مهم تبقي فاهم الدرس ده .. إحنا كبشر مش بنتصرف إلا لما نتلسع .. إنتي كبنت مش حتتعلمي الطبخ غير لما تتجوزي .. إنت كولد مش حتعرف ثمن كيلو الفراخ البانيه بكام غير لما تتغرب و تعيش لوحدك .. الكلام ده يمشي علي بني أدمين و يمشي علي دول كمان .. الأخطاء هي اللي بتعلم مش النجاح .. قصة النهاردة بتوريك ده كويس .. هي صحيح قصة بتدور أحداثها جوه عالم الجيوش و التسليح بس هي فيها الحكمة دي .. سنة 1980 حصل زلزل في الشرق الأوسط إسمه الثورة الإسلامية الإيرانية .. لما الثورة دي حصلت و وسط الفوضي و الدم و العنف إتحبس في السفارة الأميريكية في العاصمة طهران 52 موظف من السفارة .. اللي إتفرجوا علي فيلم Argo عارفين ده كويس .. المهم .. اللي كان بيحكم أميركا وقتها كان (جيمي كارتر Jimmy Carter) اللي الحقيقة كتير من الأمريكان كانوا شايفينه رجل طيب و إبن ناس و متربي و محدش كان شايفه بلطجي حيعرف يدير إزمة منيلة بستين نيلة زي دي .. (كارتر) في محاولة منه إنه يبقي في الشدة شديد و في القوة قوي أوي وافق إن القوات المسلحة الأميريكية تنفذ عملية عسكرية سموها مخلب النسر Operation Eagle Claw الهدف بتاعها هو تحرير 52 رهينة من جوه السفارة الأميريكية في قلب العاصمة الإيرانية طهران .. عملية عسكرية مكانها سلسلة أفلام جيمس بوند مش العالم بتاعنا .. عملية عسكرية معقدة لدرجة إن قدرات القوات المسلحة الأميريكية وقتها مكنتش تسمح إنها تقوم بيها .. حاول تستوعب النقطة دي كويس .. سنة 1980 قدرات القوات المسلحة الأميريكية بجلالة قدرها مكنتش تسمح إنها تنفذ عملية عسكرية من اللي إنت بتشوفهم هاريينا بيها في الأفلام بتاعتهم دلوقتي.
العملية لما تيجي تبص علي تفاصيلها مش حتلاقي نفسك بتقول غير هو مين السباك اللي عمل التخطيط ده .. إنت حتجيب طيارين من سلاح مشاة البحرية US Marine Corps حيطيروا بطيارات هليكوبتر تابعة لسلاح البحرية إسمها RH-53D يعني الطيارين حيكونوا أول مرة يطيروا بالطيارات دي في حياتهم بحيث اللي حينفذ العملية هم ميكس بين قوات برية مع ضباط من وكالة المخابرات المركزية الأميريكية CIA اللي هم برده عمرهم ما إشتغلوا مع بعض قبل كده .. اللي خطط للعملية قال إن عشان المهمة تنجح هم محتاجين 4 طيارات هليكوبتر .. حلو .. عشان قال يعني يأمنوا نفسهم و يبقوا في الSafe Side قالك العملية تتلغي لو أقل من 6 طيارات هليكوبتر فشلت إنها تخش المجال الجوي الإيراني .. الخطة إتعرضت علي (كارتر) اللي قال إحنا حنبعت 8 طيارات .. ليه؟ .. زيادة تأكيد .. يا تري بعد ما كنا محتاجين 4 طيارات و بعتنا 8 هل العملية نجحت؟
طيارة من الثمانية بعد ما طلعت إكتشفوا إنها بتسرب زيت هيدورليك بتاع المراوح و إضطرت ترجع .. طيارة تانية لقت نفسها دخلت في عاصفة رملية و الرملة بوظت موتورها و وقعتها .. طيارة ثالثة و هي طايرة شفرة من المروحة الرئيسية إتشرخت .. كنا رايحين بثمانية و وقعلنا في السكة ثلاثة و بقينا خمسة يعني أقل من الستة المطلوبين و العملية إتلغت .. فشل عملية مخلب النسر ده كان فضيحة ل(كارتر) .. الأمريكان الحقيقة عندهم شوية معايير غريبة جداً يعني إنت ممكن تبقي رئيس مرتشي و كذاب و إبن ستين كلب بس ينتخبوك عادي و بص علي (دونالد ترامب Donald Trump) و إنت تشوف ده بنفسك بس فيه حاجتين لو عملتهم فده كأنك بترمي الكاريير بتاعتك في الزبالة .. الأولانية إنك تفكر بنصك التحتاني و إنت رئيس و تتحرش بواحدة أو تخون مراتك و إنت في الرئاسة أو تلعب بديلك أيا كانت الطريقة و قصة الرئيس (بيل كلينتون Bill Clinton) مع (مونيكا لوينيسكي Monic Lewinski) و حتي قصة (ترامب) مع الممثلة الإباحية (ستورمي دانيالز Stormy Daniels) أكبر دليل علي ده .. الثانية إنك تبان ضعيف و مش قادر تحمي رجالتك.
الفشل ده خلي (كارتر) يخسر الإنتخابات الرئاسية قصاد (رونالد ريجان Ronald Reagan) اللي مكنش بيفهم زي (كارتر) و مكنش شاطر زي (كارتر) بس هو عرف يرسم نفسه قدام الأمريكان إن مفيش حد يقدر يتجرأ و يمد إيده علي المواطن الأميريكي طول ما (ريجان) قاعد علي الكرسي و لحد النهاردة لو حد سأل (كارتر) يا تري إنت عملت إيه غلط يوم عملية مخلب النسر ده بيرد يقول إنه كان لازم يبعت 9 طيارات مش ثمانية.
بس جوه المؤسسة العسكرية الأميريكية عملية مخلب النسر دي ورتهم حاجتين مهمين أوي:
- إحنا معندناش ما يسمي قوات خاصة تقدر تخطط و تنفذ عمليات عسكرية من اللي بيكتبها المؤلفين بتوع أفلام هوليوود .. معندناش القوات الخاصة اللي بتعمل المستحيل .. و دي كانت بداية ميلاد الكتيبة 160 إنزال جوي و إسم الشهرة بتاعهم Night Stalkers.
- إحنا معندناش الطيارات الهليكوبتر اللي تخليك تبعتها لأي حتة و إنت متطمن علي العساكر اللي فيها .. الأمريكان لقوا إن فيه طيارة مترمية في المخازن محدش بيقرب ليها و لقوا فيها كل اللي هم محتاجينه .. دي كانت الطيارة OH-6 Cayuse اللي بعد كده إتسمت MH-6 Black Bird و اللي عناصر القوات الخاصة الأميريكية بقوا بيسموها Killer Egg أو البيضة القاتلة.
هي طيارة تحسسك بإنها شبه الكيا السيراتو .. طيارة بتشيل عساكر و صواريخ و مدافع رشاشة .. هي محندقة و صغيرة فبتقدر تناور و تخمس في الشوارع ولا الموتوسيكلات .. اللي منكوا شاف فيلم Black Hawk Down و اللي بيحكي القصة الحقيقة لمعركة مقديشيو اللي حصلت في أكتوبر 1993 حيشوفها و الطيارين الأمريكان حرفياً بيعملوا بيها دريفتات في الشوارع .. لما الطيارة OH-6 Cayuse دخلت الخدمة رسمياً سنة 1963 كسرت 23 رقم قياسي عالمي .. لسنين فضلت هي أسرع طيارة هليكوبتر في السوق .. أكتر طيارة بتقدر تطير علي تفويلة بنزين واحدة .. أسرع طيارة هليكوبتر في التحليق العمودي بشكل سريع و اللي بيسموه Climb Rate .. الطيارة دي خدمت في القوات المسلحة الأميريكية لسنين كتاكسي أو أوبر لعناصر القوات الخاصة للمناطق اللي مستحيل طيارة تانية توصلها .. خدمت في الغزو الأميريكي للعراق .. خدمت في الغزو الأميريكي لجرانادا .. خدمت في الصومال .. زي ما قلت الناس اللي إتفرجت علي فيلم Black Hawk Down حيكونوا فاكرينها كويس.
المصدر:
- مقالة بعنوان MH-6: The killer egg helicopter U.S special forces love نشرت في مجلة 1945 و ده لينك المقالة الأصلية:
https://www.19fortyfive.com/2022/07/mh-6-the-killer-egg-helicopter-u-s-special-forces-love/
