وسط كل الكلام عن القصور الرئاسية وفيديوهات (محمد علي) وردود الرئيس (عبدالفتاح السيسي) عليه اللي خلت Social Media هايجة هيجان طفل ضرب طبق مولتين كيك بالأيس كريم قبل ما ينام فالنهاردة انا عايز أتكلم بسرعة أوي عن مشروع من ضمن المشاريع اللي بتتعمل في العاصمة الإدارية الجديدة واللي الحقيقة مش واخد حقه من الاهتمام والمشروع ده هو مجمع وزارة الدفاع الجديد أو الأوكتاجون Octagon زي ما المؤسسة العسكرية بتحب تسميه .. الحقيقة إني كنت الأول متخيل إن المبني ده إتسمي أوكتاجون عشان تصميمه الهندسي مخليه واخد شكل ثماني الأضلاع .. اللي هو النسخة المصري تقليد مقر وزارة الدفاع الأميريكية اللي الأمريكان سموه بينتاجون Pentagon عشان المبني تصميمه إنه واخد شكل خماسي الأضلاع .. بس اللي انا إكتشفته إن مش بس مقر وزارة الدفاع المصرية واخد شكل ثماني الأضلاع .. لا .. ده المبني عبارة عن 8 مباني كل مبني فيهم واخد شكل ثماني الأضلاع.
انت لو أخدت بالك من صورة موقع المبني حتلاقي إن فيه 8 مباني علي دائرة وجوه الدايرة دي فيه مبنيين كمان .. مش كده وبس .. ده فيه مكان لمبنيين كمان يتبنوا جوه .. يعني بتتكلم عن موقع إجمالي عدد المباني فيه ممكن يوصل 10 .. انا لسه مخلصتش .. من صور الموقع برده واضح إن فيه مباني إضافية حتتعمل بره دايرة ال8 مباني الكبار .. بعد كل ده انا لا يحضر في ذهني إلا جملة الفنان (نجيب الريحاني) الله يرحمه في فيلم لعبة الست لما بيقول بصوته المميز إيه ده كله إيه ده كله؟
لإن فعلياً محدش من المؤسسة العسكرية حيطلع يحكيلنا قصة المبني إيه أو اتبني ليه بالشكل ده فالحقيقة إحنا مقدمناش غير إننا نحاول نهبد سوا علي أمل إن حد فينا يقول الهبدة الصح .. انا شخصياً شايف إن فيه هبداية منطقية جداً وهي إن أي قوات مسلحة في الدنيا بتتكون من أفرع رئيسية .. في حالة القوات المسلحة المصرية فإحنا عندنا 4 أفرع رئيسية للقوات المسلحة اللي هم القوات البرية والقوات البحرية والقوات الجوية والدفاع الجوي .. لو انت كنت ناوي تعمل لكل واحدة من الأفرع الرئيسية دي مبني فده معناه إنك كنت محتاج 4 مباني .. انت ليه باني 8؟ .. فكرة إنك تقسم مقر قيادة القوات المسلحة بتاعك لمباني مستقلة بحيث كل مبني يبقي تبع قيادة معينة دي فكرة كويسة خصوصاً في حالة إن المبني كله إتعرض لهجوم .. التفسير اللي انا شايفه إن كل فرع من أفرع القوات المسلحة حيبقي ليها مبنيين .. واحد Duty و واحد Standby زي ما إحنا كمهندسين بنحب نستخدم طلمبتين في الموقع بحيث لو واحدة طلعت بره الخدمة التانية تشتغل.
فكرة إنك تقسم مقر وزارة الدفاع بتاعك لحتت عاملها الأمريكان في البينتاجون علي فكرة لإن المبني متقسم 3 حتت كل حتة كافية أوي إنها تقوم بدور المبني كله عشان زي ما قلتلك في حالة تعرض المبني لهجوم الدنيا متقفش .. بس برده .. وزارة الدفاع الأميريكية عباره عن مبني واحد بس اتقسم 3 أجزاء كل جزء فيهم كافي إنه يقوم ويشغل الوزارة كلها زي الفل.
يمكن أكتر حاجة بتيجي في دماغ أي مهندس لما بيشوف صور موقع زي موقع الأوكتاجون ده إنه يسأل نفسه هار أسود هو المشروع ده متكلف كام .. الحقيقة إن محدش عارف .. ولا حد حيعرف .. إنك تبني 10 مباني بالحجم ده بينهم إنفاق تحت الأرض تربط بينهم كلهم وده غير الفرش والتشطبيات و الإضاءة بيخليني أحس إن بيتنا حيتخرب بسبب مشروع زي ده.
المصدر:
- مقالة بعنوان Egypt’s New Ministry of Defense “Octagon” Complex Looks Like an Alien Base From Space .. نشرت في مجلة The Drive وده لينك المقالة الأصلية:
https://www.thedrive.com/the-war-zone/29762/egypts-new-octagon-ministry-of-defense-complex-looks-like-an-alien-base-from-space
