زيرو .. الطيارة اللي هزمها شوية تفتيح مخ.

الناس اللي منكوا إتفرجوا علي فيلم Pearl Harbor شافوا إزاي إن سلاح الجو الياباني دمر أسطول أميريكي كامل و هو لسه قاعد في الميناء .. كلنا إنبهرنا بالتصوير الخرافي للمعارك الجوية و اللي فعلاً يستحق إننا نحيي عليه شغل المخرج (مايكل باي Michael Bay) اللي قدملنا قبل كده أفلام The Rock و سلسلة Bad Boys و Transformers .. بس اللي أنا حابب أتكلم عنه النهاردة بشوية تفصيل هو البطل الحقيقي للغارة الجوية الأشهر في التاريخ .. الطيارة اليابانية زيرو Zero .. لما الأمريكان صحيوا من النوم لقوا نفسهم في حالة حرب مع الإمبراطورية اليابانية في الحرب العالمية الثانية هم كانوا قدام عدو بيتفوق عليهم عسكرياً في حاجتين: الحاجة الأولانية هي إن اليابانيين كان عندهم نوع طوربيدات قوي أوي مسميينه Long Lance أو الرمح الطويل و ده كان طوربيد فعلاً جاحد .. الحاجة الثانية هي إن سلاح الجو الياباني كان عنده واحدة من أقوي الطيارات المقاتلة في العالم وقتها و هي الطيارة A6M Zero من تصنيع شركة ميتسوبيشي Mitsubishi .. هنا إنت مهم أوي تفهم ليه الطيارة Zero أو زيرو كانت جامدة أوي كده.

الطيارة دي صممها واحد إسمه (جيرو هوريكوشي Jiro Horikoshi) و تقدر تقول إن لما الرجل ده صمم الطيارة دي فهو حط المنهج بتاع إزاي تصمم حاجة بتجري بسرعة عالية أوي و بقدره محدش شافها قبل كده علي المناورة و إكتشف إن السر بمنتهي البساطة إنك تخلي الحاجة دي تعمل دايت .. اللي عمله الأخ (جيرو هوريكوشي) إنه وصل بوزن الطيارة المقاتلة لأقل مستوي معروف وقتها علي مستوي العالم .. هو لقي إن الدروع المعدنية اللي بتحمي الطيار و المحرك ممكن يستغني عنها فرماها في الزبالة .. لقي إن الصلب تقيل أوي عشان تصنع منه الشاسيه بتاع الطيارة فإخترع هو سبيكة سماها Extra Super Duralumin .. كده إنت خليت الطيارة فراشة وزنها مبيعديش 1.85طن فاضل بس تحطلها موتور قوي و إختارلها موتور إسمه ساكاي Sakae و ده موتور Radial Engine يعني البساتم أو Cylinders بتاعته لا هي علي خط واحد ولا هي علي شكل حرف V إنما عاملين دايرة و الموتور ده كان بيتكون من 12 بستم بحيث بيقدر يطلع 840 حصان .. حط الموتور الخزعبلي ده علي الشاسيه الورق تلاقي نفسك قدام طيارة بتقدر تطير بسرعة بتعدي 519 كيلومتر في الساعة .. مش كده و بس .. دي عشان هي خفيفة فبتقدر تطير مسافات أطول .. علي تفويلة واحدة فالطيارة Zero تقدر تطير 2400 كيلومتر مستريح .. عشان بس أحطك في الصورة .. الطيارة Bf 109 فخر الصناعة الألمانية وقت الحرب العالمية الثانية كان أخرها تطير 750 كيلومتر بس و يمكن لإن الطيارات اللي في سلاح الجو الألماني مكنتش بتقدر تطير مسافات طويلة كان سبب أساسي في إن ألمانيا تخسر معركة بريطانيا الجوية بس خلي ده نتكلم عنه في وقت تاني لوحده.

 لحد دلوقتي زي الفل بس إنت عندك مشكلتين:

• المشكلة الأولانية إن عشان (جيرو هوريكوشي) يوصل بالطيارة Zero للوزن اللي هو عايزه إضطر إنه يضحي شوية بتسليحها .. في الوقت ده الطيارات المقاتلة كان كل تسليحها عبارة عن مدافع رشاشة أو قنابل بترميها علي السفن أو قوات العدو .. الطيارة Zero كان فيها مدفعين أساسيين إسمهم Type 99 بيستخدموا طلقات عيار 20 مليمتر و دي طلقات قوية أوي بس عشان زي ما قلتلك يخفف وزنها قدر الإمكان خلي الطيارة يبقي فيها 60 طلقة كذخيرة بس .. لما الذخيرة دي تخلص الطيار بيلجأ إنه يستخدم مدفعين رشاشيين تانيين في الموتور قدام بحيث طلقاتهم كانت نفس طلقات البنادق العادية اللي بيمسكها العساكر فطبعاً كان تأثيرها كإنك بتحدف الطيارات المعادية بالطوب.
• المشكلة الثانية إن Zero خزان البنزين اللي فيها مكش محمي جوه شاسيه الطيارة و عشان المهندسين اليابانيين يحلوا مشكلة إن ممكن الخزان يسرب كل البنزين اللي فيه لو جت فيه طلقة خرمته فكانوا حاطين جواه Bladders أو كور مطاط بتتمط عشان تقفل الفتحات اللي بتتعمل في الخزان .. ده معناه إن لو عندك طيارة فيها مدفع رشاش جامد شوية ممكن بسهولة أوي تخلي Zero تولع في الجو لو بس ضربت خزان البنزين بتاعها.

أول مرة اليابانيين يطلقوا الطيارة دي زي الكلب السعران في الحرب العالمية الثانية كانت في يوليو 1940 .. في اليوم ده 13 طيارة Zero إشتبكت مع 26 طيارة روسية من طراز I-16 و I-53  و وقعتهم كلهم في معركة مستمرتش أكتر من 3 دقايق .. لما تستوعب اللي حصل ده كمل قراية و لو لسه مستوعبتش خد وقتك مش مستعجلين .. العالم كله صحي علي إعجاز تصميم الطيارة Zero لما خبر تدمير الأسطول الأميريكي في بيرل هاربور سمّع في العالم كله .. القوات الجوية اليابانية كان تحت إيدها 521 طيارة Zero خلت العالم كله يتكلم عنها .. حتي الطيارة البريطانية سبيتفاير Spitfire اللي في رأي ناس كتير من أحسن الطيارات اللي خدمت في الحرب العالمية الثانية طيارين إنجليز جربوها ضد Zero و إكتشفوا إن عشان Zero خفيفة بزيادة فهي بتقدر تطير لإرتفاعات عالية أوي و ده بيديها أفضلية علي أي طيارة مقاتلة تانية .. بس اللي كان فعلاً طالع عينهم و عين اللي خلفهوهم ضد Zero كان الأمريكان .. لما الأمريكان دخلوا الحرب كان معاهم طيارات مقاتلة إسمها F2A Buffalo إكتشفوا إنها من إسمها متنفعش إلا لتربية المواشي فرموها في الزبالة و جابوا مكانها F4F Wildcat و يا عيني كانوا متخيلين إن الطيارة دي جامدة لدرجة إنها تقدر تقف قدام Zero بس لو جيت مسكت ورقة و قلم و قعدت تحسبها تلاقي نفسك قدام واقع مزري و هو إن F4F Wildcat دي شبه FIAT 128 و مطلوب منها تقف قدام Nissan GTR في سباق سرعة:

• إذا كانت Zero وزنها و هي فاضية من غير تسليحها مبيعديش 1.85 طن فالطيارة Wildcat وزنها ما بين 2.5 ل3 طن مستريح فمبدأياً كده إذا كانت Zero بتقدر تطير لمسافات بتوصل 2400 كيلومتر فالWildcat أخرها بالزق 1200 كيلومتر بس.
• اليابانيين حطوا لZero موتور 840 حصان بيخليها بتطير بسرعة بتوصل 519 كيلومتر في الساعة .. الأمريكان بقي لما عملوا Wildcat حطولها موتور 1200 حصان إسمه R-1830 بيخليها بتقدر تطير بسرعة 497 كيلومتر في الساعة.
• تسليح Zero كان علي قد حاله زي ما قلتلك لإن كان عندها مدفعين رشاشين أساسيين و إتنين بيضربوا طلقات بنادق الطيار بيستخدمهم لما ذخيرة المدافع الرشاشة الرئيسية تخلص بس الWildcats كان فيها 4 مدافع رشاشة عيار 0.5 بوصة.

بالورقة و القلم الZero تدي الWildcat علي قفاها مستريح و فعلاً ده اللي حصل في الأيام الأولي للحرب بس فجأة كل حاجة إتغيرت .. فجأة Zero مبقتش بتقدر تقف في أي مواجهة ضد Wildcat و ده كان ملوش علاقة بإن الأمريكان عدلوا في تصميمها ولا حاجة .. كل اللي حصل إن الطيارين الأمريكان فتحوا مخهم شوية بس .. في واحدة من أشهر معارك الحرب العالمية الثانية اللي حصلت في جزر وايك Wake Islands عايزك تعرف إن فيه 4 طيارات بس Wildcat قدروا لمدة أسبوعين يصدوا القوات اليابانية اللي حاولت تحتل الجزر .. أسبوعين و محدش عارف ياخد من الطيارات الأمريكاني لا حق ولا باطل .. لا و كمان الأربع طيارات قدروا يغرقوا مدمرة يابانية إسمها كيساراجي Kisaragi .. في معارك زي ميدواي Midway و معركة بحر كورال طيارات Wildcat هي اللي حسمت المعارك بتفوقها علي طيارات Zero مش لسبب غير إن زي ما قلت الطيارين الأمريكان شغلوا مخهم شوية.

كان فيه طيار أمريكاني إسمه (جون ثاتش John Thach) كان شكله شارب سيجارة عنابي و دماغه ملعلعة في يوم فإخترع مناورة طيران إتسمت لحد دلوقتي بإسمه (غرزه ثاتش Thach Weave) .. تعالي إنت هات طيارتين Wildcat طايرين جنب بعض .. واحدة فيهم حتبقي الطعم و الثانية حتبقي السنارة .. و الإتنين طايرين حيهجم عليهم مثلاً طيارتين Zero بحيث كل طيارة Zero تجري ورا طيارة Wildcat .. أول ما ده يحصل الإتنين طيارين بتوع Wildcat حيطيروا عكس بعض بحيث كل واحد فيهم يلف في دايره و كأنهم بيرسموا مع بعض في الجو شكل 8 .. و الدايرة بتتقفل حتلاقي إن الطيارتين سواء الطعم أو السنارة كل واحدة بقت بتطير قصاد طيارة Zero و كل اللي حضرتك كطيار أمريكاني محتاجه إنك تنشن طلقات مدفعك الرشاش ال0.5 بوصة في الطيارة Zero اللي هي أساساً الشاسيه بتاعها مش حيستحمل طلقات قوية زي دي من مسافة قريبة .. أول مرة المناورة دي تستخدم كانت في معركة ميدواي يوم 4 يونيو .1942.

لما جت سنة 1943 يعني قبل نهاية الحرب بسنتين كان العيبين بتوع تصميم Zero هم السبب في هزيمة القوات الجوية اليابانية .. فكرة إنك بتطير بطيارة فعلياً ملهاش دروع تحميها خلاها بسهولة أوي ممكن تقع من أقل طلقات تضرب عليها .. زود علي كده إن اليابان مكنش عندها القدرة إنها تبني حاملات طائرات بنفس المعدل بتاع أميركا فتلاقي نفسك قدام وضع هو إن صحيح الطيارين اليابانيين كانوا أحسن بكتير من الطيارين الأمريكان من حيث الخبرة و إن صحيح كان تحت إيدهم طيارات سريعة و ليها قدرة مش طبيعية علي المناورة بس ده كأن واحد زي (جيت لي Jet Li) أو (جاكي تشان Jacky Chan) بيتخانق مع واحد زي (جون سينا John Cena) .. لما جت سنة 1943 برده الأمريكان بدأوا يدخلوا طيارات أسرع و أقوي من Wildcat زي F6F Hellcat و F4U Corsair .. يمكن أكتر حاجة توريك حجم الكارثة اللي إتعرضت ليها القوات اليابانية كانت المعارك اللي حصلت في سماء الفلبين و إن إزاي اليابانيين خسروا 500 طيارة  في حين إن الأمريكان مخسروش إلا 123 طيارة بس .. الطيارات اليابانية كانت بتقع زي ما يكون الأمريكان بيصطادوا بط و يمكن عشان كده المعركة دي بتتسمي Great Marians Turkey Shoot .. في الأخر اللي هزم سلاح الجو الياباني هو إن الأمريكان بمناورة بسيطة أوي قدروا يستغلوا عيب رهيب في تصميم الطيارة زيرو .. علي فكرة إنت شفت المناورة دي بنفسك في فيلم Pearl Harbor بس معرفش إنت خدت بالك منها ولا لا.

المصدر:
مقالة بعنوان How America’s Naval aviators held their own against Japan’s superior fighter .. نشرت في مجلة Defense Maven و ده لينك المقالة الأصلية:
https://nationalinterest.org/blog/buzz/wildcat-vs-zero-how-america%E2%80%99s-naval-aviators-held-their-own-against-japan%E2%80%99s-superior