أنا شخصياً من الناس اللي بتحب الدهلكة في الشغل .. بحب الأفكار اللي بتجيب فلوس .. بقدر تشغيل المخ .. فيه حركات كده بتشوفها في البيزنس تقوم مسقفف و تقول لنفسك هنا سأصمت قليلاً .. من ضمن الأفكار المطرقعة دي حصلت بعد الغزو الروسي لأوكرانيا و اللي بسببها كتير من زباين روسيا اللي كانوا بيشتروا منها بترول بدأوا يقولولها الله الغني عشان محدش عايز يزعل أميركا و الإتحاد الأوروبي و ده شيء منطقي مع إن الأوروبيين كانوا معتمدين بشكل مبالغ فيه علي البترول الروسي .. الروس ميقدروش ميبيعوش بترول و في نفس الوقت المشكلة كلها حتظهر لو سفينة شايلة علم روسيا خدت حمولة بترول و ودتها لبلد تانية زي مثلاً الأردن و الأردن مش عايزة تبان إنها بتشتري بترول روسي عشان متزعلش الأمريكان زي ما قلتلك .. فالروس لقوا حل للمشكلة دي بحركة إسمها Shit-to-Ship Cargo Transfer .. يعني إيه البتاع دي؟
حضرتك السفينة الروسي اللي شايلة البترول الروسي بتقابل سفينة تانية من أي دولة تانية و ليكن مثلاً فنزويلا في عرض البحر و الحمولة بتاعة البترول بتتنقل بين السفينتين عشان السفينة اللي حتبقي شايلة علم فنزويلا حتروح للأردن و محدش حيبقي عارف إن البترول اللي السفينة دي شايلاه مش من فنزويلا إنما من روسيا .. حلو .. الطريقة دي فضلت شغالة لحد ما إتقفشت .. المشكلة إن المناطق اللي الروس كانوا بيختاروها كانت غريبة .. من ضمن المناطق دي كانت قصاد سواحل مدينة سبتة و دي مدينة صحيح هي في المغرب بس هي تحت السيادة الإسبانية علي المحيط الأطلنطي .. مشكلة الطريقة دي إنها لما بتتعمل بما يرضي الله يعني لازم ده يحصل جوه ميناء عشان تضمن إن مفيش تسريب بترولي يحصل في عرض البحر و تبقي مصيبة مع العلم إن الفكرة دي الروس سرقوها من الإيرانيين اللي عشان يبيعوا بترولهم للصين بتيجي السفن الإيرانية قصاد ساحل مدينة جوهور السنغافورية و يبدلوا الحمولة مع سفن صينية .. بعد ما الطريقة دي إتقفشت كان لازم الروس يلاقوا حل تاني.
يقوم الروس عاملين إيه بقي؟ .. واخدين مصر محلل .. يوم 24 يوليو 2022 فيه سفينة إسمها كريستيد The Crested شايلة حمولة 700,000 برميل بترول من روسيا جت ميناء الحمرا علي البحر المتوسط و نزلت حمولتها .. بعدها بكام ساعة جت سفينة تانية إسمها كريس The Cress كانت قاعدة في الميناء بقالها كام يوم شالت كل الحمولة دي كلها و إتحركت يوم 28 يوليو 2022 علي ميناء العين السخنة علي البحر الأحمر.. ركز بقي .. ميناء الحمرا ده مملوك لشركة بترول الصحراء الغربية ويبكو Wepco و دي شركة من ضمن شركات قطاع البترول المصري .. ده معناه مثلاً شحنة براميل البترول اللي وصلت ميناء العين السخنة و بعد كده كملت علي السعودية لو بصيت في الورق بتاعها حتلاقيه مش بترول روسي إنما بترول مصري لإن الورق بيقول إنه إتحمل من ميناء الحمرا المصري بس هو في الحقيقة بترول روسي.
هل الروس حيستخدموا مصر كمحلل كده كتير؟ .. الله أعلم .. هل دي كانت تجربة و عدت و مش حتحصل تاني؟ .. برده الله أعلم .. بس خلينا نتفق إنها فكرة جديدة بتوريك إزاي ممكن تجيب قرشين حلوين بالدهلكة و تفتيح المخ.
المصادر:
- مقالة بعنوان Russia finds a new route to oil market via a tiny Egyptian port نشرت في مجلة Bloomberg و ده لينك المقالة الأصلية:
https://www.bloomberg.com/news/articles/2022-08-03/russia-finds-a-new-route-to-oil-market-via-a-tiny-egyptian-port
