لو إنت شغال في شركة كبيرة فإنت غالباً شغلك عبارة عن إنك تقعد في مكتب قدام شاشة كومبيوتر في صالة كبيرة أوي .. غالباً بتبقي قاعد قدام طرابيزة طويلة يمينك و شمالك زمايلك كل واحد قدام شاشة الكومبيوتر بتاعته برده في وشك علي طول فيه نفس الصف اللي إنت شغال فيه .. ده في عُرف الهندسة المعمارية بيتسمي Open Office Space أو مكتب شغل مفتوح .. مش معني إن الطريقة دي في الديكور بتاع الشركات موجودة في كل حتة في العالم دلوقتي إن ده معناه إنها فكرة جديدة .. لا خالص .. الفكرة دي حطها لأول مرة مهندس معماري أمريكاني أي مهندس معماري عارفه كويس و درس تصميماته إسمه (فرانك لويد رايت Frank Lloyd Wright) .. الرجل ده كانت وجهة نظره إن لازم مكان الشغل ميبقاش فيه خيار و فاقوس .. هو كان شايف إن في مكان الشغل عشان الموظفين يحسوا إنهم كلهم زي بعض وإن كلهم ولاد الشركة فلازم ميبقاش فيه حيطان بتفصل بينهم سواء الحيطان دي معمولة من الأسمنت أو حيطان من العادات و التقاليد المجتمعية.
لأكتر من 80 سنة ومدرسة (فرانك لويد رايت) في التصميم المعماري لOpen Office Space هي المنهج اللي كل المهندسين المعماريين ماشيين عليه .. في رأيهم إن دي طريقة تصميم بتخلي الموظفين يتواصلوا مع بعض أحسن وأسهل .. سنة 2008 كانت السنة اللي بدأ المهندسين المعماريين يتحولوا لمنايفة مع كامل إحترامي لأهل المنوفية .. بداية من السنة دي و اللي حصلت فيها الأزمة المالية العالمية فالفكر بتاع تصميم Open Office Space بدأ يبعد واحدة واحدة عن المباديء اللي حطها (فرانك لويد رايت) و يروح لمباديء من نوعية شوف أرخص حاجة وإعملها يا باشمهندس.
فعلياً لو (فرانك لويد رايت) رجع عاش تاني وشاف بعنيه المسخ اللي اسمه Open Office Space اللي بيتطبق دلوقتي كان تف في وش أي مهندس معماري من بتوع اليومين دول .. الرجل كان باني فكرته علي إن يبقي فيه مسافات بين كل مكتب والثاني .. صحيح المكاتب كلها مرصوصة في صالة كبيرة بس أهم حاجة إن ضوء ربنا الطبيعي يخش يغطي الصالة كلها .. دلوقتي المهندسين المعماريين بقي كل همهم إنهم يحشروا المكاتب جنب بعض زي السردين .. صحيح هي مش غلطة المهندس المعماري قد ما هي غلطة العميل Client بس اللي مهم المهندس المعماري يفهمه للكلاينت هي إن اللي حضرتك بتطلبه ده مش بس عيب وحرام إنما حيجي عليك بخسارة علي المدي الطويل ودي نقطة محتاجة تتشرح كويس أوي.
سنة 2018 إتنشرت رسالة علمية في مجلة Royal Society (حتلاقوا لينكها في المصادر) قالت إن التصميمات المعمارية الحديثة لOpen Office Space اللي بقت معتمدة زي ما قلت علي فكرة كربسلي يا ابني المكاتب جنب بعض عشان نشغل أكبر عدد من الموظفين في مكان صغير في الأخر بتؤدي إلي إن قابلية الموظفين إنهم يتواصلوا مع بعض بتقل بنسبة 70% .. فكر فيها كده .. إنت بقيت مهندس ميكانيكا مثلاً قاعد بتشتغل علي مشروع بيجيلك تعديلة من المهندس المعماري فبدل ما حضرتك تاخد بعضك و تروحله لحد مكتبه تتكلم معاه بقي يتقالك إرزعه ميل و حطني في CC .. شوية بشوية وبقي الهدف اللي (فرانك لويد رايت) كان عايز يحققه إن الموظفين يتعاملوا مع بعض كبني أدمين إترمي في الزبالة قصاد إعتماد رهيب و مبالغ فيه و غلط علي فكرة الإيميلات .. ده في الأخر بيؤدي إلي إن الشغل بيطلع غلط و الشركة بتخسر فلوس .. حضرت وفرت فلوس في الأول ككلاينت بس لبست في الأخر .. ليه؟ .. عشان فكرة هذا ما وجدنا عليه أباؤنا و أجدادنا .. كل ده كوم و اللي جاي كوم تاني.
المشكلة إن المسمي بتاع Open Office Space مش ماشي ولا بيعبر إطلاقاً عن الواقع خصوصاً بعد ما جائحة فيروس كورونا شالت ما خلت .. عشان تفهم أنا قصدي إيه بص علي الرسم الهندسي للمكتب اللي عندك تحت ده .. ده Plan أو مسقط رأسي لمكتب شغل في شركة مكتب استعلامات Call Center في العاصمة الكورية الجنوبية سيول .. ده Open Office Space زي كتير من اللي موجودين عندنا في مصر .. الكراسي المتلونة بالأحمر دي هي كراسي الموظفين اللي إتصابوا بفيروس Covid-19 و اللي بحسبة بسيطة بيشكلوا 43.5% من إجمالي الموظفين اللي في الدور كله .. الدور ده شغال فيه 216 موظف إتصاب منهم 94 بفيروس كورونا والناس دي كلها إتعدت خلال فترة 16 يوم بس بدأت من 21 فبراير 2020 .. سنة 2018 إتنشرت رسال علمية قالت إن وزي ما يكون اللي كتب الرسالة دي كان معاه بلورة سحرية و شايف المستقبل إن في حالة الأوبئة فلما مكان الشغل يبقي متروس بني أدمين فمكان الشغل نفسه بيبقي مٌجهد نفسياً للي بيشتغلوا فيه .. و معني إنك مُجهد نفسياً فده بيكون نتيجة مباشرة ليه إن جهازك المناعي مش بيكون شغال بنسبه 100%.
دلوقتي الفكر إن يا إما نبعد الناس عن بعضها في أماكن الشغل و نرجع تاني للفكر الأصلي بتاع (فرانك لويد رايت) .. أو إننا نرجع تاني لمرحلة ما قبل (فرانك لويد رايت) إن كل موظف قاعد يا في مكتبه بين 4 حيطان يا إما جوه المكعب Cubical بتاعه .. ليه؟ .. أصل لو واحد فيهم عطس كلنا حنروح في ستين داهية .. رذاذ العطسة ممكن يطير مسافة 9 متر .. تيجي تسأل طب و مقابض الأبواب؟ .. طب الطرابزين بتاع السلالم؟ .. أصل فيروس Covid-19 بيقدر يعيش علي اسطح المعدن لحد فترة 3 أيام .. حل المشكلة دي زي ما قلت إننا نرجع تاني نستخدم النحاس عشان النحاس قاتل طبيعي للفيروسات و الجراثيم بس وسط جو المنايفة اللي إحنا عايشين فيه مفيش كلاينت ولا مقاول حيكلف نفسه ويغير مقابض الأبواب في شركة بدل ما هي ألمونيوم أو ستانليس ستيل يخليها نحاس .. عشان كده إنت حتشوف بعنيك في شغلك دلوقتي خصوصاً لو إنت شغال فيما يسمي Open Office Space إجراءات غريبة جداً .. حتلاقي الشركة جايبه كشاف درجة حرارة عشان تكشف علي حرارة الموظفين وهم داخلين يبصموا الصبح وعشان متتأخرش علي البصمة بدل ما كنت بتروح شغلك الساعة 8 الصبح حتضطر تقف في الطابور من 7:30 .. حيتقالك مينفعش التجمعات .. حيتقالك دخول الحمام بقي بمواعيد عشان عدد الموظفين جوه الحمام ميعديش رقم معين .. كل دي إجراءات صاحب الشغل بيتخيل إنه بيعملها عشان يحمي موظفينه مع إن فيه حلول تانية أغلي شوية ومش حتسبب الصداع ده كله بس تقول لمين .. أي كلاينت دلوقتي بقي منوفي يمكن أكتر من المنايفة نفسهم.
زي ما أنا متوقع فيه شركات كتير في العالم وخصوصا في مصر معهاش فلوس ومش في دماغها إنها تعمل الديكور بتاعها من أول وجديد بحيث يقدر يحمي موظفينها من خطر الإصابة بCovid-19 .. بناء علي دراسة عملتها جامعة شيكاغو في أميركا ف37% من الموظفين الأمريكان خلال الشهور الجاية حيبقوا مضطرين إنهم يكملوا شغلهم من البيت .. اللي حيحصل إن الشركات بعد ما كانت مكربسة موظفينها في أماكن شغل وعشان تحقق التباعد الإجتماعي فحتختار شوية موظفين إنهم يكملوا شغل من البيت.
المصادر:
- مقالة بعنوان Goodbye to open office spaces? How experts are rethinking the workplace? نشرت في مجلة National Geographic وده لينك المقالة الأصلية:
https://www.nationalgeographic.com/science/2020/04/will-coronavirus-end-the-open-office-floor-plan/ - دراسة بعنوان The impact of the ‘open’ workspace on human collaboration نشرت في مجلة The Royal Society وده لينك المقالة الأصلية:
https://royalsocietypublishing.org/doi/10.1098/rstb.2017.0239 - دراسة بعنوان The infectiousness of crowds: Crowing experiences are amplified by pathogen threats نشرت في مجلة Sage Journals وده لينك المقالة الأصلية:
https://journals.sagepub.com/doi/10.1177/0146167218780735 - مقالة بعنوان Designed to inspire: SC Johnson’s Frank Lloyd Wright-designed Administration Building نشرت في موقع شركة SC Johnson وده لينك المقالة الأصلية:
https://www.scjohnson.com/en/a-family-company/architecture-and-tours/frank-lloyd-wright/designed-to-inspire-sc-johnsons-frank-lloyd-wright-designed-administration-building
