دايماً بيقولوا إن وإحنا صغيرين بنشجع الأبطال في الأفلام بس لما بنكبر شوية بنبدأ نتعاطف مع الأشرار .. إحنا كنا عارفين إن شخصية الجوكر اللي قدمها (يواكيم فينيكس Joachim Phoenix) في فيلم Joker قاتل وعمل حاجات كتير غلط بس إحنا تعاطفنا معاه .. برده ده حصل مع شخصية (ثانوس Thanos) في فيلم Avengers: Infinity War .. المنطق بتاع (ثانوس) كان مقبول جداً وسهل يتفهم .. عدد الناس كتر والموارد الطبيعية مش مكفية فلازم نص سكان العالم يموتوا عشان الباقي يعيش .. كلنا كنا بنتفرج علي الفيلم وبنهز راسنا .. أيوه إنت عندك حق يا عم (ثانوس) إحنا فعلاً كترنا .. لو حنتكلم بالأرقام فخلال القرن العشرين لوحده عدد سكان الأرض زاد من 1.6 مليار نسمة سنة 1900 بقينا 6 مليار نسمة سنة 2000 .. إنت متخيل إحنا زدنا إزاي في القرن ده؟ .. بس اللي تقريباً محدش شرحه لعمنا (ثانوس) إن الوضع دلوقتي إتغير .. إحنا داخلين علي أيام سودا.
في الأول محدش كان فاهم أوي المشكلة فين .. إحنا كنا شايفين ملامح مصيبة بس مش فاهمينها .. في اليابان لقوا إن الناس بقت بتشتري حفاضات اللي هي بامبرز يعني للعواجيز وكبار السن أكتر ما بيشتروها للأطفال .. الصين اللي طول عمرها ماشية بسياسة الطفل الواحد لقيناها مرة واحدة سمحت إن أي إتنين متجوزين يقدروا يخلفوا لحد 3 أطفال ولما إتسألت الحكومة الصينية ليه كفا الله الشر كان ردهم إتنيلوا هو أنتوا فاهمين حاجة إحنا عدد سكانا حيبدأ يقل بداية من 2030 .. في أميركا لقينا إن معدلات الخلفة والإنجاب هناك وصلت لأقل مستوياتها من الثلاثينيات ودي كانت فترة الكساد العظيم يعني قبل الحرب العالمية الثانية .. كل دي ملامح مشكلة بس محدش كان فاهمها أوي لحد ما جت دراسة علمية عملها ناس من جامعة طوكيو اليابانية ومن دلوقتي أهو بقولك حضر نفسك عشان حتاخد صدمة عمرك.
المشكلة بمنتهي البساطة في المعلومة الجاية دي .. سنة 2019 ولأول مرة في تاريخ البني أدمين من أول ما ربنا خلق سيدنا (أدم) عليه السلام عدد الناس اللي فوق 65 سنة بقي أكتر من عدد الأطفال تحت 5 سنين .. ده معناه إن عدد سكان الأرض اللي فوق 65 سنة بقوا 9% من إجمالي عدد السكان يعني بتتكلم عن 728 مليون بني أدم .. المشكلة إن صحيح نسبة 9% دي لسه صغيرة دلوقتي بس النسبة دي حتفضل تزيد .. سنة 2050 متوقع يبقوا 16% من إجمالي سكان الأرض يعني عددهم حيوصل 1.55 مليار نسمة .. المشكلة الأكبر إن الناس اللي فوق 65 سنة مش متوزعين بالتساوي علي الأرض لإن أغلبهم حيكون عايش في أسيا وأوروبا وأميركا الشمالية .. المتوقع إن لما تيجي 2050 قارة أفريقيا حتكون القارة الأقل في معدلات أعمار سكانها علي مستوي العالم.
بعد ما فهمت المشكلة فين تعالي نعرف سوا السبب ورا المشكلة .. فيه كلمة بتتقال كتير من الناس اللي بتتكلم في موضوع تحديد النسل والكلمة دي هي معدلات الإنجاب Fertility Rate .. دي مش كلمة وحشة خلي بالك .. الكلمة دي بتعبر عن متوسط عدد الأطفال اللي المفروض يعني أي ست متجوزة تخلفه عشان يفضل عدد سكان البني أدمين ثابت .. خلي بالك من جملة يفضل عدد البني أدمين ثابت دي .. في المتوسط أي ست متجوزة لازم تخلف 2.1 طفل .. إشمعني طفلين يعني؟ عشان الطفلين يحلوا محل الأب والأم لما يموتوا بعد عمر طويل إن شاء الله .. طب وليه 0.1 ده؟ عشان مش كل الأطفال ربنا بيكتبلها تعيش لحد ما تتجوز وتخلف فتقدر تقول إن 0.1 ده مجرد Factor of Safety .. فتاني .. عشان البشر يفضل عددهم ثابت لا بيزيد ولا بيقل لازم كل ست متجوزة تخلف 2.1 طفل .. حلو .. المشكلة إن في كتير من الدول حول العالم معدل الإنجاب بقي 1.5 خصوصاً في أوروبا وشرق أسيا .. يبقي السؤال دلوقتي هو إيه اللي حصل كفا الله الشر؟
لو إنت رجل أكاديمي متعلم فإنت حتقول السبب هو ما يسمي Rapid Urbanization أو الهجرة السريعة للمدن .. لو إنت من الناس اللي بتحب تسمع كلام الشيخ (عبدالله رشدي) كتير فإنت حتقول السبب هو عمل المرأة وإن الست نسيت إن دورها هو إنها تربي العيال وراحت تشتغل .. لو إنتي فيمينيست فحتقولي لا بقي أنتوا المسئولين عشان أنتوا كرجاله مش مكفيين إحتياجات البيت .. لو إنت بني أدم بتفهم فإنت حتقدر بسهولة تشوف المشكلة فين .. الفلوس.
سنة 1950 تلت سكان العالم تقريباً كانوا عايشين في مدن والباقي عايشين في الأرياف والمناطق النائية .. سنة 2050 متوقع إن تلتين سكان العالم يعني بتتكلم عن 7 مليار نسمة حيبقوا عايشين في مدن .. ليه؟ .. في المدن مستوي المعيشة أعلي .. في المدن الفلوس أكتر .. بس في نفس الوقت في المدن إنت بتدفع فلوس أكتر عشان تعيش كويس وده بيخلق 3 مشاكل:
- أول مشكلة إن أي إتنين متجوزين يا بيقرروا ميخلفوش .. يا بيقرروا يخلفوا طفل واحد بس بالكتير .. ليه؟ .. عشان حنجيب منين ثمن البامبرز واللبن والدكاترة؟ .. زود علي كده إن في المدن سهل علي الزوجين يلاقوا طرق منع حمل وتأجيل الإنجاب .. زود علي كده إن لو مرتب الرجل مش مكفي فالست هي كمان بتشتغل وده لوحده بيخليهم يقرروا يا يأجلوا الخلفة يا يكتفوا بطفل واحد بس.
- ثاني مشكلة هي إن الحياة في المدن لو فكرت فيها يعني حضرتك مش محتاج تخلف كتير .. في الأرياف إنت محتاج تخلف كتير عشان عيالك يساعدوك في شغل الأرض والبنات تساعد أمهم في شغل البيت .. في المدينة فعلياً يعني مفيش أي سبب منطقي يخليك تخلف أكتر من طفلين .. ده كان السبب إن في الثمانينات لما الصين قررت تلغي العمل بسياسة الطفل الواحد بدأت بالمناطق الريفية.
- ثالث مشكلة إن معدلات الوفيات في المدن أقل بكتير من الأرياف بسبب الخدمة الصحية .. ده معناه إن كتير من سكان الأرض عايشين في مدن فمش بيخلفوا كتير .. لا وكمان مش بيموتوا.
المصدر:
- مقالة بعنوان Humans Aren’t Overpopulated. We’re Aging and Shrinking نشرت في موقع Big Think وده لينك المقالة الأصلية:
https://bigthink.com/surprising-science/overpopulation
