في منهج تاريخ الحضارة الفرعونية اللي خدناها في المدرسة كان فيه جزء مخصوص لاحتلال الهكسوس لمصر .. اللي خدناه في المدرسة ان الهكسوس دول شعب كانوا عايشين في الحتة اللي انت عارفها دلوقتي باسم سوريا وجم احتلوا الوجه البحري من مصر تقريبا سنة 1800 قبل الميلاد لحد ما جه الملك (أحمس) وقدر يوحد مصر كلها تاني .. ده اللي احنا خدناه في التاريخ وهو ان الهكسوس قوة احتلال خارجي لمصر .. احتلال حكم مصر 100 سنة جه بثقافته اللي كانت مختلفة كتير عن الثقافة المصرية سواء في الاسامي او في طريقة اللبس .. بس افرض لو الهكسوس مكانوش قوة احتلال .. افرض لو كان انقلاب؟
سنة 1940 علماء اثار اكتشفوا عاصمة الهكسوس في مصر .. المدينة اسمها افاريس Avaris ودلوقتي انت ممكن تزورها في نفسك في حتة اسمها تل الضبعة يدوبك 7 كيلومتر من مدينة فاقوس في محافظة الشرقية .. مؤخرا فيه فريق من علماء الاثار بقيادة دكتورة اسمها (كريس ستانتيس Chris Stantis) من جامعة بورنموث في انجلترا بدأوا يدرسوا رفات ناس اتدفنت في المدينة دي .. ومش بيدرسوا اي حتة من الرفات .. بيدرسوا الاسنان .. بما ان الاسنان بتاعة البني ادمين بتبدأ تتكون واحنا لسه صغيرين فالفكرة هي انك تجيب المينا بتاعة الاسنان لاي بني ادم و تقيس فيها نسبة النظائر المشعة لمعدن اسمه سترونشيوم Strontium .. ده معدن طبيعي ربنا خالقه في التربة وبما ان احنا غالبا بناكل خضار وفاكهة مزروعة في الارض فانت كل اللي انت محتاج تعمله انك تقيس نسبة السترونشيوم في الاسنان بتاعة الاسنان للبني ادم المدفون و تقارنها بنسبة السترونشيوم في التربة بتاعة المكان اللي الانسان اتدفن فيه وتقدر تعرف هو البني ادم اتولد و اتدفن في نفس البلد ولا هو اتولد في حتة و اتدفن في حتة تانية خالص؟
الفريق بتاع الدكتورة (كريس ستانتيس Chris Stantis) فحصوا رفات 36 هيكل عظمي اتدفنوا في مدينة افاريس بحيث خلي بالك من الحتة دي .. احنا متؤكدين ان الناس دي كلها ماتت خلال ال350 سنة اللي قبل سنة 1800 قبل الميلاد .. بمعني ان الناس دي احنا متؤكدين انهم ماتوا قبل السنة اللي الهكسوس سيطروا فيها علي شمال مصر .. الفريق بتاع الدكتورة (كريس ستانتيس Chris Stantis) لقوا ان 24 بني ادم من ال36 اتولدوا بره مصر .. ده معناه ان مدينة افاريس اللي بقت بعد كده عاصمة الهكسوس كانت بتستقبل عدد كبير جدا من المهاجرين او اللاجئين اللي هربوا من حتت مختلفة وجم عاشوا في مصر واستغلوا حالة الضعف السياسي لفراعنة مصر في الوقت ده و ثاروا عليهم و حكموا هم.
من الاخر النظرية بتاعة الدكتورة (كريس ستانتيس Chris Stantis) هي ان الهكسوس لما جم مصر كان من ضمنهم بني اسرائيل و فضلوا عايشين في البلد و استغلوا حالة الضعف السياسي بانهم هم اللي سيطروا علي شمال مصر و حكموه لحد ما راح منهم الحكم و اتقلب بيهم الحال لحد ما جه سيدنا (موسي) عليه السلام طلعهم بره مصر.
المصدر:
مقالة بعنوان ‘Invasion’ of ancient Egypt may have actually been immigrant uprising نشرت في مجلة Science Magazine وده لينك المقالة الاصلية:
https://www.sciencemag.org/news/2020/07/invasion-ancient-egypt-may-have-actually-been-immigrant-uprising
