لما (أحمد مكي) في أغنية قطر الحياة كان بيحكي قصة شاب بيعاني من الإدمان كانت واحدة من الأفكار بتاعة الكلمات إن لو سبت نفسك للدنيا قطر الحياة حيسرقك .. زي ما قال (روكي بالبوا) الزمن هو بطل العالم الحقيقي اللي محدش يقدر يهزمه .. دي نفس المشكلة اللي الإتحاد الأوروبي دلوقتي بيعيشها مع روسيا و خليني أشرحلك الموضوع بسرعة أوي .. دلوقتي إنت مش محتاج تبقي عبقري عشان تبقي عارف إن الغزو الروسي لأوكرانيا خلي الأوروبيين يشوفوا روسيا كأكبر تهديد للأمن القومي بتاعهم .. الحل في الحالات اللي زي دي إنك تحاول بكل الطرق إنك تلوي دراع عدوك عشان توجعه و ده يفسرلك ماسورة العقوبات الإقتصادية اللي فرضتها أميركا و الإتحاد الأوروبي علي روسيا .. جميل .. بس فضلت الحاجة اللي مخليه روسيا عارفه تلوي بيها دراع الإتحاد الأوروبي .. الطاقة.
لحد أكتوبر 2021 يعني تقريباً من سنة بس كانت 25% من إجمالي مصادر الطاقة سواء بترول أو غاز طبيعي أو فحم اللي بتستورده دول الإتحاد الأوروبي من بره بتيجي من روسيا .. عشان تقدر تستوعب النقطة دي بالذات حتلاقي عندك وسط الصور جدول بيوريك النسبة المئوية لإعتماد دول الإتحاد الأوروبي دولة دولة علي الغاز و البترول الروسي في سنة 2000 و سنة 2020 .. لو جيت تحسب في المتوسط يعني حتلاقي إن 56.3% من إجمالي البترول و الغاز و الفحم اللي دول الإتحاد الأوروبي حرقتهم سنة 2000 جم من روسيا .. حط ده جنب معلومة إن بعد عشرين سنة النسبة زادت بقت 57.5% .. ده معناه إيه؟ معناه إن الوقت سرق أوروبا .. من عشرين سنة و الناس بتقول إن يا جماعة خلوا بالكوا إن روسيا هي برده لسه أكبر تهديد للأمن القومي الأوروبي و رغم كده خلال عشرين سنة فضلت أوروبا تعتمد بشكل غريب علي البترول و الغاز و الفحم اللي جايين من روسيا.
طب دلوقتي إحنا إتكلمنا عن المحروقات ككل يعني بترول و غاز طبيعي و فحم كشروة واحدة بس لو حبيت تفصصهم و تمسك كل واحدة لوحدها حتلاقي إن إعتماد أوروبا علي روسيا عامل زي إعتمادك علي عربية الفول اللي أول شارع الشغل كده .. إنت كل يوم بتقول لنفسك حفطر حاجة غير الفول بس بمجرد ما تعدي جنب العربية و ريحة الفول و البصل تخش مناخيرك بتلاقي نفسك بشكل لا إرادي بتسحبلك رغيف و شوية جرجير:
- لك أن تتخيل يا مؤمن إن 26.9% من إحتياجات أوروبا من البترول بتيجي من روسيا و ده رقم خزعبلي مش بس عشان النسبة كبيرة إنما كمان عشان تاني أكتر دولة أوروبا بتستورد منها بترول هي العراق بس البترول العراقي نسبته يدوبك 9% بس من إجمالي البترول اللي حرقته أوروبا في العشرين سنة اللي فاتوا.
- صحيح كتير من محطات إنتاج الكهرباء اللي بتشتغل بالفحم في أوروبا إتقفلت بس لسه أوروبا بتستورد فحم .. 46.7% من إحتياجات أوروبا من الفحم بتيجي من روسيا .. بالمناسبة .. روسيا عندها تاني أكبر إحتياطي في العالم من الفحم و سنة 2020 هي لوحدها أنتجت 328 مليون طن .. تقريباً البيئة بتسب و تلعن كل يوم سلسفين الروس نفر نفر.
- المشكلة الكبيرة فعلاً في الغاز الطبيعي .. 41.1% من إحتياجات الإتحاد الأوروبي من الغاز الطبيعي خلال العشرين سنة اللي فاتوا جم من روسيا و الغاز الروسي بيوصل أوروبا عن طريق خطين أنابيب اللي هم نورد ستريم Nord Stream واحد و إتنين .. نورد ستريم واحد هو أطول خط غاز طبيعي تحت المياه في العالم و إتبني سنة 2011 و الخط ده حرفيا قاسم ألمانيا نصين .. نورد ستريم إتنين هو يعتبر إستكمال للخط الأولاني و هو فعلياَ لسه مخلصش و عملية بناءه عطلانة بسبب الغزو الروسي لأوكرانيا.
الكلام الكتير اللي أنا قلته ده في الأخر معناه إن روسيا هي الديلر بتاع الإتحاد الأوروبي .. مهما روسيا هددت إنها حتقفل حنفية الغاز بتاعها عن أوروبا .. مهما الغزو بتاعهم لأوكرانيا كمل و منتهاش .. مهما الروس نكدوا علي الأوروبيين عيشتهم إنهم يشترطوا إن دفعات الفلوس اللي بتحولها أوروبا لروسيا مقابل الغاز تتدفع بالروبل اللي هي عملة روسيا مش الدولار ولا اليورو .. مهما كل ده حصل لما نص إحتياجاتك من الطاقة تيجي من طرف واحد فعملية إستبداله مش سهلة و حتبقي طويلة و فيه أطراف كتير بتسترزق منها .. ده غير إن ده معناه إنك إحتمال تلاقي نفسك مضطر تبني خطوط أنابيب جديدة .. اللي في الأخر الأوروبيين بيبصوا لبعض و زي أي رجل متجوز لمبة المطبخ في الشقة بتتحرق و مراته بتقوله عايزين نغيرها يقولها وهو بيشرب كوباية الشاي .. بعدين بعدين.
المصدر:
مقالة بعنوان Visualizing the EU’s Energy Dependency تشرت في موقع Visual Capitalist و ده لينك المقالة الأصلية:
https://www.visualcapitalist.com/visualizing-the-eus-energy-dependency/
