لو إنت فاكر إن حياتك ملهاش لازمة عايزك دايماً تفتكر الطيارة اللي عندك دي .. خلينا نبدأ بالأساسيات .. هي طيارة روسي الروس سموها V-12 بس الأمريكان سموها هومر Homer و في حالة إنك رخم و بتسأل إشمعني هومر يعني فكل الطيارات الهلكوبتر اللي بتصنعها روسيا الأمريكان بيدوها إسم دلع بيبدأ بحرف H .. اللي عايزك تعرفه عن الطيارة دي إنها كانت معجزة هندسية ملهاش أي ستين لازمة و عشان كده أنا لازم أشرحلك كذا حاجة .. لازم أقولك هي إتعملت ليه؟ و الأهم أقولك هي مبقاش ليها لازمة ليه؟
خلينا نبدأ بالسؤال الأولاني: هي ليه إتعملت؟ .. شوف يا ريس زمان و زمان ده اللي هو في الخمسينات و الستينات يعني أيام ما كان بيحكمنا (جمال عبدالناصر) الله يرحمه كان الإتحاد السوفيتي كل يوم يعمل قاعدة إطلاق صواريخ باليستية عابرة للقارات في حتة شكل في البلد .. عشان برده تبقي عارف كلمة صاروخ باليستي عابر للقارات اللي هو Intercontinental Ballistic Missile و إختصاراً بيتسمي ICBM هو الصاروخ اللي لما بيتضرب بيطلع لفوق بره الغلاف الجوي للأرض و يطير في الفضاء شوية لحد ما يقع فوق الهدف اللي هو رايح يضربه .. المهم إن عشان تبني محطة إطلاق صواريخ زي دي محتاج حاجات كتير .. محتاج رملة و أسمنت و زلط و خلاطات و كابلات كهرباء و سياخ صلب و ألواح خشب و ليلة كبيرة أوي سعادتك و زود عليهم الصواريخ نفسها و اللي كانت زمان مينفعش تتنقل من حتة لحتة إلا بالقطر .. عشان كده السوفييت كانوا كل ما يقرروا يبنوا محطة إطلاق صواريخ باليستية يلاقوا نفسهم مضطرين يبنوا خط سكة حديد معاها .. طب إيه المشكلة؟ .. الأمريكان فهموا اللعبة و بقت أي طيارة إستطلاع من طراز U-2 كل اللي هي محتاجة تعمله تصور خطوط السكة الحديد و الأمريكان حيبقوا فاهمين إن الخط ده إتعمل عشان فيه قاعدة إطلاق صواريخ بتتبني في الحتة الفلانية.
طب و الحل؟ .. ما إنت لو مكان السوفييت حتلاقي نفسك بتقول أنا كده مفقوس .. سنة 1959 المهندسين السوفييت قالوا هو يجري حاجة لو عملنا طيارة هليكوبتر فشيخة تقدر تشيل الصواريخ الباليستية العابرة للقارات دي؟ .. فكر فيها كده .. الطيارة الهليكوبتر و هي طايرة لو إتدهنت بلون مناسب فمستحيل علي طيارة إستطلاع إنها تلقطها و بكده السوفييت مبقوش محتاجين يبنوا خطوط سكة حديد .. شفت سهلة إزاي .. سنة 1962 قيادة القوات الجوية السوفيتية بتوافق إن المشروع يبدأ يشتغل و سنة 1968 الطيارة V-12 بتنفذ أول طلعة جوية تجريبية ليها .. سنة 1971 السوفييت قدموا الطيارة لأول مرة قدام الناس في معرض باريس الجوي للطيران و اللي لما الغرب شافها فعلياً بلم قدامها.
هي صحيح مكانتش أول طيارة هليكوبتر بمروحتين تتعمل بس هي كانت أول مرة تتعمل طيارة بمروحتين جنب بعض بالعرض مش واحدة قدام و واحدة ورا .. كانت أول مرة يتشاف طيارة هليكوبتر طولها أطول من طيارة بوينج 737 بتقدر تشيل 196 بني أدم أو ما يعادل 40,000 كيلوجرام بضاعة .. الفراغ اللي بيتحط فيه الصواريخ كان عبارة عن أوضة 28×4.5 متر يعني تقدر ترص فيها أوتوبيسين نقل عام .. يا رجل إنت بتتكلم عن طيارة بيطير بيها طاقم من 6 أفراد منهم إتنين كهربائية .. بس شوف رغم كل الحاجات الجديدة في تصميمها دي كلها إلا إنها مكنش ليها أي ستين لازمة لدرجة إن السوفييت مصنعوش منها إلا طيارتين بس.
يبقي السؤال الثاني: هي ليه مكنش ليها لازمة؟ .. فيه 3 حاجات حصلوا مع بعض خلوا الطيارة دي تتفك و تتباع خردة أحسن .. أول حاجة إن الأمريكان حققوا نطة خزعبلية في تكنولوجيا الأقمار الصناعية للتجسس و فجأة مبقوش محتاجين طيارات الإستطلاع U-2 و ده كان معناه إن إذا كانت طيارات U-2 مش بتقدر تلقط الطيارة V-12 بس كاميرا القمر الصناعي تقدر تجيبها بسهولة .. ثاني حاجة إن الروس نفسهم تطوروا جداً في تصميم ICBM لدرجة إنهم قللوا من وزنها أوي بحيث بقي ينفع تتنقل من مكان لمكان علي ترلة عادية جوه حاوية من اللي بتشوفها علي أي طريق سفر فمش محتاجين لا خط سكة حديد ولا الطيارة V-12 .. ثالث حاجة و يمكن أهم نقطة هي إن طلعت تكنولوجيا جديدة إسمها MIRV و دي إختصار Multiple Independently Targetable Vehicles و دي بإختصار شديد إن بدل ما كان الصاروخ ICBM الواحد بيشيل رأس نووي يتيم فإحنا بقينا نقدر نركب كذا رأس نووي علي نفس الصاروخ .. ده معناه إن بدل ما كنا كل شوية محتاجين نبني قاعدة إطلاق صواريخ فلقينا لا هي قاعدة واحدة فيها كذا صاروخ بتكنولوجيا MIRV دي كفاية أوي.
المصدر:
مقالة بعنوانLet’s Remember the Largest Helicopter Ever, Which Was Completely Useless نشرت في مجلة Popular Mechanics و ده لينك المقالة الأصلية:
https://www.popularmechanics.com/military/aviation/a34042755/largest-helicopter-ever-soviet-v12-homer/
