فيه شخصيات ربنا خلقها عشان الناس تتخانق بينها وبين بعضها علي رأيهم فيها .. حد زي (طارق حامد) مثلاً اللي الزملكاوية شايفينه (روي كيين Roy Keane) الكرة المصرية والأهلاوية شايفين إنه ميفرقش حاجة عن (إبراهيم الأبيض) .. حد زي (محمد رمضان) اللي هو لوحده بس شايف إنه (إيمينيم Eminem) العرب وأمة سيدنا محمد (عليه الصلاة والسلام) كلها شايفه إنه مُهزق .. من ضمن الشخصيات دي برده هو (الدلاي لاما Dalai Lama) .. الرجل ده لما تشوف صورته حتلاقي نفسك بتقول أنا بشوف بوستات علي الفيسبوك عليها حكم حلوة أوي وبيكونوا حاطين عليها وشه .. وفيه ناس تانية متعرفش هو مين ده أصلاً .. في الحالتين صدقني لو قلتلك إن حياة وقصة (دلاي لاما) من أكتر القصص اللي حتخليك تضرب كف علي كف وإنت بتقول لنفسك بصوت الفنانة (شويكار) الله يرحمها شيء لا يصدقه عقل .. مبدأياً (دلاي لاما) ده مش اسمه أصلاً .. ده لقبه الديني زي ما كده الإمام (أحمد الطيب) لقبه الديني هو شيخ الأزهر .. عشان أقربلك الأمور تعالي نتخيل إن (دلاي لاما) هو (طارق حامد) ونحاول نشرحلك هو مين الرجل ده بإننا نوريك الزملكاوية والأهلاوية شايفينه إزاي؟ .. بمعني أخر نشوف أنصاره والناس اللي مش طايقينه رأيهم فيه إيه ومن هنا حتفهم ليه قلتلك إن قصة الرجل ده غريبة فشخ.
خلينا نبدأ برأي الناس اللي مش طايقه سيرته .. الأهلاوية في حياة (دلاي لاما) هم الصينيين .. الصينيين بسم الله الرحمن الرحيم كده شايفينه ذئب بشري بيتنكر في لبس رجال الدين .. مانعين صورته إنها تتعلق في أي حتة .. مش بس كده .. بسبب الرجل ده فيلم A Star is Born اللي خلي كل ستات مصر تعيط وهم بيتفرجوا عليه إتمنع من العرض في الصين .. تدري ليش؟ .. عشان سنة 2017 بطلة الفيلم (ليدي جاجا Lady Gaga) قابلت (دلاي لاما) وقعدت معاه يتكلموا عن اليوجا وعشان كده الحكومة الصينية قررت منع اسم (ليدي جاجا) إنه يتعرض في الصين .. لا أغانيها تتذاع .. ولا حتي أفلامها تتعرض .. إتخضيت صح .. المشكلة حضرتك إن اسم (دلاي لاما) مرتبط بحاجة إسمها التيبيت Tibet ونصيحة لوجه الله إفتح موقع EgyBest إتفرج علي فيلم قديم شوية اسمه Seven Years in Tibet .. هنا حيجي دور الزملكاوية في حياة (دلاي لاما) اللي هم أهل التيبيت.
التيبيت مش حتة صغيرة .. التيبيت فعلياً تمثل تلت مساحة الصين .. التيبيت عايش فيها ناس أغلبيتهم بيعتنقوا البوذية .. التيبيت ربنا رزقها بموارد طبيعية كتير زي الدهب والليثيوم .. التيبيت عشان مرتفعة عن سطح الأرض وفيها أنهار فلو إتعمل فيها كام سد زي السد العالي كده فهي ممكن تولد كهرباء تكفي إحتياجات الصين كلها .. عشان كده سنة 1950 القوات الصينية غزت التيبيت وإرتكبت فيها مذابح إنت لا تتخيلها .. الوضع وصل لمرحلة صعبة لدرجة إن سنة 2016 منظمة Freedom House اللي شغالة في مجال حقوق الإنسان صنفت التيبيت علي إنها تاني أسوأ مكان علي وجه الأرض من حيث حقوق الإنسان .. في حالة إنك بتسأل مين كان الأسوأ فالإجابة كانت للأسف سوريا .. حاول بس للحظة إنك تستوعب إن منظمة Freedom House شايفه إن مستوي حقوق الإنسان في التيبيت أسوأ من كوريا الشمالية .. تخيلت؟ .. الوضع زي الزفت لدرجة إن من 2009 لحد دلوقتي فيه أكتر من 146 مواطن من التيبيت إختاروا إنهم يقفوا في الشارع ويولعوا في نفسهم إحتجاجاً علي اللي بيحصل فيهم .. تفتكر الحكومة الصينية تتهز ولا تتحرك؟ .. سنة 2012 فيه مواطن من التيبيت إسمه (لوبسانج Lobsang) ولع في نفسه في الشارع والبوليس الصيني إتلم عليه عشان يحاولوا يطفوه .. بعدها إتقبض عليه وإتحكم علي عيلته إنها تدفع تعويض لضباط البوليس الصينيين .. تدري ليش؟ .. قال إيه عشان اليونيفورم بتاعهم إتحرق وهم بيحاولوا يطفوه .. السؤال دلوقتي .. عمرك شفت وساخة أكتر من كده؟
بالنسبة لأهل التيبيت ف(دلاي لاما) ده عامل زي إنك تجيب (البابا تواضروس) بتاع الأقباط وتضربه في الخلاط مع الرئيس (عبدالفتاح السيسي) .. بمعني أخر .. هو أعلي سلطة دينية للبوذيين بتوع التيبيت وفي نفس الوقت هو ممثل حكومتهم .. سنة 1959 الرجل ده إضطر إنه يهرب بره التيبيت عشان اللي حوليه كانوا خايفين الصينيين يعتقلوه ودلوقتي هو عايش في الهند .. فعلياً الرجل ده هو النسخة التيبيتية من الملكة (إليزابيث) بتاعة إنجلترا .. مفيش رئيس أمريكاني إلا وقابله وفيه منهم عطوله هدايا زي مثلاً الرئيس السابق (فرانكلين روزفيلت Franklin Roosevelt) اللي عطاله ساعة أثرية هدية والرئيس السابق برده (جورج بوش الإبن) اللي رسمله بورتريه بنفسه وعطاهوله زي أي شاب بيكراش علي زميلته في الجامعة .. لحد دلوقتي حياة الرجل ده زي ما إنت شايف فيها تفاصيل وحكايات كتير بس صدقني لو قلتلك إن لسه الإندهاش مجاش .. الحكاية حتحلوا فعلاً لما ندوس شوية في أكتر حتة الناس بتتخانق عليها بعد الكورة والسياسة .. الدين.
بالنسبة للبوذيين بتوع التيبيت ف(دلاي لاما) هو تجسيد لروح (بوذا) .. حلو .. المفروض إن (دلاي لاما) عنده 84 سنة يعني الرجل ده الأيام اللي فاضلاله في الدنيا أكيد أقل من اللي عاشها .. عشان كده السؤال دلوقتي لما الرجل ده يموت إيه اللي حيحصل؟ .. لما (دلاي لاما) بيموت وفق الديانة البوذية بتاعة أهل التيبيت فروح (بوذا) بتتجسد في طفل ما عايش في حتة ما والمفروض عشان البوذيين يلاقوا الطفل ده فيبقي فيه حد بيدور عليه .. الحد ده إسمه (بانشين لاما Panchen Lama) .. تاني ده مش اسمه ده لقبه الديني .. يعني المفروض إن دايماً يبقي فيه إتنين عايشين مع بعض .. (الدلاي لاما) و(بانشين لاما) .. لو (دلاي لاما) مات فدور (بانشين لاما) إنه يلاقي الطفل اللي روح (بوذا) تجسدت فيه عشان يبقي هو (دلاي لاما) الجديد .. والعكس صحيح .. لو (بانشين لاما) مات فدور (دلاي لاما) إنه يدور علي الطفل اللي حيكون هو (بانشين لاما) الجديد .. بإختصار شديد الديانة البوذية بتاعة أهل التيبيت قائمة علي إتنين بيعلبوا استغماية مع بعض … (دلاي لاما) اللي إحنا عمالين نتكلم عنه طول المقالة دي اللي قال إن هو ده تجسيد (بوذا) كان (بانشين لاما) رقم 9 في تاريخ البوذية .. لما (بانشين لاما) ده مات ف(دلاي لاما) بتاع دلوقتي طلع قال إن يا جدعان فيه طفل عنده 6 سنين اسمه (جيدين تشوكي نيما Gedhun Choekyi Nyima) هو ده (بانشين لاما) الجديد اللي لما أنا أموت هو اللي حيبقي دوره إنه يلاقي (دلاي لاما) الجديد .. لحد كده أتمني إن الأحداث تبقي مفهومة بالنسبة ليك.
سنة 1995 الصينيين خطفوا الطفل (جيدين) اللي كان وقتها عنده 6 سنين هو وأهله .. مش بس كده .. في نفس السنة الحكومة الصينية طلعت قالت إن أساساً (جيدين) مش هو (بانشين لاما) وجم في معبد بوذي عملوا مراسم شبه اللي البوذيين بتوع التيبيت بيعملوها عشان يقولوا إن فيه (بانشين لاما) تاني هو اللي بحق وحقيقي .. ليه هم بيعملوا كده؟ .. عشان لما (دلاي لاما) يموت يقوم (بانشين لاما) التقليد بتاعهم يطلع يقول إن (دلاي لاما) الجديد هو الشخص الفلاني واللي لأجل الصدف يعني يطلع رجل شايف إن لازم التيبيت تترمي في حضن الصين .. ويا ضحك ملكش علينا جمايل .. فضلنا من 1995 لحد من كام يوم وإحنا مش عارفين (جيدين) ده فين لحد ما الحكومة الصينية طلعت بيان قالت فيه إن (جيدين) دلوقتي بقي عنده 31 سنة وإتخرج من الجامعة وعايش حياة هادية ومش عايز حد يزعجه .. دلوقتي الكل مستني لما (دلاي لاما) يموت .. (البانشين لاما) اللي بحق وحقيقي مش عارفين هو فين وبالتالي إحتمال كبير يبقي ده أخر (دلاي لاما) للبوذيين بتوع التيبيت قصاد إن الصين بمجرد ما (دلاي لاما) يموت حيقولوا بااااااس (بانشين لاما) التقليد بتاعنا قال إن فيه (دلاي لاما) جديد وغالباً حيكون تبعهم ويرمي التيبيت في حضن الصين.
المصادر:
- مقالة بعنوان A boy chosen as the Panchen Lama disappeared in 1995. China says he’s now a college grad with a job نشرت في موقع وكالة أنباء CNN وده لينك المقالة الأصلية:
https://edition.cnn.com/2020/05/20/asia/china-tibet-panchen-lama-dalai-lama-intl-hnk/index.html - حلقة من برنامج Last Week Tonight with John Oliver بتتذاع قناة HBO وده لينك الحلقة علي YouTube:
https://www.youtube.com/watch?v=bLY45o6rHm0
