إحنا كجماهير كورة بنحب أوي نزيط .. هي عادة بنت كلب فينا بس إحنا بنحبها .. كل نادي و ليه الزياطين بتوعه و ده مقبول بس هي الفكرة إن أحياناً أنا بصفتي زياط بس مليش نادي معين بشجعه فده بيديني زي ما تقول كده ما يسمي بالزياط المحايد .. طبعاً إنت مش فاهم أنا بقول إيه فخليني أديلك مثال .. مانشستر يونايتد .. أكتر إسم إرتبط الزياط بيه مع الكيان الكبير اللي إسمه مانشستر يونايتد هو بلا منازع طيب الذكر (كريستيانو رونالدو) .. جزء كبير من ده في رأيي هو تأثير السوشيال ميديا علي مشجعين الكورة يعني مثلاً أنا من الجيل اللي ماتش الفاينال بتاع التشامبيونز ليج كنا بنتفرج عليه علي القناة الثانية الأرضية اللي أساساً كتير من شباب الجيل ده عمره ما فتحها يتفرج عليها .. إحنا الجيل اللي عاش يعني إيه الدوري الإيطالي يبقي جاحد لدرجة إن يوفينتوس و إيه سي ميلان يلاعبوا بعض في نهائي التشامبيونز لييج .. جيل اليومين دول بالنسبة ليه الدوري الإيطالي هو يوفينتوس .. تقوله إن روما زمان كان فرقة بتدوس علي وش أي حد يفتكر إنك بتضحك عليه.
المهم .. خلينا نرجع للمفهوم بتاع الزياط .. أنا شخصياً من الزياطين بتوع السير (أليكس فيرجسون) ربنا يديله الصحة .. العيال بتوع اليومين دول اللي يقولك يعني هو السير جاب كام بطولة تشامبيونز لييج ده ملوش غير إنك تطبطب عليه و تقوله معلش بكره تكبر و تنضج و تفهم يعني إيه كرة قدم .. و بصفتي من الزياطين بتوع السير (أليكس) فأنا الحقيقة من عشاق العلاقة اللي كانت بينه و بين مسمار خط النص (بارك جي سونج Park Ji-Sung).
معلومة رقم واحد .. في الفترة من 2005 لحد 2012 لما اليونايتد كان بينيم فرق أنجلترا كلها من المغرب مكنش فيه حد يعرف لاعيب من منتخب كوريا الجنوبية غير (بارك جي سونج) .. بإختصار هو كان (هيونج مين سون) بتاع زمان .. معلومة رقم إتنين إن ده كان من أكتر اللاعيبة ال Underrated يعني اللي مش واخدة حقها في تاريخ اللعبة و صدقني دي مش مبالغة .. هو مكنش رجله تتلم في حرير زي (رايان جيجز) .. مكنش لاعيب خط نص هداف زي (بول سكولز) .. مكنش بيشوط فاولات زي (ديفيد بيكهام) .. هو كان بيعمل التاسكات اللي ولا واحد فيهم بيعرف يعملها .. يبقي كلب حراسة .. و خليني أحكيلك موقف محدد في الكاريير المذهلة للرجل ده عشان تفهم أنا قصدي إيه.
كان يا مكان في موسم 2009-2010 جري الشريط لماتش الذهاب و العودة من دور ال16 لبطولة التشامبيونز لييج و القرعة توقع مانشستر يونايتد قصاد إيه سي ميلان .. ماتش الذهاب كان في إيطاليا علي ملعب السان سيرو و قبل الماتش بيحكي (بارك جي سونج) إن السير (أليكس) قاله إنت وظيفتك في الماتش ده إنك متلمسش الكورة و متمررش الكورة لحد .. وظيفتك في الماتش ده هي إنك تفضل لازق في (أندريا بيرلو) .. تسعين دقيقة كاملة و نفس (بارك) في قفا (بيرلو) .. ماتش الذهاب خلص 3-2 لصالح اليونايتد و الحقيقة إن الخطة دي مشيت زي الفل لدرجة إن السير (أليكس) عملها هي هي في ماتش العودة و اليونايتد كسب 4-0 .. إنت متخيل إن 180 دقيقة و (بارك) حاطط (بيرلو) في جيبه؟ .. مين في تشكيلة اليونايتد من الفطاحل اللي في الفرقة اللي كل مشجعي اليونايتد ممكن يزيط تشجيعاً ليهم كان مستعد يعمل الوظيفة دي؟ .. الحقيقة إن اللي حصل في الماتشين دول إتكلم عنهم (بيرلو) في الكتاب بتاعه اللي بيحكي فيه قصة حياته و إسمه Penso Quindi Gioco يعني أنا بشغل مخي قبل ما ألعب و خليني أنقلك نصاً اللي كتبه (بيرلو) عن اللي عمله فيه (بارك):
“سمعة السير (أليكس) في رأيي زي الألماظ بس يمكن المرة الوحيدة اللي سمعته فيه إتوسخت كان بسببي .. ده كان في اليوم اللي هو طلق فيه (بارك جي سونج) عليا عشان يراقبني مان-تو-مان .. (بارك) كان كل ما يلاقيني إستلمت الكورة يجري عليا بسرعة الأليكترون اللي بيلف حول الذرة يخبط فيا أو يحاول يكعبلني عشان يخوفني .. كانت عينه بتبص علي الكورة بس مش بيشغل نفسه هي رايحة فين .. زي ما يكون السير (أليكس) برمجه عشان يراقبني بس و الحقيقة إن عجبني أوي إخلاصه و تفانيه في المهمة اللي السير (أليكس) حطهاله .. عجبني إن (بارك) رغم إنه لاعيب مشهور و يمكن هو أشهر لاعيب في كوريا الجنوبية بس هو مكنش عنده أي مشكلة إنه يبقي كلب الحراسة عليا”
يمكن عشان كده لما في مرة (جاري نيفيل) كابتن فرقة مانشستر يونايتد وقت ما كان بيدربهم السير (أليكس) من كام شهر و بعد سنين من بعد ما الإتنين بطلوا كورة (جاري نيفيل) سأل السير عن يمكن أكبر غلطة هو عملها في الكاريير بتاعته كمدير فني فكان رد السير إن في نهائي التشامبيونز لييج ضد برشلونة سنة 2011 كان المفروض يعمل نفس الحركة و في الشوط الثاني يخلي (بارك) يراقب (ليونيل ميسي) مان-تو-مان .. تخيل بس لو كان ده حصل .. يمكن كان (بارك) حط (ميسي) في جيبه؟ ولا أنا كده بزيط أوفر؟ .. بس ده يوريك حجم الثقة اللي السير (أليكس) كان حاططها في (بارك).
المصدر:
مقالة بعنوان Park Ji-Sung man-marked Andrea Pirlo for 180 minutes during Man Utd vs AC Milan نشرت في موقع Give me Sport و ده لينك المقالة الأصلية:
https://www.givemesport.com/1770299-park-jisung-manmarked-andrea-pirlo-for-180-minutes-during-man-utd-vs-ac-milan
