حاول تتخيل إن إيطاليا دي عامله زي الإيكس بتاعتك .. إنت سبتها عشان هي فيها حاجات في شخصيتها مش عاجباك بس بعد كام سنة رجعتلك و بتقولك و الله العظيم أنا إتغيرت .. إيطاليا الفريق اللي أنا بكتب السناكس دي عشان أقولك إن فيه فرصة إنها تكسب اليورو هي هي نفس الفريق اللي معرفش يتأهل لكأس العالم 2018 اللي إتلعب في روسيا .. طب إيه اللي إتغير؟ .. النهاردة حنتكلم سوا عن الخمس أسباب اللي بتخليني أرشحلك إيطاليا للفوز بالبطولة.
السبب الأول هو سمعة الطليان إنهم أستاذة الكلاحة الكروية .. سمعة الطليان إنهم الفريق اللي بيبقي يوم أسود يوم ما تلاعبهم .. دول اللي إخترعوا مقولة إن الماتشات تُكسب ولا تٌلعب اللي هو إنت عايز تقولهم طب حتلعبوا كورة حلوة إمتي يعني إن شاء الله .. دول بتوع حندافع و أنتوا مالكوا خلي الهجوم ينفعكوا .. بس هنا إنت محتاج تفرّق بين حاجتين .. فيه فرق إني أقولك إن دي فرقة بتعرف تدافع و فيه فرق إني أقولك دي فرقة بتلعب أجلي فوتبول اللي إحنا بنسميها بينا و بين بعضينا الكلاحة .. فكرة الCatenaccio أو الكاتيناتشيو الطلياني هي حاجة شبه اللي عملته فرقة تشيلسي في نهائي دوري الأبطال قصاد مانشستر سيتي كده أو اللي عمله منتخب إيطاليا لما خد كأس العالم 2006 .. إحنا مقفلين دفاعنا كويس و بنصطاد اللي قدامنا بالمرتدات و الكرات الثابتة .. اللي أي فرقة بتلعب ضد منتخب إيطاليا بتخاف منه هو ركن الأوتوبيس و الضرب و اللعب العنيف .. تاني .. ده مش اللي حيحصل و مش دي طريقة لعب الطليان دلوقتي .. دي السمعة المتاخدة عنهم و اللي بتخوف أي فرقة تلاعبهم.
السبب الثاني و هو إن معاهم مدير فني إتخلق عشان يمسك منتخب إيطاليا .. أنا هنا بتكلم عن (روبيرتو مانشيني Roberto Mancini) اللي الطليان بيدلعوه بيقولوله (إل مانشو Il Mancio) .. هو إتعين مدير فني للمنتخب في مايو 2018 بعد فضيحة فشل إيطاليا إنها توصل لكأس العالم في روسيا .. ركز معايا بقي .. الرجل ده في منصبه بقاله 3 سنين .. حلو .. في ال3 سنين دول هو إستدعي 68 لاعيب للمنتخب .. ده معدل خزعبلي .. مفيش مدير فني لمنتخب إيطاليا من ساعة ما الطليان بدأوا يلعبوا كرة قدم جرب العدد ده من اللاعيبه و رغم كده إيطاليا جابت العشرة من عشرة في تصفيات يورو 2021 .. لعبوا عشر ماتشات كسبوهم كلهم.
السبب الثالث و اللي مرتبط بالسبب الثاني هو إن (مانشيني) مش فارق معاه إنت إبن مين في البلد .. لو بتعرف تلعب حتروح المنتخب .. (مانشيني) مش من المديرين الفنيين اللي بيشوف هو الأهلي و الزمالك بيلعبوا بمين و يقوم واخدهم المنتخب .. (مانشيني) بيختار لاعيبه تخليك تهرش في شعرك و تسأل هو إنت جبت الواد ده منين .. خد عندك مثلاً يعني (ساندرو تونالي Sandro Tonali) .. ده لاعيب بيلعب في إيه سي ميلان .. حلو .. ده لاعيب مش بس شبه (أندريا بيرلو Andrea Pirlo) في شكله إنما كمان ناس كتير بتقول عليه إنه (بيرلو) و هو صغير .. جميل .. تفتكر بقي (مانشيني) جابه المنتخب و هو بيلعب في ميلان؟ .. لا .. (مانشيني) لقطه و هو لسه بيلعب في فرقة برشييا في دوري المظاليم في إيطاليا .. خد عندك كمان (نيكولو زانيولو Nicolo Zaniolo) .. ده لاعيب مهم جداً في فرقة روما و زيه زي (ساندرو) إنضم للمنتخب و هو لسه ناشيء في أكاديمية إنترميلان قبل ما يلعب دقيقة واحدة في الدوري الإيطالي .. فاكرني خلصت؟ .. خد كمان (فينشينزو جريفو Vincenzo Grifo) جناح فرقة فرايبورج الألمانية و اللي إتولد في ألمانيا .. لو مدرب تاني غير (مانشيني) كان إترعب من رد فعل الإعلام الطلياني من فكرة إنه يضم لاعيب صحيح أبوه و أمه طليان بس إتولد في ألمانيا و بيلعب في الدوري الألماني.
السبب الرابع هو طريقة اللعب 4-3-3 و اللي أيوه زي ما قلتلك في أول سبب (مانشيني) مش بيدافع .. لو بصيت علي Team Sheet بتاعة منتخب إيطاليا حتحس إني بهبد و أنا مقدر ده .. فرقة قلبين الدفاع بتوعها هم (جيورجيو كيليني Giorgio Chiellini) و (ليوناردو بونوتشي Leonardo Bonucci) اللي صحيح عواجيز بس لسه فيهم الرمق و (مانشيني) بيثق فيهم .. وراهم في الجون واقف (جيان لويجي دوناروما Gianluigi Donnarumma) و اللي أنا مقدر جداً لو إنت بتشجع إيه سي ميلان و بتقولي متجيبش سيرة الواد التلفان ده قدامي بس خلينا نتفق إنه صحيح لسه عنده 22 سنة بس خبرته كحارس مرمي متفرقش كتير عن حارس عنده 32 سنة و فوق ده كله هو جاحد في صد ضربات الجزاء .. الواد ده إتشاط عليه 34 ضربة جزاء صد منهم 15 بنسبة تصدي 44% و دي أساساً نسبة بتاعة حراس مرمي كرة يد مش كرة قدم .. المهم إن فرقة إيطاليا لما تتفرج عليها تحس إنك بتتفرج علي مانشستر سيتي أو أرسنال أيام ما كان ماسكهم (أرسين فينجر Arsene Wenger) الله يمسيه بالخير .. فرقة مش عايزة تسيب الكورة .. أه والله زي ما بقولك كده .. إيطاليا رمت الكاتيناتشو في الزبالة و بقت بتلعب بالإستحواذ دلوقتي ولا تخرج قبل أن تقول سبحان الله .. أهم لاعيب في تشكيلة إيطاليا هو خط نص إنترميلان (نيكولو باريلا Nicolo Barella) .. خلي بالك أوي من الواد ده .. أول مرة يلعب ماتش رسمي له كان عنده 17 سنة .. و هو عنده 20 سنة كان كابتن فرقة كالياري .. سنة 2019 راح إنترميلان و لو كمل هناك فإحتمال تلاقيه كابتن الفرقة كمان كام سنة .. لما بتتكلم عن (باريلا) فإنت بتتكلم عن لاعيب Box-to-Box بسم الله ما شاء الله حريقة شغل.
السبب الخامس و ده المرتبط بالسبب الرابع و هو و إنت بتتفرج علي فرقة إيطاليا حتحس بإنك بتتفرج علي فيلم 300 كده .. حتلاقي الفرقة قريبة من بعض بشكل مستفز .. حتلاقي نفسك حاسس إنهم بيلعبوا زي ما إنت و صحابك بتلعبوا خماسي اللي هو كلكوا بتدافعوا و كلكوا بتهاجموا .. منتخب إيطاليا بيلعب ككتلة واحدة و اللي الطليان بيسموها سكوادرا كورتا Squadra Corta .. ده معناه إنك محتاج لاعيبه فاهمه بعضها كويس و الأهم إنهم يبقوا مكن في الملعب .. إنت عايز 10 لاعيبه فعلياً و حقاً و صدقاً مش بيبطلوا جري في الملعب طول التسعين دقيقة.
مجموعة إيطاليا مش سهلة علي فكرة .. هم معاهم ويلز و سويسرا و تركيا .. 3 فرق فعلياً مش بتخاف خصوصا المنتخب التركي و اللي أنا متوقع إنه يعمل مفاجأة مش عارف هي إيه الصراحة بس حيعمل مفاجأة و خلاص .. المنتخب الإيطالي اللي حتتفرج عليه في اليورو فعلياً مش حتعرفه .. حتلاقيه مختلف عن السمعة المتاخدة للطليان .. لو ده حصل متتخضش.
المصدر:
فيديو بعنوان The Case for Italy-Euro Series نشر علي YouTube وده لينك الفيديو:
