تعالي نتخيل سوا إن أنا وإنت معانا فلوس وقررنا نبقي منتجين سينما ونحط نفسنا في موقف خيالي شوية بإننا نسأل نفسنا سؤال: إمتي نقرر نصرف فلوس عشان ننتج جزء تاني من فيلم؟ .. المنطق بيقول إن ده يحصل لو الجزء الأول اللي عملناه كسر الدنيا وجاب فلوس زي الفل .. علي فكرة مش لازم ينجح مع النقاد ويجيب جوايز .. لا خالص .. فيلم اللمبي النقاد كلهم شتموه بس إتعمل منه جزء ثاني أنا شايف إنه أفضل فيلم كوميدي يتعمل في الخمسين سنة اللي فاتت .. عشان نحاول سوا نلاقي إجابة للسؤال ده تعالوا ناخد حالة ندرسها وهي فيلم Wonder Woman 1984 .. مهم تبقي فاهم من دلوقي إني مش جاي أقدم نقد فني للفيلم يعني أنا مش جاي أقولك الفيلم حلو ولا وحش ومش جاي أقولك هل الفيلم يستاهل إنك تتفرج عليه في حالة إنك لسه مشفتوش .. النهاردة حنتكلم عن الميكانيزم اللي صناعة السينما دلوقتي شغاله بيه والكلام ده حيمشي علي Wonder Woman وأي فيلم تاني إتعرض في فترة Covid-19 ولسه حيتعرض في الفترة اللي جاية بس خلينا نرجع تاني نركز علي حالة فيلم Wonder Woman 1984.
ده فيلم يعتبر الجزء الثاني من سلسلة Wonder Woman اللي تعتبر أكتر سلسلة بتجيب فلوس من كل سلاسل الأفلام بتاعة DC Comics .. ده فيلم تقدر تقول عليه ستاتي لإن بطلته واحدة ست اللي هي (جال جادوت Gal Gadot) وفكك مؤقتاً من حقيقة إنها إسرائيلية وكمان مخرجته واحدة ست اللي هي (باتي جينكينز Patty Jenkins) .. سبب إني سألت السؤال بتاعي في المقدمة اللي هو إيه اللي يخليك كمنتج تقرر تعمل جزء تاني من فيلم إن شركة وارنر بروس Warner Bros اللي هي أنتجته أعلنت إنها حتعمل الجزء الثالث من السلسلة وحترجع (باتي جينكينز) تخرجه وطبعاً (جال جادوت) حتبقي البطلة بتاعته وده الحقيقة خبر محيرني جداً لإني مش شايفه حاجة منطقية لإن الجزء الثاني Wonder Woman 1984 محققش النجاح اللي كنا مستنيينه فإذا كان الفيلم مجابش فلوس فإيه اللي يخليني كمنتج أصرف فلوس عشان أعمل منه جزء كمان؟ .. هنا أنا محتاج أرصلك شوية حقايق ورا بعضها وبعد كده نحلل الحقايق دي عشان نفهم منها هو إيه اللي بيحصل في صناعة السينما دلوقتي.
حقيقة رقم واحد .. فيلم Wonder Woman 1984 جاب أرباح في شباك تذاكر أميركا بس 16.7 مليون دولار .. قليلين صح؟ .. في شباك التذاكر العالمي هو قدر يجيب أرباح وصلت 85 مليون دولار .. حتلاقي نفسك بتحط إيدك علي قلبك لما تعرف إن الفيلم تكلفته وصلت 200 مليون دولار .. يعني الفيلم بحسبة أرباح شباك التذاكر بتاع السينمات وقف بخسارة علي المنتج بحوالي 115 مليون دولار .. ده قصاد إن الجزء الأولاني من السلسلة اللي نزل في يونيو 2017 جاب في أول يومين عرض ليه في السينمات الأميريكية أرباح وصلت 103.5 مليون دولار وعلي مستوي العالم جاب 230 مليون دولار وبفكرك إن ده في أول يومين من عرضه .. اليوم الأول لوحده جاب في شباك التذاكر الأمريكاني 38 مليون دولار.
حقيقة رقم إثنين .. الفلوس شاكب راكب اللي جابها فيلم Wonder Woman 1984 بما فيها فلوس بيع بتذاكر السينمات وحقوق الرعاية وبيع المنتجات وكل ده بيحطك قدام تقريباً يعني 240 مليون دولار .. دول كده يدوبك يغطولك مصاريف الفيلم بس مش هي دي المشكلة .. المشكلة إن أول كلمة حتتقال هي متنساش إن الفيلم إتعرض في وقت Covid-19 كان مدمر بيزنس الأفلام وهنا حقولك خدامك بس خلي بالك .. فيلم Wonder Woman 1984 إتعرض ورا فيلم Tenet بس إذا كان Wonder Woman 1984 أرباحه الكلية كانت 240 مليون دولار ففيلم Tenet جاب 363 مليون دولار منهم 300 مليون دولار إتجابوا من شباك التذاكر العالمي.
حقيقة رقم ثلاثة .. طب إيه رأيك لو قلتلك هات إنت 240 مليون دولار اللي هم كل الفلوس اللي جابها فيلم Wonder Woman 1984 وخلينا يا سيدي نقربها تبقي 300 مليون دولار خليهم في إيدك اليمين .. هات إنت بقي إجمالي الفلوس اللي جابها الجزء الأول اللي وصلت 821 مليون دولار فحتلاقي إن الجزء الثاني جابلك حوالي 36% بس من الفلوس اللي حققها الجزء الأول .. ده بيحطك قدام واقع مينفعش نختلف عليه وهو إن بحسبة الفلوس لوحدها فيلم Wonder Woman 1984 فشل ومجابش فلوس تخليني كمنتج أفكر إني أعمل منه جزء ثالث.
حقيقة رقم أربعة .. هنا بيجي وقت إننا نتكلم عن معلومة ناس كتير بتنساها وهي إن فيلم Wonder Woman 1984 إتعرض علي قناة HBO Max في نفس وقت عرضه في السينمات .. HBO Max زيها زي Netflix بحيث دي منصة بتنتج وبتعرض أفلام ومسلسلات إنت كمشاهد بتتفرج عليها مقابل إشتراك شهري .. جميل .. دلوقتي محدش عارف بالضبط فيه كام واحد مشترك في HBO Max بس لو صدقتهم يعني فهم بيقولوا إن فيه 13 مليون مشترك الواحد فيهم في المتوسط بيدفع 15 دولار في الشهر .. حلو .. ركز بقي معايا .. دلوقتي المنتج بتاع الفيلم اللي هو Warner Bros بيقول إن في ليلة عرض الفيلم علي HBO Max فيه 2 مليون مشاهد شافوا الفيلم مع العلم إن مفيش أي مستند رسمي يخليني أقول إنهم مش كدابين وعشان كده خليني ماشي ورا الكداب لحد باب الدار .. بحسبة بسيطة أوي أضرب 2 مليون مشاهد في 15 دولار في الشهر يعني بتتكلم عن 30 مليون دولار في أول ليلة عرض .. هوبا ده معناه إن في منطق المنتج فيلم Wonder Woman 1984 في أول ليلة من عرضه جاب نفس الفلوس اللي اللي جابها الجزء الأول بتاعه اللي كسر الدنيا.
حقيقة رقم خمسة .. سواء الناس بتوع Netflix أو HBO Max أو Apple TV فهم عندهم ناس وظيفتها إنها تعد فيه كام مشترك إتفرج علي أفلام إيه .. بس خلي بالك .. لنفترض مثلاً إن قدامك مسلسل زي The Queens Gambit اللي بيتعرض علي Netflix فهم بيشوفوا إنك إتفرجت عليه بس هم مش بيعرفوا هو إنت كملت المسلسل ولا لا؟ .. عجبك ولا لا؟ .. ولا إنت واحد من البلوجرز اللي بيعملوا فيديوهات علي سوشيال ميديا لنقد الأفلام ولا مجرد واحد بتتفرج وإنت بتتغدي بعد ما رجعت من الشغل وخلاص .. هم ملهمش دعوة بكل ده فلما تطلع شركة Warner Bros تقول إن فيه 2 مليون بني أدم إتفرجوا علي Wonder Woman 1984 فإنت متقدرش تعرف هي الناس دي رأيها إيه فيه؟
كل ده بيخليني أقول إن في زمن عرض الأفلام في وقت واحد في السينمات وعلي منصات الإنترنت زي Netflix و HBO Max بقي صعب جداً إن إنت تقرر إنهي فيلم نجح ويستحق يتعمله جزء ثاني وأنهي فيلم مصيره كيس الزبالة .. إنت في زمن شركات الإنتاج يا إما بتخبي أرقامها يا بتكدب عليك صراحة كده عشان تخليك تدفع فلوس أكتر وأديك بتتفرج وبتضيع وقت.
المصدر:
- مقالة بعنوان Warner announced ‘Wonder Woman 3’ so you would think ‘Wonder Woman 1984’ was already a hit نشرت في مجلة Forbes و ده لينك المقالة الأصلية:
https://www.forbes.com/sites/scottmendelson/2021/12/29/why-warner-bros-was-so-quick-to-announce-dc-films-patty-jenkins-directed-and-gal-gadot-starring-wonder-woman-3/?sh=194947c47032
