البطل ليه إحترامه .. أكرهه .. غير منه .. بس لازم تحترمه .. لما البرتغال كسبت اليورو 2016 مع إن محدش كان حاططها في حسابه إنها تبقي من المرشحين إنهم يوصلوا نص النهائي حتي كانت عامله زي صاحبك اللي مستواه ضعيف شوية في الفيفا فتلاقيه كسبك 5-0 .. تيجي تقوله إنت كسبت حظ يرد عليك يقولك باشا بيني وبينك دراع إنزل وريني نفسك في الملعب .. فعلياً ده اللي منتخب البرتغال بيقوله للناس قبل اليورو دي .. بيني وبينكوا تسعين دقيقة .. أنزلوا وروني نفسكوا .. النهاردة حنتكلم عن الخمس أسباب اللي تخليني أرشح البرتغال إنها تحقق المعجزة وتكسب اليورو مرتين ورا بعض.
السبب الأول منتخب البرتغال ده عنده روح الفانلة الحمرا .. دي الجملة اللي دايماً إقترنت بالأهلي .. روح الفانلة الحمرا .. إحنا اللي بنكسب في الدقيقة تسعين .. الجملة دي إتقالت بسبب الثقافة اللي إتزرعت في دماغ لاعيبه الأهلي .. إحنا لازم نكسب .. وعشان الثقافة دي تتزرع لازم اللاعيبه نفسها تكون كسبت بطولة وجربت إحساس إنها تلبس الميدالية الذهب وتشيل الكاس ومن ساعتها وهم بقوا زي المدمنين .. خلاص مبقاش فيه حاجة تكيفهم (و سوري في الكلمة يعني) غير إحساسك وإنت علي منصة التتويج بتشيل الكاس .. لسنين وإحنا اللي نعرفه عن منتخب البرتغال إنه (كريستيانو رونالدو Cristiano Ronaldo) ومعاه 10 لاعيبه تانيين .. دلوقتي منتخب البرتغال بقي فيه لاعيبه بتلعب في أندية زرعت فيها ثقافة إحنا لازم نكسب .. (برونو فيرنانديش Bruno Fernandes) هو فعلياً أهم لاعيب في فرقة مانشستر يونايتد .. (دييجو جوتا Diego Jota) هو أكثر مهاجم مبيضيعش في ليفربول .. فيه 3 لاعيبه السنة دي كانوا أبطال إنجلترا اللي هم (روبين دياز Ruben Dias) و(جواو كانسيلو Joao Cancelo) و(بيرناردو سيلفا Bernardo Silva) ومتنساش إن (دياز) أُختير أحسن لاعيب في الموسم في الدوري الإنجليزي .. فيه عندك (رافاييل جيريرو Rafael Guerrero) بطل كأس ألمانيا مع بروسيا دورتموند .. فيه عندك (جواو فيليكس Joao Felix) بطل الدوري الإسباني مع أتليتكو مدريد .. فيه عندك (جوزيه فونتي Jose Fonte) قلب الدفاع وكابتن فرقة ليل اللي كسبت الدوري الفرنساوي السنة دي واللي بيلعب معاه برده هناك (ريناتو سانشيز Renato Sanchez) .. 6 لاعيبه من أصل 11 في التشكيلة الأساسية لمنتخب البرتغال أبطال دوريات 4 من أكبر دوريات أوروبا.
السبب الثاني هو (رونالدو) .. خدامك أنا والعربية إنه كبر في السن وبقي عنده 36 سنة .. بس ده نفس البني أدم اللي جاب الموسم ده في الدوري الإيطالي 29 جون وكان هداف الدوري .. لكن وخلي بالك من اللي جاي دلوقتي .. دلوقتي أكثر لاعيب في العالم جاب جوان لمنتخب بلده في التاريخ هو الإيراني (علي دائي) اللي بسم الله ما شاء الله جاب 109 جون ..(رونالدو) فاضلة 6 جوان ويجيب الرقم ده ويبقي أفضل هداف لمنتخب بلده في التاريخ .. (رونالدو) مش بس حياكل النجيلة ده مستعد يرتكب جرايم عشان يكسر الرقم ده في اليورو الجايه.
السبب الثالث هو الباشمهندس (فيرناندو سانتوس Fernando Santos) .. ده يبقي المدير الفني لمنتخب البرتغال بالمناسبة .. سبب إن البرتغاليين بيسموه كده هو إنه فعلاً لما كان لاعيب كان تقدر تقول إنه علي قده أوي فكان شايف إنه ملوش مستقبل كلاعيب كورة وده خلاه يروح يدرس الهندسة الكهربية .. يعني شايفين اللهم زدنا تواضع يعني إحنا بالصلاة علي النبي نخش أي مجال ندوس أي حد فيه .. المهم إن دماغ (سانتوس) في الكورة هي إنه مش مهم نلعب سيكسي فوتبول .. المهم إننا نكسب .. بس خلي بالك .. ده مش هو المبدأ اللي بيقول المباريات تُكسب ولا تُلعب .. (سانتوس) عنده شوية لاعيبه كل واحد فيهم بإمكانيات معينة .. هو بيشوف أحسن خطة وأحسن طريقة لعب تخلي اللاعيبة بتاعته مستريحة في الملعب .. منتخب البرتغال تقدر تقول عليه تويوتا كرولا مثلاً .. هو مش سيكسي زي الMG-6 ولا البنات بتحبها زي BMW X-Series عشان المطبات .. هي أساساً عربية مفيهوش أوبشنز كتير بس مبتعطلش .. وده المهم .. في يورو 2016 لاعيبة البرتغال كإمكانيات كانت علي قدها أوي ف(سانتوس) لعب بطريقة 4-4-2 اللي إنت لما شفتها قلت يادي النيلة هو إيه اللي جاب (دييجو سيميوني Diego Simeone) هنا .. دلوقتي منتخب البرتغال بقي بيلعب 4-3-3 هجومية .. ليه؟ .. عشان دي إمكانيات اللاعيبة اللي تحت إيد (سانتوس) دلوقتي.
السبب الرابع هو ميكس بين السبب الأول والثالث .. زمان كانت سمعة منتخب البرتغال إنه عامل زي الزمالك كده .. يفضل شغال زي الفل في أول الموسم ويجي في الأخر ويقع .. المشكلة كانت نفسية يمكن .. اللاعيبة لما بتلاقي نفسها قربت تحقق المعجزة تلاقيهم بيقولوا يا لهوي إحنا عمرنا ما وصلنا للمستوي ده قبل كده فتلاقي الضغط النفسي أثر عليهم ووقعوا .. في كأس العالم 1966 طلعوا من نص النهائي قصاد إنجلترا بعد ما خسروا 2-1 .. في اليورو 1984 طلعوا برده من نص النهائي من فرنسا بعد ما خسروا 3-2 في الوقت الإضافي .. في يورو 2000 خرجوا من فرنسا برده بس المرة دي بالهدف الذهبي .. في يورو 2004 اللي إتلعبت علي أرضهم خسروا النهائي 1-0 من اليونان .. في كأس العالم 2006 خرجوا ثالث من فرنسا في نص النهائي .. (سانتوس) بدأ يغير ده من أول ما كسب اليورو 2016 ووراها بطولة الدوري الأوروبي 2019 .. (سانتوس) زرع في لاعيبته فكرة إن الطبيعي إنكوا تكسبوا بطولة ودي حاجة صعبة جداً تتزرع في دماغ لاعيبه منتخب .. لو إنت مدير فني لنادي فانت كل يوم صبح وليل قاعد مع لاعيبتك .. لو إنت مدير فني لمنتخب فإنت بتشوف لاعيبتك شهر في السنة.
السبب الخامس وهو السبب اللي ناس كتير حتستغرب منه وهو إن البرتغال إتحطت في مجموعة الموت .. البرتغال معاها المجر وفرنسا وألمانيا .. مجموعة ما يعلم بيها إلا ربنا .. بعد سنين من الكعب العالي لفرنسا علي البرتغال إلا إن خلاص البرتغال علمت عليهم مرتين .. مرة في نهائي اليورو 2016 ومرة في بطولة الدوري الأوروبي فخلاص البرتغاليين مبقوش خايفين من الفرنساويين .. الألمان مش هم المنتخب المرعب بتاع زمان .. خدها مني كلمة لو البرتغال إتـأهلت عن المجموعة بنت التييييت دي فأنت حتلاقيها في النهائي.
المصدر:
- فيديو بعنوان The Case for Potugal-Euro Series نشر علي YouTube وده لينك الفيديو:
https://www.youtube.com/watch?v=nP0XV9BKfzU
