الفنان (أحمد عدوية) ربنا يديله الصحة له أغنية حلوة أوي بيقول فيها جينا نمشي قالولنا نقعد .. جينا نقعد شدوا الكراسي .. الحكمة ورا الكلمتين دول إن أحياناً إنت كبني أدم و حتي كدول و أمم بنبقي عايزين نعمل حاجة صحة و نيتنا خير بس لحكمة إلهية بنلاقي الأبواب مقفلة في وشنا .. إنت ممكن تيأس و تقول ليه بس يا رب كده بس فيه ناس تانية بتقول لنفسها أكيد ربنا قفل الباب ده عشان فيه باب تاني أحسن مفتوح و مطلوب بس نتعب شوية لحد ما نلاقيه .. اللي أنا بحكيه ده تقريباً كلنا بنحسه كل يوم في حياتنا بس المعضلة دي عاشها كوكب اليابان الشقيق و حط البلد قدام سؤال معصلج لسنين فضلوا يحاولوا يلاقوا إجابة ليه .. نجيب كهرباء منين؟
طول عمر اليابان و هي بلد فقيرة من حيث الطاقة .. هي بلد عبارة عن شوية جزر عليها شوية جبال و ساحل ضيق و شكراً علي كده .. طب مناجم فحم يا رب .. مفيش .. طب حقول بترول .. لا برده .. ده السبب اللي لسنين و اليابان بتستورد طاقتها من بره و ده الحقيقة كان بيحطها أحياناً في مواقف ما يعلم بيها إلا ربنا زي اللي حصل مع الأمريكان اللي كانوا أكتر حد بيبيع بترول لليابان ولما العلاقة بينهم إتوترت اليابان ضربت الأسطول الأمريكاني في ميناء بيرل هاربور و عينك ما تشوف إلا النور بعد كده .. بعد الحرب العالمية الثانية اليابان بدأت مشروع ضخم عشان تعتمد بشكل كبير علي الطاقة النووية .. لسنين و الدنيا حلوة و الإقتصاد الياباني شغال زي الفل لحد ما جت سنة 2011 و ربنا إبتلي اليابان بزلزال فرقعلهم مفاعل فوكوشيما النووي و من ساعتها و اليابانيين قافلين مفاعلاتهم النووية .. بالنسبة لليابانيين الطاقة النووية عامل زي ما تبقي ولد من اكتوبر إرتبطت ببنت من التجمع و كانت علاقة توكسيك لدرجة إن لو القدر حط قدامك أي بنت تانية من التجمع بتاخد بعضك و تجري .. جت اليابان تحاول تمشي في سكة الطاقة المتجددة لقت زي ما قلتلك من شوية عشان هي مجموعة جزر عليها حبة جبال و شكراً علي كده فإنت لا عارف تعتمد علي طاقة الرياح ولا الطاقة الشمسية عشان مفيش عندك أرض مسطحة تبني عليها .. طب و الحل؟ .. حنفضل نحرق في بنزين كده كتير؟
الحل كان ربنا حاطه لليابانيين من زمان بس محدش خد باله منه .. لو بصيت علي خريطة اليابان حتلاقي علي يمينها فيه المحيط الهاديء أكبر المحيطات اللي ربنا خلقها علي الأرض و اللي بيفصل اليابان عن أميركا .. مد عينك شوية ناحية اليمين و حتلاقي حاجة اسمها North Pacific Gyre يعني دوامة شمال المحيط الهاديء .. الفكرة بمنتهي البساطة إن قدام ساحل اليابان بكام كيلومتر لو غطست شوية تحت المياه حتلاقي تيار المياه سريع أوي اليابانيين بيسموه كيروشيو Kuroshio .. حلو طب استفدنا ايه برده؟ .. فيه شركتين يابانيتين واحده اسمها إيشيكاواجيما-هاريما للصناعات التقيلة Ishikawajima-Harima Heavy Industries الناس كلها عارفاها باسم IHI Corporation و التانية اسمها نيدو NEDO و دي إختصار New Energy and Industrial Technology Development Organization بدأوا من سنة 2017 يشتغلوا علي مشروع إن ليه لا نحط تربينة في قاع البحر عشان لما تيار المياه السريع ده يعدي عليها تولد كهرباء؟
سنة 2018 الشركتين خلصوا التصميم و التصنيع بتاع النسخة الأولية أو Prototype للمشروع و سموه كايريو Kairyu و دي كلمة يابانية معناها التيار و لمده 4 سنين النسخة دي إتجربت في كذا منطقة علي طول ساحل اليابان لحد ما في فبراير 2022 الشركتين أعلنوا إن مرحلة الإختبارات خلصت و إن المشروع جاهز يشتغل .. التربينة عبارة عن 3 أسطوانات الواحدة فيهم طولها حوالي عشرين متر بحيث الأسطوانتين اليمين و الشمال متركب فيهم مروحة طول الواحدة 11 متر .. بمجرد ما التربينة تترمي في قاع المحيط فهي بتقدر تسوق نفسها لحد أكتر مكان مناسب عشان تيار المياه يبدأ يخلي المراوح تلف و التربينة تدور و تولد كهرباء .. أكيد السؤال اللي مخليك تهرش في شعرك دلوقتي هو معلش يعني البتاع ده بيولد كهرباء قد إيه؟ .. لو صدقت كلام شركة IHI Corporation فهو بيقدر يولد 205 ميجاوات و ده رقم محترم جداً بتقدر تاخده من أجدعها محطة إنتاج كهرباء شغاله بالفحم أو الغاز الطبيعي.
تبقي مشكلة الفكرة دي هي لما الجو يقلب .. أقصي سرعة للتيار بتاع المياه مش عند القاع خلي بالك هو بيكون قرب السطح بشوية .. في حالة North Pacific Gyre فتقدر تقول أحلي مكان هو علي عمق 50 متر من السطخ و ده نفس العمق اللي الأعاصير بتبدأ تتكون عنده و ده اللي خلي الشركتين IHI Corporation و NEDO يقضوا من عمرهم أربع سنين بيحاولوا يعالجوا المشكلة دي في تصميم Kairyu عشان يفضل ماسك نفسه .. لك أن تتخيل إن لو سرعة المياه كانت 2 متر في الثانية و دي تقريباً يعني نفس سرعة جريان المياه في المواسير بتاعة بيتكوا فالتربينة بتقدر تولد 100 كيلووات كهرباء .. عارف إن ده ولا حاجة قصاد إن مثلاً أي مزرعة رياح بتقدر تولد 3.6 ميجاوات كهرباء مستريح بس أرجع و أقولك زي ما (عدوية) قال .. جينا نقعد شدوا الكراسي .. اليابان متقدرش تعتمد علي طاقة الرياح و عشان كده لو كل مدينة ساحلية ركبت تربينتين زي Kairyu قصاد الساحل فالإتنين يقدروا يولدوا 2 ميجاوات .. لو الدنيا مشيت زي ما شركة IHI Corporation بتقول فطاقة تيار المياه لوحدها تقدر توفر ما بين 40-70% من إحتياجات اليابان كلها من الكهرباء.
المصادر:
- مقالة بعنوان Japan is Dropping a Gargantuan Turbine into the Ocean to Harness ‘Limitless’ Energy نشرت في موقع Science Alert و ده لينك المقالة الأصلية:
https://www.sciencealert.com/japan-s-dropping-a-kaiju-sized-turbine-into-the-ocean-to-fish-for-limitless-energy
