أليكسيس سانشيز .. الفلوس مش بنلاقيها علي الشجر.

أمي كانت دايماً و أنا صغير لما أشبط في حاجة غالية تقولي جملة لحد دلوقتي مسمعة في دماغي .. الفلوس مش بنلاقيها علي الشجر .. فعلاً أي حد فينا بيشتغل بيتعب عشان الفلوس .. و ده مخليني زي أي مواطن غلبان كادح بيجري علي أكل عيشه أبص علي بني أدم زي (أليكسيس سانشيز Alexis Sanchez) و أقول لنفسي فعلاً ربك بيوزع الأرزاق و أكيد له حكمة في كده .. سيك من إن (سانشيز) لاعيب كورة .. لنفترض إنه مهندس راح إشتغل في شركة المفروض إنه بياخد مرتب علي أساس الشغل اللي هو بيعمله .. سنة 2018 هو كان متقدمله أوفرين واحد من مانشستر يونايتد و الثاني من مانشستر سيتي بس Offer بتاع مانشستر يونايتد كان مغري جداً لدرجة إن حد عبيط بس كان ممكن يرفضه .. بإختصار شديد لما (سانشيز) راح من أرسنال لمانشستر يونايتد إتقاله إن المرتب اللي هو حياخده 560,000 جنيه إسترليني في الإسبوع .. هو شاب طموح و شايف شغله كويس و الشركات بتجري وراه و ربنا يزيده من نعيمه و يرزقنا معاه .. زي أي حد فينا بيجيله Offer في شركة تعالي مع بعض نفصص الفلوس اللي هو حياخدها:

مرتبه الأساسي 300,000 جنيه إسترليني .. ربنا يزيد و يبارك .. زود عليهم 100,000 جنيه إسترليني حقوق رعاية لإن طبعاً لما يتصور بتي- شيرت مانشستر يونايتد ده لوحده بفلوس .. حلو .. زود عليهم 21,370 جنيه إسترليني في الإسبوع لوكيل أعماله .. يا سيدي من جاور السعيد يسعد هو كمان ..  المكافئات و التأمين حتخلي مرتبه شاكب راكب في الإسبوع 560,000 جنيه إسترليني .. عشان البرنس زي ما حنشوف كمان شوية مكنش بيحقق التارجت بتاعه من الماتشات اللي المفروض يلعبها فكان مرتبه صافي في الإسبوع 505,000 جنيه إسترليني .. إيه بقي حكاية التارجت دي؟ .. الباشمهندس لعب مع مانشستر يونايتد 45 ماتش جاب فيهم 5 جوان بس .. إنت بتتكلم عن لاعيب بيجيب جون كل 555 دقيقة  .. بحسبة بسيطة البيه كل جون بيجيبه كان واقف علي النادي بتاعه ب8 مليون جنيه إسترليني .. من ساعة ما اللي أمه دعياله ده جه النادي و هو مصروف عليه 41 مليون جنيه إسترليني مرتبات بس يعني بعد كل ماتش بيلعبه بياخد في إيده 911,111 جنيه إسترليني .. اللهم لا حسد اللهم لا حسد.

مانشستر يونايتد حيموتوا و يمشوه لدرجة إن خلال مفاوضاتهم مع إنترميلان الإيطالي عشان ياخدوه إعارة عرضوا عليهم إنهم حيدفعوله نص مرتبه في النادي الإيطالي بس يمشي .. فيه أسباب كتير ورا إن ليه (سانشيز) مستواه زفت كده مع مانشستر يونايتد .. فيه ناس حتقولك الإصابات .. ناس حتقول ثقته في نفسه إتهزت .. ناس حتقول إن (جوزيه مورينيو Jose Mourinhu) في الفترة اللي مسك فيها النادي عقده من الكورة .. ناس حتقول إن المدير الفني الحالي (أولي جونار سولشاير Ole Gunnar Solskjaer) معرفش يطلع أحسن ما عنده .. مش حتفرق .. اللي حيفرق إن (سانشيز) محتاج يقف علي رجله و بسرعة لو راح إنترميلان .. هو حيلعب جنب حد هو عارفه كويس اللي هو (روميلو لوكاكو Romelu Lukaku) و حيلعب تحت إيد مدرب تقيل زي (أنتونيو كونتي Antonio Conte) .. ربنا معاك يا (سانشيز) و معلش لو الناس حسدتك أصل معلش عندهم حق.

المصدر:
مقالة بعنوان The Incredible Money Manchester United Poured Down the Drain as Alexis Sanchez Heads to Inter Milan .. نشرت في جريدة The Daily Mail وده لينك المقالة الأصلية:
https://www.dailymail.co.uk/sport/football/article-7375233/The-incredible-money-Manchester-United-poured-drain-Alexis-Sanchez-heads-Inter-Milan.html