الدبابة اللي قدامك في الصورة دي اسمها M1A2C Abrams و لو إنت فاكر نفسك جامد فشخ في التسليح فأحب أقولك إني غٌلب حماري إني أبص علي الدبابات من جيل Abrams ده كله و بعيني كده أميز مين فيهم تبقي M1A1 و مين فيهم M1A2 لا و دلوقتي بقي فيه M1A2C كمان .. دي مش زي KIA Cerato اللي هي تميز موديل السنة بشكل الكشافات .. بص مفيش فرق بين M1A2C و النسخة اللي قبلها علي طول غير حاجتين: أول حاجة إنهم زودوا طبقة دروع إضافية في واجهة برج الدبابة .. تاني حاجة و ده الأهم إنهم ركبوا عليها حاجة اسمها TROPHY Active Protection System و دي إفتكاسة إخترعها الإسرائيليين و ركبوها علي دبابات الميركافا بتاعتهم و أنا إتكلمت عنها قبل كده في مقالة قديمة .. الفكرة بمنتهي البساطة إن بيتركب رادار علي الدبابة عشان يشوف هل فيه صاروخ إتضرب عليها ولا لا .. لو فعلاً لقط إن فيه صاروخ إتضرب علي الدبابة فهو بيحدد مساره إيه و بيبدأ يرمي علي الصاروخ و هو جاي كتل معدنية عشان تخبط في الصاروخ تفجره في الجو قبل ما يوصل للدبابة.
الحقيقة إن دبابات Abrams مرت بمراحل تطور كتير للحاجة الساقعة .. أول نسخة خالص من الدبابات دي كانت M-1 و دي دخلت الخدمة سنة 1980 و كانت وقتها المدفع الرئيسي بتاعها عيار 105 مليمتر بس و القوات البرية الأميريكية وقتها إشترت منها 3,300 دبابة .. علي فكرة انا حكيت القصة الفقر دي بتاعة تاريخ M1 Abrams قبل كده برده في مقالة قديمة بس مش مشكلة نراجع سوا.
سنة 1984 شركة جينيرال دياناميكس General Dynamics حبت تسترزق من علي قفا وزارة الدفاع و قالتلهم إنها عملت نسخة جديدة مفيهاش أي إضافة جديدة غير إن فيها طبقة دروع إضافية و صنعوا من النسخة الجديدة دي 900 دبابة سموها M1IP بس حالياً النسخ دي طلعت بره الخدمة و القوات المسلحة الأميريكية مش بتستخدمها .. سنة 1986 إتعمل أول Upgrade بحق ربنا للدبابة M-1 لما شالوا المدفع الرئيسي عيار 105 مليمتر و ركبوا بداله مدفع فشيخ عيار 120 مليمتر و سموا النسخة الجديدة M1A1 .. بداية من سنة 1986 لحد سنة 1992 و القوات البرية و قوات مشاة البحرية الأميريكية إشتروا منها 5,200 دبابة ده غير 3,000 دبابة تانية محطوطين في المخازن .. بعدها كل كام سنة ينزلك Upgrade تافه و يعدلوا في اسم الدبابة .. عندك مثلاً أحدث نسخة نزلت منها كان اسمها M-1A1SA و دي بس فيها محرك لسه طالع من المصنع و درع إضافي من اليورانيوم المستنفذ و شوية لعب في الكهرباء و الشاشات بتاعة الكومبيوترات .. شوية كهارب و شوية Features ملهاش لازمه ينزلوها السوق و إشتروا يا هبل يا اللي معاكوا فلوس و مش عارفين تودوها فين.
سنة 1992 إتعمل تاني Upgrade بحق ربنا للدبابة دي سموها M-1A2 .. الدبابة الجديدة حطولها دروع جديدة لانج .. فرشها من جوه إتغير خالص .. إتحطلها شبكة حساسات أو Sensors جديدة بحيث بقت تدي لقائد الدبابة و المدفعجي بتاعها القدرة إن كل واحد فيهم ينشن علي أهداف غير التاني .. القوات البرية الأميريكية إشترت منها 1,500 دبابة و بعد ما إشتروهم خدوا أغلب الدبابات دي عملولهم عمرة كاملة سموها System Enhancement Package Version 2 بحيث الدبابة M-1A2 بعد ما تطلع من العمرة دي حيبقي اسمها M-1A2SEPv2 .. العمرة دي ليها علاقة بالكهرباء بتاعة الدبابة مش الميكانيكا بتاعتها .. الكومبيوترات كلها إتغيرت .. إتركبلها مدفع رشاش بيشتغل بالريموت كونترول .. إتزولدلها شوية بطاريات بحيث الدبابة ممكن تشغل Sensors بتاعتها من غير ما الموتور يشتغل زي ما إنت كده تدور مفتاح الكونتاكت في عربيتك لفة واحدة عشان تشغل كهربتها من غير ما تدور الموتور.
الدبابة الجديدة اللي بتكلم عنها M-1A2C ما هي إلا دبابة M-1A2SEPv2 بس متركبها شوية Options إضافية اللي هي الدروع و نظام TROPHY Active Protection System .. بداية من أواخر 2017 لحد دلوقتي و قيادة القوات البرية الأميريكية استلمت عدد كافي من الدبابات دي من شركة General Dynamics اللي بتصنعها عشان يكون تحت إيدها لواء دبابات كامل من M1A2C .. لما أقولك لواء دبابات فده معناه إني بتكلم في حوالي 100 دبابة و حالياً القوات البرية الأميريكية تحت إيدها 58 لواء مقاتل من ضمنهم 16 لواء دبابات .. سنة 2019 الكونجرس الأميريكي وافق إنه يدي وزارة الدفاع 1.5 مليار دولار عشان تشتري 135 دبابة جديدة .. سنة 2020 حيشتروا 174 دبابة M1A2C بحيث إن واحدة واحدة كل الدبابات اللي بتخدم في القوات البرية الأميريكية حتبقي من النوع الجديد ده.
المصدر:
مقالة بعنوان Check them out: The U.S. Army’s upgraded M-1A2C Abrams are coming نشرت في مجلة The National Interest و ده لينك المقالة الأصلية:
https://nationalinterest.org/blog/buzz/check-them-out-us-armys-upgraded-m-1a2c-abrams-are-coming-97422
