و أنا في الكلية كنت دايماً بقول حاجة كانت بتزعل الدكاترة و المعيدين .. في قسم ميكانيكا هندسة إسكندرية المنهج بتاعنا متأخر تقريباً 50 سنة عن اللي بيحصل في الدنيا .. إمسك منهج أي مادة تعجبك حتلاقي المادة العلمية اللي فيه بتشرح تكنولوجيا نزلت السوق قبل علي الأقل 50 سنة من السنة اللي إنت بتدرسها فيها ومفيش حاجة تؤكد وجهة نظري دي أكتر من تعامل مش بس كلية هندسة جامعة إسكندرية إنما كليات الهندسة في مصر كلها مع فكرة العربيات اللي بالكهرباء .. عشان تبدأ تفهم أنا قصدي إيه إنت لازم تحط قدامك شوية حقايق و تبدأ تستهدي بالله في قلبك و تفكر شوية في معني الحقايق دي:
- حقيقة رقم واحد إن حكومة رئيس الوزراء البريطاني السابق (بوريس جونسون Boris Johnson) أعلنت إن مفيش عربية بمحرك إحتراق داخلي Internal Combustion Engine حتتباع في السوق بداية من سنة 2030 مع إن أغلب التوقعات كانت بتقول إن القرار ده حيتنفذ مش قبل 2040 .. ليه (بوريس جونسون) قرر ينكد علي شركات العربيات عيشتها بالشكل ده؟ .. عشان هو عايز يوصل ببريطانيا إنها توصل لما يسمي Net-Zero Carbon Emissions يعني البلد متبقاش بتطلع أي إنبعاثات ثاني أكسيد الكربون بداية من 2050 وده نفس التارجيت اللي الرئيس الأميريكي (جو بايدن Joe Biden) حطه لبلده علي فكرة.
- حقيقة رقم إثنين إن بلد زي النرويج منعرفش عنها حاجة غير إنها البلد اللي طلعت (إيرلينج هالاند Erling Halland) و لو إنتي بنت بتقري المقالة دي فحوفر عليكي مجهود إنك تعملي سيرش عليه و أقولك إنه لاعيب كورة و خلاص حتطبق نفس القرار اللي بريطانيا حتعمله في 2030 كمان 4 سنين يعني سنة 2025.
- حقيقة رقم ثلاثة إن ولاية كاليفورنيا الأميريكية و اللي عايزك تعرف إنها تبقي خامس أقوي إقتصاد علي مستوي العالم حتبدأ فعلاً تطبق قانون حظر بيع العربيات اللي شغالة بمحرك إحتراق داخلي بداية من 2035.
لحد هنا و محتوي أي بوست علي سوشيال ميديا مطلوب منه يديلك الزتونة خلص .. إنت عرفت إن بره بقوا دايسين في سكة العربيات اللي بالكهرباء بس دلوقتي إحنا عايزينك تعمل النص الثاني من الطلب اللي طلبته منك في البداية .. إنت عرفت الحقايق اللي عايزك تعرفها خلاص و دلوقتي جه وقت إنك تستهدي بالله في قلبك و تبدأ تفكر شوية في معني الحقايق دي .. حاول تفتكر إن النرويج بلد مش بتصنع عربيات .. النرويج زيها زي مصر بلد بتستورد العربيات اللي بتمشي في شوارعها فلو البلد جت قالت مفيش عربيات بمحركات إحتراق داخلي حتمشي في الشارع فالناس حتقول أمين .. ولاية كاليفورنيا هي البلد اللي طلعت منها شركة تيسلا Tesla اللي هي أكبر كيان بيصنع عربيات بالكهرباء في العالم فلما الولاية تقول إن مفيش غير العربيات اللي بالكهرباء هي اللي حتتباع ففعلياً (إيلون ماسك Elon Musk) مؤسس الشركة و مالكها حيمشي بصاجات يرقص في الشارع .. المشكلة في بلد زي بريطانيا.
بريطانيا بلد البينتلي Bentley و بلد الماكلارين McLaren و بلد الأستون مارتن Aston Martin و بلد الرولز رويس Rolls-Royce .. و عارف إيه الحاجة المشتركة بين الأسامي دي كلها؟ .. كلهم بيعملوا عربيات بتمشي بمحركات إحتراق داخلي .. المنطق بيقول إن الشركات دي تبقي عامله زي الفنان (سعيد صالح) الله يرحمه في مسرحية العيال كبرت يمشوا في الشارع و بدل ما يمسكوا صاجات و يرقصوا زي (إيلون ماسك) يصوتوا و يقولوا أحيه يا أبو سوسو أحيه بس الغريبة إن ده محصلش .. ليه؟ .. حط قدامك شوية الحقايق دول كمان:
- حقيقة رقم أربعة إن شركة ماكلارين McLaren كانت طلعت من بدري قالت إن بداية من 2021 هي مش حتنزل السوق غير العربيات الهايبرد Hybrid يعني خلاص مش حتبيع عربيات بمحركات إحتراق داخلي بعد كده وقسم محركات الإحتراق الداخلي في الشركة حيقفل سنة 2030 و الشركة مش حتبيع غير العربيات اللي بالكهرباء بداية من 2035.
- حقيقة رقم خمسة إن الCEO بتاع شركة بينتلي Bentley و إسمه (أدريان هولمارك Adrian Hallmark) قال إن شركته أساساً يعني مش حتبيع غير عربيات بالكهرباء بداية من 2030.
- حقيقة رقم خمسة إن شركة جينيرال موتورز General Motors و اللي صحيح هي أميريكية مش بريطانية بس هي بتصنع عربيات عادية مش سوبر كارز زي شركات العربيات البريطاني اللي قلت أساميها قررت تسبق حتي الحكومة الأميريكية و أعلنت في يناير 2021 إنها حتبطل تبيع عربيات مش بس بمحركات إحتراق داخلي إنما كمان العربيات Hybrid و إنها بداية من 2035 مش حتبيع غير عربيات بالكهرباء.
ده معناه إن شركات العربيات اللي بره واخده بالها من الخازوق و إحنا عايشين في اللالاند .. الناس دي شافت مبيعات العربيات اللي بالكهرباء بتزيد ولا معدل إنتشار مطاعم الفراخ البروستد .. شافوا إزاي إن شركات العربيات اللي بالكهرباء كل شوية تنزل موديلات جديدة زي ما مطاعم الفراخ البروستد بقت كل شوية تهبد في نوع جديد من الساندوتشات واللي غالباً بتكون ملهاش طعم .. الأهم إن شركات العربيات شافت النطات اللي بتحصل في تكنولوجيا البطاريات الكهرباء و إزاي مدي رحلات العربيات اللي بالكهرباء عمال كل يوم بيزيد .. الناس دي شافت كل ده و حست إن القطر جاي عليهم و قرروا يلحقوا نفسهم و إحنا زي ما قلت في البداية مش حنفكر ندرس منهج العربيات اللي بالكهرباء للطلبة إلا بعد 50 سنة من سنة 2035.
المصدر:
- مقالة بعنوان The Gas Engine is Dead. Welcome to the Electric Revolution نشرت في موقع Robb Report وده لينك المقالة الأصلية:
https://robbreport.com/motors/cars/gas-engines-dead-1234603086/
