الطريق الي الأندلس .. مجد الإمبراطوريات إتبني علي التعيينات الصح .. الجزء الرابع.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/punbbb2ec3ve?si=502b60a75bc843d2991301f94530d9de&utm_source=clipboard&utm_medium=text&utm_campaign=social_sharing

معركة بلاط الشهداء .. أكتر معركة إتفهمت غلط في تاريخ المسلمين:

المحطة الأولي كانت مدينة بوردو علي ساحل المحيط الأطلنطي .. زي المرة اللي فاتت (أودو Oddo) برده جه عشان يلحق المدينة بس نتايج معركة بوردو كانت غير اللي حصل في معركة تولوز .. فعلياً جيش (عبدالرحمن الغافقي) كنس جيش (أودو) زي ما إنت بتكنس التراب من علي الأرض .. بعد كده حصل حاجتين .. الحاجة الأولانية إن (أودو) ملقاش حل غير إنه يروح لعدوه الأول (تشارلز) وركع قدامه يترجاه إنه يساعده يواجه الفتح الإسلامي .. الحاجة الثانية إن (عبدالرحمن) كان متخيل إن خلاص كده فرنسا بقت بتاعته .. كان متخيل إن إسمه حيتخلد في التاريخ جنب سيدنا (عمرو بن العاص) و(طارق بن زياد) و(عقبة بن نافع) وهي دي مشكلة المخابرات .. (عبدالرحمن) مكنش يعرف حاجة عن قدرات (تشارلز) في حين إن (تشارلز) كان عارف كل حاجة عن (عبدالرحمن) .. اللي (عبدالرحمن) مكنش يعرفه إن (تشارلز) كان بقاله سنين بيستعد لليوم ده.

(عبدالرحمن) خد قواته وبدأ يتحرك باتجاه مدينة تورز Tours اللي علي حسب المعلومات اللي كانت عنده كانت مدينة غنية ولإن ده كان تفكير أي قائد عسكري تقليدي وقتها ف(تشارلز) هو كمان توقع إن المدينة حتكون هي هدف (عبدالرحمن) .. (تشارلز) هو اللي إختار مكان وتوقيت المعركة ودي كانت أول غلطة وقع فيها (عبدالرحمن) بس يمكن أنا لو بقدرة قادر رجعت بالزمن وعملت معاه إنترفيو عشان أفهم دماغه كان رده غالباً حيكون إنه مكنش متخيل إن (تشارلز) يكون مستعد أوي كده .. زي ما قلتلك هي المشكلة في المخابرات .. (تشارلز) كان عارف كل حاجة عن (عبدالرحمن) بس (عبدالرحمن) كان أعمي .. عشان توصل لمدينة تورز لازم تعدي من علي كوبري معمول علي ملتقي نهري كلين Le Clain ونهر فيين Vienne .. مش بس كده .. قدام الكوبري كان فيه غابة صغيرة قوات (تشارلز) وقفت عندها.

لمدة أسبوع وقوات الجيشين واقفين قدام بعض .. (عبدالرحمن) كان حاسس إنه لبس خازوق بس هو مكنش متخيل أوي حجم الخازوق وعشان كده هو أمر بأن كل قواته اللي هو كان بعتها للإستطلاع تيجي بسرعة عشان تنضم لجيشة .. هو كان شايف وكان عنده حق إن في المعركة دي كل عسكري وكل فارس حيفرق بس في نفس الوقت هو مكنش عنده وقت كتير أوي يعني .. الشتاء داخل .. مش من مصلحته إنه يطول أول في الوقفة دي وهو لازم ياخد أكشن وبسرعة .. لأيام والهجوم الإسلامي مش بيقف .. موجة ورا موجة ورا موجة .. صحيح المشاة الفرنساويين بتوع (تشارلز) كانوا مدربين بشكل كويس وقدروا يقفوا علي رجليهم بس مع الوقت بقي باين إن فيه شروخ كتير إتعملت في صفوفهم .. يوم كمان من الهجوم بتاع خيالة المسلمين وجيش (تشارلز) حينهار.

عشان كده (تشارلز) أمر (أودو) إنه يلف ويجري بخيالته ورا ظهر المسلمين .. مش عشان يضرب جيش (عبدالرحمن) .. لا .. عشان يهاجم معسكر المسلمين .. كتير من الخيالة بتوع (عبدالرحمن) لما شافوا ده تقريباً خافوا لما اليوم يخلص ميلاقوش أكل فقرروا يسيبوا ميدان المعركة ويجروا للمعسكر يوقفوا خيالة (أودو) رغم إن (عبدالرحمن) زعق كتير وأمرهم إن محدش يتحرك بس تقول إيه .. الرجل مننا لما يكون جعان ويتقاله مفيش أكل بيلغي مخة تقريباً .. هزيمة المسلمين في معركة تورز أو معركة بلاط الشهداء كانت قاسية أوي لسبب .. غير إن أُستشهد فيها (عبدالرحمن الغافقي) وكتير من رجالته إلا إن ظروف المعركة زي ما تكون بتلعب ماتش واللي قدامك يكونوا راكنين الأوتوبيس طول التسعين دقيقة وإنت خلاص حتجيب جون يقوموا بهجمة مرتدة وعشان خاطر مدافع من بتوعك غلط دخل فيك جون في الدقيقة خمسة وتسعين اللي هي حاجة في منتهي النكد.

ناس كتير بتبص لمعركة بلاط الشهداء علي إنها النصر الحاسم لأوروبا المسيحية الكاثوليكية علي المسلمين .. الناس دي رأيها إن المسلمين إتصدموا من شجاعة وحسم (تشارلز مارتل) اللي كان فعلاً شخصية جاحدة وهو اللي حفيده (شارلمان) أسس واحدة من أهم الدول في التاريخ اللي هي الإمبراطورية الرومانية المقدسة  .. خليني أبقي صريح وصادق معاك وأقولك إن أيوه بعد معركة بلاط الشهداء سنة 732 محصلش تاني إن المسلمين حاولوا يخشوا فرنسا بس ده له أسباب تانية ملهاش علاقة ب(تشارلز مارتل) وليها علاقة بأهم حاجة في حياة البني أدمين .. الفلوس.

أنا من الناس المقتنعة إن اللي بيرسم ملامح أي حاجة في الدنيا هي الفلوس .. أنا شايف إنك لو بصيت علي العادات والتقاليد والأعراف في كل حضارة وبدأت تذاكر هي جت منين حتكتشف إنها إتولدت من الفلوس .. الفلوس أو الإقتصاد هو أهم قوة بترسم ملامح حياة البني أدمين وهي السبب في إن الفتوحات الإسلامية مكملتش جوه فرنسا .. لو جيت بصيت ليها حتلاقي إن نجاح (موسي بن نصير) و(طارق بن زياد) في فتح الأندلس إتبني علي سياسة تعامل مع البربر تقدر تلخصها بجملة واحدة .. أخواتي أخواتي أخواتي أخواتي .. ده حقيقي مش بهزر .. (موسي بن نصير) اللي هو أصلاً فارسي وإتعين قائد جيش إسلامي عربي خد البربر أو الأمازيغ في حضنه وقالهم أنتوا أخواتي وفي المقابل البربر شكلوا الغالبية العظمي من جيشه .. من بعد سنة 732 والدولة الأموية بقت بتتعامل مع البربر بمبدأ شخلل عشان تعدي وأرجوك متنساش إن البربر دي ناس دماغها ناشفة .. الدولة الأموية مبقتش بتتعامل مع البربر كإنهم مواطنين عاديين وبقت بتجبرهم يدفعوا ضرائب زيادة وده في الوقت اللي البربر أصلاً بيشكلوا الغالبية العظمي من القوات اللي فتحت الأندلس .. سنة 739 ثورة البربر بتولع .. سنة 740 كانت تونس والجزائر والمغرب دخلت مرحلة التمرد المفتوح وفي السنة دي دخلوا مدينة طنجة عاصمة ولاية المغرب وقتلوا الوالي بتاعها .. رد الخليفة الأموي إنه بعت جيش ضخم من سوريا عشان يقمع الثورة دي .. الجيش ده فعلياً إتداس علي وشه علي إيد البربر بره أسوار مدينة طنجة.

أمير الأندلس في الوقت ده كان واحد إسمه (عبدالملك بن قطن الفهيري) والرجل ده كان عنده مشكلة عويصة .. البربر اللي عايشين في الأندلس واللي زي ما قلتلك فضًلوا إنهم يعيشوا في المناطق الريفية والجبلية سمعوا باللي عملوا ولاد عمامهم البربر برده بس اللي عايشين في المغرب .. البربر بتوع الأندلس قالوا لنفسهم طب ما دي فرصتنا إن إحنا كمان نعمل ثورة وتبقي هيصة وزمبليطة ونعلن الأندلس دولة مستقلة عن الدولة الأموية .. (عبدالملك بن قطن الفهيري) زي ما قلتلك هو كان في مشكلة عويصة .. علي إيدك اليمين البربر اللي عايشين عنده في الأندلس إتعدوا وثاروا عليه هو كمان .. علي إيدك الشمال فيه بقايا جيش بعته الخليفة الأموي قاعد بره مدينة طنجة يعني يدوبك فرده كعب إنك تجيبه الأندلس يعلم البربر بتوع الأندلس الأدب .. لكن .. خلي بالك من لكن الجاية دي .. إيش ضمنك يا (عبدالملك) إن الجيش ده واللي أغلبه سوريين يرضي إنه يرجع تاني دمشق بعد ما يهزم البربر؟ .. مش يمكن الجيش ده يطمع في الأندلس ويطير رقبتك؟

(عبدالملك) ملقاش حل غير إنه يجيب الجيش ده الأندلس ولما يقمعوا ثورة البربر يبقي يحلها الحلال .. سنة 743 ثورة البربر في الأندلس إنتهت بس إنت محتاج تفهم ده كان معناه إيه .. معناه إن صحيح الأندلس فضلت تحت حكم العرب بس في نفس الوقت معناه إن المغرب والجزائر فضلت تحت سيطرة البربر والخليفة الأموي مكنش له أي سلطان عليهم .. هل تفتكر ده وضع سياسي أو إقتصادي يسمح إن الفتوحات الإسلامية تكمل تاني لفرنسا وتحاول للمرة الرابعة؟ .. مش بس كده .. زي ما (عبدالملك) توقع الجيش السوري اللي هو جابه عشان يقمع ثورة البربر زحلقوه ومش بس زحلقوه دول لبسوه قضية وأعدموه .. ده معناه إن بداية من 743 وإنت طالع الأندلس كان بيحكمها ناس سوريين لا هي عارفه الأندلس ولا تعرف تاريخها ولا عاداتها ولا تقاليدها .. البربر اللي كانوا زمان وقت (موسي بن نصير) متشالين علي الإكتاف بقوا شايفين إن السوريين اللي بيحكموهم في الأندلس دول شوية حرامية وقطاعين طرق .. الإسبان نفسهم اللي مش فارق معاهم مين يحكم بس يفرق معاهم أكل عيشهم لا واقفين مع ده ولا واقفين مع ده .. السوريين اللي بيحكموا الأندلس فعلياً معزولين عن الدنيا .. طبعاً ملهمش أي علاقات تجارية مع فرنسا والبربر اللي ماسكين المغرب قاطعين عنهم مياه ونور .. عشرين سنة من الضياع .. فعلياً دولة المسلمين في الأندلس قعدت عشرين سنة مش موقفها علي حيلها غير الستر .. حتي الدولة الأموية نفسها كان حالها يصعب علي الكافر ومش قادرة ومش عارفة تقدم أي نوع من أنواع الدعم للفرانشايز اللي هي فاتحاه في إسبانيا ده.

الدولة العباسية .. التار البايت اللي عمره ما إتنسي:

واحد من أهم الدروس اللي أنا إتعلمتها في حياتي هي أوعي تردم علي خناقة .. الخناق بين الناس عامل زي الجرح لو إتكتم حيتلوث وبدل ما كنت حتتعب شوية عشان تنظفة حتلاقيه عمال يعفن ويعفن لحد ما في الأخر حتلاقي نفسك مضطر تبتر إيدك .. الفتنة الكبري كانت خناقة وزيها زي أي خناقة كانت لازم تتعالج وتتداوي بس ده محصلش .. الفتنة الكبري الناس ردمت عليها عشان تتنسي تحت مسمي ما بلاش نتكلم في الماضي ده الماضي ده كان كله جراح .. ناس كتير منستش اللي حصل سنة 680 لما سيدنا (الحسين بن علي) رضي الله عنه إتقتل هو ورجالته في كربلاء .. ناس كتير منستش اللي حصل لما (الحجاج بن يوسف الثقفي) ضرب الكعبة بالمنجنيق .. صحيح الخليفة (عبدالملك بن مروان) تكفل بإصلاح الكعبة بس جرح زي ده مينفعش يتداوي بالفلوس .. ناس كتير صحيح التاريخ دلوقتي بيوصفهم بإنهم شيعة بس وقتها هم مكانوش ناسيين إن سيدنا (معاوية بن ابي سفيان) رضي الله عنه زي ما تقول كده سرق الحكم من إيد سيدنا (علي بن ابي طالب) رضي الله عنه .. فين وفين سنة 715 الناس دي بدأ يبقي ليها حس.

وقتها كان إسمهم الطائفة الهاشمية و الConcept اللي فكر الناس دي إتبني عليه كان بسيط جداً .. دلوقتي حكم بنو (أمية) مش شرعي واللي عمله سيدنا (معاوية بن ابي سفيان) ده حرام والمال الحرام مبيدومش .. وعشان المال الحرام مبيدومش فأديكوا شايفين إزاي الوضع السياسي والإقتصادي للدولة الأموية زي الزفت .. الهاشميين إستخدموا نفس الفكرة اللي أي حد عايز يكسب شعبية بيعملها .. إستخدموا نفس الفكر بتاع النازيين وبتاع اليمينيين المتطرفين دلوقتي اللي هو أنتوا مش لاقيين تاكلوا ومش لاقيين شغل وعندكوا مشاكل .. جميل .. إحنا بقي مش حنقولكوا حنحلها إزاي .. إحنا حنقولكوا تلوموا مين علي المصايب دي كلها وكان الحد اللي هم لاموه كان بنو (أمية) .. من سنة 715 لحد 747 الهاشميين عددهم بيزيد وبيزيد .. مع الوقت Concept بتاعهم إتعدل شوية وده اللي خلي شعبيتهم تضرب في السما .. الConcept بتاعهم بقي إن إحنا مش زي بنو (أمية) .. إحنا شبه الإشتراكيين بتوع دلوقتي .. كلنا سواسية أمام الله والقانون .. مفيش حد أحسن من حد .. سنة 748 مدينة الكوفة في العراق وقعت في إيد الهاشميين .. لما الكوفة بقت معاهم فالهاشميين زي ما تقول كده أعلنوا إنهم مش بس في حالة عصيان ومش بس في حالة ثورة .. طب إيه رأيكوا بقي إحنا عندنا الخليفة بتاعنا كمان اللي هو (أبو العباس عبدالله السفاح).

الفترة بتاعة سقوط الدولة الأموية وإعلان الدولة العباسية كلها تفاصيل كتير بس أنا عشان مركز كلامي علي الأندلس فبحاول أختصر شوية .. المهم إن الأمويين أخيراً اللي كان بيحمهم وقتها أخر الخلفاء بتوعهم (مروان بن محمد) جمع جيش قوامه 120,000 وفي يناير 750 بتحصل معركة زاب ضد قوات الهاشميين اللي بعد كده إسمهم بقي العباسيين واللي كان عددهم يدوبك 35,000 .. إزاي 35,000 يهزموا 120,000 ده موضوع ممكن نتكلم فيه بعدين اللي أنا عايز أتكلم عنه هو اللي حصل بعد كده.

فعلياً الدم بقي مش للركب .. ده بقي فوق الركب بشوية .. العباسيين كانوا بيشمشموا ورا بنو (أمية) .. سبحان الله كربلاء بتحصل هي هي بس بالعكس .. العباسيين كل ما يشوفوا حد من بنو (أمية) يقتلوه حتي (مروان بن محمد) أخر خلفاء الأمويين إتقتل في مصر .. لما العباسيين مبقوش لاقيين حد تاني من بنو (أمية) يخلصوا منه طلعوا قالوا إن يا جماعة إحنا حنطلع عفو عام عن كل الناس اللي من بني (أمية) .. لما القرار طلع فيه 80 واحد من بني (أمية) كانوا مستخبيين قالوا بجد والله؟ ويا عيني حتي ملحقوش يكملوا السؤال إتقتلوا هم كمان .. من وسط الدم ده كله فيه واحد بس من بني (أمية) عرف يهرب .. واحد بس نجي من مذبحة أستهدفت قبيلة حكمت العالم الإسلامي لسنين .. الرجل ده تجسيد للأية الكريمة وتلك الأيام نداولها بين الناس .. اللي بتكلم عنه هو (عبدالرحمن بن معاوية بن هشام بن عبدالملك) .. جده (هشام بن عبدالملك) كان خليفة .. الواد إتربي تربية ملوكي بس سنة 750 لما حصلت معركة زاب (عبدالرحمن) كان يدوبك عنده 19 سنة لما شاف بعنيه عيلته كلها بتتقتل زي النمل في المطبخ بتاع بيتكوا.

(عبدالرحمن بن معاوية بن هشام بن عبدالملك) .. تسمع عن (دينيريس تارجاريان):

حاول تحط نفسك في الكام دقيقة الجاية مكان (عبدالرحمن) وحاول تفكر هو يا تري كان حاسس بإيه لما شاف اللي أنا ححكيلك عنه دلوقتي .. إنت إتقالك إن جيش الخليفة (مروان بن محمد) إتهزم والعباسيين بيدوروا علي أي حد من بني (أمية) عشان يقتلوه .. (عبدالرحمن) اللي بفكرك إنه كان لسه عنده 19 سنة خد أخواته البنات وإبنه (سليمان) وأخوه وهربوا بره دمشق .. بعد فترة من الهرب (عبدالرحمن) بدأ يفهم إن العباسيين عايزين يقتلوه هو وأخوه بإعتبار إنهم الرجالة من بني (أمية) وبالتالي قرر إن هو وأخوه ينفصلوا عن أخواته البنات وإبنه .. (عبدالرحمن) وأخوه كملوا هروب لحد ما مسلحين تابعين للعباسيين شافوهم في قرية بتطل علي نهر الفرات .. (عبدالرحمن) وأخوه ملقوش حل غير إنهم ينزلوا النهر ويعوموا للضفة الثانية .. حاول بس تفهم إن عبور نهر سباحة مش حاجة سهلة .. ده مش زي إني أقولك إنزل حمام السباحة خدلك لفتين .. (عبدالرحمن) وصل الضفة الثانية من نهر الفرات وفعلاً مكنش قادر ياخد نفسه من التعب .. بيبص حوليه ملقاش أخوه .. بص الضفة اللي هو جه منها لقي أخوه معرفش يعوم ورجع تاني ولقي المسلحين اللي تبع العباسيين ماسكينه .. (عبدالرحمن) شاف بعنيه المسلحين وهم بيجبروا أخوه يركع وظهره ليهم و واحد فيهم بيطلع سيفه وبيقطع رأسه عن جسمه .. (عبدالرحمن) شاف المسلحين وهم بياخدوا رأس أخوه وبيمشوا وبيسيبوا باقي جثته علي ضفاف النهر.

أيام و(عبدالرحمن) كان تايه مش عارف يعمل إيه ولا يروح فين لحد ما قضاء ربنا بعتله واحد صاحبه إسمه (بدر) .. هم الإتنين راحوا القدس ومنها علي شبه جزيرة سيناء ومنها علي مصر .. والي مصر وقتها كان إسمه (عبدالرحمن بن حبيب الفهيري) كان برده عنده مشكلة عويصة .. واضح أن أي حاكم من عيلة (الفهيري) نصيبه إنه يتحط في مشكلة ما يعلم بيها إلا ربنا .. المشكلة كانت كالأتي .. (عبدالرحمن بن حبيب الفهيري) اللي عينه كان الأمويين يعني المفروض إنك رجل ولاءك لبني أمية .. حلو .. بس دلوقتي العباسيين هم اللي مكانهم .. جميل .. طموح (عبدالرحمن بن حبيب الفهيري) كان إنه يستقل بمصر خالص عن العباسيين بس العباسيين خيروه بين إنه يفضل والي مصر تحت حكمهم وبالتالي بكل أدب كده يسلملهم (عبدالرحمن بن معاوية بن هشام) .. أو يرفض ويفضل متمسك بفكرة الإستقلال دي وساعتها هو و(عبدالرحمن بن معاوية) حيتعدموا وتتعلق رؤوسهم علي أبواب القاهرة كنوع من أنواع زينة مولد النبي .. سنة 755 (عبدالرحمن بن معاوية) بيعرف إن (عبدالرحمن بن حبيب الفهيري) قرر إنه يشتري رقبته .. بالحظ وتوفيق ربنا (عبدالرحمن بن معاوية) بيهرب من مصر وبيروح علي لببيا ومنها علي المغرب.

ليه (عبدالرحمن) راح المغرب أصلاً؟ .. معلومة رقم واحد إن أمه مغربية وبالتالي كتير من البربر اللي عايشين في المغرب بصوله علي إنه واحد منهم .. صحيح هو من بنو (أمية) ووقتها البربر زي ما حكيت علاقتهم ببنو (أمية) مكنتش حلوة أوي بس الرجل أمه مغربية وده في حد ذاته سبب كافي إننا نقف جنبه .. معلومة رقم إتنين إن (عبدالرحمن) كان عايز يعيش وبالتالي هو بقي بيحاول يبعد قدر الإمكان عن أي مكان يقدر العباسيين يوصلوله.

في أواخر سنة 755 (عبدالرحمن) وصل مدينة طنجة وبقي بينه وبين الأندلس ترعة بس هو سأل نفسه السؤال اللي غالباً ناس كتير بتنسي تسأله لنفسها .. طب وبعدين؟ .. دلوقتي أنا لو عديت الترعة دي وبقيت في الأندلس طب وبعدين؟ .. الناس هناك حتستقبلني إزاي؟ .. هو أنا هربان طول الخمس سنين اللي فاتوا وسافرت من دمشق لحد المغرب عشان أتقتل في إسبانيا؟ .. اللي أنا أعرفه إن الوضع في إسبانيا زي الزفت .. السوريين اللي بيحكموا إسبانيا مش عارفين يسيطروا عليها .. البربر مش عاجبهم إن السوريين بيحكموا .. تقريباً كله بيلطش في كله هنا .. (عبدالرحمن) قرر يمشي بمبدأ بص يمينك وشمالك قبل ما تعدي الشارع .. هو بعت صاحبه (بدر) إسبانيا عشان يحاول براحة كده يسأل الناس هناك سؤال .. هو أنتوا رد فعلكوا إيه لما أخر أمير من نسل بني (أمية) تلاقوه عندكوا هنا في إسبانيا؟

الحقيقة إن الإجابات كانت مبشرة لدرجة إن في سبتمبر 755 (عبدالرحمن) بيوصل السواحل الإسبانية  .. ناس كتير جوه الأندلس كان أصلهم سوري وبالتالي هم مش معترفين بحاكم غير يكون سوري زيهم ومعلش يعني (عبدالرحمن) من نسل الغالي بن الغالي (معاوية بن أبي سفيان) .. ناس تانية رحبت بيه من قبيل التعاطف اللي هو يا ضنايا إنت أخر واحد من عيلتك .. قصة (عبدالرحمن) كانت مؤثرة أوي لدرجة إن ناس كتير جت تشوفه لمجرد إنها تتأكد إنه فعلاً لسه عايش وإنه حقيقي ومش مجرد خيال من وحي المؤلف .. خبر إن (عبدالرحمن) وصل إسبانيا مخدش كتير عشان يوصل لحاكم الأندلس وقتها (يوسف بن عبدالرحمن الفهيري)  .. أيوة شطور توقعت أنا رايح فين .. (يوسف) بما إنه من عيلة (الفهيري) فهو كمل في نفس التريند بتاعهم إنه يتحط في مشكلة عويصة والمشكلة كانت يعمل إيه في المصيبة اللي حلت علي عتبة بيته دي؟ .. الحقيقة إن (يوسف) معملش .. تدابير ربنا هي اللي عملت .. فجأة من غير لا إحم ولا دستور تحصل ثورة في مدينة سرقطة Zaragoza ومنها ولعت لإقليم بامبلونا Pamplona في شمال إسبانيا .. (يوسف بن عبدالرحمن الفهيري) ملقاش حل غير إنه ياخد قواته ويروح يتعامل مع الثورة دي .. هوبا بتبدأ لعبة الكراسي الموسيقية .. (عبدالرحمن) خد رجالته اللي هم شايفينه الوريث الشرعي للأندلس وراح خد مدينة مالاجا Malaga في جنوب إسبانيا .. بعدها خد راح مدينة إشبيلية Seville .. ومنها بدأ يروح للعاصمة قرطبة Cordoba.

سنة 756 بتحصل المعركة اللي شكلت مستقبل الأندلس لسنين وسنين .. إسمها بالعربي معركة المصارة بس المصادر الأجنبية بتقول عليها معركة ألميدا Battle de Alameda وبصراحة حاسس إن الإسم الإنجليزي سيكسي أكتر .. المهم إن (يوسف بن عبدالرحمن الفهيري) لحق نفسه ووصل قرطبة قبل ما (عبدالرحمن) يوصلها وللأسف التوقيت كان صعب .. الجيشين كان بيفصل بينهم نهر إسمه نهر الوادي الكبير ولإيام جيش (يوسف) كانوا كل يوم يعملوا حفلة باربيكيو عشان يغيظوا جيش (عبدالرحمن) اللي كان بعيد عن أي خطوط إمداد والعساكر كانت واقعة من الجوع في حين إن العاصمة قرطبة كانت في ظهر جيش (يوسف) .. (يوسف) حاول يوصل لحل دبلوماسي مع (عبدالرحمن) وعرض عليه إنه يجوزه بنته بس (عبدالرحمن) رفض .. معركة المصارة إنتهت بإنتصار (عبدالرحمن) وبعدها (يوسف) هرب علي تاني أهم مدينة في الأندلس اللي هي طليطلة Toledo علي أمل إنه يجمع جيش تاني بس وهو هناك رجالته سلموه تسليم أهالي وقتلوه وبعتوا رأسه ل(عبدالرحمن) كهدية .. يوم الجمعة 14 مايو سنة 756 (عبدالرحمن بن معاوية بن هشام بن عبدالملك) بيعلن نفسه أمير إمارة الأندلس وبيعمل واحدة من أهم الريمونتادات السياسية في تاريخ البني أدمين وعشان كده يمكن إنت عارفه أكتر بإسم (عبدالرحمن الداخل) ولو الإسم معداش عليك قبل كده فإنت يمكن عارفه بإسمه التاني .. (صقر قريش).

المصادر:

• فيديو بعنوان The conquest of Hispania – The Moors pf Andalusia – EP 3 P 1 WOTW و ده لينك الفيديو علي YouTube:
  https://youtube.com/watch?v=rr-6omka00Y&feature=share&fbclid=IwAR0MTPrbFY1jNXY9kxXTLQI_0qAmEsCEOilnOm6dOT1tWctzTYiu3z2Es9w
• فيديو بعنوان The true story of a Syrian refugee – Abd Al-Rahman I – WOTW EP4 P1 و ده لينك الفيديو علي YouTube:
  https://youtube.com/watch?v=nZgA_WLxkzk&feature=share&fbclid=IwAR1-0cdON24N4B2L95iNrnY5O7VeYTnalEJb2L0eDPb6Rs7hW5-eMJDov4s