إحنا من كتر كلام الأمريكان علي الطيارة F-35 و إنها الطيارة اللي مفيش زيها و إزاي هي غالية و مش أي حد حيشتريها و إن مشاكلها كتير فتخيلنا يا عيني إن الأمريكان معندهمش مصيبة منكده عليهم عيشيتهم إلا هي .. بس الحقيقة مش كده .. فيه طيارة تانية يمكن منكده علي الأمريكان و منغصة عليهم عيشيتهم أكتر من F-35 ودي تبقي الطيارة اللي عندك في الصورة.
زي ما إنت شايف دي طيارة هليكوبتر .. إسمها CH-53K و بيدلعوها يقولولها King Stallion يعني حصان الملك .. الطيارة دي اللي حيستلمها و يشتغل بيها هم قوات مشاة البحرية US Marine Corps و دي ناس شغلتها هي العمليات البرمائية يعني دي طيارة هليكوبتر معمولة عشان تحط عليها شوية عساكر و معدات و ترميهم خلف خطوط العدو و ترجع تاني .. لحد دلوقتي الكلام حلو .. حتبدأ تحس بنفس إحساس الرجل المتجوز و هو بيحاسب علي الحاجات اللي مراته إشترتها من كارفور لما تعرف إن سعر الطيارة الواحدة بيعدي 144 مليون دولار يعني أغلي من الطيارة F-35 .. مش بس كده .. الطيارة دي من تصنيع شركة إسمها سيكورسكي Sikorsky و دي شركة مملوكة لشركة تانية إسمها لوكهيد مارتن Lockheed Martin و دي اللي بتصنع الطيارة F-35 بالمناسبة .. شركة سيكورسكي سلمت الطيارة للكلاينت اللي هم قوات مشاة البحرية في مايو 2018 .. عشان التسليمة دي يتوافق عليها و سيكورسكي تاخد فلوسها لازم الطيارة CH-53K تاخد موافقة من جهة إسمها Operational Test & Evaluation Office تقدر تقول عليهم إستشاري المالك .. الناس دي لازم تدي الطيارة شهادة إسمها IOC ودي إختصار Initial Operational Capability يعني الطيارة تصميمها زي الفل بس إحنا محتاجين نجربها كتير عشان لو لا قدر الله فيه مشكلة في التصميم نلحق نعالجها .. يوم 10 يناير 2019 إتعرف إن الطيارة اللي إتسلمت عشان تاخد شهادة IOC أساساً مينفعش تاخدها لإن التصميم نفسه خربان و كله مشاكل.
عشان إنت بس لو مهندس في مكتب فني و حاسس إنك مضغوط حاول تحط نفسك في موقف الناس بتوع سيكورسكي .. دي ناس المشروع معاها من 2006 و سلموه في مايو 2018 بعد ما صرفوا عليه 31 مليار دولار و لسه الطيارة مينفعش تطير .. طبعاً إنت بتسأل هو فيه إيه؟ ماله الكاسيت لا سمح الله؟ .. في إبريل 2018 الأمريكان طلعوا تقرير قالوا فيه إن تصميم CH-53K فيه أكتر من 1000 مشكلة .. تخيل تسلم مشروع يطلعلك فيه 1000 كومنت .. من ضمن الكومنتات إن Gearbox بتاع المروحة الأساسية فيه مشاكل .. عداد السرعة بايظ .. المواتير بتسخن بسرعة .. ديل الطيارة مش متزن و بيتهز جامد كل ما السرعة تزيد .. العادم بتاع الموتور بيلف و يرجع للموتور تاني .. شركة سيكورسكي قالت إنها حتشتغل علي الكومنتات دي عشان تسلم الطيارة تاني في مايو 2020 و عليكوا خير .. فلو إنت حاسس إنك مضغوط و بتغلط كتير بسبب المشاريع الFast Track اللي إنت شغال عليها إفتكر إن أخواتك في شركة سيكورسكي اللي بيقبضوا بالدولار إنت بتطلع شغل أحسن منهم.
المصدر:
مقالة بعنوان This Helicopter is More Expensive than the F-35 (and it Has Some Big Problems) .. نشرت في مجلة The National Interest وده لينك المقالة الأصلية:
http://blog/buzz/helicopter-more-expensive-f-35-and-it-has-some-big-problems-44132
