يُحكي أن بعد ما الحرب العالمية الثانية خلصت إتعملت سلسلة محاكمات ملهاش أي معني إتسمت محاكمات نورمبيرج Nuremberg Trials علي أساس إن يتحاكم فيها قادة ألمانيا النازية في جرايم الحرب والإبادة الجماعية اللي هم عملوها سواء ضد اليهود أو الغجر أو الروس أو أي حد ملته مكانتش إنه كان من الجنس الأري .. المهم .. تيجي تشوف هم مين اللي إتحكم عليهم في المحاكمات دي؟ يطلعوا كلهم رجاله .. يعني مفيش ستات خالص مسئولين عن أي جريمة قتل حصلت في السنين دي كلها؟ .. يقولك تؤ تؤ الستات دول ملايكة .. بعدها سنة 1990 الأمم المتحدة تعمل محكمة دولية لمحاكمة مجرمي الحرب في الإبادة الجماعية اللي حصلت في رواندا ويوغوسلافيا .. تشوف فيه كام ست إتحكم عليها في المحاكمة دي؟ زيرو .. زيرو؟ .. يا جدعان ده فيه أدلة متلتلة علي إن فيه ستات بإيديها مسكت مسدسات وأعدمت أسري سواء في رواندا أو يوغوسلافيا .. ده فيه أدلة تملا عين الشمس علي إن فيه ستات متهمة بإرتكاب جرايم تعذيب وفي الأخر المحكمة الجنائية الدولية متحبسش ولا ست؟ .. ده بجد؟ .. طب أزيدك من الشعر بيت .. خلال العشرين سنة اللي هم عمر المحكمة الجنائية الدولية حصلت مرة واحدة يتيمة إن المحكمة أدانت واحدة ست والكلام ده كان سنة 2012 والست دي كانت (سيمون جباجبو Simone Gbagbo) مراة رئيس ساحل العاج.
اللي حصل إن جوز الست خسر الإنتخابات الرئاسية سنة 2011 وزي أي رئيس دولة أفريقية بيعمل لما بيخسر الإنتخابات قالك دي مؤامرة علي الشرعية والبلد دخلت في حرب أهلية عشان البيه مكنش عايز يسيب الكرسي .. مراته الست (سيمون) سنة 2012 المحكمة الجنائية الدولية وجهت ليها تهم تخليك تقول لنفسك أحية هو فيه ستات بتعمل كده؟ أنا كنت فاكر إن الجرايم دي بيعملها رجالة بس .. الست دي إتوجه ليها تهم الإبادة الجماعية .. تنفيذ عمليات إغتصاب جماعي .. جرايم تخلي الشيطان شخصياً يسقفلها ويقول عليها دي خليفتي في الملاعب .. سنة 2015 محكمة في ساحل العاج وجهت ليها تهمة محاولة قلب نظام الحكم وحكمت عليها بالسجن 20 سنة .. سنة 2018 طلع قرار رئاسي بالعفو عنها .. رغم كل المصايب اللي هي عملتها الست دي هي موقفتش حتي قدام قاضي في المحكمة الجنائية الدولية .. ليه؟ .. عشان هي ست.
مستغرب صح؟ .. فاكر لما قلتلك إن المحكمة الجنائية الدولية موجهتش أي تهمة لأي ست في جرايم الإبادة الجماعية اللي حصلت لا في رواندا ولا في يوغوسلافيا؟ .. كانت فيه واحدة ست إتقبض عليها وإتاخدت في الرجلين إسمها كان (بيليانا بلافسيك Biljana Plavsic) .. الست دي كانت رئيسة جمهورية صرب البوسنة .. بص هي مكنتش رئيسة لوحدها لإن صرب البوسنة كانت دولة غريبة شوية في إن كان ماسكها إتنين رؤساء جمهورية بيحكموا مع بعض .. المهم إن في المحاكمة بتاعتها لما القاضي سألها إيه ردك علي التهم المتوجهه ضدك كان دفاعها عن نفسها إن بشويش عليا أنا ست وحدانية مكسورة الجناح .. أنا مكنش ينفع أعترض لإن الرجاله اللي معايا في الحكومة كانوا هما اللي بياخدوا القرار وأنا مضطرة أوافق وأسكت .. ومش لوحدها اللي دفاعها عن نفسها كان كده .. (ليندي إينجلاند Lynndie England) الضابطة الأميريكية اللي صورها كانت في كل حتة بعد ما إتسربت وهي بتعذب المعتقلين في سجن أبوغريب في العراق لما إتقدمت لمحاكمة عسكرية كان ردها إن معلش يعني لما ضابط صغير يرفض ينفذ أمر عسكري أبقوا تعالوا أسجنوني .. أه نسيت أقولك .. عارف مين الضابط اللي فوقيها اللي هي كانت بتقول إنه قالها تعمل كده؟ .. كان البوي فريند بتاعها وقتها .. الست دي خزوقت البوي فريند بتاعها أحلي خزوقة في الدنيا.
أنا فعلاً مش ببالغ لو قلت إن فيه دراسات كتير أثبتت إن لو واحدة ست وقفت قدام قاضي وعيطتله شوية وقالتله إنها كانت مجبرة تعمل الجريمة اللي هي متهمة بإنها عملتها عشان جوزها أو البوي فريند بتاعها أو حتي مديرها الرجل الوحش المفتري هو اللي أجبرها علي كده فالقاضي بيطلعها براءة .. النيابة في المحكمة الجنائية الدولية بلمت لما سمعت قرار القاضي طلع (بيليانا بلافسيك) براءة من كل التهم المتوجهه ليها اللي كان من ضمنها الإبادة الجماعية .. في المقابل الرئيس برده بتاع صرب البوسنة اللي كان بيحكم مع (بيليانا بلافسيك) إتحكم عليه بأربعين سنة سجن ولما الدفاع بتاعه قدم إستئناف الحكم إتشدد بقي سجن مدي الحياة .. لسبب ما محدش فاهمه لو ست إرتكبت جريمة ووقفت قصاد قاضي فبيتحكم عليها بحكم مخفف فشخ مقارنة برجل إرتكب نفس الجريمة بتاعتها.
المصدر:
- مقالة بعنوان Why it’s important to see women as capable of terrible atrocities نشرت في مجلة The Conversation وده لينك المقالة الأصلية:
https://theconversation.com/why-its-important-to-see-women-as-capable-of-terrible-atrocities-149877
