مشكلة الكرسي إنه بيلعب في دماغ اللي بيقعد عليه .. انت ممكن تبقي طيب و أمير و تتحط علي الحرج يطيب بس قعدتك علي الكرسي تطلع العربجي اللي جواك .. (أليكساندر كيرينسكي) كان بيتشاف في روسيا علي إنه الأمل اللي فاضل إن البلد تقف علي رجلها تاني .. بداية من 8 يوليو 1917 وهو بقي رئيس وزراء الحكومة الإنتقالية .. الرجل كان الإشتراكيين بيحبوه .. شباب الثورة واقف معاه .. المؤسسة العسكرية بتثق فيه .. حتي طبقة الفلول المنتنمين بشكل أو بأخر للأسرة الملكية شايفينه رجل ينفع تتناقش و تتفق معاه .. شوية بشوية و (كيرينسكي) بدأ يتغير .. فجأة مبقاش عاجبه إن كل شوية ناس معترضة علي أي حاجة في البلد تنزل تتظاهر .. يعني إيه يبقي فيه مطالب فئوية .. انتوا عايزين تخربوا البلد ولا إيه .. تم إعلان حالة الطواريء .. مفيش مظاهرات ولا إعتصامات .. مش كده وبس .. عقوبة الإعدام رجعت تتطبق تاني.
الناس اللي زي (كيرينسكي) ده لما بتبدأ تذاكرهم بتكتشف إنهم مينفعش يعيشوا من غير ما يبقي ليهم عدو .. هو مينفعش يبقي مواطن طبيعي يصحي كل يوم يقول يا فتاح يا عليم يا رزاق يا كريم يشوف هو عنده إيه في شغله يخلصه النهارده لإن الحكم زيه زي الهندسة أو الطب أو المحاماة في الأخر هي شغلانة .. لا .. اللي زي (كيرينسكي) ده مينفعش يعيش كده .. لازم يحسس الناس إنه بيحيمهم من خطر .. لازم يرسم نفسه علي إنه حامي حمي البلاد اللي من غيره الفوضي حتشيل ما حتخلي .. هو بص حوليه بيحاول يلاقي عدو ينفع يترسم قدام الناس علي إنه شيطان الإنس .. البلاشفه محبوسين .. القيصر مش حينفع يرجع .. مبقاش فاضل غير المؤسسة العسكرية.
قائد القوات المسلحة الروسية في الوقت ده كان الجنرال (لافار كورنيلوف Lavar Kornilov) والرجل ده خد أحلي خازوق في حياته من (كيرينسكي) .. (كيرينسكي) قعد معاه في يوم و عمل نفسه قال يعني بيفضفض .. الثورة خربت البلد .. شباب الثورة مش فالحين غيرإنهم عايزين فلوس .. هم بس شاطرين يقولولك عيش حرية عدالة إجتماعية بس كل واحد فيهم عايز يفخد في بيته و ياخد مرتبه .. طبعاً (كورنيلوف) بيسمع الكلام ده و يقوله مضبوط يا ريس .. الناس لازم تتعلم الإنضباط العسكري .. (كيرينسكي) عمل نفسه قال يعني مش فاهم أوي و قاله قصدك إيه يا جنرال؟ .. رد قاله نعلن الأحكام العرفية يا ريس .. (كيرينسكي) مد إيده ل(كورنيلوف) وقاله معايا نسجن الشعب كله؟ .. (كرونيلوف) سلم عليه و قاله معاك يا ريس .. وده كان الخازوق.
(كيرينسكي) بعدها طلع قال للناس إن المؤسسة العسكرية عايزه تنقلب علي الثورة .. الجنرال عايز يسجنكوا كلكوا و يقلبها نظام ديكتاتوري .. مش كده وبس .. (كيرينسكي) عمل نفس المناورة اللي عملها الرئيس (أنور السادات) الله يرحمه لما خرج الإخوان المسلمين من السجون عشان يقفوا قصاد الشيوعييين .. (كيرينسكي) خرج المعتقلين من الحركة البلشفية عشان يقفوا قصاد الجيش .. (كورنيلوف) قالك الموضوع مش مستاهل و سلم نفسه و إتحكم عليه بالسجن هو و 30 ضابط من قيادات المؤسسة العسكرية بتهمة محاولة قلب نظام الحكم.
اللي عمله (كيرينسكي) ده تقدر تقول إنه شبه الدبور اللي زن علي خراب عشه .. بعد اللي عمله في (كورنيلوف) محدش بقي بيثق فيه .. البلاشفة اللي هو سجنهم و بعد كده طلعهم من السجن بقوا بيشتغلوا ليل نهار علي اليوم اللي يخلصوا منه فيه ..المؤسسة العسكرية مبقتش تأمنله .. حتي فلول الأسرة الملكية بقوا خايفين منه .. بس محدش كان بيشتغل أكتر من البلاشفة .. محدش كان بيسعي للحكم زيهم .. من فنلندا (لينين) بقي بيحركهم زي المدير الفني اللي بيحرك لاعيبته في الملعب .. في المدن الكبيرة سواء بيتروجراد أو موسكو أو ريجا أو ساراتوف حتلاقي لجان شعبية من البلاشفة بتحاول تجند عمال المصانع و الفلاحين و الموظفين لفكرهم .. (لينين) إتعلم من درس أيام يوليو وحط لنفسه Deadline .. لازم الثورة التانية تحصل قبل يوم 20 أكتوبر .. إشمعني؟ .. عشان ده يوم أول جلسة في البرلمان ولو ده حصل و لسه (كيرنسكي) في السلطة فهو كده يقدر ياخد شرعية الحكم .. دي فرصة (لينين) إنه يركب الموجة ولو راحت منه مش حتيجي تاني.
يوم 10 أكتوبر 1917 (لينين) بيوصل بيتروجراد عشان يحضر بنفسه الإستفتاء اللي إتعمل جوه قيادة الحركة البلشفية .. فيه ناس جوه الحركة كانت شايفه إن مفيش داعي إن تحصل ثورة تانية و كفاية لحد كده .. (لينين) حضر بنفسه عشان يتأكد إن القيادة العليا للحركة ماشية زي ما هو عايز .. هنا الحظ بيلعب دوره .. مفيش حد بيوصل للحكم من غير شوية حظ و الحظ هنا عادة بيكون في صورة غباء من الأخرين .. قرارات غلط مش في محلها بتقلب موازين الأمور .. في حالتنا هنا حصل حاجتين ملهمش علاقة ببعض بس حطهم جنب بعض و تلاقي نفسك بتقول أها عشان كده (لينين) وصل للسلطة:
- أول حاجة إن أعضاء البرلمان خافوا .. هنا انت محتاج تفهم إن صحيح الفكر الإشتراكي كان أقوي فكر مسيطر علي الشارع في روسيا بس مكنش فيه كيان واحد هو اللي بيدافع عن الفكر ده .. زي ما قلتلك الفكر الإشتراكي وقتها كان عامل زي الإسلام السياسي كده عندنا وقت ثورة يناير بيمثله تيارات و تكتلات كتير بس المشترك بينهم إنهم كلهم كانوا خايفين من البلاشفة .. إشاعة إن البلاشفة بيحضروا لمصيبة وصلت ليهم وعشان كده ناس كتير قالت طب بدل ما البرلمان المفروض يجتمع يوم 20 أكتوبر خليها 25 أكتوبر .. في وضع هش زي اللي كانت فيه روسيا .. فيه وقت الناس خايفه و قلقانه .. في وقت الحقيقة بتضيع زي شوية التراب اللي بيطيروا مع الهواء لما السلطة أو الحكومة تبقي خايفة تعمل الجلسة الإفتتاحية للبرلمان فده كأنه إعلان هزيمة .. الثقة هي أهم علاقة بين الشارع و الحكومة ومن غيرها حتبقي الفوضي و (لينين) كان عايز الفوضي دي.
- ثاني حاجة حصلت هي القرار الغريب اللي طلع قرار يوم 20 أكتوبر من رئيس الحكومة (كيرينسكي) إن الوحدة القتالية المسئولة عن حماية العاصمة بيتروجراد تتحرك بإتجاه الجبهة الألمانية .. محدش عارف الحقيقة هو ليه القرار ده إتعمل ولا إيه الحكمة من وراه بس خليك عارف إن بسبب القرار ده الحركة البلشفية بدأت تجند قادة الوحدة القتالية دي .. يوم 24 أكتوبر الحركة البلشفية بقي عندها الضباط الأحرار بتوعها .. وحدة قتالية كاملة جالها قرار بالتحرك من العاصمة وبالتالي انت تقدر تمشي في الشارع تلاقي عساكر ماشيين عادي جداً بسلاحهم و مدرعاتهم .. مين دول يا جدعان؟ .. لا متقلقش دول الوحدة القتالية المسئولة عن حماية العاصمة اللي حتتحرك بإتجاه الحدود مع ألمانيا .. يوم 24 أكتوبر (لينين) وصل بيتروجراد و لبس زي عسكري مزيف كأنه عسكري ضمن عساكر الوحدة القتالية دي .. ثورة (لينين) بدأت رسمياً.
ليلة 25 أكتوبر بدأت الثورة .. أو بلاش ثورة .. بدأ الإنقلاب علي السلطة اللي عمله رجاله (لينين) .. (لينين) رجل انت محتاج تفهم طريقة تفكيره برده .. روسيا بلد كبيرة .. كبيرة أوي .. و عشان تسيطر عليها لو قلت لنفسك انا حبدأ من تحت لفوق بحيث أبني قاعدة جماهيرية كبيرة و الناس هي اللي تشيلني علي كتافها لحد ما أبقي في السلطة فانت كده ولا قدامك خمسين سنة عشان توصل للكرسي .. أو إنك تقول انا اقطع رأس الأفعي و البلد كلها حتعرف إني انا اللي أستحق أحكم .. في الليلة دي هو إختار هدفه كويس أوي اللي هو القصر الشتوي Winter Palace مقر الحكومة الإنتقالية .. رجالته إعتقلوا (كيرنيسكي) و كل أعضاء الحكومة .. (لينين) فعلياً بص للناس قالهم من النهارده مفيش حكومة انا الحكومة.
بقية التيارات السياسية الروسية قالوله طب عليا الطلاق ما انت قاعد علي الكرسي .. البرلمان أو مجلس السوفييت اللي بقي عبارة عن 760 عضو كل أعضاءه اللي مش من ضمن الحركة البلشفية رفضوا الإعتراف بسلطة (لينين) .. مؤسسات الدولة كلها دخلت في إضراب عام .. اللي حصل ده كان إختبار حقيقي لنظرية (لينين) .. هل روسيا عشان هي بلد كبيرة لو قطعت رأس الأفعي يبقي انت كده وصلت؟
نقطة برده مهم تبقي فاهمها هي إن التيارات السياسية التانية في روسيا كانت فاهمه دماغ (لينين) كويس .. (لينين) كان بيقول إن إقتحام رجالته لمقر الحكومة ده كان هدفه إنه يدي الحكم لمجلس السوفييت بس كل ده كدب .. (لينين) عمره ما حيقبل فكرة إن يبقي فيه برلمان بيراقب شغله .. (لينين) مش عايز يحد يقوله انت بتعمل إيه .. هو بيدعي إنه عايز روسيا حرة بس في الحقيقة هو عايز يبقي الملك .. الديكتاتور .. فرعون اللي كلمته تمشي علي أطخن طخين .. في الأول العلاقة بين (لينين) و باقي التيارات السياسية كانت محاولات إنه يوريهم حسن نيته بس لما لقي إن ده مش جايب نتيجة قرر يدبحلهم القطة.
يوم 4 نوفمبر (لينين) أعلن إن الحركة البلشفية بتاعته بقي ليها حاجة إسمها مجلس مفوضي الشعب Council of People’s Commissars اللي إتعرف بإسمه الروسي سوفناركوم Sovnarkom .. يطلع إيه السوفناركوم ده؟ .. ده يبقي البرلمان بتاع الحركة البلشفية .. ده بالضبط لما تقرر تفتح مطعم و تقول لنفسك ليه أدفع فلوس لفرن عيش عشان يوردلي أكياس العيش اللي حعمل بيها السندوتشات؟ طب ما أفتح انا فرن .. كل ده و الناس مش فاهمه هو فيه إيه .. هم شايفين التيارات السياسية بتتخانق علي الكرسي وخلاص .. حاجة شبه جداً اللي كان بيحصل عندنا في مصر بعد ثورة يناير بس الكل كان مستني الإنتخابات البرلمانية .. المفروض إن معاد الإنتخابات كان يتعمل في أخر نوفمبر و الحقيقة إن التيارات السياسية المعارضة للبلاشفة كانوا متشعلقين في الإنتخابات دي بإيديهم و سنانهم و مهم تفهم ليه؟
دي كانت حتبقي الفرصة إن الشعب يقول رأيه في اللي بيحصل .. ده كان حيبقي إستفتاء علي شعبية البلاشفة في الشارع .. (لينين) كان بيتصرف و كأن الناس كلها عايزاه وده كان حيبقي الإختبار الحقيقي لنفوذه .. علي الناحية الثانية (لينين) كان عارف إنه حيخسر الإنتخابات .. بالورقة و القلم لو قلنا إن 65% من الشعب الروسي مع الفكر الإشتراكي و الباقي مع الفلول فزي ما قلتلك كتير في اللي حكيته الفكر الإشتراكي كان تحت منه تيارات و تكتلات كتير .. من ال65% دول بالكتير أوي 25% منهم حيدوا أصواتهم لمرشحي الحركة البلشفية .. طب و الحل يا (لينين)؟ .. نؤسس الكيان اللي حيبقي بعد كده حيبقي المخابرات العامة السوفيتية KGB.
الإنتخابات إتعملت في ديسمبر 2017 ومع الإنتخابات (لينين) كان بيؤسس الحاجة اللي حتبقي أشهر من النار علي العلم مش بس في روسيا إنما في العالم كله .. المخابرات العامة السوفيتية KGB .. في الأول هي بدأت ككيان إسمه لجنة مكافحة الثورة المضادة و التخريب و إختصاراً بالروسي كانت بتتسمي تشيكا Cheka و اللي مسكها كان واحد إسمه (فيلكس دزيرجينسكي Felix Dzerzhinsky) و اللي أهم حاجة تعرفها عنه إنه مكنش عنده مشكلة يرمي الست والدته في المعتقل و يعذبها بنفسه لو كانت أفكارها معارضة للي بيقوله (لينين) .. بالنسبة ل(فيليكس) ف(لينين) هو العدالة و اللي يقوله هو القانون و اللي يقف قدام القانون لا يستحق الحياة .. يوم 5 يناير 1918 البرلمان بيفتتح بعد الإنتخابات و لسه أعضاء البرلمان بيخشوا المبني لقوه مقفول .. ليه؟ .. رجال مسلحين تابعين لتشيكا قافلين الباب و اللي حيعدي حيتقتل.
وسط كل الهري ده أرجوك متنساش إن كان فيه صداع إسمه الحرب العالمية الأولي و الحرب دي لازم تخلص .. كتير من الروس سواء بلاشفة أو غير بلاشفة اللي مؤمنين أوي بالفكر الإشتراكي كانوا شايفين إن دولة إمبريالية يعني إستعمارية زي ألمانيا مينفعش بأي حال من الأحوال نمضي معاها إتفاق سلام .. بس (لينين) كان شايف إن خلاص القوات المسلحة إنهارت و بناء عليه حتي لو حاربنا ألمانيا زي ما حضراتكوا عايزين فإحنا مستحيل نكسبها .. الروس و الألمان إتفقوا علي وقف إطلاق النار و (لينين) بعت (ليون تروتسكي) لألمانيا عشان يتفاوض معاهم علي إتفاق السلام .. بس خلي بالك .. (لينين) كان لسبب ما يعني مقتنع بإن الألمان حيبصوا للفوضي اللي عايشه فيها روسيا و يقولوا لنفسهم يا سلام انا عايزه من ده يا (حزمبل) .. لسبب ما هو كان شايف إن الناس مبهورة بالثورة الإشتراكية .. ليه معرفش بس ده السبب إن (ليون تروتسكي) وهو بيتفاوض مع الألمان كان عامل زي شخصية (عم أيوب) اللي قدمها الفنان (محمد صبحي) في مسرحية الجوكر .. منتهي المماطلة و تضييع الوقت .. ليه؟ علي أمل إن الثورة الإشتراكية توصل ألمانيا .. حتي الألمان كانوا متنرفزين منه جداً لحد ما جه القلم علي وش الروس اللي صحاهم من نومهم.
في فبراير 1918 الأوكرانيين مضوا إتفاق سلام مع الألمان خلاهم فعلياً يترموا في حضن الألمان .. أوكرانيا باعت روسيا .. ده اللي خلي الألمان فعلياً يلووا دراع (ليون تروتسكي) إنه يقبل إتفاقية سلام كارثية يوم 3 مارس 1918 .. أوكرانيا ضاعت من روسيا .. بيتروجراد عاصمة الإمبراطورية الروسية حتبقي تحت سيطرة الألمان و الروس يتفضلوا يلموا حاجتهم و يعزلوا للعاصمة الجديدة موسكو .. روسيا خسرت بولندا و فنلندا و ليتوانيا و أستونيا اللي كلهم خدوا حق الحكم الذاتي تحت حماية ألمانيا .. فعلياً و بجرة قلم الروس صحيوا الصبح علي خبر إنهم خسروا 34% من تعداد سكانهم و 32% من مساحة أراضيهم الزراعية و 54% من مساحة المناطق الصناعية و 89% من مناجم الفحم بتاعتها .. بجرة قلم روسيا تحولت من دولة عظمي لدولة كحيانة .. إتفاقية السلام دي صحيح ريحت (لينين) من صداع الحرب العالمية الأولي بس فتحت في وشه باب جهنم .. باب الحرب الأهلية الروسية اللي البلاشفة كسبوها بطلوع الروح بس من بعدها إتولد الإتحاد السوفيتي.
بسبب إني فتحت سيرة موضوع معقد شوية و تفاصيله و أحداثه داخله في بعضها فخليني أختم بإني أرصلك الزتونة بتاعة الأحداث في الكام نقطة الجايين دول:
- إبريل 1917: (فلاديمير لينين) بيرجع روسيا من منفاه بمساعدة الألمان.
- أكتوبر 1917: البلاشفة بقيادة (لينين) بيطيحوا بالحكومة الإنتقالية اللي كان ماسكها (أليكساندر كيرنسكي) اللي كان مقرها قصر الشتاء في مدينة ساينت بطرسبرج.
- مارس 1918: بتتمضي معاهدة السلام بين روسيا و ألمانيا اللي إتسمت بإسم معاهدة بريست-ليتوفسك واللي بسببها روسيا خسرت جزء كبير من أرضها لصالح ألمانيا و كمان دول فنلندا و أستونيا و لاتفيا و ليتوانيا و أوكرانيا و جيورجيا و أرمينيا و أذربيجان خدت حق الحكم الذاتي.
- من نوفمبر 1918 لحد أكتوبر 1920: الحرب الأهلية الروسية بتولع بين البلاشفة اللي إتعرفوا بإسم الحمر Reds ضد أي حد غير البلاشفة اللي كلهم إتوحدوا تحت إسم البيض Whites .. في المرحلة دي كانت حتت كتير من روسيا تحت الإحتلال البريطاني و الفرنسي و الأمريكاني و الياباني كمان.
- من يونيو 1918 لحد مارس 1921: يمكن اللي خلي البلاشفة يكسبوا الحرب الأهلية هو سياسة فشيخة إسمها شيوعية الحرب وهي إنهم خدوا الأراضي الزراعية وضع يد بحيث الأكل بقي يتاخد من الفلاحين يروح للعساكر اللي بتحارب .. صحيح السياسة دي خلتهم يكسبوا الحرب بس سببت مجاعة رهيبة لكتير من الفلاحين.
- فبراير 1919 لحد مارس 1921: الحرب الروسية البولندية و اللي بعدها بسنة مش بس بولندا بتمضي إتفاقية سلام مع روسيا إنما كمان بيتم إعلان ميلاد إتحاد الجمهوريات السوفيتية الإشتراكية USSR و دي إختصار Unions of Soviet Socialists Republics و اللي بيضم روسيا و أوكرانيا و بيلاروسيا و دول القوقاز.
المصدر:
مقالة بعنوان From Tsar to U.S.S.R.: Russia’s Chaotic Year of Revolution نشرت في مجلة National Geographic وده لينك المقالة الأصلية:
https://www.nationalgeographic.com/history/history-magazine/article/russian-revolution-history-lenin
مقالة بعنوان Soviet Union Timeline نشرت في موقع هيئة الإذاعة البريطانية BBC وده لينك المقالة الأصلية:
https://www.bbc.com/news/world-europe-17858981
