الطريق إلي الأندلس .. مجد الإمبراطوريات إتبني علي التعيينات الصح .. الجزء الثالث.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/kedwzgbauohl?si=4b341a3ef1924c02863c3587729a6eb9&utm_source=clipboard&utm_medium=text&utm_campaign=social_sharing

فتح الأندلس .. النار اللي شرارتها كان شرف بنت:

أحياناً فيه أحداث كتير في التاريخ بتحصل وبتكون أحداث كبيرة وبترسم ملامح البشر لقرون ويكون سببها حاجة بسيطة أوي .. غيرة ستات ممكن تكون السبب في حروب يروح فيها ضحايا بالالاف .. أو رغبة أب إنه ينتقم لشرف بنته .. لك أن تتخيل إن الفتح الإسلامي للأندلس وحضارة إستمرت لأكثر من 700 سنة ووراها فترة صعبة في تاريخ البشر زي محاكم التفتيش الإسبانية سببها في الأخر إن أب قلبه إتحرق علي شرف بنته .. اللي حصل إن سنة 710 كان فيه مدينة إسمها سايوتا Ceuta بالإنجليزي وسبتة بالعربي ودي مدينة إسبانية بتطل علي مضيق جبل طارق علي طول .. المدينة دي كان بيحكمها رجل طيب إسمه الكونت (جوليان) .. فعلياً بعد ما (طارق بن زياد) بقي حاكم طنجة فبقي هو و(جوليان) جيران .. يدوبك بيفصل بينهم ترعة .. طبيعي إن في حالات زي دي الحكام يتكلموا مع بعض عشان يشوفوا إزاي ممكن ينفعوا بعض زي إنهم يسهلوا من طرق التجارة وإنهم ميضايقوش بعض عملاً بالمبدأ الأزلي في السياسة اللي هو محدش بيقول للرزق لا .. (طارق) بعت ل(جوليان) جواب إنه محتاج يجيله في زيارة رسمية زي أي زيارة رسمية بين إتنين رؤساء دول بتشوفها دلوقتي .. في الوقت ده (جوليان) كان له بنت وحيدة بعتها العاصمة بتاعة المملكة اللي هي طليطلة أو توليدو عشان تكمل تعليمها وهي هناك أُعجب بيها الملك (رودريك) اللي زي ما قلتلك أعلن نفسه ملك غصب كده وإغتصبها زي ما إغتصب الحكم وخلاها حامل منه.

(جوليان) جاله خبر إن بنته شرفها أُنتهك وهو قاعد مع (طارق) .. متفهمش إيه اللي حصل بس (جوليان) حلف مية يمين إنه ينكد علي (رودريك) عيشته وإيه ممكن يعمل فيه كده غير إنه يقدم إسبانيا للعرب .. (جوليان) عرض علي (طارق) إنه هو بنفسه اللي حيوفر السفن اللي قواته تعبر بيها المضيق من المغرب لحد إسبانيا .. في إبريل 711 (طارق بن زياد) ومعاه 7,000 مقاتل كانوا عبروا مضيق جبل طارق اللي هو سماه علي إسمه .. أنا عارف كويس إن 7,000 مقاتل دول مش رقم يكفي إن (طارق بن زياد) يفتح إسبانيا كلها بس إنت مهم تفهم المنطق ورا الأمور.

فيه مصطلح في العسكرية الحديثة إسمه  Reconnaissance in Force يعني قوة إستطلاع كبيرة تروح مكان هي مش عارفاه وتبدأ تستكشفه .. الفكرة إنك عايز قوة تقدر تدافع عن نفسها لو حصلت مشكلة وفي نفس الوقت القوة دي بتفضل ماشية جنب الساحل عشان في أي لحظة (طارق) يقدر يسحبهم للسفن بتاعته الي علي الساحل .. في الوقت ده (رودريك) كان في أقصي شمال إسبانيا فوق خالص بيحارب القبائل الباسكية .. إقليم الباسك ودول الناس اللي عايشة بين فرنسا وإسبانيا من قديم الأزل وهم ناس دماغهم ناشفة مش بيحبوا حد غريب يحكمهم واللي منكم بيحب الكورة عارف ده من ماتشات فرقة أتليتيكو بيلباو .. طبعاً وجود 7,000 مقاتل أجنبي علي أرضك ده خبر كفيل إنه أولاً يجيلك بدري وثانياً يخليك تسيب اللي وراك واللي قدامك وتجري تشوف المصيبة دي.

(رودريك) لما إتحرك بإتجاه جنوب إسبانيا كان إلي حد ما فاهم الموضوع .. من وجهة نظرة أنا تحت إيدي 30,000-40,000 مقاتل وده رقم كافي جداً إنه يدمر قوة الإستطلاع بتاعة (طارق) وهي دي الفكرة .. هو عارف إن دي قوة إستطلاع .. ممكن في أي وقت يلاقي جيش إسلامي أكبر من ده بكتير نزل علي سواحل بلده وعشان كده هو محتاج فعلياً ميسيبش حد عايش من القوة بتاعة (طارق) .. هو عسكري واحد بس يرجع عشان يبلغ المسلمين بإن القوط اللي عايشين في إسبانيا دول مفيش قوة في الأرض حتنتصر عليهم .. عشان كده رغم إن (رودريك) كان تحت إيده الرقم ده من العساكر إلا إنه بعت لكل أمراء إسبانيا إن كل أمير يجي هو ورجالته .. دي كانت أهم معركة في حكم (رودريك) وهو كان فاهم ده كويس .. هو مش بس يحتاج يكسب ده محتاج يكسب بفرق سكور كبير.

علي الناحية الثانية (طارق) بعت ل(موسي بن نصير) إنه محتاج تعزيزات وبسرعة .. (موسي) بعتله 5,000 مقاتل وبكده إجمالي عدد القوات اللي تحت إيد (طارق) بقوا 12,000 بس .. حتي بعد التعزيزات دي فقوات (رودريك) كانت تقريباً أكتر من ضعف قوات (طارق) .. المعركة اللي (رودريك) كان مستنيها حصلت يوم 19 يوليو 711 .. المعركة دي الغرب بيسميها معركة جوادا-ليتي Battle of Guadalete والمصادر العربية بتسميها معركة وادي لكة أو معركة شذونة أو معركة سهل البرباط .. أيا كان إسمها فالمعركة دي حصلت جنب مدينة قادش اللي ليها نادي الموسم ده بيلعب في الدوري الممتاز الإسباني .. المهم إن في المعركة دي (رودريك) شاف طارق واقف هو ورجالته فوق تلة مرتفعة شوية فأمر بهجوم شامل .. مهم بردة تبقي فاهم وحعيد تاني إن (رودريك) كان عايز نصره في المعركة دي يبقي حاسم .. هو عايز العساكر اللي حيعيشوا وحيرجعوا تاني المغرب يحكوا عن إزاي القوط دول ناس مفترية .. في وسط الهجوم ده (رودريك) إتسلم تسليم أهالي .. فاكر لما قلتلك إن (رودريك) أمر كل الأمراء في مملكته إن كل واحد يجي هو ورجالته؟ .. وفاكر لما قلتلك إن (رودريك) أعلن نفسه ملك غصب كده؟ .. دي كانت فرصة الأمراء المعارضين لحكمه واللي نفسهم هم كمان يحكموا إنهم يخلصوا منه .. كل أمير هو ورجالته وقفوا في السكة وسابوا (رودريك) يلبس لوحده في قوات (طارق).

الحتة دي عشان تتفهم إنت محتاج ترجع تبص علي المجتمع الإسباني وقت حكم القوط .. كنت قلت إن المجتمع ده سياسياً كان عامل زي Game of Thrones كده اللي هو كله بيخزوق في كله .. مفيش أي سبب منطقي يخلي أي أمير قوطي يخون (رودريك) بالشكل ده إلا إذا كلهم كانوا باصين تحت رجليهم .. كل اللي كانوا بيفكروا فيه هو إن (رودريك) يغور في ستين داهية .. طب يا عم ما لو (رودريك) مات فأنتوا مش حتقدروا تقفوا قصاد المسلمين لوحدكوا .. هي دي الفكرة .. أمراء إسبانيا كانوا ناس كل واحد عاجباه دماغه ومعندهمش أي نوع من الحكمة والتخيل إنهم يعرفوا إن إسبانيا مش تحت إيدها إلا جيش واحد ولو الجيش ده إتهزم فخلاص كده Game Over وإسبانيا بقت تحت حكم المسلمين .. إن يكون عندك طبقة حاكمة قارية تاريخ وفاهمة إن الأمراء الإسبان مش زي الدولة الرومانية اللي تقدر تتهزم مش مرة ولا إتنين إنما 3 مرات متتالية من (هانيبال) ورغم كده تقدر تهزمه في الأخر زي ما شفنا في قصة الحروب البونيقية دي مش حاجة سهلة.

ده في الوقت اللي (طارق) مكنش لوحدة .. كان فيه حد بيساعده والحد ده كان الكونت (جوليان) .. الرجل ده كان بيكره (رودريك) لدرجة إنه بقي فعلياً Google Maps بتاع (طارق) في إسبانيا .. الحقيقة إن المعلومات اللي الكونت (جوليان) عطاها ل(طارق) تتقدر بالذهب .. خلال سنة واحدة كان (طارق) دخل عاصمة القوط في إسبانيا اللي هي توليدو وخد تاني أكبر مدينة ليهم اللي هي قرطبة أو كوردوبا Cordoba بالإنجليزي وياريته هو اللي خدها .. ده بعت واحد من الضباط بتوعه وكان إسمه (مغيث) ومعاه 700 فارس بس عشان ياخدوا المدينة وسيطروا عليها بعد حصار إستمر 3 شهور.

الغيرة مرة وياما بهدلت أبطال:

حاول تحط نفسك مكان (موسي بن نصير) لثواني .. دلوقتي إنت بعت (طارق) إسبانيا وتحت إيده 7,000 مقاتل عشان تبقي زي ما قلت عملية إستطلاع .. شوية (طارق) قالك إلحقني وبعتله 5,000 كمان .. خلال سنة واحدة (طارق) خد عملية الإستطلاع دي رماها من الشباك وحولها لغزو كامل لإسبانيا .. في سنة واحدة هزم الجيش اللي بيحمي إسبانيا .. خد العاصمة توليدو وتاني أكبر مدينة اللي هي قرطبة .. تفتكر حتحس بإيه؟ .. حاول تبصلها كإنك مدير شركة وعندك موظف شاطر أوي ماسك مشروع .. قلتله خد إمسك المشروع ده شوفلنا حيكلف كام لقيته مش بس عمل دراسة جدوي ده بقي بيكلم الكلاينت وبيحجز مواعيد تسليمات وتقريباً إنت مش موجود في الصورة .. تفتكر حتحس بإيه؟ .. حتعمل إيه؟ .. حقولك اللي عمله (موسي) وإنت بينك وبين نفسك قول هو ده اللي إنت كنت حتعمله أو لا.

(موسي) خد 18,000 مقاتل وتقدر تقول إنها كانت المرحلة الثانية من فتح الأندلس وفي يونيو 711 وصل سواحل إسبانيا لمدينة سايوتا بتاعة الكونت (جوليان) وإتحرك لمدينة إشبيلية وخدها وبعد كده وصل مدينة ميريدا Merida اللي إحتاجت سنة كاملة عشان (موسي) ياخدها في 713 .. ده في الوقت اللي حتت تانية في إسبانيا رضت تبقي تحت سيطرة المسلمين من غير ما حد يموت .. ولاية ميرثيا شرق إسبانيا الحاكم بتاعها عمل إتفاق سلام مع (موسي) إن والله أرضه حيبقي ليها حق الحكم الذاتي في مقابل إنه يدفع الجزية وإن القوات الإسلامية تتحرك زي ما هي عايزة في أرضه .. المرحلة اللي بعد كده هي اللي كانت مُسلية لما (طارق) و(موسي) قابلوا بعض في توليدو .. لك أن تتخيل أغرب إجتماع شغل يحصل لما (موسي) و(طارق) قعدوا مع بعض يصفوا حساباتهم.

(طارق) كان زي الموظف في شركة اللي شاطر أوي في شغلة وبيدخل شغل كتير للمكتب لدرجة إن لما مديره قعد معاه عشان يديله زيادة في مرتبه جه قاله زيادة إيه لا انا عايز أبقي شريك في المكتب .. طبعاً مدير المكتب زعقله وعرفه مقامه وإن إنت جاي تشتغل عندي مش تشاركني بس عشان ميزعلوش قاله الزيادة اللي كنت حديهالك حديلك قدها الضعف بس حتفضل شغال معايا .. دي كانت خلاصة القعدة بين (طارق) و(موسي) واللي بعدها لما بصوا علي خريطة شبه جزيرة إيبيريا اللي هي إسبانيا والبرتغال  لقوا إن فعلياً تحت إيدهم نصها تقريباً ولسه النص التاني .. سنة 714 الإتنين قسموا القوات اللي تحت إيدهم نصين .. النص الأول كان بقيادة (طارق) واللي خد مدينة سرقسطة وبعدها برشلونة .. ومش بس كده .. (طارق) كان زي القطر اللي مش بيقف في محطات لدرجة إنه عدي جبال البرانس ووصل جنوب فرنسا لحته إسمها ناربون Narbonne.

الحقيقة إن الغيرة مرض بياكل قلوب الناس خصوصاً الرجاله .. متتخيلش إن غيرة الستات اللي بنشوفها في حياتنا وحشة .. غيرة الستات دي سهلة قصاد غيرة الرجاله من بعض خصوصاً لو بتتكلم عن رجاله في إيدها سُلطة .. السلطان الأموي في الوقت ده كان (سليمان بن عبدالملك بن مروان) وده يبقي إبن (عبدالملك بن مروان) واللي خليني أفكرك إن ده الرجل اللي كان وزير داخليته (الحجاج بن يوسف الثقفي) وده الرجل اللي ضرب الكعبة بالمنجنيق عشان ينهي التمرد ضد حكمه .. (سليمان) كان أولاً رجل مفتري أو خليني مبقاش قاسي عليه وأقول إن (سليمان) مكنش عنده أي مشكلة إنه يبقي قاسي وشايل قلبه حاطط مكانه ديب فريزر لو إحتاج يوري الناس مين اللي بيحكم .. سنة 714 (سليمان) كانت أول سنة ليه كخليفة وهو بص لقي (موسي) و(طارق) طايحين في إسبانيا من غير ما حد يقولهم أنتوا بتعملوا إيه؟ .. الإتنين مش مستنيين إنهم ياخدوا إذن الخليفة في أي قرار .. الإتنين بيتعاملوا علي إن إسبانيا والبرتغال بقت بتاعتهم فعلياً.

يمكن عشان كده (سليمان) قرر إستدعاء الإتنين لدمشق .. لما (موسي) جاله جواب الإستدعاء هو كلف إبنه (عبدالعزيز) إنه يمسك إسبانيا لحد ما هو يرجع .. الخطوة دي يمكن خلت لو (سليمان) كان شاكك إن (موسي) بيفكر يستقل بإسبانيا فدلوقتي بقي متؤكد .. لما (موسي) و(طارق) وصلوا دمشق لقوا نفسهم قدام خليفة مش عايز يسمع أصلاً هم حيدافعهم عن نفسهم إزاي .. (سليمان) كان مقتنع بإن الإتنين بيتأمروا ضده وإنهم بيخططوا إنهم يستقلوا بإسبانيا .. (سليمان) أمر بعزل الإتنين من مناصبهم وتجريدهم من ثرواتهم ودي كانت أخر مرة نسمع سيرة (طارق بن زياد) .. ده في الوقت اللي (عبدالعزيز) كان عايش في اللالاند .. في الوقت اللي أبوه بيتحاكم في دمشق بتهمة الخيانة العظمي فالبيه بعد ما خلي باقي إسبانيا والبرتغال تحت إيده راح إتجوز أرملة الملك (رودريك) .. هو (رودريك) عشان يحافظ علي النسل الملكي إتجوز بنته فلما هو إتقتل (عبدالعزيز) إتجوزها.

اللي حصل بعد كده يعلمك الدرس المهم فشخ .. أوعي تمشي ورا كلام حرمة .. مراة (عبدالعزيز) الجديدة أقنعته إنه عشان يحكم القوط لازم يتعامل كأنه ملك القوط .. لازم يلبس لبسهم .. يعمل حفلات عري زي حفلاتهم .. يلبس تاج .. يسمي نفسه ملك القوط .. طبعاً لما الخليفة (سليمان) عرف شاط وأمر بإغتياله ومش بس إغتياله .. رأس (عبدالعزيز) إتفصلت عن جسمه وإتحطت في قلة فيها خل عشان تحافظ عليها وإتشحنت علي مركب لحد دمشق .. مش بس كده .. بعد ما (سليمان) عزل (موسي بن نصير) وجرده من كل ثرواته وسابه يشحت في الشارع لما رأس إبنه وصلت دمشق الخليفة عمل حفلة كبيرة وخلي الحرس بتوعه يجيبوا (موسي) القصر .. (موسي) قعدوه علي طرابيزة في وسط الحفلة وقدموله راس إبنه علي طبق .. تحس إن (سليمان) كان بيعلي علي (جورج أر أر مارتن George R.R. Martin) اللي كتب Game of Thrones.

متتخيلش إن عدم وجود (طارق) أو (موسي) أو حتي (عبدالعزيز) في إسبانيا حيعطل الدنيا .. دي ميزة الفتوحات الإسلامية وهي إن فيه System بيتحط والناس بتمشي عليه زي عقارب الساعة .. مش حتفرق مين اللي في القيادة ومش حتفرق إذا كان فيه حد قاعد علي الكرسي أصلاً أو لا .. في الفترة من 716 لحد 720 أغلب شبه جزيرة إيبيريا كان تحت سيطرة المسلمين .. الخطوة الأولي هي السيطرة علي المدن الكبيرة .. الخطوة الثانية هي السيطرة علي طرق التجارة .. الخطوة الثالثة هي الهجرة وهي إن السكان العرب يبدأوا يروحوا يعيشوا في المكان اللي إتفتح .. عادة العرب بيحبوا يعيشوا في المدن بس البربر أو الأمازيغ اللي برده مسلمين بس بسبب طبيعتهم وإنهم بيحبوا الخلاء ومش بيحبوا زحمة المدن بيفضلوا يعيشوا في الأرياف والمناطق الجبلية.

قصه الفتح الإسلامي للأندلس بتفكرني بقصة قريتها من الفلكلور الشعبي الإسباني .. القصة بتقول إن زمان قبل زمن الملك (رودريك) بكتير كان فيه ملك من القوط بني برج وفي البرج ده حط أهم سر من أسرار الكون وقفل باب البرج بقفل ضخم .. وصية الملك ده إن أي ملك يجي من بعده لازم يحط قفل زيادة علي القفل الأصلي اللي باب البرج إتقفل بيه .. 26 ملك جم من بعد الملك ده وكلهم نفذوا الوصية لحد ما البرج بابه بقي مقفول ب27 قفل ولحد ما جه الملك (رودريك) .. (رودريك) فتح الأقفال دي كلها ودخل البرج .. البرج كان جواه أوضة واحدة .. حيطان الأوضة كان مرسوم عليها جرافيتي عبارة عن فرسان راكبين حصنة عربية أصيلة وفي إيدهم رماح .. في وسط الأوضة كان فيه طرابيزة من الذهب والفضة ومرصعة بالأحجار الكريمة .. الطرابيزة منقوش عليها جملة إن دي طرابيزة الملك (سليمان) إبن الملك (داوود) عليهما السلام .. علي الطرابيزة كان فيه قلة من الفخار جواها ورقة .. لما الملك (رودريك) فتح الورقة لقي مكتوب عليها بما إنك إنت اللي فتحت أبواب البرج وإنت اللي مسكت الورقة عشان تقرأها فإنت السبب في إن الفرسان اللي مرسومين علي الحيطان حيغزو إسبانيا وحيطيحوا بحكم الملك بتاعها اللي هو إنت.

زي ما قتلك الفتح الإسلامي بقي خلاص زي المكنة .. زي المصنع اللي خطوط الإنتاج بتاعته مش بتقف عشان خاطر مهندس الصيانة تعبان وعنده إشتباه كورونا .. صحيح إن نهاية (موسي بن نصير) و(طارق بن زياد) كانت سنة 714 إلا إن في 721 المسلمين بيعبروا جبال البرانس اللي بتفصل بين إسبانيا وفرنسا وبيحاولوا يسيطروا علي مدينة تولوز .. جميل .. لسه المسلمين بيفرشوا العدة وبيرشوا مياه وبيركبوا المنجنيق وأبراج الحصار إذا  بأمير المنطقة وكان إسمه (أودو Oddo) بيهجم عشان ينقذ المدينة من الحصار .. عشان بس تبقي فاهم إن عشان جيش وقتها يكون لسه واصل مدينة يحاصرها ويبدأ يركب المعدات والأسلحة اللي حيستخدمها في الحصار وقائد الجيش يبدأ يرصص عساكره فدي بتبقي مرحلة حرجة أوي .. دي شبه دخولك الحمام كده .. تخيل إنك في الحمام ولسه بتقلع بنطلونك تلاقي حد جاي يثبتك عشان يسرقك .. إياكش حتي تبقي (جاكي شان) زمانك مش حتعرف تتصرف.

هزيمة المسلمين كانت قاسية أوي .. هزيمة خلتهم ينسحبوا تاني لحد إسبانيا .. المسلمين بيكرروا المحاولة تاني سنة 725 بغارة جديدة وصلت لحد مدينة أوتون Autun ودي مدينة علي الحدود بين فرنسا وسويسرا .. الحقيقة إن في رأيي المشكلة كلها كانت في Google Maps .. حاول تتخيل إنك رايح مشوار وإنت معاك Google Maps وفجأة موبايلك يفصل .. إنت ممكن مشوارك يبقي في أكتوبر وإنت ساكن في مصر الجديدة بس عشان إنت من الصعيد ومتعرفش السكة ممكن توصل إسكندرية وإنت مش واخد بالك .. المسلمين مكنش عندهم دراية أوي ولا عارفين تفاصيل أوروبا جغرافياً ودي كانت مشكلة.

سنة 732 كانت السنة الفاصلة .. السنة اللي بيعشقها المؤرخين والمستشرقين .. دي السنة اللي أي حد من المستشرقين فرحان بيها أوي علي إنها السنة اللي واحد إسمه (تشارلز مارتل Charles Martel) أنقذ المسيحية من سيطرة الإسلام بعد معركة تعتبر من أشهر المعارك في تاريخ البشر وهي معركة بلاط الشهداء .. عشان تفهم ليه إتقال علي السنة دي كده أنا محتاج أرجعك تاني معلش لسنة 711 .. دي السنة اللي (طارق بن زياد) بدأ فتح الأندلس بس أنا مش عايز أتكلم عن السنة دي من وجهة نظرنا كمسلمين .. أنا عايز أتكلم عنها من وجهة نظر (تشارلز مارتل) عشان تفهم ليه سنة 732 مهمة؟ وتفهم ليه المستشرقين والغرب بيمجدوا أوي فيه؟

من اليوم اللي (تشارلز) إتولد فيه والناس بتعايره .. هو عامل زي شخصية (جون سنو Jon Snow) في مسلسل Game of Thrones .. هو زيه زي (جون سنو) الإبن اللي مش شرعي لأمير من أمراء فرنسا .. سنة 714 ودي السنة اللي (طارق بن زياد) و(موسي بن نصير) قدروا يضموا الأندلس للدولة الأموية أبو (تشارلز) مات ومراته الأولانية اللي كانت عايزة إبنها اللي كان لسه عنده 8 سنين يحكم أمرت بسجن (تشارلز) عشان ميبقاش تهديد لحكم إبنها .. (تشارلز) بيقدر يهرب ولإنه من وجهة نظر ناس هو الوريث الشرعي للحكم فقدر يجمع جيش إشتبك مع جيش مراة أبوه الأولانية بره أسوار مدينة كولون سنة 716 .. (تشارلز) إنهزم في المعركة دي ودي كانت المرة الوحيدة اللي يخسر فيها معركة.

(تشارلز) كان من الناس اللي بتفهم أوي .. عشان تفهمه حاول تفتكر مشهد من مشاهد فيلم Brave Heart لما (وليام والاس William Wallace) وهو صغير كان عايز ينتقم لموت أبوه بس عمه اللي جه عشان يربيه قاله قبل ما تتعلم تستخدم سيف لازم تتعلم تستخدم مخك .. هزيمته في معركة كولون علمته إنه لازم يفكر بره الصندوق .. بره الأفكار اللي مجتمعه وعصره إتعود عليها .. هو كان مقتنع بإن الجيوش أهم حاجة بتميزها هي التدريب .. التدريب هو أهم أداة في إيد أي قوات مسلحة ودي كانت القاعدة رقم واحد .. قاعدة رقم إتنين إن الخداع عامل زي الملح في الأكل يعني مفيش حرب من غير خداع .. قاعدة رقم ثلاثة إن لازم تتعلم إزاي توصل لمرحلة إنك تقول علي نفسك أنا مفيش حد يتوقعني .. في نفس السنة اللي هي 716 قدر يهزم جيش مراة أبوه بإنه نفذ واحدة من أشهر المناورات اللي العرب والمسلمين إتشهروا بيها اللي هي الكر والفر وده يوريك قد إيه (تشارلز) كان من الناس اللي معندهاش مشكلة يقرأ ويتعلم ويستفيد من خبرات ناس حتي لو كانوا المسلمين اللي وقتها المسيحين الكاثوليك كانوا بيقولوا علينا إن إحنا شياطين في الأرض.

الفكرة إنك تقنع عدوك إنك حتنسحب لدرجة إنه يقرر يجري وراك لحد ما بتوصل لمكان إنت محضره كويس .. مكان يكون فيه شجر كتير أو تل عشان تخبي فيه باقي قواتك عشان في لحظة محددة القوات دي تطلع وتفجع عدوك .. الكر والفر بيحتاج تدريب كتير وبيحتاج قائد واثق فشخ في قدراته وقدرات رجالته عشان كده مش أي حد بيعرف يعمله .. سنة 718 شمال فرنسا كله بقي تحت إيد (تشارلز) .. من 718 لحد 732 دخل في حرب شرسة ضد كل جيرانه مرة واحدة واللي كان من ضمنهم (أودو Oddo) اللي في نظر الفرنساويين كان بطل معركة تولوز .. إقليم بافاريا جنوب ألمانيا بقي تحت إيده .. هولندا بقت تبعه .. بس فضلت معركة تولوز (تشارلز) واقف قدامها كتير.

(تشارلز) كان عارف إن العرب حيهاجموا تاني .. هو شاف بعنية إزاي هم إتهزموا في تولوز في 721 ورجعوا تاني في 725 فأكيد في يوم حيسمع خبر إن المسلمين عبروا جبال البرانس للمرة الثالثة والمرة دي حيكونوا حالفين إنهم ميرجعوش تاني قفاهم يقمر عيش .. (تشارلز) بدأ يذاكر الجيوش الإسلامية .. إيه أسلحتها؟ .. إيه تكتيكها في المعارك؟ .. مع الوقت بدأ يفهم المشكلة فين .. المشكلة إن الجيوش الإسلامية هي جيوش نظامية بس أوروبا مفيهاش الحكاية دي .. الدولة الإسلامية جيشها بقي ناس أكل عيشها هو الحروب والفتوحات .. دي ناس بتاخد مرتب عشان تحارب .. في أوروبا الجيوش بتبقي من الفلاحين وغالباً أوروبا بتحارب بعد موسم الحصاد عشان الناس تبقي فاضية تحارب .. (تشارلز) بقي عارف إن أي فتح إسلامي جديد لأوروبا لو حصل فالأوروبيين حيشيلوا أوبح .. إلا إذا هو قلد المسلمين .. قلدهم مش إنه دخل الإسلام .. قلدهم إنه هو كمان بقي عنده جيوش نظامية مدربة أكل عيشها هو الحرب.

مشكلة الجيوش النظامية إنها عايزه فلوس .. عايزه فلوس مرتبات وأكل وشرب وتسليح وعلاج وإنتقالات .. الفلوس دي مكانتش تحت إيد (تشارلز) بس هو بص حوليه لقي الكنيسة معاها فلوس .. فلوس كتير فشخ كمان .. هو بدأ ياخد الأراضي اللي تحت إيد الكنيسة الكاثوليكية وضع يد ويبيعها .. تقدر تقول كان شغال بعد الظهر سمسار أو مطور عقاري ودي الخطوة اللي كانت حتخلي الكنيسة الكاثوليكية تطلع ضده قرار الحرمان أو Excommunication اللي بمنتهي البساطة البابا يقول للمسيحيين أعملوا بلوك ل(تشارلز) بس الكنيسة كانت عاقلة بما يكفي إنها تبقي عارفة إن (تشارلز) هو اللي بيحمي أوروبا .. فرنسا تحت حكم (تشارلز) هي أقوي قوة عسكرية في أوروبا وبالتالي نعصر علي نفسنا شوال لمون ونسكت .. بس الفلوس اللي كانت بتجيله هي اللي خلته يقدر يدفع مرتبات ويمرن أول جيش نظامي في تاريخ أوروبا .. سنة 730 المواجهة بين المسلمين و(تشارلز) بقت شبه محتومة لما (عبدالرحمن الغافقي) إتعين والي الأندلس .. (عبدالرحمن) كان من ضمن الناس اللي شاركت في معركة تولوز ومن ساعتها هو حالف لا ينتقم من الفرنساويين .. سنة 732 بدأ (عبدالرحمن) يستعد لحملة فتح فرنسا بجيش وصل عدده 70,000 مقاتل أغلبه كان من الخيالة.

المصادر:

• فيديو بعنوان The Journey to al-Andalus – The Muslim conquest of North Africa وده لينك الفيديو علي YouTube:|
  https://youtube.com/watch?v=aYkn2KfYvFw&feature=share&fbclid=IwAR2_7I75SQ_IOv7yV0Qifu3ajnzS41oLSkHYSct1aCl4r2gfSYudBzX51HE
• فيديو بعنوان The conquest of Hispania – The Moors pf Andalusia – EP 3 P 1 WOTW وده لينك الفيديو علي YouTube:
  https://youtube.com/watch?v=rr-6omka00Y&feature=share&fbclid=IwAR0MTPrbFY1jNXY9kxXTLQI_0qAmEsCEOilnOm6dOT1tWctzTYiu3z2Es9w