العربيات اللي بالكهربا .. مصلحتك أولاً.

لو أنا جيت سألتك تفتكر إيه السبب في إن إحنا كلنا كده مش بنركب عربيات بالكهرباء؟ ردك حيكون إيه؟ .. ناس كتير حيكون رأيها السعر .. عشان نقيسها صح تعالي نتخيل للحظة معلش إن إحنا عايشين بره مصر .. دلوقتي لو أنا جيت قارنت بين سعر عربية بالكهرباء مع سعر عربية بنفس إمكانياتها بس بموتور إحتراق داخلي فإنت حتلاقي سعر العربية اللي بالكهربا أغلي بحوالي 12,500-19,000 دولار زيادة .. زي ما قلتلك أسعار العربيات في مصر ما أنزل الله بها من سلطان فمتحاولش إنك تقارن سعر عربية Tesla Model S في مصر بعربية بموتور إحتراق داخلي بنفس إمكانياتها .. بس خلينا نتفق إن إذا كان صحيح إنت كمستهلك مش حتصرف علي العربية اللي بالكهرباء زي ما إنت بتصرف علي عربيتك اللي بموتور إحتراق داخلي بس إنت حتدفعلك مبلغ يعورك في الأول .. عشان إنت بني أدم كيوريوس و مخك شغال و عايز تفهم هي الحاجة جت منين حتسأل طب ليه؟ .. ليه أنا أكع الكعة دي في الأول كده؟

الحقيقة إن الإجابة حاجتين .. الحاجة الأولانية هي إن شركات العربيات اللي بالكهرباء كعت كعة أكبر منك بكتير عشان تصرف علي البحث و التطوير أو Research & Development اللي إنت عارفها باسمها السيكسي أكتر R&D فهي بتحاول تعوض اللي هي دفعته .. السبب الثاني حضرتك هو البطارية.

بما إني في الأول خالص قلتلك تعالي نتخيل إننا عايشين بره مصر فتعالي نغمض عنينا و نحلم إننا عايشين في إنجلترا .. في بلاد الإنجليز لو إنت حبيت تشتري عربية Tesla Model S Long Range فإنت حتلاقي نفسك بتدفع كاش علي الطرابيزة 98,000 دولار قصاد إن يبقي تحت إيدك عربية بتمشي 610 كيلومتر علي الشحنة الواحدة يعني توديك من القاهرة لإسكندرية تفسحك هناك و ترجعك تاني .. يا بلاش .. عشان العربية دي تعمل كده فهي محطوطلها بطاريات ليثيوم أيون Lithium ion بقدرة إجمالية 100 كيلووات ساعة .. الليثيوم أيون دي مادة بتتصنع من معدن الكوبالت و ده من المعادن اللي ربنا خلقها في الأرض و إحنا كبشر بننقب عنها و فيه مناجم بتطلع كوبالت هي دي بتكون مصدر بطاريات اللثيوم أيون اللي بتلاقيها في السوق .. حضرتك حتقول لنفسك أكيد الناس دي بتستغفلني .. هي يعني البطاريات دي غالية أوي كده؟

عشان ترضي شخصية المنوفي اللي جواك بتروح السبتية بتاعة إنجلترا و ده مصنع بيبيع بطاريات كهرباء بتاعة عربيات مستعملة في ويلز اسمه Electric Classic Cars و لما تروح هناك حيتقالك إن البطارية المستعملة قدرة 5.3 كيلوات ساعة ثمنها 1,800 دولار .. يعني إنت محتاج عشرين بطارية عشان تجيب ال100 كيلوات ساعة .. يعني بتتكلم إنك حتصرف علي البطاريات بس 36,000 دولار .. يعني 37% من ثمن العربية الTesla Model S بالتقريب كده رايح في بطاريتها بس .. و متفتكرش إن ده قاصر علي العربيات بتاعة Tesla .. العربية Nissan Leaf البطارية 40 كيلوات ساعة بتاعتها ثمنها معدي 12,500 دولار .. بإختصار بناء علي تقرير طالع من مؤسسة بلومبيرج Bloomberg ففي سنة 2020 في المتوسط كده يعني ثمن بطاريات العربية الكهرباء حيبقي 30% من سعر العربية.

الجديد بقي إن إخواتنا في شركة Tesla بقالهم فترة شغالين مع شركة اسمها CATL عشان يعملوا بطارية ليثيوم أيون برده بس مصنوعة من الفوسفات مش من الكوبالت .. أكيد بتسأل هو يعني إيه الفرق؟ .. الفرق سيدي المواطن المنوفي في الفلوس .. سنة 2010 كان الكيلوات ساعة الواحد اللي بتيدهولك بطاريات الليثيوم أيون المتصنعة من الكوبالت سعره 1000 دولار .. سنة 2015 السعر ده قل بقي 381 دولار .. إحنا بقينا في 2020 أهو و السعر وصل 147 دولار لكل كيلووات ساعة و هي دي المشكلة إن بطاريات الكوبالت جابت أخرها خلاص .. سعرها مش حينفع يقل أكتر من كده و ده اللي بطاريات الفوسفات حتقدر تيدهولك .. الناس دي بتتكلم إن سعر الكيلوات ساعة بتاع بطاريات الفوسفات حيوصل 100 دولار و لو ده حصل فسعر كيلومتر العربية اللي بالكهرباء حيبقي أرخص من سعر الكيلومتر بتاع العربية اللي فيها محرك إحتراق داخلي .. الناس دي بتقول إن سنة 2030 و عليك خير سعر الكيلووات ساعة بتاعة بطاريات الليثيوم أيون المتصنعة من الفوسفات حيبقي 61 دولار .. اللي هو حقاً و صدقاً يعني يا بلاش.

لو إنت من المحاظيظ في الأرض اللي عندهم عربية Tesla Model S فإنت رجل البطارية بتاعة عربيتك بتمشيك 610 كيلومتر علي الشحنة الواحدة زي ما قلنا .. لو إنت رجل مهم و مشاوريك كتير و بتقطعلك في اليوم 120 كيلومتر فإنت في خمس أيام شغل في الأسبوع حتخلص شحن العربية .. حيتقالك إن البطاريات بتاعة عربية معاليك ممكن تشحنها ما بين 1000-1,500 مرة يعني لو حتشحنها مرة في الإسبوع فالبطاريات دي حتعيش معاك 25 سنة مستريح .. مفيش موتور إحتراق داخلي بيمشي 610 كيلومتر في الأسبوع و يعيش معاك 25 سنة .. مستحيل .. طب إيه رأيك بقي إن بطاريات الفوسفات اللي Tesla شغالة عليها دي بتقدر تشحنها 4,000 مرة .. يعني تقدر تعيش معاك 75 سنة .. أرجع و أقولك إنه حقاً و صدقاً يا بلاش.

المصدر:

مقالة بعنوان Tesla’s Shift to Cobalt-Free Batteries Is Its Most Important Move Yet نشرت في مجلة Forbes و ده لينك المقالة الأصلية:
https://www.forbes.com/sites/jamesmorris/2020/07/11/teslas-shift-to-cobalt-free-batteries-is-its-most-important-move-yet/?sh=33f012a446b4