الحروب البونيقية .. المدعكة العالمية الأولي.

لينك التسجيل الصوتي للجزء الأول من المقالة:
https://soundcloud.com/user-112011687-312727988/hdygrtyarbwc?si=e54968bbd57d40158bc3684ba4da9ed4&utm_source=clipboard&utm_medium=text&utm_campaign=social_sharing

لينك التسجيل الصوتي للجزء الثاني من المقالة:
https://soundcloud.com/user-112011687-312727988/1a-1?si=571ef5ac054e40f494f36ba09c6d1565&utm_source=clipboard&utm_medium=text&utm_campaign=social_sharing

مفيش حرب تستحق إنك تقف قدامها وإنت بتضرب كف علي كف من كتر ما إنت مش مصدق أحداثها أكتر من الحرب البونيقية الأولي والثانية .. فكك من الحرب العالمية الأولي والثانية .. وفكك كمان من الفتوحات الإسلامية .. وفكك من الحملات الصليبية والتتار والدولة العثمانية .. أنا مش ببالغ لو قلتلك إن كل دول ولا حاجة قصاد الحرب دي .. الحرب البونيقية أو Punic War فعلاً هي زي ما (جون سنو John Snow) قال في مسلسل Game of Thrones إن دي هي الحرب العظمي اللي حسمت شكل العالم اللي إنت شايفه دلوقتي .. لولا الحرب دي مكنش البرلمان الأميريكي حيتسمي مجلس الشيوخ أو Senate .. لولا الحرب دي مكنتش اللغة اللاتينية حتبقي هي الأساس اللي إتبنت عليه كل اللغات الأوروبية الحديثة اللي إنت بتتعلمها دلوقتي .. بإختصار شديد الحرب دي هي اللي خلت الدولة الرومانية هي القوة العظمي الأولي علي مستوي العالم لمدة أكتر من 700 سنة .. لو إنت شايف إن الحرب العالمية الثانية مهمة فخليني أقولك إن الحرب دي أهم منها .. خليني أحاول أبسطلك الحكاية قدر الإمكان بإني أسأل سؤال وأحاول أجاوب عنه وبعد كده أسأل سؤال تاني وأجاوب عنه وهكذا عشان متوهش مني لإن صدقني لو قلتلك إن سهل أوي تتوه مني وأنا بحكي الحكاية دي.

خلينا نسال السؤال الأول .. هو بالصلاة علي سيدنا النبي تطلع إيه الحروب البونيقية دي؟

عشان تفهم إيه هي الحروب البونيقية دي بص علي الخريطة اللي قدامك في الصورة .. دي كانت خريطة العالم زي ما البني أدمين اللي كانوا عايشين فيه شايفينه .. في الوقت ده كان فيه قوتين عظمتين في العالم بيتعاركوا مع بعض علي مين يفرض سيطرته علي البحر المتوسط .. علي إيدك اليمين حتلاقي الدولة الرومانية واللي عاصمتها زي ما إنت عارف هي روما .. علي إيدك الشمال دولة قرطاجة اللي هي دلوقتي تونس .. إحنا عارفين مين هي روما وعارفين الدولة الرومانية وعارفين الباستا والبيتزا والإسباجيتي .. بس إحنا منعرفش حاجة عن قرطاجة وخليني دلوقتي بسرعة أوي أقولك تطلع إيه البتاعة دي .. زمان أيام الفراعنة كانت فيه حضارة تانية علي سواحل لبنان دلوقتي إسمها الدولة الفينيقية .. هو إسم غبي أنا عارف بس العرب بيسموا أهل الحضارة دي الفينيقيون والغرب بيسموهم Phoenicians وبتتنطق فونيشيان .. الفينيقيين هم أول ناس في التاريخ يعملوا مستعمرات .. صحيح إن أساس الحضارة دي في لبنان بس هم وصلوا لحد تونس وعجبتهم وبنوا فيها مدينة اللي هي قرطاج أو كارثادج Carthage وبقت فرع للفينيقيين لحد ما قرطاج بقت كيان مستقل .. الفكرة إن الرومان مكانوش بينطقوها فونيشيان إنما كانوا بينطقوها بونيسيان Ponecian وبالتالي الإسم اللي لزق في الحرب دي هو Punic War اللي لو ترجمتها للعربي حتلاقيها الحروب البونيفيقة أو البونيقية .. معلومة ممكن تكون شايفها ملهاش لازمة بس مهم تكون عارفها .. اه خد دي كمان .. لو دخلت في قاموس إنجليزي كتبت كلمة Punic حتلاقي من ضمن معانيها الخاين فده يوريك قد إيه الغرب كان شايل في قلبه أوي من الحرب دي .. المهم .. خلينا نرجع تاني نشوف مين اللاعيبة اللي حتلعب اللعبة دي .. روما وقرطاجه .. الحقيقة إنك لما تيجي براحة كده تبص علي هو الدنيا بتمشي إزاي في روما وفي قرطاجة تلاقي إن الدولتين شبه بعض في حاجات كتير بس الإختلافات اللي بينهم كانت هي السبب إن عاجلاً أم أجلاً الدولتين دول لازم يخبطوا في بعض.

أظن السؤال دلوقتي هو طب هي وقتها الدنيا في روما بتمشي إزاي؟

روما وقتها كانت بلد غريبة حبتين وهي إنها كانت جمهورية الأغنياء .. هي قدام الناس بلد ديموقراطية عندها برلمان والبرلمان ده أعضاءه منتخبين وكأنك بتبص علي أي دولة أوروبية دلوقتي زي بلجيكا أو هولندا بس سواء البرلمان أو الحكومة لما تيجي تبصلهم تلاقيهم أغني أغنياء البلد .. لو حابب تشبهها بحاجة فالرومان كانوا اللانيسترز Lannisters بتوع Game of Thrones .. عشان تبقي حاجة مهمة في البلد قدامك سكة من إتنين .. يا تتولد غني وساعتها تخش البرلمان او Senate وتبقي من الأكابر وأعيان البلد .. أو تخش الجيش تتسحل فيه لحد ما تترقي وتبقي جنرال كبير قد الدنيا .. يعني عشان تبقي حاجة كبيرة في روما يا إيدك تتغرق فلوس يا تتغرق دم .. زي ما قلتلك هم اللانيسترز بتوع القصة دي .. وقت القصة بتاعتنا ما بتتحكي فالرومان كانوا بيسيطروا علي أغلب إيطاليا ما عدا شمال إيطاليا اللي هو دلوقتي مكانه مدينة ميلان اللي وقتها كانت تحت سيطرة قبائل عايشة هناك إسمها الغال.

إذا كان البرلمان هو السلطة التشريعية فالحكومة نفسها كانت ماشيه بنظام غريب شوية هو نظام القناصل .. هم كان عندهم منصب إسمه قنصل وده رجل بيُنتخب من أعضاء البرلمان وبيفضل في منصبه سنة كاملة وفيه منهم إتنين مش واحد يعني فيه إتنين قناصل ودول تقدر تقول عليهم رؤساء الوزراء .. كل واحد في الإتنين عنده جيش .. كل واحد في الإتنين له حق إنه يلغي قرار التاني .. تخيل إن عيلة اللانيسترز بدل ما بيحكمها طيب الذكر (تايوين لانيستر) لوحده فإحنا حنجيب منه إتنين يمشوا الدنيا مع بعض .. لكن .. وخلي بالك من اللي جاي دلوقتي عشان حيفرق معانا في القصة قدام .. زي ما المثل بيقول المركب اللي ليها ريسين تغرق فالرومان كانوا بيحافظوا قدر الإمكان يعني إن الإتنين القناصل ميكونوش مع بعض في نفس المكان في نفس الوقت عشان ميمسكوش في خناق بعض .. طب إفرض يعني الظروف حكمت والإتنين القناصل بقوا موجودين في حتة واحدة مع بعض .. ساعتها واحد يمسك الحكم يوم والتاني يمسك الحكم اليوم اللي وراه وهكذا .. فكر إنت ممكن تستغربه أنا عارف بس هم كان سلو بلدهم كده  وعلي رأي الست (لي) في فيلم فول الصين العظيم ملناش دعوة يا (محيي).

طب إزاي قرطاجة مختلفة عن روما؟

قرطاجة زيها زي روما كانت جمهورية الأغنياء برده بس عشان تبقي من أكابر البلد معندكش إلا سكة واحدة وهي إنك تبقي غني وعشان تبقي غني هناك مش شرط تتولد وفي بقك معلقة دهب .. لا خالص .. إقتصاد قرطاجة كان قايم علي التجارة فإنت لو بتشغل مخك وحرك في السوق فإنت بسهولة تقدر تبقي (عبدالغفور البرعي) بتاعهم وتوصل للبرلمان .. قرطاجة ناس مش بتوع حروب .. دي ناس بتاعة تجارة ومعاها فلوس فأسهل حاجة عندهم هي إنهم يأجروا ناس تحارب عشانهم .. لو حنستمر في التشبيهات بتاعة Game of Thrones فدول يبقوا التايريل House Tyrell .. في وقت ما قصتنا بتتحكي كانت قرطاجة بتسيطر علي تونس وساحل البحر المتوسط من أول ليبيا لحد المغرب ومعاهم حتة كبيرة من إسبانيا وشوية جزر في البحر المتوسط وأهم جزيرة فيهم هي جزيرة صقلية واللي القصة كلها قايمة عليها واللي الحقيقة سبب الخناقة بين الرومان وقرطاجة فعلاً يهلك من الضحك.

إيه سبب الخناقة الأولانية بين روما وقرطاجة؟

بص يا سيدي .. كان يا مكان كان فيه عصابة طليان معاهم سلاح راحوا جزيرة صقلية وأهل الجزيرة شافوهم وقالوا لنفسهم الله جيش واستقبلوهم علي أمل يعني إن العصابة دي تبقي هي اللي تحمي الجزيرة بعد كده .. زعيم العصابة زهق وقرر إنه هو اللي يحكم الجزيرة والعصابة بتاعته بقت شوية بلطجية وقراصنة وقطاع طرق عاملين قلق في المنطقة .. هوبا تقوم ثورة عليهم من أهل الجزيرة يقوم زعيم العصابة يعمل إيه؟ .. راح لقرطاجة قالها ما تيجي تلحقيني وأنا أوعدكم أبقي رهن إشارتكوا لو إحتجتوا أي حاجة .. كان Offer مينفعش يتقاله لا الصراحة وفعلاً قرطاجة بعتت قوات لقمع الثورة والدنيا هديت وصقلية بقت تحت حكم قرطاج .. يقوم زعيم العصابه يعمل إيه؟ .. يروح لروما يقولهم ما إحنا طليان زي بعض ومينفعش نخلي الأغراب يتحكموا فينا ..روما صدقته وقرروا إنهم يبعتوله قوات عشان تخليه يهرب من الوعد اللي هو وعده لقرطاجة .. سبب تافه ملوش أي معني كان السبب في إن تقوم حرب استمرت أكتر من عشرين سنة من 264 قبل الميلاد لحد 241 قبل الميلاد.

الحرب البونيقية الأولي لما تيجي تبصلها تلاقي إن عدد الجنود اللي حاربوا فيها وصل مليون بني أدم .. إهدأ بس قبل ما تكمل .. إنت عارف يعني إيه حرب يشارك فيها مليون عسكري؟ ده في الوقت اللي إحنا بنتكلم عن حرب قامت قبل ميلاد السيد المسيح (عليه السلام) .. بس الحرب دي بالذات كانت أول مرة الرومان يعملوا حاجات كتير أوي .. كانوا أول مرة يحاربوا بره إيطاليا .. كانت أول مرة يحاربوا حد غير الإغريق وغير الغال .. كانت أول مرة يلاقوا نفسهم محتاجين يبنوا أسطول .. أول مرة يبقوا محتاجين يعرفوا هو يعني إيه سفينة؟ وبيتحارب عليها إزاي؟ .. يُقال إن الرومان أساساً مكانوش عارفين هي السفن الحربية دي بتتعمل إزاي فلما لقوا سفينة حربية من قرطاجة غرقت وموج البحر جابها للسواحل بتاعتهم بصولها ودرسوها وقلدوها .. أنا فعلياً بجري في أحداث الحرب دي وإنت لو حابب تقرأ فيها فأنا أنصحك فعلاً بس خليني أقول إن الحرب دي خلصت بنصر الرومان وسيطرتهم علي شوية الجزر في البحر المتوسط اللي كانت تحت إيد قرطاجة وأهم جزيرة هي صقلية اللي الحرب دي كلها قامت عشانها .. بس فيه نقطة .. بعد عشرين سنة من الحرب الرومان وقرطاجة كانوا مستعجلين إن الحرب دي تخلص وعشان كده معاهدة السلام اللي إتمضت بينهم تقريباً متقرتش كويس ومحدش بص فيها من كتر السربعة لإن إتفاقية السلام دي سابت خازوق كبير والخازوق ده له إسم و إسمه (هاميلكار باركا).

(هاميلكار باركا) ده كان قائد القوات بتاعة قرطاجة في صقلية .. فعلياً الرجل ده مخسرش الحرب .. الحرب دي خلصت لما الرومان بدأوا يفهموا هي الأساطيل بتشتغل إزاي؟ ويعني إيه حروب بحرية؟ وبدأوا يهزموا الأسطول بتاع قرطاجة بس ده مش معناه إن القوات البرية بتاعة قرطاجه إتهزمت لإن ده محصلش .. بناء علي إتفاقية السلام ف(هاميلكار باركا) بقي مطلوب منه ياخد جيشه ويسيب صقلية ويرجع العاصمة قرطاج وطبعاً العساكر بتوعه عايزين فلوس مرتباتهم لإن زي ما قلتلك في الأول قرطاجة مش زي اللانيسترز .. هم زي التايريل عايشين علي إنهم يأجروا ناس تحارب بالنيابة عنهم وبالتالي العساكر دول عايزين فلوس .. بس في نفس الوقت بنود إتفاقية السلام بتقول إن لازم قرطاجة تدفع تعويضات لروما وعشان كده قلتلك إن زي ما تكون بنود الإتفاقية دي متراجعتش ومحدش في قرطاجة قراها أصلاً .. كان المفروض بحسبة متاخدتش خمس دقايق تشوف إنت المفروض حتدفع كام تعويضات وتشوف حتدفع كام مرتبات وتشوف معاك في الميزانية كام وتبدأ تطرح ولما تلاقي عندك عجز تتفاوض مع الرومان علي إن مبلغ التعويضات يا يقل يا يتقسط .. المهم إن البرلمان بتاع قرطاجة صحي الصبح لقوا جيش كامل مستني يقبض فلوسه ومفيش فلوس في الخزنة .. أول ما العساكر عرفوا قاموا محاصرين العاصمة .. البرلمان راح ل(هاميلكار باركا) قالوله مش حتتصرف قالهم وأنا مالي دي ناس مقبتضش مرتباتها ومفيش حل غير إنكوا تسيبوني أبني جيش تاني من مرتزقة تانيين عشان أهزم المرتزقة الأولانيين .. وقتها الفلوس مكنتش تكفي إنك تبني جيش من أول وجديد وكمان تكفي ثمن التعويضات اللي بتتدفع لروما واللي المفروض إنها  تتسدد في معادها بس في نفس الوقت العاصمة متحاصره ومفيش حل غير إنهم يقولوا ل(هاميلكار باركا) إعمل اللي تعمله بس إلحقنا.

فعلاً (هاميلكار باركا) جمع جيش جديد وهزم الجيش الأولاني وحرر العاصمة .. لسه الناس حتقول هيييييييه لقوا إن معاد سداد التعويضات لروما قرب ومفيش فلوس .. (هاميلكار باركا) إقترح علي البرلمان بتاع قرطاجة هو إيه رأيكوا الجيش اللي معايا أروح أعزز بيه من وجودنا في أفريقيا بحيث إن الغنايم اللي حناخدها ندفع بيها فلوس التعويضات؟ .. بتوع البرلمان بصوا لبعض وقالوا دي فكرة هايلة يا واد يا (هاميلكار باركا) .. اللي محدش كان عارفه إن (هاميلكار باركا) كان في دماغه فكر تاني خالص .. ده رجل متهزمش من الرومان وإتقاله معلش بلدك خسرت الحرب .. رجل لو تفتح قلبه متلاقيش فيه إلا كره للرومان وغضب من البرلمان بتاع قرطاجه اللي قبل إنه يمضي إتفاقية السلام المهينة دي مع روما .. هو كان شايف إن البلد محتاجة رجل يحكمها ومفيش في قرطاجة كلها أرجل منك يا واد يا (هاميلكار باركا) .. بمجرد ما إتقاله إتكل علي الله بدل ما يروح أفريقيا راح إسبانيا .. لما البرلمان إعترض وقالوله إنت إزاي تعمل كده رد عليهم بصندوق كله فلوس جه من بيع الفضة اللي جت من مناجم إسبانيا اللي هو استولي عليها .. لما الرومان نفسهم إعترضوا .. رد عليهم قالهم ده أنا بجمعلكوا الفلوس بتاعة التعويضات بتاعتكوا .. الفلوس عمت برلمان قرطاجه وروما .. 4 سنين قضاها (هاميلكار باركا) في إسبانيا .. 4 سنين وهو بيأسس مملكة مستقلة عن قرطاجة وأسس ليها عاصمة جديدة إنت تعرفها كويس .. عاصمة جديدة هو سماها باركا بس بقت بتتسمي بارسا ودلوقتي هي مدينة برشلونة الإسبانية وإسمها اللي إتعرف في التاريخ كان قرطاجة الجديدة أو قرطاجنة او Carthago Nova.

المملكة الجديدة دي تقدر تقول عليها عشان نكمل في التشبيهات بتاعة Game of Thrones إنه أسس عيلة الستارك .. لما (هاميلكار باركا) مات كان له إبنين كبار هم (صدر- بعل) و(هان- بعل) بس اللي مسك الحكم من بعد (هاميلكار باركا) كان جوز بنته اللي برده إسمه (صدر- بعل) .. معلش الناس دي كان عندها عجز حاد في الأسامي فكانوا بيسموا عيالهم بنفس الأسامي بتاعتهم بس مش دي القضية .. (صدر- بعل) الي هو جوز بنت (هامليكار باركا) حكم المملكة دي زي ما الكتاب ما بيقول ومن ضمن الحاجات اللي عملها إنه مضي علي إتفاقية سلام مع روما لتقسيم الحدود بين مملكته اللي هي في نظر الرومان كانت فرع من دولة قرطاجة في إسبانيا وبين الرومان .. يدوبك الإتفاقية دي إتمضت و(صدر- بعل) مات وجه وراه إبن (هاميلكار باركا) اللي هو (هان- بعل) اللي إنت ممكن تكون عارفه بإسم (هانيبال Hannibal) واللي بسبب الإتفاقية دي أعلن الحرب علي روما واللي تعتبر الخناقة الثانية بين روما وقرطاجة.

أظن إنت بتسأل نفسك طب إيه مشكلة إتفاقية ترسيم الحدود اللي إتمضت بين (صدر-بعل) جوز بنت (هاميلكار باركا) مع الرومان؟

الإتفاقية قالت إن أخر حدود الرومان مع قرطاجة هو نهر إسمه إيبرو .. في نفس الوقت كانت فيه مدينة إسمها ساغونتوم Saguntum كانت غنية شوية لإن أهلها عايشين علي التجارة والمدينة دي كانت المفروض إنها تابعة للرومان وأهل المدينة ماضيين إتفاقية مع الرومان إن لو لا قدر الله حصل حاجة فلازم روما تيجي تنجد أهل المدينة .. لحد دلوقتي الدنيا واضحة .. المشكلة إن (هانيبال) قال إن مدينة ساجونتوم دي تبعه مش تبع الرومان لإنها علي الضفة اللي تبعه من نهر إيبرو .. فعلياً الخريطة بتقول إن (هانيبال) عنده حق .. الرومان نشفوا دماغهم وإحساسي إنهم شافوا (هانيبال) بيهوش ومش عايز يحارب ولا نيلة يمكن لإن سنه وقتها كان 26 سنة ويعتبر لسه صغير .. سنة 215 قبل الميلاد الحرب البونيفيقة التانية بتولع لما (هانيبال) خد رجالته وحاصر مدينة ساجونتوم لده 8 شهور .. تخيل يا حضرت 8 شهور والمدينة بتستنجد بروما تيجي تلحقها وتنفذ بنود الإتفاقية بينهم وروما عامله تليفونها سايلانت .. 8 شهور لحد ما (هانيبال) دخل المدينة وأهلها يا إتقتلوا يا إتباعوا كعبيد .. كان ممكن روما تتفادي كل ده لو بس صانت كلمتها مع ساجونتوم بس بسبب العلوق$% روما إتفشخت في حرب استمرت 25 سنة .. ربع قرن من الحرب بسبب قرار غلط .. بس لو إنت فاكر إن دي أغرب حتة في القصة فاستني شوية لسه التقيل جاي .. روما بعتت رسول للبرلمان بتاع قرطاجة برسالة واضحة .. يا تسلمونا (هانيبال) يا الحرب ..والرسول واقف وسط البرلمان بتاع قرطاجة فرئيس البرلمان سأله هو إنت عايز إيه؟ .. فالرسول الروماني الجلالة خدته وصرخ في وشهم نحارب فرئيس البرلمان قاله عليا الطلاق ما هي راجعه وقامت الحرب البونيفيقية التانية .. شايفين زمن الحروب الجميل.

هنا جه الوقت نفهمك هي خطة كل طرف كانت إيه؟ .. إزاي الرومان فكروا يكسبوا الحرب وإزاي (هانيبال) إداهم علي قفاهم؟

خطة الرومان كانت سهلة لدرجة التفاهة:

• واحد من القنصلين اللي هو (بابليوس كورنيليوس سكيبيو) حنبعته علي جيش لإسبانيا عشان ياخد مدينة ساجونتوم تاني من إيد (هانيبال) وبمجرد ما إسبانيا تقع يبقي كده إحنا قطعنا مياه ونور عن قرطاجة.
• إحنا حنجيب القنصل التاني (سيمبرونيوس لونجوس) ونحطه علي جيش قوامه 50,000 مقاتل ونبعته لجزيرة صقلية عشان يحضر نفسه لإنزال قواته علي سواحل العاصمة قرطاجة وبمجرد ما العاصمة تقع يبقي كده كش ملك.
• جيش تالت أو هو مش جيش أوي يعني هو تقدر تقول الفريق الرديف أو فرقة الدرجة الثانية اللي فاضله إتوزعت علي طول حدود الدولة الشمالية مع الغال عشان لو لا قدر الله الغال حبوا يستغلوا الوضع فالعساكر اللي محدش كان عايز ياخدهم معاه دول يبقوا خط الدفاع الأخير عن روما.

إذا كانت خطة الرومان سهلة لدرجه التفاهة فخطة (هانيبال) كانت مجنونة لدرجة الهبل .. هو كان عارف إن ساحل شمال أفريقيا مينفعش تدافع عنه لإن الله أعلم الجيش الروماني حينزل فين؟ .. وفي نفس الوقت مينفعش يتبت في إسبانيا بإيديه وسنانه لإن ساعتها هو حيكون بيضحي بالعاصمة قرطاجة نفسها .. طب والعمل يا واد يا (هانيبال)؟ .. هو يجري حاجه لو أنا قررت أغزو إيطاليا؟ .. إيه اللي حيحصل يعني لو عديت سلسلة جبال الألب وهوبا بقيت في شمال إيطاليا .. طبعاً هو مكنش يعرف إن خطة الرومان كانت إنهم يسيبوا جيش مينفعش يمسك حماية كارتة طريق مصر الإسكندرية الصحراوي عشان يحمي شمال إيطاليا بس هو شاف إن الحل ده محدش يقدر يتوقعه والحقيقة هو كان عنده حق .. بس زي ما بنقول رب صدفة خير من ألف معاد .. (هانيبال) خد قواته وبدأ يمشي علي ساحل إسبانيا بتاع البحر المتوسط في نفس الوقت الجيش الروماني اللي إتبعت عشان ياخد إسبانيا من (هانيبال) زي ما قلنا ضمن خطة روما كان هو كمان ماشي علي ساحل البحر المتوسط رايح علي إسبانيا .. شكلك توقعت إيه اللي حيحصل بعد كده.

بالصدفة البحتة قوات الإستطلاع بتاعة الجيشين لقوا بعض وقوات الاستطلاع بتاعة قرطاجة قدرت تهزم بتاعة روما بس شوية فرسان قدروا يرجعوا بسرعة عشان يحذروا قائد الجيش الروماني (سكيبيو) اللي لقي نفسه قدام مشكلة .. هو أنا دلوقتي أسيب إسبانيا عكس ما البرلمان بتاعي قالي وأفضل أجري ورا جيش (هانيبال) اللي الله أعلم هو عدده كام وهل أنا أقدر أوقفه أو لا؟ .. ولا أسيب (هانيبال) يكمل سكته لإيطاليا ولا كأني شفته وأنا كمان أكمل سكتي لإسبانيا زي ما البرلمان قالي؟ .. (سكيبيو) مسك العصاية من النص .. هو ساب جيشه كله يكمل سكته جوه إسبانيا إنما هو والحرس بتاعه جريوا بسرعة عشان يسبقوا جيش (هانيبال) لحد إيطاليا عشان يحذر البرلمان بتاع روما من المصيبة اللي جايه في السكة .. علي الناحية الثانية جيش (هانيبال) كان بيتفشخ في زحفه لإيطاليا.

زحف جيش (هانيبال) بين جبال الألب لإيطاليا يعتبر من أكتر تحركات الجيوش اللي عليها خناقة في تاريخ البشر من ساعة ما قلنا يلا نحارب .. المنطق والعقل بيقول مينفعش جيش يزحف بين جبال الألب في عز الشتاء .. كانت معجنة .. تلج .. السقعة .. عساكره ماتت يا بالجوع يا من البرد يا من هجمات القبائل اللي عايشة في المنطقة .. ورغم كل ده (هانيبال) عملها .. حقق المعجزة بس الثمن كان مخيف .. هو بدأ زحفه لإيطاليا وكان تحت إيده 98,000 مقاتل ولما وصل فعلاً كان معاه 26,000 بس .. لسه (هانيبال) حيقول هييييييه وصلت لقي (سكيبيو) اللي بفكرك إنه كان جاي جري من إسبانيا عشان يلحقه قبل ما يوصل شمال إيطاليا واللي مقدرش إلا انه يجمع جيش صغير مقدرش يقف قدام جيش (هانيبال).

(هانيبال) اللي رغم إنه خسر 72,000 مقاتل في عبوره جبال الألب إلا إنه برده داس علي وش (سكيبيو) واللي علي فكرة إتصاب جامد في المعركة وكان حيموت لولا إن إبنه (سكيبيو) الصغير اللي كان عنده وقتها 18 سنة لحق ينقذه .. (سكيبيو) الصغير ده ركز معاه شوية لإن ده يبقي (جايمي لانيستر) بتاع القصة .. شاب صغير فشيخ سواء في قدرته علي القتال أو قيادته للعساكر بتوعه .. المهم .. (هانيبال) اللي لو ححب أشبهه بشخصية من عايله ستارك فأنا مش شايفله غير (روب ستارك) .. نفس الدماغ اللي سابقه سنه في التكتيك العسكري .. نفس الطموح إنه يثبت نفسه .. (هانيبال) كان في موقف زي الفل .. أنا علي عتبة باب إيطاليا .. معايا جيش صحيح صغير بس روحة المعنوية في السما .. حتي قبائل الغال بقت بتقول لنفسها ما يمكن (هانيبال) ده هو الأمل بتاعنا إننا نخلص من روما .. روما ملقتش حل غير إنها ترمي خطتها الأصلية في الزبالة .. (هانيبال) بقي جوه إيطاليا ومفيش جيش يحمي البلد وعشان كده إتبعت أمر ل(سيمبرونيوس لونجوس) بإن سيب بقي صقلية وإنسي خالص غزو قرطاجة وتعالي بسرعة عشان تلحق أخوك (سكيبيو) الكبير .. اللي محدش في روما كانت متوقعه إن (هانيبال) حيدوس علي وش (سيمبرونيوس لونجوس) و(سكيبيو) الكبير .. محدش كان متوقع إن (هانيبال) بيفهم فشخ أوي كده .. محدش كان متوقع إن روما تتحط في موقف إن أيامها تبقي تتعد علي الصوابع.

طب إيه اللي حصل لما (سيمبرونيوس لونجوس) جري برجالته وراح يلحق (سكيبيو) الكبير؟

زي ما هو متوقع الإتنين القناصل مسكوا في خناق بعض .. (سيمبرونيوس) راسه وألف سيف ياخد رجالته ويهاجم .. (سكيبيو) بيقوله بس إفتكر إني قلتلك بلاش .. الإتنين الحقيقة كانوا ليهم وجهتين نظر عكس بعض وإنت فعلياً ممكن تقف ورا أي واحدة فيهم وإنت حاسس إن عندك حق:

• (سكيبيو) شاف بعنيه إزاي جيش (هانيبال) بيشتغل وكان عارف إن العساكر اللي تحت إيده اللي بفكرك إنهم الجيش التالت اللي روما سابته يحمي الحدود الشمالية مينفعوش زي ما قلتلك يأمنوا كارتة طريق مصر إسكندرية الصحراوي فهو كان وجهة نظره إننا نستغل الشتا في إننا نحاول نمرن عساكرنا قدر الإمكان عشان المواجهة الجاية مش بس حتكون قصاد (هانيبال) إنما كمان حتكون قصاد قبائل الغال اللي قررت إنها تقف وراه علي أمل إنهم بكده يخلصوا من روما.
• (سيمبرونيوس) علي الناحية الثانية كان عارف إن الإنتخابات الجاية علي منصب القنصل قربت وهو كان عايز يضمن منصبه فكان شايف إن 50,000 عسكري ده رقم كفاية جداً إنه يقف قصاد 26,000 مقاتل اللي تحت إيد (هانيبال) .. لو هو هاجم وقدر يهزم (هانيبال) فكده خلاص Game Over ومش بس روما إنتصرت إنما كمان هو ضمن يكسب الإنتخابات.

(هانيبال) من ناحيته كان عنده رأي تالت خالص .. هو كان خايف إن (سكيبيو) كلامه يمشي لإن رجالته الله أعلم يقدروا يستحملوا شتاء كامل تاني في شمال إيطاليا أو لا .. وفي نفس الوقت قواته عددها أصغر من إنها هي اللي تهاجم .. هو محتاج روما اللي تهاجم .. يعني هو محتاج (سيمبرونيوس) هو اللي كلامه يمشي .. (هانيبال) كان مذاكر شخصية (سيمبرونيوس) كويس .. هو كان عارف إنه عصبي وعايز يحسم الحرب دي النهاردة قبل بكره .. كل اللي (هانيبال) عمله هو إنه بعت خيالته عبرت نهر تريبيا في شمال إيطاليا عشان تستفز الجيش الروماني و(سيمبرونيوس) ما صدق إن جاتله الفرصة إنه يمشي كلمته علي (سيكيبيو) .. (هانيبال) إختار توقيت ومكان خطته كويس .. هو إختار يوم 30 ديسمبر أسقع يوم في السنة عشان يخلي الخيالة بتاعته تجري تعدي نهر تريبيا وترجع تاني بسرعة .. (سيمبرونيوس) أمر قوات المشاة بتاعته إنها تعدي النهر هي كمان ورا الخيالة بتاعة (هانيبال) .. خلي بالك بقي .. 50,000 مقاتل بيعدوا نهر في عز السقعة .. تخيل هم كانوا سقعانين إزاي .. تخيل هم كانوا جعانين إزاي .. تخيل أصلاً كم الوقت اللي إنت محتاجه عشان تنظم عبور جيش كامل لنهر .. ومش بس كده .. إنت فلاح عايش في روما إتقالك شيل سلاحك عشان تنضم للجيش تدافع عن بلدك قصاد المحتل الأجنبي (هانيبال) .. إتشحنت معنوياً بما فيه الكفاية بس إنت فلاح برده متعرفش حاجة في الدنيا غير أرضك وبيتك ومراتك وعيالك .. لا عمرك شفت أفريقيا ولا عمرك شفت قرطاجة دي .. وفي وسط السقعة والثلج والظلام هوبا تشوف قدامك جيش فيه أفيال اللي هو إنت أساساً عمرك ما شفتهم قبل كده .. نفس الصدمة اللي (سكيبيو) شافها بعنيه وحذر (سيمبرونيوس) منها بس محدش سمع كلامه .. نفس إحساس نظرة (جايمي لانيستر) لما شاف (دينيريس تارجاريان) راكبه التنين بتاعها وهاتك يا حرق في رجالته .. هزيمة روما كانت كارثية .. هم دخلوا المعركة دي ب50,000 مقاتل مات حوالي نصهم .. تخيل مصر تخش حرب ضد إسرائيل مثلاً وفي معركة واحدة نخسر 25% من إجمالي تعداد قواتنا المسلحة.

يعني خلاص كده؟ (هانيبال) المفروض إنه كسب الحرب؟

بعد اللي حصل عند نهر تريبيا الوضع كان زي الزفت بالنسبه للرومان .. تقريباً معندهمش جيش .. شتاء سنة 216 قبل الميلاد خلي الناس كلها تفضل في بيوتها من البرد .. (هانيبال) استغل فترة الشتاء كأجازة لرجالته عشان يمرنهم وكمان يريحهم للمعجنة اللي حتحصل بعد كده .. في روما بقي الدنيا كانت مولعة .. الإنتخابات اللي (سيمبرونيوس) كان نفسه يكسبها إتعملت وزي ما هو متوقع خسرها والبرلمان إنتخب إتنين قناصل جداد (جايوس فلامينيوس) و(نيوس سيرفيليوس جيمينيس) .. (جايوس فلامينيوس) أو اللي أنا بسميه المتسربع اللي حتي مستناش في روما عشان يحضر القداس اللي بيتعمل عشان قال يعني ياخد بركة الألهة عشان ينجح في منصبه الجديد .. الرجل كان مستعجل لدرجة إنه جمع جيش من 4 كتائب وجري بسرعة لشمال إيطاليا عشان يمنع (هانيبال) من إنه يعدي نهر تريبيا .. (هانيبال) توقع ده وعشان كده قرر إنه ياخد رجالته وبدل ما يمشي في السكة السالكة مشي فيهم في الملاحات .. خد جيشه وخلاه يعدي من منطقة مستنقعات وفي رحلته دي خسر رجالة كتير وكمان خسر عين من عينيه اللي جالها نوع بكتريا أجبر الدكاترة بتوعه إنهم يستأصلوها خالص قبل ما العدوي توصل للمخ .. وعشان محدش من رجالته يهرب هو ركب أخر فيل في جيشه وكان أخر واحد في الجيش .. معاناة ما يعلم بيها إلا ربنا بس جابت همها .. جيش (هانيبال) وصل حتة إسمها ايتروريا يدوبك ساعة زمن من روما .. علي فكرة إنت محتاج تبص للخريطة اللي في الصور عشان تبقي مجمع الأحداث كلها .. بمجرد ما (جايوس فلامينيوس) جاله الخبر رقع بالصوت الحياني .. بالنسبة له روما مبقاش قدامها غير كام يوم وتتحاصر .. بس بالنسبة ل(هانيبال) هو كان عارف إن جيشه أضعف من إنه يحاصر روما .. هو أساساً مكنش عايز يروح روما .. هو كان عايز يخلق حالة من الهلع جوه إيطاليا عشان أي حد كان نفسه يثور علي روما ومش عارف ينضمله .. هو كان عايز يخلق حالة حرب أهلية بس (جايوس فلامينيوس) مكنش عارف ده .. هو مكنش شايف غير حاجة واحدة بس .. أنا لازم أعلق رأس (هانيبال) علي باب روما.

 (هانيبال) كان عارف ده وعارف إن (جايوس فلامينيوس) مستعجل يحاربه وعشان كده هو استلمه في كمين ولا الكمين اللي المرور بيستلمك فيه في اليوم اللي إنت نازل من غير ما تاخد رخصتك معاك .. (هانيبال) إختار بحيرة إسمها تراسمانيا بسبب طبيعتها الجغرافية إنه يرص الفرسان وأغلب قواته البرية وسط الشجر اللي بيطل علي البحيرة وساب شوية عساكر علي الساحل الضيق بين البحيرة والشجر .. بمجرد ما (جايوس فلامينيوس) وصل البحيرة إفتكر إن شوية العساكر دول هم المؤخرة بتاعة جيش (هانيبال) ولإنه مستعجل قرر إنه يهاجم .. لما قرب بما يكفي (هانيبال) أمر قواته اللي مستخبيه وسط الشجر إنها تطلع عشان تفجع الرومان .. معركة تراسمانيا تعتبر رقم قياسي جديد يحققه الرومان في الخساير البشرية اللي بيتعرضولها في كل مرة يواجههوا (هانيبال) .. المرة دي (جايوس فلامينيوس) دخل المعركة ومعاه 40,000 مقاتل مفضلش منهم غير 10,000 بس .. حاول تبص للوضع من وجهة نظر الرومان .. أكتر من 50% من إجمالي قواتنا المسلحة راح في ستين داهية .. إتهزمنا مش بس في معركة واحدة إنما إتنين .. الروح المعنوية للناس بقت في الحضيض .. هنا الرومان ملقوش قدامهم غير حل واحد .. الديكتاتورية .. بس خلي بالك .. إذا كنا إحنا كلمة ديكتاتور معلقة في دماغنا بإنه زعيم الأمة زي اللي شفته مثلاً في مسرحية الزعيم بتاعة (عادل امام) فالرومان مفهوم كلمة ديكتاتور عندهم مختلف حبتين .. حاول تبصلها زي ما إحنا والسوريين عندنا حاجة إسمها فلافل بس في الحقيقة الفلافل السوري دي حمادة والفلافل المصري دي حمادة تاني خالص.

إيه هي الديكتاتورية الرومانية وليه إتعملت وهل جابت نتيجة قبل كده؟

حاول تبصلها كأنك رئيس نادي .. الفرقة بتاعتك بيتداس علي وشها من كل فرق الدوري .. اللاعيبة مش بتسمع الكلام وبتتدلع في الملعب .. الجماهير بتشتم فيك في المدرجات .. هنا إنت بتقول أنا حختار مدير فني دكر يشخط في اللاعيبه عشان يرجعلهم روح الإلتزام تاني .. تغيير المدير الفني ده عند الرومان بيسموه ديكتاتور .. لما الدنيا بتخرب خالص بيلغوا حكاية القنصلين والبرلمان وبيختاروا رجل واحد يمسك هو البلد .. بيبقي في إيده كل الصلاحيات .. كلمته بتمشي علي أطخن طخين .. بس بشرط .. الديكتاتور ده بيبقي مدير فني مؤقت .. بيفضل في منصبه 6 شهور يعدل فيهم الحال المايل وبعد كده بيتنازل عن السلطة لصالح البرلمان عشان يرجع تاني نظام القناصل .. علي فكرة الحركة دي الرومان معملوهاش مخصوص بسبب تهديد (هانيبال) ليهم .. الحركة دي بتتعمل بقالها أكتر من 500 سنة وفي كل مرة الديكتاتور بيخلص مدته وبيسلم السلطة تاني للبرلمان .. في وقت القصة بتاعتنا البرلمان إختار واحد إسمه (كوينتيس فابياس ماكسيموس) واللي أنا بسميه الرايق اللي ميحاربش وهو متضايق .. (فابياس) وجهة نظره أنتوا جربتوا تروحوا تتخانقوا مع (هانيبال) وفي كل مرة بيتداس علي وشكوا فواضح إننا بنعمل حاجة غلط .. هو قرر إن القوة أو المواجهة المباشرة عمرها ما حتكسر (هانيبال) .. اللي حيسكر (هانيبال) حاجة تانية خالص .. الوقت.

(فابياس) قرر إن أحسن استراتيجية ممكن روما تمشي عليها هي إنها تتفادي أي مواجهة مباشرة مع (هانيبال) .. سيبوه ينهب في القري .. سيبوه يحرق في الأراضي الزراعية .. سيبوه يسرق أكلنا .. سيبوه يقتل .. سيبوه يغتصب ستاتنا .. في كل مرة حيستفزنا عشان ندخل في مواجهة معاه حنطنشه .. في كل يوم بيعدي هو بيخسر إمدادات وبيخسر فلوس .. شوية صبر وجيشه حيجوع .. الفكر ده علي فكرة بيتدرس في أي كلية عسكرية دلوقتي .. الفكر ده الأمريكان استخدموه ضد البريطانيين أيام حرب الاستقلال بتاعتهم وفي الاستراتيجية العسكرية بيتسمي تكتيك فابيان Fabian Tactic .. بس المشكلة إن الرومان نفسهم كانوا مش عاجبهم الفكر ده .. إنت لو مكانهم حتفكر زيهم .. تخيل مثلاً إن الجيش الإسرائيلي دخل مصر وإحنا مش عارفين نكسبه في أي معركة مباشرة وجه الرئيس عندنا قال سيبوا الإسرائيليين ينهبوا ويسرقوا ويحرقوا ويغتصبوا في ستاتنا وإحنا عادي حنسيبهم لحد ما يتعبوا وساعتها إحنا حننقض عليهم بس لما تيجي اللحظة المناسبة .. ساعتها الغضب اللي في الشارع حتي لو إحنا شايفين إن ده صح وإن دي استراتيجية فعلاً حتجيب نتيجة بس حنرفضها .. رغم إن الرومان جابوا (فابياس) عشان يبقي ديكتاتور ويمشي كلمته عليهم وهم يحطوا جزمة في بقهم بس هم مستحملوش يفضلوا ساكتين وبدأت تتشكل مؤامرة عشان يتعمل إنقلاب عسكري علي (فابياس) بقيادة قائد القوات البرية (ماركوس مينوشيوس روفس).

علي الناحية الثانية (هانيبال) كان عارف إن (فابياس) ده تعلب وإن لو الرومان سمعوا كلامه ففعلاً الوقت هو اللي حيخلص علي (هانيبال) فكان من مصلحة (هانيبال) إن (فابياس) ده يغور في ستين داهية .. في الوقت ده كانت الإشاعة إن فيه مؤامرة بتتعمل عشان (روفس) يعمل إنقلاب علي (فابياس) وصلت ل(هانيبال) واللي عشان يشعلل الدنيا أكتر بقي لما يجي مثلاً يقرر يحرق أرض زراعية ويسمع إن الأرض دي مملوكة ل(فابياس) بيسيبها ميحرقهاش .. شوية بشوية والإشاعات بقت بتكتر إن يمكن (هانيبال) و(فابياس) أصلاً صحاب وطابخينها سوا .. الإنقلاب حصل بإن البرلمان مش حقول لغي صلاحيات الديكتاتور اللي عطوها ل(فابياس) بس قرروا إنهم يعينوا (روفس) ديكتاتور معاه .. اللي هو كأنهم رجعوا تاني نظام القناصل .. بمجرد ما القرار طلع (روفس) جمع جيشه اللي هو فعلياً جاب كل القوات المسلحة اللي تحت إيد روما وخد نصهم وحاول يواجه (هانيبال) تالت مرة وللمرة الثالثة الرومان بيتداس علي وشهم .. سنة كاملة في الهم ده لحد ما البرلمان في روما قال للإتنين يلا من هنا يا شوية مهزقين وإتعملت إنتخابات جديدة جه فيها إتنين قناصل جداد اللي هم (جايوس ترينتيوس فارو) و(لوسيوس أميليوس باولوس) .. ركزلي بقي مع (فارو) ده شوية لإنه مصيبة سودا لوحده.

إزاي (فارو) لبس روما في أسوأ كارثة عسكرية في تاريخ البشر؟

(فارو) بني حملته الإنتخابية علي إنه هو الشخص الوحيد اللي يقدر يعلق رأس (هانيبال) علي أبواب روما .. هو الوحيد اللي يقدر ينقذ البلد والناس صدقته .. كسب الإنتخابات وشكل أكبر جيش إتعمل في تاريخ روما كلها .. 16 لواء بإجمالي عدد مقاتلين عدي 80,000 وده رقم فشيخ ومجرد إنك تقارنه بتعداد جيش (هانيبال) اللي كان يدوبك 40,000 جندي مشاة و 10,000 فارس فكده المنطق بيقول إن (هانيبال) حيتداس علي وشه .. أنا عارف إن في بداية دخول (هانيبال) شمال ايطاليا كان معاه 25,000 بس لكن جاتله تعزيزات من قبائل الغال اللي شافته الأمل الوحيد قدامهم إنهم يخلصوا من روما .. (فارو) طلع زعق في الناس هو فين .. هو فين (هانيبال) .. إتقاله إن (هانيبال) معسكر في حتة إسمها كاناي والغرب بينطقوها كيني .. (فارو) زعق في رجالته وقالهم تعالوا ورايا .. لما الجيش الروماني وص لكاناي حصلت خناقة بين (فارو) و(باولوس) وكأن نصيب الرومان إن في كل مرة يحاربوا (هانيبال) الإتنين القناصل يمسكوا في خناق بعض .. (باولوس) مكنش عاجبه إن (هانيبال) هو اللي اختار مكان المعركة .. كاناي دي حتة مفتوحة مفيهاش لا جبال ولا مرتفعات .. ولإن زي ما حصل في نهر تريبيا لما الإتنين القناصل يبقوا موجودين مع بعض في نفس المنطقة فالقانون بيقول إن (فارو) يحكم يوم و(باولوس) يحكم يوم .. لما جه اليوم بتاع (فارو) أصدر أوامره لجيشه إنه يستعد للهجوم .. لحد دلوقتي أنا مقلتش ليه كاناي تعتبر أسوأ هزيمة عسكرية لأي جيش في تاريخ الحروب لإن المعركة دي تعتبر كورس مكثف في إزاي جيش صغير يقدر يحاصر جيش أكبر منه .. عارف إنك بتهرش في شعرك ومش فاهم فخليك معايا.

(هانيبال) رص قواته علي شكل هلال معكوس زي ما حتشوف في الخريطة بحيث إن الهلال كان مقوس في إتجاه الرومان .. الفكرة إنه رصص كل المشاة الأضعف واللي تسيلحهم ودروعهم أضعف في نص الهلال وخلي قوات المشاة الأقوي تسليحاً وتدريعاً في الطرفين .. (فارو) شاف ده بعنيه وقالك بااااس بسيطة .. أنا أجيب ال80,000 مقاتل اللي عندي اللي متوزعين علي 16 لواء وأعتبرهم إنهم وحدة قتالية واحدة بحيث أخليهم يضربوا نص الهلال الضعيف واللي بمجرد ما يقع حيقدر رجالتي يشقوا طريقهم ل(هانيبال) اللي طبيعي حيكون في الصفوف الخلفية بيتابع المعركة ماشية إزاي .. سامعك يا اللي بتقول حلو .. اللي إنت متعرفوش إن (هانيبال) وقادة الجيش بتوعه إتنكروا في زي ضباط مشاة وكانوا ضمن الصفوف الأولي للقوات البرية اللي في نص الهلال وكأنه بيقول للعساكر بتوعه يا نعيش عيشة فل يا نموت إحنا الكل .. الهجوم الروماني كان كاسح بس صفوف المشاة بتاع قرطاجة صمدت والهلال المعكوس بدأ يتعدل .. شوية بشوية قوات المشاة بتاع قرطاجة بدأت تتراجع ده في الوقت اللي قوات المشاة بتاعة قرطاجة الأقوي واللي قلتلك إنها مترصصة علي طرفي الهلال بدأت هي تتحرك لجوه بحيث تقفل علي القوات الرومانية .. اللحظة اللي مصير الرومان إتحسم فيها كانت لما خيالة قرطاجة لفت وقفلت الدايرة .. عارف لما (رامزي بولتون) حاصر (جون سنو) في Battle of the Bastards؟ بس المرة دي من غير ما (سانسا) تيجي تلحق الرومان .. من ال80,000 مقاتل اللي (فارو) دخل بيهم المعركة مفضلش منهم غير 3,000 .. معركة كاناي كانت كارثة حقيقية مش بس عشان عدد الضحايا من الجنود إنما كمان قادة الجيش .. 6000 قائد روماني إتقتلوا في المعركة دي .. روما كانت بتستعد لأخر أيامها .. زهرة شباب جيل كامل مات .. كل القيادة العليا للقوات المسلحة ماتت .. لحد ما حصل حاجتين كانوا يمكن هم السبب إن في الـخر الحرب دي إتحسمت لروما:

• أول حاجة إن (هانيبال) مراحش حاصر روما عشان ينهي الحرب .. وقتها روما مكنش عندها إلا أخر جيشين حالهم يصعب علي الكافر تقدر تدافع بيهم عن نفسها .. الجيش الأول في الجنوب بقيادة واحد من القنصلين الجداد اللي أنتخبوا بعد مجزرة كاناي اللي هو (جاياس كلوديوس نيرو) .. الجيش الثاني في الشمال بقيادة (ماركوس ليفيوس سالاندر) .. ولا واحد من الجيشين كان يقدر لوحده إنه يقف قصاد (هانيبال) .. حتقولي طب ليه الجيشين ميتجمعوش مع بعض ويقفوا قصاد (هانيبال) وده سؤال منطقي والاجابة عنه سببين واحد فيهم أقدر أقوله ليك دلوقتي والسبب التاني حتعرفه كمان شوية .. السبب الأول إن قرطاجة كان ليها قوات في جزيرة صقلية اللي هي في جنوب إيطاليا والجيش اللي تحت إيد (نيرو) كان هو خط الدفاع الأخير قصاد القوات دي .. فلو (نيرو) ساب مكانه عشان يروح يواجه (هانيبال) فحتبقي مصيبة .. السبب الثاني بقي حتعرفه كمان شوية.
• تاني حاجة هي (سكيبيو) الصغير اللي بفكرك إنه إبن (سكيبيو) الكبير واللي قلتلك خلي بالك منه وأفتكر إسمه لإننا حنحتاجه بعدين وجه الوقت نتكلم عنه .. (سكيبيو) الصغير اللي بعد كده الرومان سموه (سكيبيو أفريكانوس) وخلينا نسميه كده من دلوقتي كان لسه عنده 25 سنة لما إقترح علي الرومان إن الحل الوحيد إننا نخلص من (هانيبال) إننا نجبره يمشي من إيطاليا خالص .. إزاي يا حاج؟ .. نضربه في مملكته اللي عنده أهم من قرطاج .. إسبانيا ..  وبعد ما ناخد إسبانيا نتحرك علي قرطاجة العاصمة في تونس .. متنساش إن قلتلك إن أبو (هانيبال) اللي هو (هاميلكار باركا) زي ما يكون أسس مملكة جديدة في إسبانيا .. (سكيبيو أفريكانوس) إترجي البرلمان إنهم يدوله شوية قوات عشان يروح ياخد بيهم إسبانيا والغريبة إنهم وافقوا .. مش عشان هم شافوا فيه الأمل أو إنهم كانوا عارفين إنه جامد .. لا خالص .. أصلهم كل ما يعينوا حد عشان يمسك الجيش الروماني في إسبانيا يرفض المنصب عشان عارف إنه إنتحار و(سكيبيو أفريكانوس) هو الوحيد اللي إتطوع للوظيفة .. هنا إنت محتاج تفهم إن (سكيبيو أفريكانوس) هو النسخة الروماني من (هانيبال) .. الإتنين كانوا في نفس السن تقريباً لما تولوا قيادة جيش بلدهم .. 25 سنة .. الإتنين بيفكروا بره الصندوق .. الإتنين ماشيين بمبدأ داري علي شمعتك تقيد .. (سكيبيو أفريكانوس) فعلياً مقالش لأي حد إنه حياخد الجيش بتاعه ويعمل عملية إنزال بري جريئة أوي علي سواحل العاصمة بتاعة قرطاجة في إسبانيا اللي هي كارثاجو نوفا اللي إنت دلوقتي عارفها بإسم برشلونة زي ما قلتلك .. حتي مساعدينه في القيادة بتاعة الجيش مكانوش عارفين إنهم رايحين برشلونة إلا بعد ما الأسطول إتحرك فعلاً.

إزاي (سكيبيو افريكانوس) خد إسبانيا والحرب خلصت؟

حصار (سكيبيو أفريكانوس) للعاصمة قرطاجنة بدأ بهجوم كان حينجح فيه إنه يسيطر علي المدينة بس فشل فيه .. في اليوم الثاني حد قاله إن حيحصل عاصفة فقال ل500 من رجالته إنهم يستنوا علي الناحية التانية من البحيرة الصغيرة اللي واحد من أسوار المدينة بتطل عليها وفعلاً تاني يوم قامت العاصفة والرياح خدت المياة من البحيرة الصغيرة وإتخلق طريق صغير عدوه وطلعوا منه للمدينة اللي لما (سكيبيو) دخلها قتل أي حد يشوفه في سكته لحد ما القوات اللي بتحميها استسلمت .. شايفك يا اللي بتقولي ده محظوظ يا عم .. ماشي حنعديها إنها حظ المرة دي .. بعد سقوط العاصمة أخو (هانيبال) اللي هو (صدر- بعل) قرر إنه يسيب إسبانيا خالص ويروح لأخوه في إيطاليا .. متفهمش ليه؟ .. هل هو شاف إن أخوه محتاجله .. هل هو شاف إن إسبانيا خلاص مبقاش ينفع إنه يتدافع عنها .. قرار (صدر- بعل) إنه يتحرك من إسبانيا بإتجاه إيطاليا كان هو السبب في إن الجيشين اللي تحت إيد روما مقدروش يتحركوا يواجههوا (هانيبال) .. الموقف كان كالأتي من وجهة نظر الرومان:

• لو (هانيبال) عرف يقابل أخوه وبقوا جيش واحد فخلاص Game Over وقرطاجة كسبت الحرب.
• لو (نيرو) إتحرك من مكانه في الجنوب عشان يقابل (سالاندر) ويخلصوا من (صدر- بعل) بس (هانيبال) شم خبر وإصطاد جيش (نيرو) في السكة فكده خلاص Game Over وقرطاجة كسبت الحرب.
• لو (صدر – بعل) قدر يخش إيطاليا قبل ما (نيرو) يلحق يوصل عشان يساعد (سالاندر) فكده خلاص Game Over وقرطاجة كسبت الحرب.

رغم كل ده (نيرو) عملها .. خد أغلبية جيشه و إتحرك بيهم في السر وقطع مسافة 900 كيلومتر في 7 أيام عشان يوصل من صقلية لحد شمال إيطاليا من غير ما (هانيبال) يعرف .. لما جيش (صدر – بعل) إتهزم وهو شخصياً مات في المعركة ساعتها البرلمان في روما وافق علي النص الثاني من خطه (سكيبيو أفريكانوس) .. عشان نطرد (هانيبال) من إيطاليا لازم نهاجم قرطاجة .. (سكيبيو أفريكانوس) بعت جواسيسه لقرطاجة وبلغوه إن فيه حرب أهلية بتحصل هناك و(هانيبال) مش موجود وفيه أمير إسمه (ميسينيسا) عايز يحكم ومتخانق مع ولاد عمه .. نزول جيش (سكيبيو أفريكانوس) علي سواحل قرطاجة كان بداية نهاية الحرب .. المدينة بعتت ل(هانيبال) تعالي إلحقنا .. تخيل معايا (هانيبال) كان حاسس بإيه وقتها .. كل السنين دي كلها وكل التضحيات وكل الخساير وفي الأخر ميحققش اللي هو عايزه .. لما قرطاجة إتحاصرت إضطر ياخد كل جيشه ويرجع بسرعة عشان يلحق بلده .. معركة زاما بين (هانيبال) و(سكيبيو افريكانوس) هي اللي حسمت الحرب لروما .. هزيمة (هانيبال) عاملة زي ما تكون فرقة مانشستر سيتي مثلاً بتلاعب فرقة في دوري الدرجة الثانية ويفضلوا مهاجمين ويضيعوا فرص والاستحواذ معاهم وشايطين كور في العارضة وتيجي الفرقة الثانية تجيب جون من هجمة مرتدة في الدقيقة تسعين .. الأجلي فوتبول في أروع صورها.

هنا روما عرضت علي قرطاجة إتفاقية سلام غريبة جداً .. قالولهم أدونا 300 طفل من الأسر الغنية ومن العيلة المالكة كأسري وإحنا حنضمن ليكوا إننا مش حندمر المدينة .. برلمان قرطاجة وافق .. شوية وروما رجعت تقول لقرطاجة طب سلملولنا أسطولكوا وكل تسليحكوا عشان منحاصرش المدينة وندمرها والمرة دي كمان برلمان قرطاجة وافق .. شوية وروما رجعت تقول لقرطاجة طب يا ريت بقي تطلعي سكان المدينة بره عشان إحنا حنخشها .. هنا قرطاجة قررت تحارب .. عشان يعملوا سيوف سيحوا التماثيل بتاعة الألهة بتاعتهم .. عشان يعملوا حبال ستات البلد قصت شعرها .. 3 سنين المدينة فضلت تدافع عن نفسها .. المجاعة قتلت نص تعداد سكان المدينة اللي وقتها كانوا 250,000 بني أدم ومات 75,000 بني أدم من أهل المدينة في المعارك لحد يوم استسلامها .. لما الرومان دخلوا المدينة فعلاً مكنش فاضل فيها من 250,000 بني ادم اللي كانوا عايشين فيها غير 50,000 بس والرومان باعوهم كلهم كعبيد .. ساعتها البرلمان في روما قرر إنه يحرق المدينة .. 17 يوم والمدينة بتتحرق .. الرومان مكانوش بس عايزين يهمزموا قرطاج دول كانوا عايزين يمحوها من الوجود .. مكانوش عايزين حد يفتكر إسمها .. إن إسم (هانيبال) وإسم قرطاجة ميتقالش علي لسان حد بعد كده .. وفي الأخر يقولك إن التوسع الإسلامي ده كان بحد السيف وإن الإسلام إنتشر بالدم .. أنا شخصياً شايف إن الدول الكبيرة بشكل تلقائي جداً بتحاول تفرض سيطرتها علي اللي جنبها .. هي الأيام دول وربنا بيتداولها بين الناس بس خلينا نكون صرحاء بإن الإمبراطورية الرومانية وإن كانت من أعظم إمبراطوريات التاريخ إلا إنها كانت من أكثرها دموية .. كانوا دمويين لدرجة إنهم حبوا يمحوا أي أثر لأعداءهم .. ياريت بس تفتكروا ده كويس قبل ما تقرروا تدافعوا عن التراث الروماني وتشتموا في التراث الإسلامي .. علي الأقل (عمرو بن العاص) رضي الله عنه لما دخل مصر مقالش إحرقلي يا إبني كل الكنايس والأديرة دي مش عايزين وجع دماغ هنا.

المصادر:

• مجموعه حلقات علي YouTube من قناه Extra History تقدر تلاقيهم علي اللينك ده:
  ttps://www.youtube.com/watch?v=EbBHk_zLTmY
  https://www.youtube.com/watch?v=lf0-Yki5p40
• مجموعه حلقات علي YouTube من قناه Extra History تقدر تلاقيهم علي اللينك ده:
  https://www.youtube.com/watch?v=wT_rev5VAQc
  https://www.youtube.com/watch?v=McT1H-NVCMQ
• مقالة بعنوان The Roman empire achieved its conquest through brutality and death نشرت في مجلة The National Interest وده لينك المقالة الأصلية:
  ttps://nationalinterest.org/blog/buzz/roman-empire-achieved-its-conquests-through-brutality-and-death-113016