فيه إفتكاسة عملتها القوات الجوية الأميريكية إسمها Loyal Wingman أو كلب الحراسة و عشان تفهم الإفتكاسة دي عيش معايا في السيناريو ده .. دلوقتي إنت طيار طاير بطيارتك F-35A اللي متكلفة فوق 120 مليون دولار عشان تضرب هدف معين فوق مصر مثلاً .. جه الدفاع الجوي المصري لقطك و ضرب عليك صاروخ من منظومة الدفاع الجوي S-300 .. دلوقتي الصاروخ اللي إتضرب عليك ده ثمنه تقريباً 2 مليون دولار .. إنت متخيل إن ممكن صاروخ متكلف 2 مليون دولار يوقع طيارة واقفة علي الأمريكان ب120 مليون دولار؟ .. جه الأمريكان قالوا طب ليه لا نخلي الطيارة F-35A يطير جنبها طيارة صغيرة بدون طيار Drone بحيث لو إتضرب علي الF-35A صاروخ تقوم هي تترمي قدامه و تتدمر هي بدالها.
جم قالوا طب ليه لا نخلي Drone دي شايله قنابل و صواريخ بحيث إن طيار F-35A يستخدمها و يتحكم هو فيها لو ذخيرته و صواريخه خلصت؟ .. شوية و قالوا طب ليه لا نخلي كل طيار F-35 يطير معاه سرب Drones من دول هو يقدر يتحكم فيهم و يخليهم يضحوا بنفسهم لو إتضرب عليه صواريخ و يستخدمهم في ضرب أهداف بدل ما هو يضربها و يخليهم يشتبكوا مع طيارات العدو كمان؟ .. بإختصار هم عايزين كلب جيرمان شيبارد مُدرب يطير مع كل طيارة .. لا كلب إيه قول فرقة كلاب متشرسة تهوهو و تجري علي اللي صاحبها يقولها عليه .. الفكر ده إترجم في الطيارة اللي عندك في الصورة دي .. إسمها XQ-58A بس إسمها اللي هي مشهوره به هو فالكيري Valkyrie و هي إتصنعت بالتعاون بين إدارة الأبحاث و التطوير بتاعة القوات الجوية مع شركة تصنيع Drones إسمها كراتوس Kratos Unmanned Aerial Systems.
يوم 5 مارس 2019 إتجربت الطيارة دي في أول طلعة جوية ليها مدتها 76 دقيقة ضمن 5 طلعات حيتعملوا عشان يتأكدوا إنها شغالة من غير مشاكل .. صحيح إن في المستقبل الطيارة دي مش حتطير لوحدها إنما حتطير ضمن سرب طالع مع طيار مقاتل بطيارته إلا إن في الطلعة التجريبية دي كانوا بس عايزين يتأكدوا إنها شغالة .. الطيارة Valkyrie ليها مدي طيران بيعدي 4000 كيلومتر و علي فكرة ده مدي طيران قريب أوي من الطيارة المقاتلة F-16 Fighting Falcon و أعلي من مدي الطيران بتاع الطيارة F-22 Raptor اللي أقصي مدي طيران ليها 2880 كيلومتر بس .. و إن كان الطيارة Valkyrie أقصي سرعة ليها 1000 كيلومتر في الساعة بس ده ميجيش حاجة جنب أقصي سرعة سواء للطيارة F-16 أو F-22 اللي بيوصل 2400 كيلومتر في الساعة.
دايماً بيقولوا لكل تكنولوجيا فيه تكنولوجيا مضادة بس في الحالة دي أعتقد إن بقي فيها تكنولوجيا ضد التكنولوجيا المضادة .. الفكر كان إن لو عندك منظومة دفاع جوي محترمة زي S-400 فإنت كده أمنت نفسك ضد قدرة F-35 علي التخفي من الرادار بس دلوقتي الطيارة دي ممكن يطير معاها سرب طيارات Valkyrie شايل قنابل و يرمي نفسه فوق أماكن بطاريات صواريخ الدفاع الجوي بتاعتك و بكده بقيت عريان .. و زي ما بنقول .. بلاش تنام و إنت عريان.
المصدر:
مقالة بعنوان The US Air Force’s Jet-Powered Robotic Wingman is Like Something Out of a Videogame .. نشرت في مجلة The Drive وده لينك المقالة الأصلية:
https://www.theverge.com/2019/3/9/18255358/us-air-force-xq58-a-valkyrie-prototype-robotic-loyal-wingman-drone-successful-test-flight
