إسبانيا من المنتخبات اللي انا عن نفسي بشبهها ب(نرمين الفقي) .. تشبيه غريب صح .. جيل التسعينات كان بيموت فيها .. دي اللي كنا بنكراش عليها و إحنا صغيرين و لما كبرنا بقينا بنكراش عليها أكثر .. الجيل الجديد مش مستوعب أوي إيه يعني اللي مميز فيها عشان نحبها كده .. إسبانيا بطلة كأس العالم 2010 .. بطلة أوروبا 2008 و 2012 .. بس ده كان زمان .. إحنا عايشين في عصر السرعة اللي محدش فاكر هو كل إيه إمبارح عشان نفتكر منتخب كسب بطولة من 9 سنين .. النهاردة عايزين نتكلم عن 5 أسباب تخلينا نقول علي منتخب إسبانيا إنه مرشح جامد زحليقة إنه يكسب يورو 2021.
السبب الأول إن محدش عاملهم حساب .. العصر الذهبي للكرة الإسبانية من 2008 ل2012 خلي الإسبان يقعوا في نفس الغلطة اللي إحنا في مصر وقعنا فيها بعد منتخب الساجدين .. إحنا بقينا مبسوطين جداً بمنتخبنا لدرجة إننا مفكرناش في المستقبل .. محدش كان بيفكر هو مين (تشافي Xavi) الجديد أو مين حيكمل مشوار (فيرناندو توريس Fernando Torres)؟ .. بمعني أخر مفيش دم جديد بيتضخ للمنتخب .. عشان كده من 2012 لحد دلوقتي و منتخب إسبانيا مبقاش هو المنتخب المرعب بتاع زمان .. حتي الإسبان نفسهم مش عاملين حساب أوي لمنتخبهم و مش مستنيين منه حاجة و هي دي النقطة اللي بيعتمد عليها المدير الفني (لويس إنريكي Luis Enrqiue) .. هو بيبني منتخب للمستقبل .. تشكيلة منتخب إسبانيا اللي حتلعب في اليورو الجاي هي الأقل في معدل الأعمار من سنين و يمكن أكتر مرة إسبانيا تخش بمنتخب أغلبية لاعيبته بيلعبوا بره إسبانيا و إن ولا واحد فيهم بيلعب في ريال مدريد .. إن محدش عاملك حساب بتشيل الضغط من عليك خصوصا لو إنت لاعيب صغير في السن زي كتير من لاعيبة منتخب إسبانيا.
السبب الثاني هو أكاديمية لاماسيا بتاعة برشلونة .. لو سألت أي حد بيشجع برشلونة دلوقتي حتلاقيه شايل الهم .. هو شايف إن النادي داخل علي أيام سودا و ده إحتمال وارد بس أرجوك حاول تبص علي نص الكوباية المليان .. زي ما الجيل الذهبي لإسبانيا إتبني علي كتاف اللاعيبه اللي إتخرجت من لاماسيا فبرده الجيل الحالي لمنتخب إسبانيا فيه كتير طلعوا منها .. خد عندك مثلاً (إيريك جارسيا Eric Garcia) .. أيوة و الله عارف إنك لو بتشجع مانشستر سيتي فإنت شايفه عيل مبالغ فيه و أخطاءه كتير بس إنت محتاج تفهم حاجة .. هو لسه عنده 19 سنة .. هو بيلعب تحت إيد مدرب محترم جداً يمكن إنت سمعت عنه قبل كده إسمه (بيب جوارديولا Pep Guardiola) .. عايزك تعرف رغم إنه لسه عيل صغير إلا إنه بياخد كورسات تدريب .. (إيريك جارسيا) يمكن هو مشروع لاعيب قلب دفاع محترم بس مانشستر سيتي مش هو النادي الصح بالنسبة له دلوقتي .. لاعيب تاني طلع من لاماسيا و حتشوفه في منتخب إسبانيا في يورو 2021 هو (داني ألمو Dani Olmo) الللي عنده 23 سنة و جناح فرقة أر بي لايبزج اللي علي فكرة خدها مني كلمة ده النسخة الجديدة من (توماس مولر Thomas Muller) .. اللي هو اللاعيب اللي إنت لا فاهم هو صانع ألعاب ولا جناح ولا بيهبب إيه في عشته بالضبط غير إنه عمال يدي أسيستات لزمايله.
السبب الثالث هو (إنييستا) الجديد و أمل منتخب إسبانيا .. (بيدري Pedri) .. رغم إن لسه عنده 18 سنة إلا إنك حتشوف بنفسك إن منتخب إسبانيا كله بيدور حوله .. هو لاعيب مهم جداً في برشلونة بس إذا كان (ليونيل ميسي Lionel Messi) هو الكل في الكل في برشلونة ففي المنتخب (بيدري) هو القلب النابض للفرقة .. غريب إن (لويس إنريكي) يبني فرقته كلها علي لاعيب لسه عنده 18 سنة بس ده يوريك إزاي الرجل ده بيبني فرقة للمستقبل.
السبب الرابع هو محور الإرتكاز للفرقة (سيرجيو بوسكيتس Sergio Busquets) .. معاك و خدامك أنا و العربية إن الموسم ده أداء (بوسكيتس) خلانا نقول عليه المنتهي بس بعد إستبعاد (سيرجيو راموس Sergio Ramos) من المنتخب ف(بوسكيتس) حيكون هو الكابتن و الكبير أوي للفرقة .. كونه عنده 32 سنة بيخلي خبرته مينفعش تقدرها بثمن خصوصا لزمايله اللي قلت أساميهم و اللي أكبر واحد فيهم عنده 23 سنة .. (بوسكيتس) حيكون الدراع اليمين ل(لويس إنريكي) في الملعب .. و رهان علي العشرين جنيه اللي في جيبي أداء (بوسكيتس) في البطولة دي حيخليك تقول لنفسك أومال كان فين طول الموسم مع برشلونة؟
السبب الخامس و هي طريقة اللعب 4-3-3 .. عشان تفهم قصدي حاول تخش علي YouTube تتفرج علي Highlights بتاعة ماتش إسبانيا و ألمانيا في بطولة الدوري الأوروبي و اللي كسبته إسبانيا 6-0 .. في الماتش ده حتلاحظ حاجة غريبة .. لاعيبه ألمانيا جريو كتير ورا الكورة .. جريوا كتير أوي بس محدش فيهم لمسها .. (لويس إنريكي) عمل ميكس بين التيكي تاكا بتاعة (جوارديولا) مع الضغط العالي ل(يورجين كلوب Jurgen Klopp) .. لما تلعب قصاد منتخب إسبانيا إنت حتلعب قصاد فريق صغير في السن فلسه عنده صحة عايز يضيعها و بيضغط عليك في كل حتة في الملعب .. و في نفس الوقت حتلعب قصاد فرقة فيها خط نص بيعرف يعمل الأسيست اللي يحط المهاجم هو و الجون.
مجموعة إسبانيا الصراحة لطيفة جداً .. هم معاهم بولندا و سلوفاكيا و السويد .. دي مجموعة سهلة في الحنين تخليك تبدأ تعلي ثقتك في نفسك و في لاعيبتك مع كل ماتش بيعدي .. توقعي الشخصي إسبانيا في نص النهائي بتاع يورو 2021 و يا كاتب التاريخ لا تغلق الصفحات.
المصدر:
فيديو بعنوان The Case for Spain-Euro Series نشر علي YouTube وده لينك الفيديو:
