشمشيش علينا .. حتي العساكر بتوع الجيش قالوا إحنا زينا زي العمال عايزين نشتغل 8 ساعات بس .. فعلياً البلد كانت بتفك من بعضها و (لينين) قاعد بيتفرج و بيشرب شاي بلبن و بيسقسق بقسماط مستني اللحظة اللي ينط فيها علي الحكم.
الفرصة جت لحد عند (لينين) يوم 15 يونيو 1917 .. في الوقت ده الحكومة الإنتقالية اللي بتحكم روسيا و بعيداً عن إن البلد فعلياً المسامير اللي مربطاها في بعض بدأت تفك فالحكومة بصت لنفسها و سألت السؤال الوجودي .. هو إحنا إيه هي الشرعية اللي مقعدانا في الكرسي؟ .. زي ما قلتلك ده سؤال وجودي و بناء عليه محتاج يتشرحلك .. أي حاكم في الدنيا محتاج شرعية يبني عليها حكمه .. في الدول الديموقراطية الشرعية دي هي نتيجة الإنتخابات .. في الدول اللي زي حالاتنا بتكون هي مباديء الثورة أو الإنقلاب اللي الحاكم وصل للحكم بسببها .. في روسيا في الوقت اللي قصتنا بتتحكي فيه الشرعية اللي الحكومة الإنتقالية بتحكم بسببها مش إنها تمشي زي ما مباديء (كارل ماركس) قالت .. لا خالص .. الشرعية اللي هم بانيين قعدتهم في الكراسي عليها هي إن روسيا متخسرش الحرب العالمية الأولي.
روسيا في الحرب العالمية الأولي كانت بتحارب ألمانيا .. لو الألمان كسبوا الحرب فكده مفيش أي حاجة تمنع أن أنصار القيصر (نيكولاي الثاني) يرجعوه تاني للحكم .. ليه؟ .. القيصر هو اللي كان ماسك روسيا في الحرب ولما شلتوه عشان ثورتكوا الفاشلة دي خسرنا الحرب .. هو طبعاً الثورة مش هي السبب الأساسي ورا هزيمة روسيا في الحرب العالمية الثانية بس هو الموضوع حيتقدم كده للناس .. و بناء عليه الحكومة الإنتقالية بغض النظر عن الأزمة الإقتصادية بسبب الحرب و زي ما تقول كده حننسي مؤقتاً إن فيه خازوق إسمه (لينين) بيهيج الشعب علينا فإحنا لازم نعمل حاجة تخلينا نكسب الحرب ضد ألمانيا .. نصر زي ده كفيل إنه يسكت الشارع و يخليه يفهم إن الشرعية معانا و بالتالي مجرد إنك تكرر نفس الكلام اللي بيقوله (لينين) ده يبقي خيانة عظمي.
في نص يونيو بيبدأ هجوم كاسح للقوات الروسية علي طول حدودهم مع ألمانيا .. هجوم مشي زي الفل في أول يومين .. في اليوم الثالث الألمان بيعملوا هجمة مرتدة قلبت الطرابيزة علي الروس .. هنا الحكومة الإنتقالية لقت نفسها في وضع زي الزفت .. لو الهجوم المضاد الألماني كمل فأول مدينة كبيرة في طريقهم بعد ما يخشوا الحدود هي العاصمة بيتروجراد اللي هي سانت بطرسبرج دلوقتي .. كابوس مرعب .. إحنا نفذنا الهجوم ده عشان ننقذ شرعيتنا بس دلوقتي الهجوم فشل و بقاء العاصمة نفسه بقي في خطر .. طب و الحل؟ .. إعلان حالة الطواريء القصوي و إستدعاء قوات الإحتياط .. حلو .. مين بقي قوات الإحتياط دي؟ .. العمال اللي شغالين في مصانع بيتروجراد .. يعني شباب الثورة الإشتراكيين .. يعني كتير من أفراد الحركة البلشفية اللي زي ما قلتلك هم جزء من مظلة كبيرة أوي إسمها الثورة الإشتراكية الروسية .. اللي الحكومة شافته إنه قرار مصيري لإنقاذ حياة الدولة الروسية البلاشفة شافوه و باعوه للناس علي إنه إنقلاب علي مباديء الثورة .. أنتوا عايزين تودوا شباب الثورة الجبهة يموتوا عشان الجو يخلالكوا بالكرسي .. انت أكيد سمعت نفس الكلمات و المصطلحات دي أيام ثورة يناير عندنا.
يوم 4 يوليو 1917 شوية عساكر من الإحتياط اللي هم أساساً منتمين للحركة البلشفية مشيوا في شوارع بيتروجراد و بدل ما يروحوا لثكناتهم العسكرية وقفوا قدام مقر الحركة البلشفية .. ليه؟ .. مستنيين إشارة من (لينين) .. جه الوقت للثورة الثانية .. لازم الحكومة الإنتقالية دي تمشي .. المتأمرين علي الثورة لازم يتعدموا في ميدان عام .. (لينين) طلع للعساكر بس بدل ما يقولهم يا رجاله إحنا لازم ناخد الحكم قالهم إخزوا الشيطان و أرجعوا ثكناتكوا .. (لينين) في اللحظة اللي كان المفروض يركب الموجة خاف .. و خوفه ده كلفه كتير أوي.
الحكومة الإنتقالية إعتبرت اللي عمله العساكر ده خيانة وبناء عليه الحركة البلشفية كلها بقت حركة محظورة .. كتير من قيادات الحركة إتقبض عليهم و (لينين) نفسه زي الفار جري و راح قعد في فنلندا .. الثورة الفاشلة دي إتسمت في التاريخ الروسي بإسم أيام يوليو July Days .. اللي حصل في ثورة أيام يوليو غير حاجات كتير جداً في روسيا .. مبدأياً كده الحكومة الإنتقالية صحيح طلعت منتصرة بس خسرت كتير أوي بعد قرار تنحي رئيسها (جيورجي ألفوف) من منصبه .. الرجل شاف الدم اللي سال في شوارع بيتروجراد و قالك انا مش لاعب ومش حبقي مسئول عن موت أي بني أدم بعد كده .. اللي مسك وراه هو (أليكساندر كيرينسكي) اللي إستغل الفرصة إنه يخلص من (لينين) ومن البلاشفة كلهم .. (كيرنيسكي) بص للناس و شاور علي (لينين) و قالهم هو ده اللي انتوا ماشيين وراه .. أنتوا ناسيين إن الألمان هم اللي جابوه لينا عشان يدمر بلدنا .. ده جاسوس و خاين و عميل .. الحقيقة إن الناس صدقت و زي ما قلتلك كتير من قيادات الحركة البلشفية إترمت في السجون ومن ضمنهم ناس كبيرة زي (ليون تروتسكي Leon Trotsky) .. لكن يبقي الفار الهربان (لينين) اللي محدش عارف يخلص منه.
المصدر:
مقالة بعنوان From Tsar to U.S.S.R.: Russia’s Chaotic Year of Revolution نشرت في مجلة National Geographic وده لينك المقالة الأصلية:
https://www.nationalgeographic.com/history/history-magazine/article/russian-revolution-history-lenin
مقالة بعنوان Soviet Union Timeline نشرت في موقع هيئة الإذاعة البريطانية BBC وده لينك المقالة الأصلية:
https://www.bbc.com/news/world-europe-17858981
