ناس كتير معندهاش الربط بين البلاستيك و البترول .. ناس كتير مش متخيلة ان كيس البلاستيك اللي انت بتحط فيه الطماطم و الخيار من عند الخضري ده في الحقيقة عبارة عن شويه جاز .. ده يفسرلك ليه شركات بترول كبيره من ضمنها ارامكو السعوديه و Royal Dutch Shell الهولنديه بينهم وبين بعضيهم حطوا 400 مليار كاستثمار عشان يزودوا من انتاج البلاستيك الخام بنسبه 25% خلال الخمس سنين الجاية .. يا تري هم عملوا كده ليه؟ .. لان في الوقت اللي الRenewable Energy و العربيات اللي بالكهرباء بقت عامله زي اغنية لقيت الطبطبة بتاعه (حسين الجسمي) .. زي ما انت كده كل شوية الاغنية بتنطلك في كل حتة فبرده اي قعدة بيتفتح فيها سيرة سعر لتر البنزين في مصر بقي كام بيتقال فيها يا سلام لو كنا بلد بتهتم بالعربيات اللي بالكهرباء بدل ما احنا ماسكنا شوية كواحيل متخيلين ان ازمة الطاقة في مصر حلها ان العربيات الملاكي تمشي بالغاز الطبيعي .. شركات البترول سواء ارامكوا او شيل او موبيل بقوا عارفين ان سبوبة بيع البترول الخام مبقتش تتجيب فلوس زي مان .. طب والحل؟ .. يلا نبيع بلاستيك.
الخازوق اللي شركات البترول دي حتلبسه هو ان لو كلام الناس بتوع مؤسسة الابحاث كاربون تراكر Carbon Tracker طلع صح .. الناس دي طلعت تقرير قال ان فعلا الطلب علي البلاستيك الخام حيوصل لاعلي مستوياته علي سنه 2027 .. لسه الناس بتوع البترول حيقولوا هييييييه لقوا ان التقرير بيقول ان بعد سنه 2027 الطلب علي البلاستيك بدل ما كان بيزيد بمعدل 4% كل سنة فهو حيرجع يقل ل1% بس .. ده معناه ان فعليا بيزنس البترول احلي ايامه خلصت خلاص .. شهر العسل كان اخره سنه 2019 .. دلوقتي احنا في مرحله النفقة .. لان حتي الطلب علي البلاستيك مبقاش زي الاول.
الاتحاد الاوروبي السنه دي اقترح ان تتعمل ضريبه 800 يورو علي كل طن بلاستيك يترمي في الزبالهة.. السنة دي برده الصين طلعت قرار ان في كل المدن الكبيره حيتم منع تصنيع اي حاجه مصنوعه من البلاستيك اللي بتستخدم مرة واحدة زي مثلا انك تروح ستارباكس تلاقي ان المعلقة اللي بتاكل بيها التشيز كيك من البلاستيك و بتترمي في الزبالة بعد ما تخلص اكل .. وعلي فكرة .. قرار الصين ده حيتطبق علي البلد كلها بدايه من سنه 2022 .. فيه شركات بترول شافت الخازوق اللي جاي زي بريتيش بيتروليوم BP اللي باعت اداره البتروكيماويات بتاعتها لشيكه انيوس Ineos الانجليزية برده المملوكة لرجل الاعمال السير (جيم راتكليف Jim Ratcliff) بخمسة مليار دولار.
المصدر:
مقاله بعنوان ‘War on plastic’ could strand oil industry’s $300bn investment نشرت في جريده The Guardian وده لينك المقاله الاصليه:
https://www.theguardian.com/environment/2020/sep/04/war-on-plastic-could-strand-oil-industrys-300bn-investment#:~:text=The%20war%20on%20plastic%20waste,according%20to%20a%20new%20report.
