أحياناً بحب لما ببقي فاضي مش لاقي حاجة أعملها إني أسرح بخيالي في لعبة مسلية أوي إسمها What if? .. إيه اللي ممكن يحصل لو حاجة تمت مكنش ربنا رايد إنها تحصل و حصلت حاجة تانية؟ .. يعني مثلاً .. عمرك سألت نفسك إيه اللي كان ممكن يحصل لو الرئيس (محمد أنور السادات) الله يرحمه كان سمع بنصيحة الفريق (سعد الدين الشاذلي) الله يرحمه و مطورش الهجوم في حرب أكتوبر 1973؟ .. عمرك سألت نفسك إيه اللي كان حيحصل لو (روبيرتو باجيو) مكنش ضيع ضربة الجزاء الأخيرة في ماتش نهائي كأس العالم 1990 قصاد البرازيل؟ .. جربها اللعبة دي حتعجبك أوي .. عمرك سألت نفسك لو الرئيس (عبدالفتاح السيسي) كان بيحكم البرازيل مش مصر؟ .. الحتة دي بالذات غريبة لسبب .. إمشي في الشارع إسأل أي حد تلاقيه قصادك إيه أكتر حاجة إتبنت في مصر خلال السنين اللي فاتت حتلاقيه بيقولك كباري .. مش حتفرق إنت بتسأل حد عنده كام سنة و من أنهي بلد و بيشتغل إيه .. الكام سنة اللي فاتوا حرفياً زي ما يكون الحكومة عايزة تعمل كوبري لكل مواطن .. كباري في كل حتة .. عشان كده تخيل يعني What if? الرئيس (السيسي) بيحكم البرازيل .. تدري ليش؟ .. عشان نهر الأمازون اللي قاسم البرازيل نصين مفيش عليه ولا كوبري.
بالورقة و القلم معلومة إن نهر الأمازون دي معليهوش كباري المفروض تخليك تهرش في شعرك و تشك في كلامي .. إنت بتتكلم عن تاني أطول نهر في العالم .. ده نهر فيه أكبر كمية مياه وسط كل أنهار الأرض .. ده نهر بيعدي علي 3 دول اللي هم بيرو و كولومبيا و البرازيل و مفيش ولا دولة فيهم فكرت تعمل عليه كوبري يتيم .. ده نهر عايش علي ميته 30 مليون بني أدم .. إزاي نهر زي ده مفيهوش كباري .. دوروا كويس يمكن تلاقوا .. مجرد إنك تفكر فيها حتلاقي نفسك مستغرب .. القاهرة لوحدها فيها تسع كباري بتعدي نهر النيل .. بالمناسبة يعني لو إنت فاكر إن فترة حكم الرئيس (السيسي) بتميزها إن بقي عندنا كباري كتير أوي فعايزك تعرف إن خلال الثلاثين سنة اللي فاتوا الحكومة الصنيية بنت فوق نهر اليانجتسي لوحده أكتر من 100 كوبري .. يا مؤمن ده أطول نهر فيكي يا أوروبا اللي هو نهر الدانوب اللي هو يدوبك يعني تلت طول نهر الأمازون إتعمل عليه 133 كوبري .. مهم تبقي فاهم هي المشكلة فين؟ .. إيه السر ورا إن عدد الكباري فوق الأمازون هو نفس عدد المصريين اللي عندهم إستعداد يدوقوا شوربة الضفادع .. صفر .. الفكرة في ميكس بين حاجتين هم اللي شغلانة الهندسة دي كلها عايشة عليهم .. الفلوس و الفلوس.
أول مشكلة إن مفيش فلوس كتير حتجيلك لو عمرت كوبري فوق الأمازون .. صحيح إن النهر ده طوله 6,920 كيلومتر بس أغلبهم هو ماشي وسط غابات مش عايش فيها بني أدمين كتير .. حتي المدن و القري اللي بتطل علي النهر مش مدن كبيرة و مفيهاش تعداد سكان كبير و الناس هناك إتعودت بقالها سنين إنها تمشي حالها بالعبارات و المعديات .. بمعني .. حتي لو بناء الكوبري ده ببلاش فالفلوس اللي حتجيلك ولا حاجة قصاد الصداع بتاع الخوازيق الهندسية اللي حتشوفها عشان تبني كوبري في مكان منيل بستين نيلة زي الأمازون.
تاني مشكلة إنك حتصرف فلوس كتير .. كتير أوي عشان تبني كوبري واحد .. التربة الطينية الناعمة فشخ بتاعة قاع النهر حتخليك عشان تبني كوبري تحفر خوازيق و تحط أساسات حتخليك تكع دم قلبك .. فكك من الفلوس .. يا سيدي الفلوس حنلاقيها علي ورق الشجر .. المشكلة إن أنا لو مهندس مدني جيت سألتك هو إنت عايز كوبري طوله كام فصدقني لو قلتلك معرفش .. أنا مش بهزر .. إحنا مش عارفين الكوبري حيبقي طوله كام لإن تخيل مثلاً إن مكان كوبري قصر النيل هنا في القاهرة عرض نهر النيل بيتغير علي حسب إنت في شهر كام في السنة .. يعني مثلاً .. من شهر يونيو لحد شهر نوفمبر ده موسم الجفاف هناك يعني مفيش مطر فتلاقي إن عرض النهر بيتراوح ما بين 3.2 كيلومتر لحد 9.7 كيلومتر .. من شهر ديسمبر لحد شهر إبريل و ده بيكون موسم الأمطار الموسمية عرض النهر بيوصل 48 كيلومتر بعمق مياه بيوصل 15 متر و دي مش غلطة في الكتابة .. عشان أقربلك الصورة برده تخيل إن أنا جيت قلتلك عايز أبني كوبري فوق نهر النيل بس في حتة من النهر عرضها بيتغير ما بين 5-50 متر علي حسب إنت في شهر كام .. هل ده كلام يخش دماغ ناس عاقلين؟
برده عشان أبقي دقيق في كلامي فيه كوبري واحد يتيم إتبني فوق نهر متفرفع من نهر الأمازون إسمه نيجرو ريفر Negro River أو النهر الأسود و الكوبري ده إتبني سنة 2011 .. في 2019 رئيس البرازيل وقتها (جايير بولسونارو) زي ما يكون إتعدي من الرئيس (السيسي) و قالك إنه عايز يعمل كوبري فوق نهر الأمازون بس الرجل مشي من منصبه و محدش شد خط حتي في المشروع.
المصادر:
- مقالة بعنوان Why are there no bridges over the Amazon River? نشرت في موقع Live Science و ده لينك المقالة الأصلية:
https://www.livescience.com/why-no-bridges-over-amazon-river
