سوري في الكلمة إحنا لا نستحق إن يتقال علينا فلاحين .. لو عايز تشوف مين هم الفلاحين اللي بحق وحقيقي روح إتفرج علي الهولنديين .. هولندا بلد معندهاش نيل .. هولندا بلد معندهاش حضارة عاشت الاف السنين كان أساسها هو الزراعة .. تاريخياً علاقة هولندا بالزراعة زي علاقة مصر بالكريكيت كده اللي هو إحنا أساساً منعرفش إيه هي الكريكيت دي؟ .. رغم كل ده إلا إن هولندا حالياً هي ثاني أكبر مُصدر للمنتجات الزراعية في العالم بعد أميركا ودي في حد ذاتها حاجة غريبة لإن دايماً بيتقال إن الزراعة إرتبطت بإن يبقي فيه عندك مساحة فاضية تزرع فيها .. أميركا مساحتها 237 ضعف مساحة هولندا ورغم كده سنة 2017 هولندا صدرت منتجات زراعية بحوالي 110 مليار دولار .. عملوها إزاي الناس اللي كل معلوماتنا عنهم إنهم دايماً محششين ولما تمشي في شوارع أمستردام حتلاقي بنات الليل معروضين في فاترينات زي الفساتين؟ .. بإنهم شغلوا مخهم شوية .. الصور اللي عندك دي كلها هي الإجابة .. دي حضرتك ألبوم صور إسمه سلسلة الصوبات الزراعية Greenhouse Series صورها واحد إسمه (توم هيجين Tom Hegen) وده السر اللي هولندا بنت عليه ثروتها الزراعية وهو صوبات زراعية مفروشة علي مساحة إجمالية 94 كيلومتر مربع .. عشان أحطك في الصورة دي مساحة حوالي 35 ضعف مساحة جزيرة الزمالك اللي في النيل .. إنت ممكن تلاقي في هولندا صوبة زراعية واحدة معمولة علي مساحة 175 فدان.
زي ما إنت شايف فمفيش مانع نركب شوية كهارب ولمبات LED عشان الShow يكمل يعني بس تحت ده فيه شوية إبداع في الهندسة الزراعية .. هو مش إبداع قد ما هو زي ما قلتلك في الأول شوية تفتيح مخ .. الري كله بالتنقيط أو Hydroponic Systems .. عشان هولندا جوها مش زي عندنا ساقع مش دافي فهم بيوفروا الحرارة اللازمة للمحاصيل الزراعية بحاجة إسمها Geothermal Energy ودي إنك تستخدم حرارة الأرض في إنك تسخن مياه عشان تدفي بيها جو الصوبات الزراعية .. الصوبات الزراعية الهولندية بتحقق نسب إنتاج محاصيل مبتحصلش في دول عندها أراضي خصبة .. يعني مثلاً .. كل كيلو ونص طماطم الصوبات الزراعية دي بتنتجه بيستخدم حوالي 4 لتر مياه قصاد إن في المتوسط يعني كيلو ونص الطماطم بيحتاج حوالي 97 لتر مياه .. الفلاحين الهولنديين وصلوا لمرحلة من الجمدان انهم بينتجوا 100 مليون طماطماية في السنة من مساحة أرض زراعية متجيش 116 فدان وفوق ده كله من غير ما يستخدموا أي مبيدات حشرية .. زي ما قلتلك شوية تفتيح مخ.
الصوبات الزراعية نفسها متصممة صح أوي .. عشان زي ما قلتلك هولندا جوها مش دافي زي عندنا فالحرارة عندهم مهمة وعشان كده الصوبات الزراعية بتاعتهم بتتصنع من طبقتين زجاج .. الSteel Frame اللي بتتصنع منه الصوبات الزجاجية بيكون خفيف ومش واخد مساحة كبيرة عشان أولاً يبقي سهل عليك إنك تزود Extension يعني صوبة زراعية بتزرع فيها محصول معين حبيت تزوده فبيكون سهل عليك ده وكمان عشان الصلب الكتير ميعملش أي إعاقة لإضاءة الشمس إنها تخش للصوبات.
فيه شركات زراعية زي Duijvestijn Tomatoes وصلت لمرحلة التنين بإنهم إتفقوا مثلاً مع محطة تكرير بترول جنب المزرعة بتاعتهم عشان ياخدوا منها خط أنابيب ثاني أكسيد كربون يضخوه جوه الصوبات الزراعية عشان المحصول ينمو أسرع .. بلاش دي .. فاكر لمض LED اللي قلتلك إن واحد من أسباب إستخدامها هو Show؟ الحقيقة إن فيه سبب ثاني إن الإضاءة بتاعة اللمض دي بتساعد المحصول إنه ينمو أسرع خلال ساعات الليل .. علي فكرة .. القانون الهولندي بيقول إن 98% من الإضاءه LED اللي بتستخدم جوه الصوبات الزراعية لازم قبل ما تشغلها تفرش ستاير أو شاشات سودا عشان التلوث البصري إن وإنت بتتفرج من الجو مثلاً متلاقيش فرح العمدة .. علي فكرة برده الهولنديين مش بقالهم سنين بيعملوا الحكاية دي .. الموضوع بدأ في الألفينات يعني مش من بعيد .. سنة 2009 البرلمان الهولندي أقر خطة إعادة هيكلة القطاع الزراعي كله بحيث الفلاحين حيبطلوا بشكل نهائي يستخدموا مبيدات حشرية وحيبدأوا يقللوا اعتمادهم علي المضادات الحيوية بنسبة 60% .. تجربة تستحق إننا نبصلها .. لو إنت مهندس زراعي بتفكر تعمل ماجستير أو تكتب ريبورت في الكلية فده موضوع حلو جداً إنك تدور فيه بشكل أعمق.
المصدر:
- مقالة بعنوان How the Dutch use architecture to feed the world نشرت علي موقع Arch Daily وده لينك المقالة الأصلية:
https://www.archdaily.com/932301/how-the-dutch-use-architecture-to-feed-the-world
