في الوقت اللي العالم كله بيتعلق في قشاية حظر التجول و الحجر الصحي عشان دول العالم تقلل علي قد ما تقدر من معدلات الإصابة بفيروس كورونا فتلاقي الهولنديين رايحين في سكة تانية خالص .. لك أن تتخيل إن لحد دلوقتي رئيس الوزراء الهولندي (مارك روتي Mark Rutte) رافض نهائي فكرة الحجر الصحي .. مفيش حاجة اسمها Social Distancing بالشكل اللي العالم بيطبقه .. هولندا صحيح وقفت الدراسة في المدارس و قالت للمطاعم تشتغل ديليفيري بس لكن لسه الحياة ماشية بشكل طبيعي هناك .. الناس بتروح شغلها .. الحدايق و المولات مفتوحة .. تاني .. الدنيا عندهم مش سداح مداح .. المطاعم مجبرة تمشي علي نظام صارم جداً إن مينفعش أكتر من أربع بني أدمين يبقوا واقفين في Waiting Area أو منطقة الإنتظار لحد ما ياخدوا الأوردرات بتاعتهم .. المسافة بين الناس اللي مستنيه تدفع علي الكاشير في المحل مينفعش تقل عن متر و نص .. لكن الدنيا مش حتقف و الحيةه حتكمل عادي .. بمنتهي البساطة الهولنديين قالوا للناس إعدوا بعض .. هنا انت قبل ما تشتمهم أو تقول عليهم إيه التخلف ده انت لازم تفهم هي الناس دي بتفكر إزاي؟
كنت قلت قبل كده إن عشان أزمة الفيروس دي تعدي علي خير حيحصل حاجة من 3 حاجات .. الحاجة الأولانية إن يتعمل مصل للفيروس بحيث لو كل دولة حقنت به 60% من تعداد سكانها فكده حيحصل حاجة اسمها Hard Immunity وده يعتبر الحل السهل ومشكلته إنه عشان يحصل انت قدام فترة ما بين 12-18 شهر .. الحاجة الثانية إن الناس تعدي بعض و نبدأ نكون مناعة طبيعية ضد الفيروس وده بيسموه Herd Immunity وده يعتبر حل الي حد ما سهل بس مشكلته إن عشان الدولة تطبقه لازم يبقي عندها قطاع طبي جامد زحليقة إنه يقدر يستوعب أعداد المصابين اللي مناعتهم مش قوية و اللي معرضين إن حالتهم تتطور للإلتهاب الرئوي .. الحاجة الثالثة ودي حتحصل بعد الحاجة الأولي أو الثانية وهي إن مع الوقت الفيروس ده حنبدأ نتعامل معاه علي إنه مرض مزمن زي الضغط و السكر اللي هو المصل بتاعه متاح لأي حد يجيله ولو مفيش مصل فالمستشفيات بقت خلاص عندها الخبرة و الكفاءة إنها تستقبلك لحد ما تخف و تخرج.
هولندا قررت تمشي في سكة Herd Immunity وده سببه إن القطاع الطبي الهولندي قوي جداً زيها زي إنجلترا علي فكرة .. إنجلترا هي كمان كانت ماشية في نفس السكة .. رئيس الوزراء (بوريس جونسون Boris Johnson) طلع قال إنه لازم 60% من إجمالي تعداد سكان بريطانيا يتعدي بالفيروس عشان الناس تكون مناعة طبيعية ضده وهو نفسه قال إنه مستعد يقبل بإنه يضحي بنسبة 0.5-1% من إجمالي حالات الإصابات بالفيروس اللي حتموت بس يمكن عشان (بوريس جونسون) بني أدم جلف لسانه بيحدف طوب فالناس مفهمتش فكرته فالسياسة دي سببت حاةه غضب أجبرته إنه يغير رأيه .. حكومة هولندا من اليوم الأول وهي شارحه للناس هي حتعمل إيه و الناس متعاونة جداً .. السؤال دلوقتي هل التجربة الهولندية دي حتنجح؟ .. قادينا قاعدين و حنشوف.
المصدر:
مقالة بعنوان The Netherlands is letting a lot of people get sick to try to beat Coronavirus نشرت في موقع Vice وده لينك المقالة الأصلية:
https://www.vice.com/en_us/article/939mez/the-netherlands-is-letting-a-lot-of-people-get-sick-to-try-to-beat-coronavirus
