ناس كتير إتريقت علي توتنهام لإنهم تخيلوا إنهم يقدروا ياخدوا (بابلو ديبالا Pablo Dybala) من يوفينتوس و الحقيقة انا فاهم الناس إتريقت ليه أصل الموضوع مغري جداً للسف الصراحة .. بس لو انت ناوي تكمل سف علي الفراخ فأحب بس أقولك إن الفراخ عملوا كذا صفقة محترمة جداً .. جابوا جناح صغير في السن اللي هو (ريان سيسجنون Ryan Sessegnon) و جابوا خط النص الأرجنتيني (جيوفاني لو سيلسو Giovani Lo Celso) و قبليهم دفعوا 65 مليون جنيه إسترليني عشان يشتروا حيطة في خط النص إسمه (تانجاي إندومبيلي Tanguy Ndombele) فخلي بالك إن الفراخ السنة دي ناويين يكاكوا كتير.
عاجبني أوي الدماغ اللي ماسكه فرقة وولفرهامبتون .. انا كنت إتكلمت عنهم قبل كده و قلت إنك خلال السنين الجاية حتلاقيهم بينافسوا علي المراكز المؤهلة للبطولات الأوروبية و انا فاكر إن ناس كتير إستغربت و انا مقدر إستغرابكوا الحقيقة .. هجوم وولفرهامبتون السنة دي خلي بالك منه لإنه حيتكون من المكسيكي (راؤول خيمينيز Raul Jiminez) و معاهم (باتريك كوترون Patrick Cutrone) و اللي في حالة إنك بتشبه علي إسمه فأيوه ده المهاجم اللي كان بيلعب في AC Milan .. تحس إن وولفرهامبتون سمعوا إن فيه أوفر في كارفور إيطاليا لإنهم كمان جابوا الجناح (بيدرو نيتو Pedro Neto) و خط النص (برونو خواردو Bruno Juardo) من فرقة لاتسيو و دافعين فيهم 18 مليون جنيه إسترليني بس .. فلو انت بتشجع مانشستر يونايتد أو أرسنال فخلي بالك وولفرهامبتون كانوا في المركز السابع السنة اللي فاتت و ناويين علي السادس أو الخامس السنة دي.
أكتر حد انا متعاطف معاه جداً هو (وليفريد زاها Wilfred Zaha) .. تخيل نفسك شغال في شركة و انت عارف إن قدراتك تخليك تروح شركة أكبر و يجيلك Offer من شركة كبيرة و متروحش عشان الشركة تحت بير السلم اللي انت ماضي معاها عقد مرضتش تسيبك .. أرسنال فضلوا يتحايلوا علي كريستال بالاس إنهم ياخدوه لحد ما زهقوا و راحوا إشتروا (نيكولاس بيبي Nicolas Pepe) مكانه .. جم إيفرتون قالوا عايزينه فإتقال إن كريستال بالاس عايزين فيه 80 مليون جنيه إسترليني .. ليه يعني؟ .. حتي لما (زاها) قدم طلب رسمي إنه يمشي إدارة النادي قالتله خش يا عبد يا بنجالي انت كمل شغل و لما الكفيل يحب يبيعك حيبيعك .. فدلوقتي لو انت مكان (زاها) فانت قاعد في نادي انت مش عايز تلعب فيه وسط زمايل شايفينك عالة عليهم و بيتفرج عليك جمهور بيشتم فيك ليل نهار .. الله يكون في عونك يا إبني.
كلمتين بس في حق ليفربول .. صحيح أنتوا حافظتوا علي الفرقة اللي كسبت Champions League .. بس انتوا مصرفتوش غير 1.3 مليون جنيه إسترليني عشان تجيبوا قلب دفاع ناشيء اللي هو (سيب فان دين بيرج Sepp van den Berg) .. الأندية الكبيرة اللي عندها طموح بتشوف دايماً إزاي تبقي أقوي مش إزاي تفضل علي حالها .. لإذا كان ليفربول حاطط هدف قصاد عينه إنه يكسب الدوري من السيتي فكان المفروض يشوفوا إزاي يعملوا صفقات تخليهم فرقة سوري في الكلمة فشيخة لإن حتي السيتي اللي عندهم فرقة مفيهاش غلطة إشتروا خط النص (رودري Rodri) و المدافع (جواو كانسيلو Joao Cencelo).
قلبي معاك يا (فرانك لامبارد Frank Lampard) .. انت ماسك تشيلسي و انت مش عارف تشتري حد عشان العقوبة اللي إتوقعت علي النادي و مكنش قدامك غير إنك يدوبك تحول صفقة (ماتيو كوفاسيتش Mateo Kovacic) من إعارة لإنتقال دايم مع إنه يعني معملش حاجة تخليك تشتريه بس مش مشكلة أهو أحسن من مفيش .. إن (إيدن هازارد Eden Hazard) يمشي فدي كانت حاجة صعبة بس جماهير تشيلسي كانت فرحانة له و كان كل أملهم ان الفرقة متخسرش حد أكتر من كده لحد ما جه (ديفيد لويز David Luiz) و غفل جمهور تشيلسي و راح أرسنال .. دلوقتي (لامبارد) عنده مشكلة حقيقية في قلب الدفاع .. حالياً هو معندوش غير إتنين اللي هم (كورت زوما Kurt Zouma) و (أندرياس كريستانسين Andreas Christensen) لإن (أنتونيو روديجير Antonio Rudiger) مصاب و الله أعلم حيرجع إمتي و ده وضع مش كويس لفرقة بتخطط إنها تبقي من الأربعة الأوائل.
المصدر:
مقالة بعنوان Arsenal are full of optimism again but it couldn’t have gone much worse for Wilfred Zaha. The Winners and Losers of the Transfer Window .. نشرت في جريدة The Daily Mail و ده لينك المقالة الأصلية:
https://www.dailymail.co.uk/sport/football/article-7338041/Arsenal-turned-Zaha-nightmare-winners-losers-transfer-window.html
