أي حد لعب Age of Empire أو Total War أو حتي Assassin’s Creed عدي عليه الاسم ده .. الإمبراطورية الرومانية المقدسة أو Holy Roman Empire .. الاسم لوحده يجيبلك صداع من كتر العظمة .. بس خليني أقولك إن ورا الاسم اللي يجيب دماغ عالية ده قصة إستمرت أكتر من 1000 سنة بس صدقني لو قلتلك 1000 سنة من الهري .. علي رأي الأخ (فولتير Voltaire) لما قال عنهم دي لا كانت إمبراطورية ولا كانت رومانية ولا كانت مقدسة.
بإختصار شديد كانت فيه حاجة اسمها الإمبراطورية الرومانية اللي كانت محتله مصر و حكمها قبل كده (يوليوس قيصر) و (أغسطس قيصر) وأي حد أخره قيصر و إنت شخصياً هرستها كتير في منهج التاريخ بتاع إعدادي و ثانوي .. المهم إن الإمبراطورية دي بدأت تفك من بعضها من بعد ما الوحي نزل علي سيدنا (عيسي) عليه السلام .. كل ما عدد المسيحيين يزيد كل ما المسامير اللي بتربط الإمبراطورية دي في بعضها بتفك لحد ما وصلنا لنقطة إن الإمبراطورية إتقسمت نصين: نص شرقي اتسمي الإمبراطورية البيزنطية وعاصمتها القسطنطينية اللي هي إسطنبول دلوقتي و اللي العرب عرفوها باسم الروم .. النص الثاني كانت الإمبراطورية الغربية و فضلت عاصمتها روما .. الفرق بين النصين إن النص الشرقي كانت الديانة الرسمية بتاعته هي المذهب الأرثوذوكسي للمسيحية و النص الغربي الديانة الرسمية بتاعته هي المذهب الكاثوليكي .. حاجة شبه أوي التقسيمة بتاعة السُنة و الشيعة .. الإتنين محسوبين علي نفس الدين بس بيلعنوا سلسفين بعض .. الإمبراطورية الشرقية كبيرها هو الإمبراطور البيزنطي .. الإمبراطورية الغربية كبيرها هو بابا الفاتيكان.
زي ما إنت متخيل بلد بيحكمها العسكر و بلد تانية بيحكمها ناس بتاعة دين فطبيعي إنك تلاقي مع كل يوم بيعدي نفوذ الإمبراطورية الغربية عمال يقل يقل لحد ما وصلنا لسنة 800 بعد الميلاد و بقي بابا الفاتيكان وقتها (ليو الثالث) فعلياً مش لاقي حد ينجده .. الرجل بيحكم إمبراطورية من ورق .. إمبراطورية هو مش عارف يدافع عنها .. ده خلاه يقول نفس البق الحمضان اللي قعد (جون سنو Jon Snow) يصدعنا بيه .. We Need Allies .. الحقيقة إن مكنش قدامه غير حد واحد .. (شارلمان Charlemagne).
ده كان رجل دكر بيحكم ناس اسمهم الفرانكس Franks ودول الناس اللي عايشين في إقليم جيرمانيا اللي هو دلوقتي فرنسا و ألمانيا .. كمكافأة له علي وقفة الرجاله اللي عملها مع روما فبابا الفاتيكان أعلن (شارلمان) إمبراطور روما الجديد .. سنة 814 الكبير مات و لما الكبير بيموت عادة المولد بيتفض .. عيال (شارلمان) إتخانقوا مع بعض و الإمبراطورية إتقسمت لحد ما في سنة 962 واحد من أحفاده اسمه (أوتو الأول) قدر يوحد ألمانيا تاني ولإنه بقي هو الكبير أوي فبابا الفاتيكان وقتها (يوحنا الثاني عشر) نصبه إمبراطور علي الإمبراطورية الرومانية المقدسة .. اللي هي ألمانيا و كام حتة من إيطاليا .. يعني تاني .. الإمبراطورية الرومانية المقدسة ملهاش علاقة لا من قريب ولا من بعيد بالإمبراطورية الرومانية بتاعة (يوليوس قيصر) .. الإمبراطورية الرومانية المقدسة ده اسم الدلع بتاع ألمانيا.
من بعد وفاة (أوتو الأول) و العلاقة بين الفاتيكان و بين الإمبراطورية الرومانية المقدسة كان المفروض إنها تبقي شبه العلاقة بين أي تنظيم سياسي و الذراع العسكري بتاعه .. زعيم العصابة و الفتوات بتوعه .. سوري لو التشبيه ممكن يضايق حد من الكاثوليك .. بس المشكلة إن لما جت سنة 1075 العلاقة بدأت تتوتر أوي و بقت خناقة علي مين يمشي كلامه علي مين؟ .. العسكر يمشي كلامه علي القسيس ولا القسيس يمشي كلامه علي العسكر؟ .. المرحلة دي من تاريخ أوروبا بتتسمي صراع التنصيب Investiture Conflict و الخناقة دي خلصت سنة 1250 بموت الإمبراطور (فريدريك الثاني) واللي من بعده الدنيا كلها عرفت إن القسيس كسب الخناقة .. يا مؤمن ده الألمان إحتاجوا 23 سنة عشان يختاروا حد يحكمهم بعد ما (فريدريك الثاني) ده مات .. الإمبراطورية مخدتش كتير عشان تموت بعد ما فضلت سنين في الإنعاش .. سنة 1806 الإمبراطور (فرانسيس الثاني) تنازل عن الحكم و إدي ألمانيا ل(نابليون بونابرت).
اللي فعلاً علق مع الناس من سيرة الإمبراطورية الرومانية المقدسة هو بس اسمها .. بصراحة الإسم سيكسي أوي يعني .. سنة 1871 لما ألمانيا إتوحدت تاني حبوا يسموا الكيان اللي طلع ده اسم الرايخ Reich ودي كلمة ألماني معناها المملكة و إتسمت بكده تشبهاً و تكرماً بسيرة الإمبراطورية الرومانية المقدسة .. حتي لما النازيين مسكوا الحكم قالوا إنهم جايين عشان يعيدوا مجد الإمبراطورية الرومانية المقدسة و (هتلر) كان متخيل إن حكمه حيستمر ألف سنة .. تاني .. فعلياً مفتكرناش من سيرة الإمبراطورية دي إلا اسمها.
المصدر:
- مقالة بعنوان Everything You Need to Know About the Holy Roman Empire .. نشرت في موقع Historyextra وده لينك المقالة الأصلية:
https://www.historyextra.com/period/early-modern/holy-roman-empire-facts-what-when-how-long-name-called-emperors/
