يوم 28 إبريل 1998 كان من الأيام المميزة الحقيقة اللي عدت علي مصر لإن ده اليوم اللي الناس بقت مش مضطرة ميبقاش عندها حاجة تتسلي بيها غير القناة الأولي و الثانية .. اليوم ه كان بداية إن بعدها باربع سنين بس يبقي عندنا قناة ريم اللي عرفتنا علي إن فيه واحدة إسمها (نانسي عجرم) بتغني أخاصمك أه و من ساعتها و عينك ما تشوف إلا النور .. اليوم ده كان اللي مصر أطلقت فيه القمر الصناعي نايل سات 101 و اللي علي حسه (صفوت الشريف) الله يرحمه حط نفسه في فئة الأبطال القوميين في التاريخ المصري الحديث .. الأقمار الصناعية في رأيي لازم تتحط في قائمة أهم الإختراعات اللي عملها البشر في تاريخهم لإن يكفي إني أقولك إن لحد يوم 16 سبتمبر 2021 كان فيه 7,941 قمر صناعي بيدوروا حول الكرة الأرضية .. صحيح زي ما قلتلك مصر دخلت سوق الأقمار الصناعية نسبياً متأخر لإن أول قمر صناعي يطلقه البشر للفضاء كان سبوتنيك Sputnik اللي أطلقه السوفييت سنة 1957 .. من السنة دي لحد سنة 2010 البشر كانوا بيطلقوا أقمار صناعية بمعدل شبه ثابت اللي هو ما بين 60-100 قمر صناعي في السنة .. يدوبك 2010 عدت علي خير و ماسورة أقمار صناعية إتكسرت و غرقت الفضاء.
سنة 2020 لوحدها كانت زي ما يكون مشروع قمر صناعي لكل مواطن .. في سنة واحدة البشر نفذوا 114 عملية إقلاع صاروخي لإطلاق 1,300 قمر صناعي و بكده البشر كسروا حاجز إطلاق 1,000 قمر صناعي خلال سنة واحدة .. الناس تخيلت إن كده خلاص إحنا قفلنا اللعبة و مش حنكسر الرقم ده تاني فتيجي سنة 2021 و تقولنا صاربرايز ماذرفاكرز .. لحد يوم 16 سبتمبر 2021 بس يعني لسه السنة مكانتش خلصت كان البشر أطلقوا 1,400 قمر صناعي عايز أقولك إن منهم 51 قمر صناعي أطلقتهم شركة واحدة اللي هي SpaceX عشان يخدموا مشروع واحد اللي هو Starlink اللي المفروض إنه حيوفر الإنترنت لأي مكان علي وجه الأرض عن طريق شبكة أقمار صناعية.
مهم أوي بالنسبة لي إنك تفهم هو ده حصل إزاي؟ و اللي عشان تفهمه لازم تحط جنب بعض سببين هم اللي ورا فكرة إن السما حتبقي عاملة زي الأوتوستراد وقت خروج الموظفين:
- أول سبب إن إذا كان زمان بناء الأقمار الصناعية ده كان سر حربي فدلوقتي بسم الله ما شاء الله العلم بقي ببلاش بس اللي يقرأ .. يكفي إني أقولك إن يوم 29 أغسطس 2021 فيه صاروخ Falcon 9 تابع لشركة SpaceX إنطلق عشان يوصل شحنة لمحطة الفضاء الدولية و بالمرة يعني يحط كام قمر صناعي جداد في مدارهم من ضمنهم قمر صناعي هو فعلياً يعني مشروع تخرج لطلبة من قسم علوم و تكنولوجيا الفضاء جامعة ماساشوسيتس الأميريكية.
- ثاني سبب إن تكنولوجيا صناعة الأقمار الصناعية خلتك تقدر تعمل قمر صناعي بضعف الإمكانيات و نص الحجم .. نص الحجم يعني بدل ما كنت حتطلق قمر صناعي واحد حتقدر تطلع قمرين و ثلاثة .. حجم أقل يعني حتوفر بنزين الصاروخ سواء كان وقود صلب أو مسال .. عايزك تعرف إنك لو بصيت علي كل الأقمار الصناعية اللي أطلقت خلال سنة 2020 حتلاقي إن 94% منهم أصغر حجما من الجيل اللي أطلق قبلهم يعني بتتكلم عن قمر صناعي وزنه مش بيعدي 600 كيلوجرام.
أخر نقطة عايز أتكلم فيها هي إن صحيح كتير من الأقمار الصناعية اللي بتطلق اليومين دول بيكونوا عشان التصوير و الإتصالات و التجسس بس السبوبة الجديدة اللي بتجيب فلوس زي الفل هي الأقمار الصناعية اللي بتوفر خدمة الإنترنت .. فيه شركتين هم اللي دايسين أوي في البيزنس ده اللي هم SpaceX و اللي بتعمل مشروع Starlink زي ما حكينا قبل كده و شركة تانية إسمها OneWeb .. خلال سنة 2020 بس الشركتين دول لوحدهم أطلقوا للفضاء حوالي 1000 قمر صناعي و خلال السنين الجاية الشركتين بيخططوا إنهم يطلقوا 4,000 قمر صناعي .. ده بيزنس ممكن يجيب ترليون دولار أرباح فكل شركة عايزه ينولها من الحب جانب و يمكن ده السبب إن شركة أمازون Amazon هي كمان ريقها جري و شغاله علي مشروع إسمه كويبر Project Kuiper عشان برده يوفروا خدمة الإنترنت عن طريق أقمار صناعية مش كابلات أرضية زي الإنترنت المنزلي بتاعك.
المصدر:
مقالة بعنوان Just how many satellites are orbiting our planet? نشرت في موقع Big Think و ده لينك المقالة الأصلية:
https://bigthink.com/hard-science/satellites-orbiting-earth/
