الطيارات الهليكوبتر بمعناها التقليدي اللي إنت عارفه خلاص بتنتهي .. واحدة واحدة شكل الطيارة الهليكوبتر حيبدأ يتغير .. مش حتلاقيها بمروحة كبيرة أساسية و مروحة خلفية في الذيل بعد كده .. في حالة إنك مش مصدقني فإنت حتشوف ده بعنيك سنة 2030 .. في السنة دي القوات المسلحة الأميريكية حتطلع الطيارة الأسطورية UH-60 اللي إنت ممكن تكون عارفها بإسم الدلع بتاعها بلاك هوك Blackhawk علي المعاش .. الطيارة دي فعلاً ليها مكانة كبيرة أوي في قلب أي حد بيحب يعرف عن الطيارات .. هي إتصممت سنة 1974 و دخلت الخدمة لأول مرة سنة 1981 .. ده معناه إن بقالها 39 سنة شغالة .. أحدث نسخة منها إسمها UH-60M و دي فيها محركين T-700 GE-701D من تصنيع شركة جينرال إليكتريك General Electric بيخلوا الطيارة تقدر تشيل طاقم من 4 و معاهم 11 عسكري بتسليحهم و أكلهم و شربهم و هي طايرة بسرعة 277 كيلومتر في الساعة و علي فكرة علي تفويلة تانك بنزين هي تقدر تطير 510 كيلومتر مستريح .
الفكرة كلها في البديل .. مجرد إنك تبص علي الطيارتين اللي الأمريكان حيختاروا واحدة فيهم عشان تحل محل Blackhawk و إنت حتشوف إزاي إحنا داخلين علي مرحلة جديدة من فكرة هو يعني إيه طيارة هليكوبتر .. الطيارة الأولانية هي SB-1 Defiant .. كلمة Defiant يعني المتحدية و الحروف SB دي إختصار شركتي سيكورسكي Sikorsky و بوينج Boeing اللي إشتغلوا مع بعض عليها .. الطيارة تبصلها تحسها طيارة هليكوبتر بس مش أوي .. إذا كانت الطيارة Blackhawk فيها مروحة أساسية متركب فيها 5 شفرات فالطيارة SB-1 Defiant متركب فيها مروحتين أساسيتين بيلفوا عكس بعض .. إذا كانت الطيارة Black Hawk فيها مروحة خلفية بتلف عمودي زي أي طيارة هليكوبتر فتلاقي SB-1 Defiant متركب فيها مروحة خلفية بس بالعرض شبه اللي بتشوفهم في الهوفركرافت .. طب ده عطانا إيه مختلف؟ .. لو صدقت كلام شركتي سيكورسكي و بوينج فالتصميم ده بيخلي الطيارة تطير بسرعة 460 كيلومتر في الساعة يعني أكتر بحوالي 180 كيلومتر في الساعة من أقصي سرعة ممكن Blackhawk تديهالك .. و علي فكرة .. زيها زي Blackhawk فهي بتستخدم طاقم من 4 بس بتقدر تشيل 12 عسكري بكامل تسليحهم.
الطيارة الثانية هي V-280 Valor أو الشُجاعة من تصنيع شركة بيل تيكسترون Bell Textron و دي طيارة فعلاً شكلها غريب .. هي كتصميم إتبنت علي نفس الرسم بتاع طيارة تانية إسمها V-22 Osprey أو النسر و الطيارة دي الأخوة مهندسين الطيارات بيحبوا يسموا التصميم بتاعها Tiltrotor يعني جسم المروحة نفسه بيلف .. في حالة V-22 Osprey المروحتين كانوا بيلفوا 90 درجة بحيث بدل ما الطيارة بتطير كهليكوبتر فتلاقيها بتطير كطيارة عادية بجناحين و مروحتين .. الجديد في V-280 Valor إن المروحتين مش بيلفوا 90 درجة .. هم بيلفوا بزوايه أقل بكتير .. طب بالصلاة علي النبي أنا إستفدت إيه؟ .. برده لو صدقت كلام شركة بيل تريكستون اللي صنعت الطيارة فهي بتطير بسرعة بتعدي 550 كيلومتر في الساعة و ده تقريباً ضعف سرعة Blackhawk .. و مش بس كده .. إذا كانت علي تفويلة واحدة الطيارة Blackhawk بتقدر تطير 510 كيلومتر مستريح فالطيارة V-280 Valor بتقدر تديك 1280 كيلومتر .. طب أزيدك من الشعر بيت .. إذا كانت Blackhawk بتشيل طاقم من 4 و معاهم 11 عسكري فالطيارة V-280 Valor بتشيل برده طاقم من 4 بس معاهم 14 عسكري.
سنة 2022 حنعرف مين فيهم اللي حتحل محل Blachawk و لإن حتي الأمريكان عارفين إن الطيارتين مينفعش تقول عليهم طيارة هليكوبتر فإسم هليكوبتر ده أساساً حيبدأ يتلغي و يحل محله إسم تاني هو Assault Aircraft .. مش بقولك إحنا داخلين علي مرحلة جديدة.
المصدر:
مقالة بعنوان And then there were Two: Which Helo will Replace the Army’s UH-60 Blackhawk نشرت في مجلة Popular Mechanics و ده لينك المقالة الأصلية:
https://www.popularmechanics.com/military/aviation/a31706694/blackhawk-replacement-helicopter/
