لينك التسجيل الصوتي للمقالة علي Sound Cloud:
https://soundcloud.com/user-112011687-312727988/nqoyo5qat1x6?si=616835b1531a42d7b2d2b8fe62162d77
مشكلة البشر في رأيي إنهم أحياناً كتير مش بيكونوا متخيلين إن الحياة أبسط من كده .. مش لازم يبقي فيه مؤامرة كبيرة .. مش لازم يبقي فيه حوار .. إنت غالباً إتقالك كده من مدرس الحساب بتاعك في إعدادي وثانوي لما في مسألة الهندسة كان مخك بيخليك تلف حول نفسك مع إن الحل بسيط وتافه وقدام عنيك بس إنت بتقول لنفسك أكيد فيه فخ .. أكيد المسألة فيها تريكاية مع إن ده مش حقيقي .. خد مثال علي الحكاية دي غارة بيرل هاربور .. اللي منكوا ميعرفش الحكاية فنصيحة خش علي EgyBest إتفرج علي فيلم Pearl Harbor .. هو فيلم متفهمش ده حربي ولا رومانسي ولا كوميدي بس ما علينا يعني .. الحكاية وما فيها إن لسنين وأميركا مكنتش عايزة تخش الحرب العالمية الثانية .. من سنة 1939 لحد سنة 1941 والأمريكان راسهم وألف سيف إن خلي الأوروبيين يولعوا في بعض .. إحنا عشان نريح ضميرنا حندي الإنجليز مساعدات عسكرية وطبية بس في نفس الوقت إحنا أكبر شريك تجاري لليابان اللي لأجل الصدف يعني تبقي حليفة ألمانيا اللي كانت بتفشخ الإنجليز في افكارهم .. يعني الأمريكان يدوا الإنجليز مساعدات بالإيد اليمين وياخدوا من اليابانيين فلوس ثمن للبترول اللي بتاخده منهم بالإيد الشمال ولا تخرج قبل أن تقول سبحان الله .. يوم 7 ديسمبر 1941 كان اليوم اللي فيه كل حاجة إتغيرت .. في اليوم ده اليابانيين ضربوا أسطول المحيط الهاديء الأمريكاني اللي كان راكن في قاعدة بيرل هاربور في جزيرة هاواي وده اليوم اللي أميركا فيه دخلت الحرب.
وشوف رغم كل ده فهوس الناس بغارة بيرل هاربور مش بس سببه إن عشانها أميركا دخلت الحرب .. الغارة دي كانت مختلفة في حاجات كتير أوي .. إنك تقرر تصطاد أسطول كامل للعدو .. تروح ومعاك 6 حاملات طائرات شايلين 400 طيارة وال 6 حاملات طائرات ماشي معاهم 14 سفينة و 3 غواصات وتخلي الطيارات دي تطير وكل طيارة شايله طوربيد وترميه بإتجاه سفينة من سفن الأسطول اللي راكن في الميناء .. كل الكلام ده لحد ما حصل فعلاً يوم 7 ديسمبر 1941 لو قلته لأي خبير إستراتيجي دارس بره وجوه حيقولك ده اسمه هراء وخيال علمي .. مش بس كده .. قيس خساير اليابانيين مقارنة بخساير الأمريكان .. الأمريكان في غارة واحدة خسروا فوق ال 300 طيارة و 8 بارجات و 3 فرقاطات و 3 مدمرات .. شفت الخيال العلمي فشخهم إزاي؟ .. لسنين وغارة بيرل هاربور شاغلة بال العسكريين والمؤرخين وأي جروب أو صفحة علي السوشيال ميديا بتهتم بحتة الحروب خصوصاً تاريخ الحرب العالمية الثانية وحتلاقيهم إتكلموا كتير عن الغارة دي .. من أكتر النقاط اللي بتتقال إن طب إيه رأيكوا بقي إن الإنجليز هم اللي طلعوا فكرة ضرب بيرل هاربور في دماغ اليابانيين؟
اه والله زي ما بقولك كده .. فيه ناس مُقتنعة بإن البحرية الإنجليزية سابت حيلها ومحتالها .. سابت قواتها البرية اللي بيتداس علي وشها في شمال أفريقيا .. سابت هسهس إن في أي لحظة الألمان حينزلوا علي شواطيء إنجلترا لغزوها .. سابوا تأمين الهند وبعتوا أسطول كامل بحاملات طائرات وبارجات وحطوا عليها العلم الأميريكي لأستراليا قال إيه عشان يقنعوا اليابانيين بإن الأمريكان بيستعدوا لضربهم في غارة إستباقية .. لمحبي وعشاق نظريات المؤامرة فأنا جاي النهاردة أقولكوا إن إنتوا كان عندكوا حق .. أيوه الإنجليز هم اللي طلعوا فكرة غارة بيرل هاربور في دماغ اليابانيين بس مش بالشكل اللي إنت متخيله .. عشان كده مقالة النهاردة إحنا محتاجين نصدمك بحاجتين:
- أول حاجة إنك تعرف إن اليابانيين سرقوا فكرة غارة بيرل هاربور من الإنجليز اللي عملوها قبيلهم في الإيطاليين في غارة جريئة أوي علي ميناء تارانتو علي البحر المتوسط.
- ثاني حاجة إنك فعلاً تفهم هو ليه اليابانيين قرروا إنهم يضربوا الأمريكان في بيرل هاربور؟
غارة ميناء تارانتو .. درس مهم أوي إتعلمه اليابانيين وطنشه الأمريكان:
سنة 1940 كانت فعلياً أسود سنة عدت علي إنجلترا في تاريخها .. لو إنت شايف إن سنة 2020 عشان الكورونا و الإقتصاد والحال الواقف وإن مفيش فلوس دي سنة صعبة فحاول لثواني إنك تبص للدنيا من وجهة نظر مواطن إنجليزي عايش سنة 1940 .. فرنسا حليفتك وقعت تحت إيد الألمان .. مفيش دولة في أوروبا واقفه قصاد الألمان إلا إنت .. زود علي كده إن الطليان دخلوا الحرب ضدك كمان اللي هو إنت عايز تقولهم أنا ناقص يا بتوع الإسباجيتي أنتوا كمان .. بالنسبة للإنجليز فالطليان كانوا زي إبن أختك الرخم اللي إنت بتكره نفسك لما بتيجي تزوركوا في البيت .. إنت مش مشكلتك إن القرد الصغير شقي وبيوقع الأطباق الصيني من النيش .. بالنسبة ليك يولع النيش وسنينه .. المشكلة إنه بيمسك موبايلك يفتحه ويلعب بيه والله أعلم بيهبب إيه وهو بيلعب .. الطليان كقوة عسكرية مكانوش أقوي لا من ألمانيا ولا من اليابان .. المشكلة إن إيطاليا بتطل علي البحر المتوسط وتحت إيدها ليبيا اللي برده بتطل علي البحر المتوسط .. ده معناه إن عشان سفن الإمدادات الإنجليزي تيجي من الهند لحد بريطانيا فهي بقت بدل ما تخش البحر المتوسط من قناة السويس بقت مضطرة تلف من حول رأس الرجاء الصالح عشان خايفة من إن الأسطول الإيطالي يصطادها .. اللي هو ودنك منين يا جحا .. إنك تلف حول أفريقيا ده هلك وقت وفلوس وفي الحروب خصوصاً الحروب العالمية مفيش أغلي من الوقت والفلوس.
البحرية البريطانية مكنتش عارفة تلاقيها منين ولا منين .. سفن الإمدادات اللي بتجيلهم من أميركا الغواصات الألمانية بتصطادها زي لعبة البطة بتاعة الأتاري .. قواتهم في شمال أفريقيا بتسف تراب ورا قوات (إيرفين روميل Erwin Rommel) .. في نفس الوقت الإنجليز شايلين هم اليوم اللي يجيلهم فيه خبر إن الألمان بدأوا عملية الإنزل البري لقواتهم علي سواحل بريطانيا .. فعلياً هم مش مستحملين إنهم يضيعوا وقت وفلوس أكتر من كده في إنهم يلفوا حول أفريقيا عشان يهربوا من خطر البحرية الإيطالية .. والحل؟ .. بتوع البيتزا يطلعوا بره اللعبة.
الفكرة كانت إلي حد ما سهلة .. البحرية الإيطالية مكنتش فشيخة وقتها .. أكبر أسطول ليهم في البحر المتوسط راكن في ميناء اسمه تارانتو والأسطول ده عبارة عن 6 بارجات و 9 فرقاطات تقيلة و 7 فرقاطات خفيفة و 13 مدمرة .. الأسطول ده لو كان واجه السفن اللي تحت إيد إنجلترا في البحر المتوسط في معركة مفتوحة كان الإنجليز إتداس علي وشهم .. الإنجليز قالوا إحنا لازم نصطاد الأسطول ده وهم في الميناء .. جميل أوي .. يا تري حتضربي ميناء تارانتو بكام حاملة طائرات يا إنجلترا؟ .. يا تري حيبقي معاكي 6 حاملات طيارات و 400 طيارة زي ما اليابانيين إستخدموا ضد الأمريكان في بيرل هاربور؟ .. لك أن تتخيل يا مؤمن إن الإنجليز ضربوا الأسطول ده كله بحاملة طائرات واحدة يتيمة إسمها ايلوستيريوس Illustrious .. الضحك مخلصش لحد كده .. حاملة الطائرات دي مكنتش بتشيل غير 21 طيارة بس .. وعشان يا ضحك ميبقاش ليك علينا جمايل فال12 طيارة دول يبقوا Fairey Swordfish ودي طيارة قديمة من أيام الحرب العالمية الأولي وطلعت بره الخدمة بس دي نفس الطيارات اللي الإنجليز دمروا بيها البارجة الألمانية بمسارك Bismarck .. ميزه الطيارات دي إنها كانت بطيئة .. بتضحك أنا عارف .. هي كانت طيارات بيطير بيها إتنين وكانت بتطير بسرعة يدوبك 220 كيلومتر في الساعة بس البطء ده هو اللي كان بيخلي مساعد الطيار يعرف بسهولة إنه ينشن الطوربيد بتاعها علي السفن المعادية.
الساعة 11 بالليل يوم 11 نوفمبر 1940 حاملة الطائرات Illustrious طلع منها موجتين .. الموجة الأولي من 12 طيارة والثانية من 9 طيارات .. ال21 طيارة دول نصهم كان شايل طوربيد واحد لكل طيارة والنص الثاني كان بيرمي Flares أو شعلات فوق السفن الإيطالية اللي راكنة في الميناء عشان الطيارات اللي شايلة طوربيد تنشن عليها .. غارة مقعدتش أكتر من ساعة زمن .. الساعة 12 بليل كانت 19 طيارة إنجليزي رجعت تاني لحاملة الطائرات .. فيه طيارتين بس وقعوا .. خساير الإنجليز كانت طيارتين بس قصاد إن الطليان خسروا 3 بارجات من أصل 6 اللي كانوا تحت إيد الطليان في البحر المتوسط.
وسط كل ده كان فيه إتنين بيتفرجوا وده يوريك قد إيه إنك تتفرج وتتابع اللي بيحصل حوليك دي حاجة مهمة وقد إيه الروتين وتكبير الدماغ بيودي في داهية .. وسط ما الطليان كانوا بيصلحوا الميناء اللي إتضرب وبيطلعوا القتلي بتوعهم من تحت الأنقاض كان فيه رجل لابس زي عسكري بس غريب عليهم عمال يتفرج .. الرجل ده كان ملازم أول (تاكيشي نايتو Takeshi Naito) مساعد الملحق العسكري الياباني لإيطاليا .. الرجل ده لما سمع خبر إن أسطول إيطاليا في البحر المتوسط إتضرب بغارة جوية نفذتها طيارات إنجليزية طلعت من حاملة طائرات خد النوتة والقلم وجري علي ميناء تارانتو يتفرج .. بالنسبة ليه ولأي ضابط بحري وقتها إنك تحط كلمات زي غارة وميناء وحاملة طائرات وطيارات في جملة واحدة كان خيال علمي .. اللي عمله الإنجليز ده متعملش قبل كده .. وهو في الكلية البحرية كان بيسمع عن الأدميرال (إيسوروكو ياماموتو Isoroku Yamamto) قائد سلاح البحرية الياباني واللي كان دايماً يقول إن مستقبل الحروب إنك تبعت حاملة طائرات تصطاد أسطول العدو بالطيارات .. هو كان عارف إن قيادة القوات المسلحة كانت بتقول علي الفكرة دي هبد بس أهو الإنجليز عملوها .. التقرير اللي (تاكيشي نايتو) كتبه بخط إيده وبعته للأدميرال (ياماموتو) كان هو المنهج اللي غارة بيرل هاربور مشيت عليه .. كلمة كلمة حرف حرف.
وزي ما اليابانيين كانوا بيتعلموا من غارة ميناء تارانتو فبرده الأمريكان كانوا موجودين .. وسط قادة العملية علي متن حاملة الطائرات Illustrious كان فيه ضابط بحري أمريكاني إتبعت عشان يتعلم من الإنجليز والضابط ده كان ملازم أول برده إسمه (جون أوبي John Opie) .. الرجل ده كتب تقرير نسخة من اللي كتبه (تاكيشي نايتو) وبعته لقيادة القوات البحرية وقالهم إن يا جماعة الخير ميناء بيرل هاربور ميفرقش كتير عن ميناء تارانتو .. وإن يا ناس زي ما الإنجليز ضربوا الميناء فبرده اليابانيين ممكن يضربوا بيرل هاربور .. وإن زي ما الطليان مكانوش متخيلين إن ممكن غارة بطيارات من حاملة طائرات تدمر أسطول راكن في ميناء فإحنا لازم نعمل حسابنا ونبدأ نزود من دفاعاتنا الجوية حول بيرل هاربور .. طب إيه رأيك بقي إن (جون أوبي) طلب إنه يروح بنفسه لبيرل هاربور عشان يقيم إيه اللي ممكن يتعمل عشان نحمي الميناء من غارة محتملة يعملها بتوع السوشي .. عارف إترد عليه بإيه؟ .. طلبه إترفض بحجة إن إنت أكيد عايز تاخد أجازة عشان زهقت من الحرب في أوروبا وعايز تقضيلك مع صاحبتك يومين وتاكل من إيد الست والدتك .. الروتين العسكري في أزهي صوره .. وده حيخليني أنقل علي السؤال الثاني.
غارة ميناء بيرل هاربور .. ليه؟ .. ها .. ليه؟
فعلياً ده واحد من أكتر الأسئلة اللي إنت حتتعب عشان تلاقي إجابة ليها .. حط نفسك مكان اليابانيين وإنت فعلياً حتلاقي نفسك بتهرش في شعرك من الحيرة .. إيه اللي يخليني أروح أضرب الأمريكان؟ .. باخد منهم بترول وهم راضيين بالقرشين اللي بياخدوهم مني .. كده كده أنا أساساً مكنش عندي لا الإمكانيات ولا أنا مخطط إني أبعت قوات برية لأميركا عشان أحتلها .. يبقي أروح أقولهم عاركني ليه؟ .. فيه نقطة برده غايبة عن ناس كتير هي إن إذا كانت غارة بيرل هاربور حصلت سنه 1941 وإن الحرب العالمية الثانية بدأت سنة 1939 فأحب أقولك إن ده بالنسبة لليابان كان الشوط الثاني .. قبليه كان فيه شوط أول إتلعب واليابان كانت كسبانة بس إتفشخت فيه .. سنة 1931 اليابان الماتش بتاعها بدأ بدري 9 سنين لما غزت إقليم مانشوريا وده إقليم علي الحدود بين روسيا والصين .. الغزو الياباني للصين بدأ سنة 1937 وأي حد بيحب الجغرافيا عارف إن الصين بلد مساحتها كبيرة .. كبيرة أوي .. كبيرة خالص .. إنك تبقي دولة زي اليابان تروح تحتل بلد زي الصين وفي نفس الوقت تروح تتعارك مع أميركا فده بيخليك فعلياً تسألهم هو أنتوا كنتوا بتفكروا في إيه لما قررتوا تضربوا بيرل هاربور؟
يا بيه ده لما قرار وقف إطلاق النار إتمضي في الحرب العالمية الثانية واليابان إستسلمت دي كانت بلد فعلياً ليها 1.8 مليون عسكري بره أرضها في الصين وكوريا .. إنت متخيل إن بلد بتمضي علي قرار الإستسلام وهي عندها قوات قد إجمالي تعداد الجيش المصري كله دلوقتي بره أرضها .. بتجيبوا فلوس وأكل وشرب للناس دي كلها منين؟ .. دي كانت فلوس اليابان .. عارف فلوس أميركا كانت قد إيه؟ .. عشان تستوعب بس إزاي إقتصاد أميركا كان فشيخ وقتها حاول تتخيل إن ميزانية بناء السفن الحربية اللي كانت بتتحط للقوات البحرية الأميريكية سنة 1940 يعني قبل ما أميركا تخش الحرب كانت أكبر من ميزانية بناء السفن الحربية اللي كانت بتتحط للقوات البحرية اليابانية من أول سنة 1931 لحد سنة 1940 .. إنت متخيل؟ .. أميركا كان معاها فلوس تبني سفن في سنة قد الفلوس اللي كانت مع اليابان عشان تصرفها في 9 سنين.
علي فكرة مش معني كلامي إن اليابانيين مكانوش عارفين إن الحرب مع أميركا حتكون صعبة .. بالعكس .. هم كانوا عارفين ده كويس .. الأدميرال (ياماموتو) ناس كتير عارفاله جملته المشهورة بإن بعد غارة بيرل هاربور اليابان صحت عملاق كان نايم وعطتله إرادة يقدر يدوس بيها علي وش أي حد .. الرجل ده قال برده إن لما اليابان تحارب أميركا فهي كأنها بتحارب العالم كله .. هو كان باصص علي اللي قلته من شوية .. هو كان باصص علي إنه بيحارب بلد ميزانية بناء السفن الحربية بتاعتها في سنة قد ميزانيته هو في 9 سنين .. عشان كده هو كتب في تقريره اللي إتسلم لقيادة القوات المسلحة اليابانية قبل تنفيذ غارة بيرل هاربور إنه يقدر يدي الأمريكان علي قفاهم ممكن لمدة 6 شهور أو سنة بس لو الحرب طولت لسنتين أو حتي ل3 سنين فهو مش حيقدر يكسبها .. (ياماموتو) كأنه كان باصص من بلورة سحرية .. الغارة حصلت سنة 1941 .. الحرب دخلت سنتها الثانية ما بين 1942-1943 .. و خلت سنتها الثالثة ما بين 1943-1944 .. اليابان إستسلمت سنة 1945 .. زي ما (ياماموتو) توقع بالضبط .. ده بيخليني أرجع أسأل ليه؟ .. يعني لنفترض إني كنت قاعد في الإجتماع لما الأدميرال (ياماموتو) قال للباشاوات بتوع وزارة الدفاع بإنه لو مكسبش أميركا خلال سنة فهو مش حيقدر يكسب الحرب فأكيد أول سؤال حسأله هو إحنا بالصلاة علي النبي نقدر أساساً نكسب أميركا في سنة؟ .. يعني هل ده أصلاً ينفع يحصل؟
إجابة السؤال ده إنك تفهم هي اليابان كانت عايزه إيه؟ .. بمنتهي البساطة اليابان كانت عايزه تجيب قلم فلوماستر وتقسم المحيط الهاديء نصين .. نص يبقي تبع أميركا ونص يبقي تبع اليابان .. حاول تتخيل الفكرة بتاعة خط بارليف .. الإسرائيليين لما بنوا خط بارليف كان في فكرهم إن إحنا مش عايزين المصريين يعبروا قناة السويس و يخشوا سيناء فإحنا حنعمل خط دفاعي بطول القناة .. نفس الفكرة مع اليابانيين .. اليابان عايزه تاخد نص المحيط الهاديء وضع يد .. ده معناه إنها لازم تعمل خط دفاعي يحمي النص بتاعها من المحيط الهاديء ضد أي محاولة أميريكية إنها تاخد أي حتة خدتها اليابان .. جميل أوي الكلام ده .. جت اليابان تفكر هي حتعمل ده إزاي لقت إن عندها مشكلتين:
- أول مشكلة هي مشكلة الموارد ودي اللي إتكلمنا عنها في مقالة قبل كده .. إنت عايز موارد كتير عشان تحقق هدف زي ده .. مش بس بترول .. حتحتاج حديد للسفن والدبابات .. حتحتاج ألمونيوم ومنجنيز وفضة .. حتحتاج مطاط وقطن وكتان .. كل ده في الوقت اللي اليابان بلد معندهاش الموارد دي كلها وده معناه إنها لازم كمان تنقي الجزر والدول اللي عندها موارد كتير وتحتلها وتسيطر علي الموارد بتاعتها.
- ثاني مشكلة هي المقاومة .. إن اليابان تاخد نص المحيط الهاديء وضع يد فأكيد فيه دول تانية حتقفلها .. أهم 3 دول علي المحيط الهاديء هم روسيا والصين وأميركا واللي صادف إن الثلاثة كانوا متحالفين مع بعض ضد اليابان في الحرب العالمية الثانية .. اليابان خلصت من صداع القوات البحرية الصينية لما غرقت أغلب أسطول الصين في حرب سنة 1895 ومن ساعتها والقوات البحرية الصينية مقامتش .. مصير القوات البحرية الروسية مفرقش كتير عن مصير أختها الصينية لما قامت الحرب بين روسيا واليابان سنة 1904-1905 .. كده مفضلش غير أميركا.
من سنة 1939 والقوات البحرية اليابانية عماله تتوسع في المحيط الهاديء .. كل يوم بيعدي واليابان بتقرب من هدفها .. دايرة نفوذهم عماله توسع يوم عن يوم .. ومع كل يوم بيعدي دايرة نفوذ اليابان بتقرب من اللحظة اللي أميركا حتبدأ تقول لا بقي الوضع ده مينفعش يتسكت عليه .. أو ده اللي اليابانيين كانوا متوقعينه .. ده في الوقت اللي اليابانيين كانوا عارفين المعلومة اللي كانت غايبة عن الإسرائيليين .. الخطوط الدفاعية مبتعملش حاجة .. دلوقتي الإسرائيليين عايزين يمنعوا المصريين يعبروا القناة ويخشوا سيناء .. جميل جداً .. قمت إنت باني خط دفاعي بطول القناة بس خلي بالك .. إنت عايز في كل نقطة علي الخط ده دفاعاتك تبقي أقوي من قدرة عدوك الهجومية .. بمعني .. عشان خط بارليف يقع مش لازم إحنا كمصريين ندمر الخط كله من أوله لأخره .. لا خالص .. إحنا ممكن نركز جهودنا علي نقطة أو نقطتين في الخط عشان نخترقهم وقواتنا تعدي لسيناء وساعتها خط بارليف حيقع .. اللي اليابانيين كانوا عارفينه إن فكرة الخطوط الدفاعية دي عاملة زي فكرة إتعب دلوقتي عشان ترتاح بعدين .. أنا جايلك من المستقبل وبقولك إنت حتتفشخ بعدين .. ده اللي اليابان كانت بتفكر فيه .. طموحنا في المحيط الهاديء حيخلي الأمريكان عاجلاً أم أجلاً يقلبوا علينا ولو ده حصل فالمواجهة جاية جاية وساعتها مش حينفع نعمل خط دفاعي يقسم الكرة الأرضية نصين .. إحنا مش حينفع نعمل ده لإن عمر ما قدراتنا علي بناء السفن حتوصل للأمريكان .. الحل إننا نكسب أميركا بالقاضية من أول بوكس ومن هنا إتولدت بيرل هاربور.
ده قصاد فكرة تانية خلتني أسأل نفسي هو معلش لو اليابان مضربتش الأمريكان في بيرل هاربور كان حيحصل حاجة؟ .. اليابان إحتلت الصين وأميركا متحركتش؟ .. تفتكر الأمريكان كانوا حيتحركوا لو اليابان إحتلت الفلبين؟ .. ولا الهوا .. الدرس اللي إحنا ممكن نتعلمه من قرار اليابان إنها تضرب بيرل هاربور إنك لما تيجي تحط إستراتيجية فمهم إنك تبقي عارف إنت عايز إيه وتسأل نفسك هو عدوك حيعمل إيه لما يبان قدامه طموحك .. كل ده جميل .. بس المهم برده إنك تسأل نفسك هل عدوك حيبقي سهل عليه إنه يتحرك ضدك؟ .. ليه اليابان مسألتش نفسها هل الشارع الأميريكي كان حيوافق إن أميركا تخش الحرب عشان اليابان عمالة تتوسع في المحيط الهاديء؟ .. اليابان شافت بعنيها إزاي الأمريكان سابوا أوروبا وهي بتقع حتة حتة في إيد الألمان .. اليابان شافت بعنيها والأمريكان عاملين نفسهم مش شايفين القنابل وهي نازلة زي المطر علي لندن .. اليابان كان المفروض تبقي عارفة إن مفيش حاجة كانت حتخلي (فرانكلين روزفيلت Franklin Roosevelt) رئيس أميركا يعرف يقنع الكونجرس بتاعه بإن اليابان بقت بتشكل خطر واضح وصريح للأمن القومي بتاع بلده.
بإختصار شديد اليابان حسبتها عسكرياًصح بس سياسياً غلط ودي مشكلة العسكريين لما يتسابوا هم اللي يرسموا إستراتيجية بلد في حرب خصوصاً لما تكون عالمية .. كان المفروض اليابان تدرس الوضع السياسي في أميركا .. يبقوا فاهمين هو الشارع الأميريكي بيقول إيه .. هل الشارع الأميريكي فارق معاه اليابان أصلاً؟ .. مش يمكن لو اليابان كانت زي ما هي عايزة قسمت المحيط الهاديء نصين مكنتش أميركا إتحركت؟ مش لسبب غير إن المواطن الأميريكي مش عايز وجع دماغ .. أسئلة كتير لو فكرت فيها حتلاقي نفسك طالع بقايمة دروس مستفادة ويمكن هي دي أهم ميزة في التاريخ .. إنه بيعلمك ببلاش .. كل اللي إنت محتاج تعمله إنك تسأل نفسك طب إفرض لو كان ده حصل؟
المصادر:
- مقالة بعنوان Where did Japan get the idea of Pearl Harbor? This picture is a clue نشرت في مجلة The National Interest وده لينك المقالة الأصلية:
https://nationalinterest.org/blog/reboot/where-did-japan-get-idea-pearl-harbor-picture-clue-169598 - مقالة بعنوان A Taranto-Pearl Harbor Connection نشرت في موقع معهد القوات البحرية الأميريكية U.S. Naval Institute وده لينك المقالة الأصلية:
https://www.usni.org/magazines/naval-history-magazine/2016/december/taranto-pearl-harbor-connection - مقالة بعنوان Bi-planes smash Italian fleet at Taranto نشرت في موقع World War 2 Today.com وده لينك المقالة الأصلية:
http://ww2today.com/11th-november-1940-italian-fleet-attacked-in-taranto-harbour - مقالة بعنوان Why Japan failed at Pearl Harbor نشرت في مجلة The National Interest وده لينك المقالة الأصلية:
https://nationalinterest.org/feature/why-japan-failed-pearl-harbor-18638
