إيه سي ميلان .. مشكلة التجديد ثلاثية الأبعاد اللي قدام الإدارة.

أي حد بيتفرج علي ماتشات الدوري الإيطالي عارف إن فرقة إيه سي ميلان AC Milan بتعمل عظمة الموسم ده .. مشكلة إنك تستوعب إنجاز تعمله أي فرقة كورة إن لازم يتحطلك الإنجاز ده في سياق إنت تقدر منه تستوعبه .. يعني مثلاً .. أنا ممكن أقولك إن الموسم ده الدوري الإيطالي إتلعب منه 16 جولة من أصل 38 يعني تقريباً نص الدوري خلص ومن أول الدوري لحد دلوقتي وفرقة ميلان متصدرة الجدول .. لحد هنا جميل وهيييييه وعاد مرعب أوروبا وكل الكلام اللطيف ده بس برده إنت مش حتقدر تستوعب إزاي دي حاجة فشيخة إلا لما تستوعب اللي حيتقالك دلوقتي .. أخر مرة حصل إن ميلان يتصدر الدوري لأكتر من 15 جولة كان من عشر سنين .. في العشر سنين دول عدي علي ميلان سبع مديرين فينيين .. في العشر سنين دول عدي علي ميلان أربع مديرين نشاط كرة قدم .. في العشر سنين دول مسك ميلان إتنين مُلاك .. حاجات كتير فشخ حصلت في ميلان في العشر سنين دول .. يعني مثلاً .. اللي بيملك ميلان دلوقتي هي شركة استثمارات إسمها Elliot Management .. الشركة دي أساساً مسكت النادي لإن اللي كان بيملك النادي قبلهم كان رجل أعمال صيني إسمه (لي يونج-هونج Li Yonghong) والرجل ده استلف 325 ميلون دولار من شركة Elliot Management ومعرفش يسددهم وعشان كده الشركة خدت منه النادي .. شركة Elliot Management مشتغلتش قبل كده في إدارة الأندية ومتعرفش عنها حاجة وده في حد ذاته مش عيب .. اللي عجبني إنهم جابوا حد بيفهم تحت شعار إدي العيش لخبازه ودي قاعدة للأسف ناس كتير في البيزنس بقت بتنسي تطبقها عشان بقوا بيمشوا بشعار (حزلقوم) في فيلم لا تراجع ولا استسلام القبضة الدامية لما قال مش لما أجرب ألاقي نفسي بعرف .. الشركة جابت رجل إسمه (إيفان جازيديس Ivan Gazidis) وده كان رئيس مجلس إدارة نادي أرسنال وقالوله تعالي شيل الليلة في ميلان.

الحقيقة إن الناس بتوع Elliot Management عجبوني أوي في إختيارهم ل(إيفان جازيديس) .. ميلان دلوقتي نادي إتحمل بديون وصلت 500 مليون دولار في أخر 3 مواسم .. بس في نفس الوقت هم عايزينه يبقي نادي بينافس .. طبيعي إنك تقول معلش يعني أطبخي يا جارية كلف يا سيدي .. حنافس إزاي وأنا مش معايا فلوس أصرفها؟ .. الحل إنك تعمل زي ما (إيفان جازيديس) عمل في أرسنال .. تشتري لاعيبة صغيرة في السن برخص التراب بس تكون لاعيبة مستقبلها حلو وتبيعها وتكسب فيها قرشين حلوين .. لحد دلوقتي إنت متقدرش تقول إن الطريقة دي مش جايبة نتيجة مع ميلان لإن ببساطة بص علي جدول ترتيب الدوري الإيطالي وإنت تتأكد .. المشكلة إن إدارة ميلان دلوقتي عندها مشكلة غريبة ومش بتحصل كتير وعشان كده أنا عايز أقف قدامها شوية .. المشكلة إن فيه 3 لاعيبة أساسيين في الفرقة علي أخر الموسم ده عقدهم حيخلص .. الثلاثة في أخر 6 شهور في عقدهم .. الثلاثة في معدلات أعمار مختلفة .. الثلاثة بيلعبوا في مراكز مختلفة .. الثلاثة لازم تبص ليهم كل واحد لوحدة تدرس حالته وتحط نفسك مكان إدارة ميلان وتسأل نفسك .. يا تري أجدد عقده ولا أقوله الباب يفوت جمل؟

اللاعيب الأول هو (جيان لويجي دوناروما Gianluigi Donnarumma):

علي الورق المفروض إن التجديد ل(دوناروما) ميبقاش مشكلة .. ده إبن النادي .. من وعنده 16 سنة هو أساسي في ميلان .. من وعنده 17 سنة وهو بيلعب في منتخب إيطاليا .. تخيل إن عنده 21 سنة ولعب لحد دلوقتي 224 ماتش مع ميلان .. عشان بس أحطك في الصورة .. (باولو مالديني Paolo Maldini) أسطورة ميلان وصل للماتش رقم 224 مع ميلان وهو عنده 23 سنة .. (دوناروما) حارس كبير ولسه قدامه وقت يكبر ويتعلم أكتر عشان كده بقولك علي الورق المفروض التجديد ليه ميبقاش مشكلة .. في صيف 2017 ميلان جدد عقده مع (دوناروما) واللي كان وقتها يدوبك عنده 18 سنة والعقد ده خلاه ثالث أعلي مرتب علي مستوي العالم ياخده حارس مرمي .. إحنا دلوقتي في 2020 و(دوناروما) حالياً هو خامس أعلي حارس مرمي علي مستوي العالم من حيث المرتب .. طبيعي إن إدارة ميلان لما تيجي تقعد مع (دوناروما) عشان تجدد عقده يعرضوا عليه مرتب أعلي بكتير من اللي هو بياخده دلوقتي .. زود علي كده حتة إن وكيله هو (مينو رايولا Mino Raiola) أكتر وكيل لاعبين حراق في العالم دلوقتي حتكتشف إنك لو مكان إدارة ميلان إنك مش عارف تجدد عقد (دوناروما) لسبب بسيط جداً وهو إن مفيش فلوس .. فيروس كورونا خرب بيت الأندية ويكفي إني أقولك إن أندية أوروبا بس الموسم ده خسايرها وصلت 4.2 مليار دولار.

علي إيدك اليمين (دوناروما) يقدر يطلب اللي هو عايزه لإنه لاعيب مهم في الفرقة وتخيل غضب الجماهير لما تعرف إن الإدارة مرضتش تجدد لإبن النادي عشان الفلوس رغم إنه عايز يقعد .. علي إيدك الشمال الإدارة هي كمان تقدر تلوي دراع (دوناروما) .. معلش يعني إنت عشان تروح نادي تاني فإنت حتطلب مش أقل من 20 مليون دولار في السنة مرتب وده معناه إن الأندية اللي تقدر تدفعلك المبلغ ده تتعد علي الصوابع وبسم الله ما شاء الله لاجل حظك يعني ولا واحد فيهم عنده مشكلة في حراسة المرمي .. معلش يعني فرقة زي يوفينتوس معاها فلوس وتقدر تدفع 20 مليون دولار في السنة مرتب بس ما هم عندهم (فوسيتشي تشيزني Wojciech Szczesny) والإحتياطي بتاعه (جيان لويجي بوفون Gianluigi Buffon) .. باريس سانجيرمان عندهم (كيلور نافاس Keylor Navas) .. الحل اللي ممكن يرضي جميع الأطراف إن (مينو رايولا) يوافق يجدد عقد (دوناروما) بزيادة بسيطة في المرتب بس قصاد إن يتكتب شرط جزائي في عقده بحيث إن المبلغ ده يكون صحيح كبير يدخل فلوس لخزنة النادي بس مش كبير أوي زي ما ميلان كان بيفكر يطلبه.

(جيان لويجي دوناروما) حارس مرمي ميلان ويمكن من أحسن خمس حراس مرمي علي مستوي العالم دلوقتي بس مشكلته من وجهة نظر ناديه إن وكيل أعماله (مينو رايولا) أكتر وكيل لاعبين حراق ومغلاوي في سعره.

اللاعيب الثاني هو (هاكان كالاهونجلو Hakan Calhanoglu):

من ساعة ما الواد اللي محدش عارف ينطق إسمه صح ده جه ميلان سنة 2017 وهو بيلعب أساسي بس مكنش اللاعيب اللي حتحس بفرق بين إنه في الملعب أو قاعد علي الدكة .. فضل حاله كده لحد ما جه (ستيفانو بيولي Stefano Pioli) المدير الفني الحالي لميلان مسك الفرقة كحل مؤقت في نص موسم 2019-2020 ومن ساعتها و (هاكان) مستواه عمال يعلي ويعلي .. خلينا نبقي صريحيين وأمناء مع نفسنا للحظة .. (هاكان) حالياً هو خامس أعلي مرتب في ميلان وبياخد في السنة حوالي 6 مليون دولار .. العدل بيقول إنه لما يتجدد عقده لازم مرتبه يزيد لإنك حتي لو سبته يمشي كلاعيب حر كمان 6 شهور فهو بسهولة أوي يقدر يلاقي نادي يديله 8 مليون دولار في السنة .. بس في نفس الوقت لازم برده نفهم حاجة … (هاكان) لاعيب مهم في فرقة كبيرة بتلعب في دوري كبير بس هو بقاله سنين ملعبش في دوري أبطال أوروبا .. حتي منتخبه تركيا مش أملة أوي في أوروبا دلوقتي ومعملش معاهم أي إنجاز يستحق إننا نتكلم عنه .. إنت دلوقتي جزء من كيان بيكبر كل يوم ولو مش عاجبك الباب يفوت جمل .. حتروح فين؟ مانشستر يوتايتد؟ .. تفتكر إنك حتلعب أساسي علي (برونو فيرنانديز Bruno Fernandez)؟ .. يا تفضل في ميلان ضامن مركزك ومتقدر يا تروح نادي كبير في دوري كبير والله أعلم حتشمها أصلاً أو لا .. الحل اللي أنا شايفة إن الإدارة تعرض عليه مرتب أعلي سيكا ولو مش عاجبه يروح يشوف مستقبله في حتة تانية.

(هاكان كالاهونجلو) من يوم ما جه ميلان في 2017 وإحنا بنقول عليه لاعيب كويس .. هو صحيح مش أحسن حاجة في الدنيا بس أهو شغال.

اللاعيب الثالث هو (زلاتان إبراهيموفيتش Zlatan Ibrahimovic):

ده بقي حالة مختلفة خالص عن الإتنين اللي قبل كده .. هو جه في موسم 2019-2020 في وقت الفرقة كانت في قعر الكنيف .. وقتها مفيش محلل رياضي إلا وهزق الإدارة ومسح بكرامتها الأرض علي إنها جابت لاعيب بقي عنده 40 سنة في أكتوبر 2020 وخلته صاحب أعلي مرتب في الفرقة كلها .. بس لما الدوري الإيطالي رجع بعد الحظر بتاع فيروس كورونا وأرقام (زلاتان) في 2020 تحطها في عين أي حد من اللي كان بيتريق علي النادي لما جابوه .. في 20 ماتش في الدوري لحد دلوقتي جاب 24 جون .. ومش بس جوانه .. شخصيته في أوضة اللبس .. نفوذه وسط اللاعيبة .. إن يبقي عندك مثل أعلي اللاعيبة الصغيرة تبصله وتتعلم منه .. من نوفمبر 2020 وهو مبيلعبش بسبب الإصابة بس الفرقة موقعتش وهو مش موجود ودي أكتر حاجة مخلية إدارة النادي مش مستعجلة إنها تجدد عقده .. غالباً الإدارة مستنيه إنه يرجع من الإصابة وتشوف مستواه .. لو لسه فيه الرمق ممكن يجددوله بس حتي لو جددوله هل من المنطق والحكمة إن لاعيب عنده 40 سنة ياخد أعلي مرتب في الفرقة؟ .. ولو مستواه مكنش قد كده لما يرجع من الإصابة حيتقاله مع ألف سلامة.